Кондак 1

Возбранный чудотворче и скорый в скорбех помощниче, святителю отче Иннокентие, яко имея велие дерзновение пред Господем, от всяких нас бед свобождай, да с радостию зовем ти:

Радуйся, Иннокентие, молитвенниче о душах наших.

Икос 1

Ангельскому жительству на небесех поревновал еси, отче: по имени бо и житие твое непорочно бысть на земли, сего ради и возвысился еси до лицезрения Творца Ангелов. Отнюдуже призирая выну на град сей и люди, услыши нас, похвальная восписующих ти сия:

Радуйся, невинностию Агнца непорочнаго подражатель бывый;

Радуйся, воздержанием твоим ангельское во плоти житие явивый.

Радуйся, яко ангел, Сибирския церкве Божия дела возвещаяй;

Радуйся, яко архистратиг силы небесныя, всех прибегающих к тебе от бед сохраняяй.

Радуйся, непорочности и невинности соименный учителю;

Радуйся, незлобия и чистоты усердный хранителю.

Радуйся, убеленный невинностию крине райскаго прозябения;

Радуйся, умащенная чистотою маслина небеснаго благословения.

Радуйся, уме небесных неизреченных благ наслаждаяйся;

Радуйся, пастырю, с мудрыми в радость Пастыреначальника своего вшедый.

Радуйся, яко свет лица Божия ясно на небеси смотряеши;

Радуйся, яко тем же светом осиянный, притекающих к тебе неизреченно возвеселяеши.

Радуйся, Иннокентие, молитвенниче о душах наших.

Кондак 2

Ведый Господь велика тя быти светильника во стране языков, благоволи сокрыти род и отечество твое, да явишися в земли Хинстей, якоже Мелхиседек в Ханаанстей, и увериши, яко не от человек пришел еси к нам, но от Бога, Ему же поем: Аллилуиа.

Икос 2

Разум просвещенный хотя имети, богомудре отче, от юности избрал еси в место образования своего матерь градов православныя веры нашея и подвижничества, да живя среди земных ангелов и взирая на скончание жительства их, подражатель явишися вере их; темже и сам соделался еси небесным человеком. Сего ради слышиши от нас сия:

Радуйся, винограде многоплодный, в благораствореннем юзе возрасший;

Радуйся, цвете благовонный, в Малей России процветший.

Радуйся, славо и удобрение града Киева;

Радуйся, красото и утешение отцев Печерския лавры.

Радуйся, яко измлада мудрости прилежа, Божественное писание ясне извыкл еси;

Радуйся, яко отложив вся мирския сласти, Христов ярем носити изволил еси.

Радуйся, в юности посвятивый в жертву приятну Господу себе самаго;

Радуйся, сохранивый невредно целомудрие девства драгаго.

Радуйся, яко в земнем училищи небесныя премудрости учивый;

Радуйся, яко щитом веры вся разжженныя лукаваго стрелы угасивый.

Радуйся, яко издетска Бога возлюбивый;

Радуйся, яко заповедий Его неложный хранитель бывый.

Радуйся, Иннокентие, молитвенниче о душах наших.

Кондак 3

Силою свыше позна тогда благоверный царь непорочное и святое жительство твое, отче Божий, иже и избра тя во апостольское служение и предпосла, яко первенца духовнаго сыноположения, насаждати святую веру в земли языков чуждих, неведущих пети Богу: Аллилуиа.

Икос 3

Имеет тебе, святителю отче Иннокентие, вся страна Сибирская велика учителя и дивна в вере наставника; сего ради, яко добляго поборника верным и скораго молитвенника тя чтуще, с веселием и радостию дары тебе приносим таковыя: Рaдyйcя, священная главо, разума водами напояема;

Радуйся, плод благоуханен житием твоим от юности являяй.

Радуйся, искоренителю терновнаго служения идольскаго;

Радуйся, насадителю лозы православныя веры.

Радуйся, новый апостоле, облагоухавый верою последния концы России;

Радуйся, добрый пастырю, утвердивый красныя ноги своя на востоце царства Сибири.

Радуйся, мрачныя страны просветителю;

Радуйся, душевныя темноты озарителю.

Радуйся, врагов веры Христовы разрушителю;

Радуйся, прельстителей душ христианских разителю.

Радуйся, идолослужительных старец мудрость посрамивый;

Радуйся, мудрых века сего мудрейший.

Радуйся, Иннокентие, молитвенниче о душах наших.

Кондак 4

Буря злобы древляго змия обуя царство хинов, егда не можаху отверзти ушеса ко глаголом Царствия Христова, тобою, новый апостоле, возвещаемым, и не хотяху прияти тя, вторицею на пределех их явльшася, да умудриши я воспевати единому Богу: Аллилуиа.

