"Умиление" Смоленская

От юности сосуд избранен был еси/ и в житии Богу послужил еси,/ иноков наставниче Иннокентие,/ потщался еси хуждшее покорити лучшему,/ темже и страсти умертвив,/ возвысился еси к зрению красоты несозданныя,/ в Бозе Емуже предстоиши,/ моли, отче, Христа Бога/ спастися душам нашим.

От юности своей весь Богу поработился еси, блаженне,/ Того ради любве отечество и род оставил еси,/ и, в пустыню вселився,/ в ней жестокое житие показал еси,/ и чудес дарования от Господа приял еси,/ преподобне Иннокентие,/ моли Христа Бога спастися душам нашим.

Мира и сродник удалився,/ в пустыни неустанною молитвою Богу угодил еси/ и в подвизе жития, отче, просиял еси,/ поминай нас, чтущих усердно память твою, да зовем ти:/ радуйся, Иннокентие преподобне.

Отечества, преподобне, удалився/ и вселився в пустыню,/ тамо жестокое житие показал еси и многих людей житием своим удивил еси./ Помилуй нас, чтущих память твою, да зовем ти:/ радуйся, преподобне Иннокентие, отче наш.

Блаженная мати Софие,/ нетлением мощей и чудес сиянием почти тя Бог;/ поминающе твое праведное житие,/ тя молим испросити/ телесем нашим здравие и душам спасение.

Богорадованная Владычице,/ Препрославленная Мати щедрот и человеколюбия,/ Всемилостивая о всем мире Ходатаице!/ Прилежно, рабы Твои, к Божественному предстательству прибегающе/ и пречудному образу Твоему со умилением припадающе, молимся:/ молитву теплую к Сыну Твоему и Богу нашему сотвори,/ о Всепетая Царице Богородице,/ да всяких болезней и печалей нас Тебе ради избавит/ и от грехов всяких свободит,/ Царствия Своего Небеснаго наследники ны покажет,/ велие бо неизреченное, яко Мати, имаши дерзновение к Нему/ и вся можеши,/ Едина во веки Преблагословенная.

К Богородице со умилением припадем/ вси, грехами обремененнии,/ чудотворную икону умиления облобызающе/ и вопиюще со слезами:/ Владычице, приими моление недостойных раб Твоих/ и подаждь нам, просящим,/ велию Твою милость.

Днесь, вернии, преславно ликовствуем, память преподобныя Вассы совершающе, и раце мощей ея умильно покланяющеся, со слезами и любовию вопием ей: буди ходатаица наша пред Богом, огради молитвами твоими обитель и град наш, в скорбех и печалех нам буди утешительница, ты бо еси крепость верным, и обители Псково-Печерския украшение.

Память преподобныя Вассы днесь светло совершающе, благодарственне воспоминаем многотрудныя подвиги, естество бо женское отвергши, со супружником твоим устремися к монашескому житию, да нетленными венцы венчает тя Христос.