Икос 4

Слышаще и ведуще тя премудра учителя и истиннаго сказателя таин Божиих, прихождаху к тебе не точию старцы, но и юнии, в нихже разум напечатлевал еси древния истины Евангельския, сего ради яко пастыря, просветителя и отца нашего ублажающе, зовем ти:

Радуйся, рабе благий и делателю добрый;

Радуйся, искоренителю злых и прогонителю нечестия бодрый.

Радуйся, яко сугубу мзду небесную сугуба ради путешествия к хином приял еси;

Радуйся, яко сподобился еси восприяти чудес дар и славы венец пресветел.

Радуйся, апостолу Павлу в подвизех служения своего подражавый;

Радуйся, терпению его в научении безкнижных юношей последовавый.

Радуйся, яко на пажити веры правыя и при источнице воды живыя люди твоя паствил еси;

Радуйся, яко на злаце красне пребыти твоему стаду мудре наставил еси.

Радуйся, светильниче всесветлый и вселюбимый:

Радуйся, паче звезд яснейший и вожделеннейший.

Радуйся, винограда животнаго святопрозябший грозд, вино искапающий;

Радуйся, святопомазанная главо, честный наш учителю.

Радуйся, Иннокентие, молитвенниче о душах наших.

Кондак 5

Боготочный источник превеликих чудес явился еси в земли нашей, достославно отче, приял бо еси, еще на земли ти жившу, власть недуги изцеляти, по смерти же наипаче прослави тя Бог многими чудотвореньми, да вси чудодействующему тобою Богу вопием: Аллилуиа.

Икос 5

Видевше жителие Иркутстии святую церковь, в нейже почиваше нетленное и цельбоносное тело твое, угодниче Божий, яко вторую купину в пламени сущу, силою же твоих молитв невредно сохраненную, прославиша Бога; темже и мы, видяще оную доныне целу, благолепну и яве поведающую знамения и чудеса твоя, воспеваем тебе сице:

Радуйся, всю страну Сибирскую удививый чудесы, имиже обитель твоя освятися;

Радуйся, оруженосец духовный, имже всяка злая страсть и болезнь от верных прогонится.

Радуйся, яко излиянием чудес от Бога обогатился еси;

Радуйся, яко неоскудный источник изцелений явился еси.

Радуйся, яко стаду твоему помощь и заступление даваеши;

Радуйся, яко чудес сиянии паству твою просвещаеши.

Радуйся, невредимо от огня сохранивый церковь, в нейже, жив сый, воздевал еси о спасении людий преподобныя руце свои;

Радуйся, яко стаду твоему помощь и заступление дававши;

Радуйся, яко чудес сиянии паству твою просвещаеши.

Радуйся, невредимо от огня сохранивый церковь, в нейже, жив сый, воздевал еси о спасении людий преподобныя руце свои;

Радуйся, явственно тем свидетельствовавый, яко свято бысть почивавшее в ней нетленное тело твое.

Радуйся, всем безпомощным приятное попечение;

Радуйся, коеяждо немощи скорый и безмездный врачу.

Радуйся, яко и всяк благопотребен дар от Господа просящим подаваеши;

Радуйся, яко прославляяй тя чудесы Бог тобою всех к Себе призывает.

Радуйся, Иннокентие, молитвенниче о душах наших.

Кондак 6

Словеса апостольская, еже молитися о спасении паствы твоея, яко иерарх во ушию своею прием, не точию в жизни, но и по преставлении являешися священнодействитель Божественных тайн, уверяя верующих в непрестаннем ходатайстве о требующих твоея помощи и воспевающих Богу: Аллилуиа.

Икос 6

Возсиял еси пречудно, архиерею Божий, егда вторицею явивыйся зельне страждущему, ударив в пол жезлом, язвою на древе того места уврачевал еси душевную язву омраченнаго неверием; абие бо позна тя быти благодатнаго врача и славя тя, вопияше:

Радуйся, иерарше благий и верный;

Радуйся, делателю неутомимый винограда Христова.

Радуйся, служителю Господень, о верных умоляяй;

Радуйся, наставниче, грешных к небеси направляяй.

Радуйся, таин Божиих истинный строителю;

Радуйся, молитвенных рук непрестанный воздевателю.

Радуйся, яко избавляеши от неверия;

Радуйся, яко изцеляеши от малодушия.

Радуйся, укрепление мудростию блaгoдyшия;

Радуйся, просвещение светлостию благочестия.

Радуйся, премудрый проповедателю;

Радуйся, пресладкий обличителю.

Радуйся, Иннокентие, молитвенниче о душах наших.

Кондак 7

Хотяще некогда сановитии града сего в неподобное время видети и любопытною десницею осязати нетлением уже процветавшия святыя мощи твоя, святителю Христов, потщашася прикрыти дерзновение свое благословением архипастыря: но ты, чистоты любителю и веры рачителю, не восхотел еси явити себе им, научая тем не высокомудрствовати, но в смиренномудрии пети Богу: Аллилуиа.

Икос 7

Новое и преславное чудо показа нам тобою на земли всех чудес Творец и Владыка, егда тебе ради пременишася естества уставы; среди бо лета и зноя мраз и иней явистася при цельбоноснем гробе твоем, еже знамением бысть, яко аще и умерл еси на земли плотию, но душою в вышнем селении всегда жив сый, теплым своим ходатайством пособствуеши вопиющим тебе:

Радуйся, смиренномудрия столпе необоримый;

Радуйся, презренную гордость низлагаяй.

Радуйся, любящия чистоту душ соблюдаяй;

Радуйся, грешных к покаянию воззываяй.

Радуйся, делателю чудес многославных;

Радуйся, ходатаю и подателю дарований многоразличных.

Радуйся, заблуждших и ослепленных наставниче;

Радуйся, любопытных и маловерных обличителю.

Радуйся, яко славу земную в уметы вменил еси;

Радуйся, яко честь Бога Вышняго всем сердцем взыскал еси.

Радуйся, имже о силе Божией естества уставы пременяются;

Радуйся, имже помыслы злобнии прогоняются.

Радуйся, Иннокентие, молитвенниче о душах наших.

Кондак 8

Странно бе видети, како три по естеству мощная животная, силою, данною ти свыше, обезсилеша, яко не можаху довлещи до обители твоея единаго путника из жителей града сего, вразумляюща тем, якоже древле осля Валаама, да не идет в дальнюю страну, не прияв от тебе путеваго напутствия, абие же, воспомянув отложенный обет свой, позна тя скорого помощника и возопи: Аллилуиа.

Икос 8

Весь всего себе исполнив любве нелицемерныя к пастве своей, был еси скорый помощник призывающим тя в помощь, святителю отче Иннокентие: не точию бо близ притекающих к раце мощей твоих, но и далече отстоящих и призывающих имя твое изцеляеши от всякия болезни. За таковое убо врачевание приими от нас похвалы сия:

Радуйся, цельбы исполнь явивыйся алавастре, яко люди Христовы ароматствуеши твоими изцелении;

Радуйся, ароматный фиале, чудесы удивляя, нарда пистика многоценный.

Радуйся, источниче, благодать изцелений изливающий нам от всечестныя раки твоея независтно.

Радуйся, яко тело твое трудолюбное вместо мастей нам во гробе оставил еси истощати изцеления.

Радуйся, яко твоими молитвами слепии прозреша.

Радуйся, яко твоим ходатайством хромии и безногии ходити начаша.

Радуйся, яко твоим заступлением разслабленнии изцелеша;

Радуйся, яко твоим предстательством от неизцельныя огневичныя болезни здрави быша.

Радуйся, покрытых струпами, яко прокаженных, уврачевавый;

Радуйся, впадших в лихорадочныя и трясавичныя язи возставивый.

Радуйся, яко лишенных смысла здравым умом снабдеваеши;

Радуйся, яко от страха и мечтаний томимых свобождаеши.

Радуйся, Иннокентие, молитвенниче о душах наших.

Кондак 9

Всякия скорби и горькая испытания терпеливно подъял еси, отче, яко добр воин Христов, ово терпя наветы от клеветников злых, ово же препирался с полчищем неверных и суеверных и ово искушаем от древляго змия, уязвлявшаго тя за жертвы своя, из челюстей его тобою исхищаемыя, но вся сия побеждая за возлюбившаго тя Христа, немолчно воспевал еси Ему: Аллилуиа.

Икос 9

Витийство человеческое изнемогает изрещи вся скорби, лишения, уничижения, болезни и страдания, яже ради спасения паствы твоея, святе Иннокентие, подъял еси. Темже терпению твоему точию дивящеся и любовию побеждаеми, с благодарным чувствием вопием:

Радуйся, воине Христов непобедимый;

Радуйся, твердейший адаманте, в терпении невредимый.

Радуйся, яко ярость неблагомыслящих, гневающихся неправедне, претерпел еси;

Радуйся, яко превозносящияся злочестивым шатанием паки люте сокрушаемы видел еси.

Радуйся, жестоких и злокозненных владык укрощение;

Радуйся, угнетенных и страждущих рабов скорое заступление.

Радуйся, яко корения заблуждений и терние неверия трудолюбне исторгал еси;

Радуйся, яко Божественных повелений насаждения в сердцах верных многими труды возделовал еси.

Радуйся, смирением своим диавола победивый;

Радуйся, молитвою и бденным стоянием плоть свою умертвивый.

Радуйся, яко красныя твои нозе добльственне к борению со врагами простерл еси;

Радуйся, яко добре течение совершив, ко Христу восхождение обрел еси.

Радуйся, Иннокентие, молитвенниче о душах наших.

Кондак 10

Спасения ради от ослепления старцу, очима тяжко видящу, получити же зрение хотящу и с верою о сем у тебе помощи просящу, скоро притекл еси, святче, в храмину того, идеже егда прикоснулся еси болезненней главе его, абие ощути он свет во очию своею и прозре, хваля тя и вопия Богу: Аллилуиа.

Икос 10

Стену крепкую и ограждение необоримое от всех скорбей и зол имеет тя, пастырю благий, страна сия: твоим бо сильным заступлением и предстательством доныне град сей и обитель твоя сохраняются в мире и благоденствии. И мы убо, спасаемии тобою, благодарственно вопием ти:

Радуйся, чаша, елей милости к нам Божия содержащая;

Радуйся, горо, Божественнаго на нас гнева тучи отводящая.

Радуйся, яко потоки мира к нам приводиши;

Радуйся, яко обилие благ ходатайствуеши.

Радуйся, милости превеликия и скорбным сострадания сокровище;

Радуйся, пространное Божияго о пастве твоей промышления приятелище.

Радуйся, в печалех сущим увеселение;

Радуйся, удрученных попечении житейскими утешение.

Радуйся, в деторождении матерем скорый помощниче:

Радуйся, в час кончины молитвенный наш предстателю.

Радуйся, о милости и мире паствы твоея известный рачителю;

Радуйся, отче честный, от всякаго зла и бедствия усердный наш хранителю.

Радуйся, Иннокентие, молитвенниче о душах наших.

Кондак 11

Пение всеумиленное и моление теплое пред нетленными мощами твоими, единым от боляр приносимое тебе, не презрел еси, отче, но скоро услышав и во сне явлься, облегчил еси болезни и страдания его, сице и наших молениий и пений гласы услыши, иерарше Христов, вере же и любви людий твоих вонми и свыше покров твой даруй хвалящим тя и поющим Богу: Аллилуиа.

Икос 11

Светосиятельна тя светильника, чрез седмьдесят и три лета сокрываема в земли не восхоте Господь оставити под спудом, еже исполнитися речению Его, аки светильник на свещник поставляют, да входящии видят свет. Темже и мы во храме сем и всюду, яко тя зряще и тобою просвещаеми, дерзаем глаголати сия:

Радуйся, светлое на тверди церковной светило и Сибирския страны славо;

Радуйся, церквей строителю и обогатителю чудесы тех нескудный.

Радуйся, пресветлая красото святыя обители сея;

Радуйся, блестящая заре избраннаго тобою града сего.

Радуйся, свещниче всезлатый и многоценный;

Радуйся, бисере предрагий небесный.

Радуйся, облакообразный покрове, на теснем пути спасения нас осеняющий;

Радуйся, огневидный столпе, в нощи неведения и заблуждений нас просвещающий.

Радуйся, яко святынею твоею всех требующих помощи твоея освящаеши;

Радуйся, яко блистанием чудес твоих во вся концы страны сея сияеши.

Радуйся, яко и по преставлении твоем с нами пребываеши;

Радуйся, яко, и живя в селениих райских, нас не оставляеши.

Радуйся, Иннокентие, молитвенниче о душах наших.

Кондак 12

Благодать свыше с небесе подаждь, преблаженне отче, с верою и благоговением воспоминающим честное твое успение и пресветлое пренесение святых мощей твоих празднующим; имаши бо дарованную ти от Бога силу и власть подавати требующим вся, яже ко спасению прошения, и ныне предстоя Престолу Божественному, моли о тебе воспевающих: Аллилуиа.

Икос 12

Поюще твое ходатайство и сильное заступление просящим твоея скорыя помощи, восхваляем подателя всех благих Бога, даровавшаго в последняя времена стране сей тебе, отца нашего чудотворца, молитвенника и заступника, ты же не возгнушайся нас, грешных и недостойных рабов Его, но услыши хвалебными гласы вопиющих тебе:

Радуйся, суетства привременнаго к буияго воистинну обличителю;

Радуйся, апостолом равноревностный Евангельским научением.

Радуйся, мучеников сострадальче и красото;

Радуйся, первопастырю и учителю христоименитых людий земли сея.

Радуйся, церковное украшение;

Радуйся, архиереев доброто, священников и иноков похвало.

Радуйся, яко приял еси трудов твоих воздаяние;

Радуйся, крестоносному народу нашему похвало и утверждение.

Радуйся, телес наших неусыпное хранение;

Радуйся, и душ наших к Царствию Небесному возведение.

Радуйся, Богу совершенне и всецеле угодивый;

Радуйся, венец безсмертия навеки получивый.

Радуйся, Иннокентие, молитвенниче о душах наших.

Кондак 13

О предивный чудотворче и преславный угодниче Христов Иннокентие! Вонми гласу молений наших, от сокрушеннаго сердца к тебе возносимому, и богоприятным твоим ходатайством испроси нам от Христа Бога нашего прощение прегрешений наших, ослабу и избавление от врагов видимых и невидимых, и от всякия скорби, беды и напастей, да с тобою и со всеми святыми в селении праведных сподобимся пети Ему: Аллилуиа.

(Этот кондак читается трижды, затем икос 1 и кондак 1)

Молитва первая святителю Иннокентию, чудотворцу Иркутскому

К тебе, святче Божий, яко к скорому помощнику и молитвеннику о спасении моем, аз недостойный и грешный припадая молюся: не презри мене унылаго, немощнаго, во многая беззакония впадшаго, и по вся дни и часы согрешающаго, но вонми души моей, яко скорблю, и умоли Господа Бога всея твари Содетеля, Емуже ныне предстоиши в радости святых и с лики ангелов, помиловати мя и извести из темницы греховныя душу мою, прежде даже не отъиду отсюду и ктому не уготов явлюся на суд Его. Ей, отче! не посрами мене, к тебе с верою притекающаго, аще бо и недостоин есмь твоего ходатайства и заступления, но ты, быв подражатель человеколюбия Божия, сотвори мя достойна чрез обращение от злых дел к благому житию, да тако душею и телом здрав быв, славлю и пою дивнаго во святых Своих Бога нашего и твое теплое заступление, всегда, ныне и присно, и во веки веков. Аминь.

Молитва вторая святителю Иннокентию, чудотворцу Иркутскому

Святителю, отче Иннокентие! Призри на нас, раб Божиих (имена), и на приход (дом) сей; моли Христа Бога, да низпослет нам Духа Своего Святаго дар, во еже умудрити нас ходити пред Ним во всяком благочестии и чистоте. Мы присно заблуждаем от пути спасения: руководи нас, милостивый наш наставниче. Мы немощни есмы в вере: утверди нас, правоверия учителю. Мы зело убози сотворихомся добрых дел: обогати нас, благосердия сокровище. Мы присно наветуеми есмы от враг, видимых и невидимых, и озлобляеми: помози нам, безпомощных заступниче; да славословяще имя Божие во дни и в нощи, сподобимся быти наследницы и жизни вечныя, и прославим Отца и Сына и Святаго Духа, ныне и присно, и во веки веков.

Молитва третья святителю Иннокентию, чудотворцу Иркутскому

Святче Божий, пастырю добрый, делателю верный винограда Христова, святителю отче Иннокентие! Призри на град сей и на люди сия! Моли Христа Бога, да сохранит паству твою от волков, губящих ю; да ниспослет Духа Своего Святаго во еже умудрити нас ходити пред Ним во всяком благочестии и чистоте во вся дни живота нашего, да славословяще Имя Его Всесвятое во дни и в нощи, сподобимся быти наследницы жизни вечныя, и прославим Отца, и Сына, и Святаго Духа, ныне и присно и во веки веков. Аминь.

 

Пе́снь 1.

Ирмо́с: Истря́сшему в мо́ри мучи́тельство фарао́не, и Изра́иля су́шею наста́вльшему, пои́м Христу́: я́ко просла́вися во ве́ки.

Иера́рше непоро́чне, при́зри с Небесе́ и ви́ждь, и посети́ осене́нием твои́м виногра́д се́й, его́же насади́ десни́ца твоя́ во стране́ язы́ков, да просла́вим благогове́йно чудеса́ твоя́, а́ще и невозмо́жно е́сть исчи́слити я́.

На пути́ иногда́ вразумля́ше Валаа́ма осли́ца, да не и́дет проклина́ти Изра́иля, его́же и благослови́ прише́дый от Месопота́мии; си́це утомле́нными ко́ньми вразумле́н бы́сть преогорче́нный пу́тник, да возда́ст святи́телю Инноке́нтию сла́ву, е́юже обеща́ся.

Но́г боле́знию, и разслабле́нием все́х чле́нов неду́гующему, яви́лся еси́ ско́рый цели́тель, о́тче на́ш Инноке́нтие, не пре́зри у́бо и ны́не с ве́рою притека́ющих к живоно́сным и присноцеле́бным моще́м твои́м.

Богоро́дичен: Отцу́ Собезнача́льнаго Сы́на пло́тию родила́ еси́, Пренепоро́чная Де́во, Его́же моли́ со святи́телем, да сотвори́т ны́ сы́ны Своего́ Ца́рствия, и насле́дники обетова́ния ве́чнаго.

Пе́снь 3.

Ирмо́с: Утверди́ на́ш у́м и сердца́, Небеса́ сло́вом утвержде́й, во е́же пе́ти и сла́вити Тя́, во спасе́ние ду́ш на́ших.

Купину́ втору́ю показа́л еси́, слове́сный па́стырю, егда́ моли́твами твои́ми сохрани́л еси́ посреде́ пла́мене невреди́му святу́ю це́рковь, в не́йже почива́ше не у́ просла́вленное на земли́, но с Небесе́ оби́лием чудотворе́ний я́вственно свиде́тельствованное свя́то бы́ти нетле́нное те́ло твое́.

Еди́ней ве́ре досту́пен яви́лся еси́, непоро́чне: те́мже с премене́нием естества́ уста́вов, мра́з и и́ней сокры́ша чистоту́ твою́ от оче́с нечи́стых, дерзну́вших в неве́рии ви́дети тя́, и́мже не да́л еси́ узре́ти сла́вы твоея́, поуча́я ны́ чи́стым се́рдцем тебе́ сла́вити.

На по́мощь ско́ро прите́кл еси́ к ста́рцу, очи́ма тя́жко ви́дящему, и прикосну́вся боле́зненней главе́ его́, яви́л еси́ на не́м дела́ Бо́жия; просвети́ у́бо и на́ша душе́вныя о́чи моли́твами твои́ми, священнонача́льниче.

Богоро́дичен: Тве́рдое и непрело́жное упова́ние ве́мы Тя́, Богоро́дице, его́же держи́мся, и упова́юще мо́лимся: сохрани́ гра́д се́й, и вся́ гра́ды и страны́ христиа́нския от все́х бе́д, находя́щих челове́ком согреша́ющим, но а́бие моли́твами Твои́ми прие́млющим согреше́ний оставле́ние.

Седа́лен, гла́с 3:

Тако́в на́м подоба́ше архиере́й, преподо́бен, незло́бив, кро́ток, отлуче́н от гре́шник, и́же пред ве́чным Архиере́ем, Иису́с Христо́м, мо́лится вы́ну о спасе́нии ста́да своего́: мно́го бо мо́жет моли́тва пра́веднаго, поспешеству́ема во благо́е.

Сла́ва: Прото́ржеся вода́ в пусты́ни, исто́чник исцеле́ний истека́ет от неистле́нных моще́й святи́теля Инноке́нтия, ра́дость ве́чная над главо́ю его́, ея́же да сподо́бимся и мы́ моли́твами его́, в невече́рнем дни́ воскресе́ния.

И ны́не: О Тебе́, Отрокови́це, возгласи́ проро́к, глаго́ля: се́ врата́ восто́ка, и бу́дут затворе́на, и никто́же про́йдет сквозе́ я́: но Госпо́дь Бо́г еди́н про́йдет, и бу́дут врата́ затворе́на.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Иису́с в дому́ Петро́ве прикосну́ся руце́ те́щи его́, огне́м жего́мыя, и а́бие оста́ви ю́ о́гнь; сия́ же зна́мения после́доваша тебе́ ве́рующему чудотво́рцу, укроти́л бо еси́ огне́вицу еди́ным прикоснове́нием бо́ку лежа́щаго на одре́ сме́рти, но призва́вшаго тя́ во упова́нии жи́зни.

Исцеля́хуся иногда́ ве́рующии от нанесе́ния главотя́жей и убру́сцев Па́вловых; не про́сты си́лы творя́ше Бо́г и твои́ма рука́ма, но́вый апо́столе, пе́рсть бо от твоея́ свяще́нныя ра́ки и еле́й от лампа́ды отверза́ют слепотству́ющей о́чи и да́руют исцеле́ние.

Моли́тва ве́ры спасе́ лю́те боля́щаго, и́же и испове́да, я́ко вра́чеве не воскреся́т, упова́ние же на тя́, благосе́рдый о́тче, николи́же посрамля́ет с ве́рою призыва́ющих тя́ во благовре́менную по́мощь.

Богоро́дичен: Отрокови́ца неискусому́жная ражда́ет Прови́деннаго Ду́хом от Авваку́ма, и к Рожде́нному мо́лится о душа́х на́ших, му́дре пасо́мых па́стырем, и по исхо́де свое́м вы́ну с на́ми в неистле́нии свята́го телесе́ своего́ пребыва́ющим.

Пе́снь 5.

Ирмо́с: От но́щи неве́дения, Богове́дения де́нь, во све́те лица́ Твоего́, Христе́, да возсия́ет, ко у́тру хвале́ние Твое́ в сердца́х на́ших.

Любо́вию погрузи́ся во струя́х упова́ния на уго́дника Бо́жия, покры́тый от главы́ до но́г стру́пами и во пло́ти свое́й не обрета́яй исцеле́ния, и а́бие очи́стися от нечистоты́ боле́зненныя, я́коже Неема́н от прока́зы, погруже́нием во Иорда́не, по глаго́лу Елиссе́еву.

И́щущим тебе́ обрета́ешися гото́вый помо́щник, святи́телю Инноке́нтие, и ско́ро подае́ши неду́гов исцеле́ние, я́коже иногда́ жене́, боле́знующей десно́ю руко́ю, яви́лся еси́ в со́нном виде́нии и сотвори́л еси́ ю́ здра́ву за еди́ное призва́ние свята́го твоего́ и́мене.

Тве́рдое благода́ти позна́ние утвержда́я в ве́рующих, научи́л еси́ на́с ве́дети тя́, я́ко наста́вника ми́лостиваго, благоутро́бия сокро́вище, правове́рия учи́теля, архиере́ев похвалу́, безпомо́щных засту́пника, при́сно моля́щагося о спасе́нии ча́д твои́х, с ве́рою к тебе́ притека́ющих.

Богоро́дичен: Вереи́ а́довы сломи́шася, и закле́пи ве́чнии сокруши́шася Ро́ждшимся от Тебе́, Пречи́стая Ма́ти. Те́мже мо́лим Тя́: изба́ви ны́ от ве́чныя сме́рти хода́тайством Твои́м и всели́ ны́ во све́те Сы́на Твоего́, све́т искупле́ния ми́рови возсия́вшаго.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Ели́цы притека́ху к тебе́, помо́щниче те́плый, не отхожда́ху посра́млени, немощни́и исцеля́хуся, в боле́зни деторожде́ния су́щия, от многоцеле́бныя благосты́ни твоея́ приима́ху ско́рое неду́га разреше́ние, слепи́и прозира́ху; посети́ у́бо и на́с, ще́дрый о́тче, твое́ю по́мощию.

Не бу́ди неве́рен, но ве́рен, ре́кл еси́, о́тче, втори́цею яви́выйся от преломле́ния ноги́ лю́те стра́ждущему, и уда́рив жезло́м в ме́сто, иде́же стоя́сте но́зе твои́, я́звою на дре́ве уврачева́л еси́ душе́вную я́зву омраче́ннаго неве́рием, а́бие бо испове́да бы́ти тебе́ благода́тнаго врача́, воздви́гшаго его́ от одра́ боле́зненнаго.

Непоро́чныма твои́ма рука́ма препо́дал еси́, архиере́ю Бо́жий, безсме́ртную пи́щу стра́ждущей, о чу́до! на Небеси́ приобща́яся и́стее Невече́рняго Све́та, вя́щше седми́десяти ле́т по твое́м успе́нии, и на земли́ явля́ешися священноде́йствитель Боже́ственных Та́ин, уверя́я па́ству твою́ в неразлу́чном пребыва́нии вы́ну с притека́ющими ко твое́й по́мощи.

Богоро́дичен: И́стины учи́телю, наста́ви ны́ во и́стинней ве́ре, моля́ о спасе́нии на́шем с Пречи́стою Де́вою Богоро́дицею Рожде́ннаго от Нея́ на спасе́ние всего́ ми́ра.

Конда́к гла́с 4:

Непоро́чности соиме́ннаго па́стыря, пропове́дника ве́ры во язы́цех Монго́льских, сла́ву и украше́ние Ирку́тския па́ствы, любо́вию восхва́лим вси́ ве́рнии: то́й бо е́сть храни́тель страны́ сея́, и моли́твенник о душа́х на́ших.

И́кос:

А́нгельским житие́м возвы́сился еси́, о́тче, до лицезре́ния красоты́ несозда́нныя, ея́же наслажда́яся ны́не на Небеси́, мо́лишися о спасе́нии на́шем, на́с же на земли́ науча́еши взыва́ти тебе́ такова́я: Ра́дуйся, кри́не, в благорастворе́нном ю́зе процветы́й; ра́дуйся, пе́рвенче духо́внаго сыноположе́ния, от Ма́лыя Росси́и Бо́гу посвяще́нный. Ра́дуйся, сла́во и велича́ние гра́да Ки́ева; ра́дуйся, в земно́м учи́лищи Небе́сныя му́дрости наста́вниче. Ра́дуйся, му́дрый исполни́телю веле́ний царя́ земна́го; ра́дуйся, му́жественный подви́жниче Царя́ небе́снаго. Ра́дуйся, пропове́дниче ве́ры во язы́цех Монго́льских; ра́дуйся, началоположи́телю до́браго священнонача́лия во страна́х Сиби́рских. Ра́дуйся, украше́ние Ирку́тския па́ствы; ра́дуйся, благоуха́ние пусты́ни. Ра́дуйся, о́бщаго воскресе́ния в нетле́нии твое́м увери́телю; ра́дуйся, неизчерпа́емых чуде́с исто́чниче. Ра́дуйся, храни́телю страны́ тобо́ю избра́нныя; ра́дуйся, Инноке́нтие, моли́твенниче о душа́х на́ших.

Пе́снь 7.

Ирмо́с: В нача́ле зе́млю основа́вый и Небеса́ сло́вом утверди́вый, благослове́н еси́ во ве́ки, Го́споди Бо́же оте́ц на́ших.

Кре́пость и исцеле́ние приима́ху от тебе́, о́тче, немощству́ющии пло́тию; ско́рбнии же ду́хом и удруче́ннии печа́льми жите́йскими обрета́ху душе́вное утеше́ние во умиле́нном призыва́нии свята́го и просла́вленнаго и́мене твоего́, прославля́ющаго ди́внаго во святы́х Свои́х Бо́га Изра́илева.

О́тче, непоро́чности соиме́нне, та́ко просла́вися све́т тво́й пред челове́ки, я́ко ви́дяще до́брая дела́ твоя́ и чудотворе́ния мно́гая, прославля́ют чудоде́йствующаго тобо́ю, ди́внаго во святы́х Свои́х Бо́га Изра́илева.

Тро́ичен: Душе́вныя на́ша боле́зни исцели́, Бо́же, моли́твами просла́вленнаго от Тебе́ уго́дника, ускоря́ющаго на по́мощь умиле́нною душе́ю, тре́бующим де́йственнаго его́ пред Тобо́ю, Тро́ице Свята́я, заступле́ния.

Богоро́дичен: У́м на́ш плени́ в послуша́ние ве́ры, ду́х и ду́шу всесоверше́ны соблюди́, и те́ло в прише́ствие Го́спода на́шего Иису́са Христа́ непоро́чно сохрани́, моли́твами Твои́ми, Богороди́тельнице.

Пе́снь 8.

Ирмо́с: Безнача́льнаго Царя́ Сла́вы, Его́же трепе́щут небе́сныя си́лы, по́йте, свяще́нницы, лю́дие, превозноси́те во вся́ ве́ки.

Широ́кий пу́ть, вводя́щий в па́губу, презре́л еси́, преподо́бне, и те́сными враты́ вше́л еси́ в небе́сное Ца́рствие. Отону́дуже призира́я вы́ну на призыва́ющих тя́ с ве́рою, укрепи́ у́бо и на́с понести́ благо́е и ле́гкое и́го Креста́, да вни́дем в поко́й Бо́га благослове́ннаго.

Ангелоподо́бным житие́м на земли́, обре́л еси́ благода́ть исцеле́ний, и яви́лся еси́ вои́стинну а́нгел храни́тель па́ствы твоея́, бо́дрственно утвержда́я ю́ в ве́ре многоразли́чными твои́ми чудотворе́нии, и соблюда́я в чи́стом испове́дании отце́в Бо́га благослове́ннаго.

Христо́во благоуха́ние яви́лся еси́, о́тче, в спаса́емых тобо́ю от неду́гов душе́вных же и теле́сных; те́мже обита́тели гра́да тобо́ю избра́ннаго, прославля́юще святу́ю па́мять твою́, благословля́ют просла́вившаго тя́, отце́в Бо́га благослове́ннаго.

Богоро́дичен: Не́сть на́ша бра́нь ко пло́ти и кро́ви, но к нача́лом, и ко власте́м, и к миродержи́телем тьмы́ ве́ка сего́, к духово́м зло́бы поднебе́сным; над ни́миже покажи́ ны́, Влады́чице, победи́тели, я́ко да по о́бразу непоро́чнаго па́стыря возмо́жем вся́ стре́лы лука́ваго разжже́нныя угаси́ти.

Пе́снь 9.

Ирмо́с: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Апо́стол язы́ков бы́л еси́, о́тче, я́коже и Па́вел, те́мже ны́не восхище́н еси́ на высоту́ Боже́ственнаго лицезре́ния, иде́же мо́лишися, да Бо́г возрасти́т, е́же ты́, му́дрый де́лателю, насади́л и напои́л еси́.

Шле́м спасе́ния восприи́м, и мече́м духо́вным препоя́сався, изше́л еси́ на де́ло твое́, па́стырю ди́вный, и согради́л еси́ опло́т благоче́стия во мра́це язы́чества. Моли́ у́бо преблага́го Бо́га, да укрепи́т, е́же соде́ла в на́с руко́ю твое́ю.

И́менем и житие́м непоро́чне, приими́ хвале́бныя пе́сни, любо́вию к тебе́ возноси́мыя, осеня́я моли́твами твои́ми па́ству, осия́нную луча́ми добро́т твои́х, и ускоря́я на по́мощь благода́тным заступле́нием твои́м во вре́мя благопотре́бно.

Богоро́дичен: Херуви́мов честне́йшая, и сла́внейшая без сравне́ния Серафи́мов, не пре́зри моле́ния ра́б Твои́х, но покры́й на́с честны́м Твои́м покро́вом: спаси́ лю́ди, благогове́йно чту́щия па́мять непоро́чнаго па́стыря, и моли́твенника о гра́де се́м, ди́внаго Инноке́нтия.

Свети́лен, гла́с 1:

Сла́ва Тебе́, Бо́гу, показа́вшему на́м све́т спасе́ния в житии́ и словеси́ Твоего́ уго́дника; сла́ва Тебе́, Благода́телю, возсия́вшему просвеще́ние и́стины в побо́рнице благоче́стия и и́стины; сла́ва Тебе́, ди́вному Щедротода́вцу, удиви́вшему ми́лости Твоя́ на ходи́вшем во све́те Лица́ Твоего́, святи́теле и чудотво́рце Инноке́нтии.

Сла́ва, и ны́не, богоро́дичен: Све́т ми́рови возсия́ в Рождестве́ Твое́м, Пречи́стая Богоро́дице, осия́й у́бо у́м на́ш позна́нием Сы́на Твоего́, се́рдце уязви́ любо́вию к Боже́ственным за́поведем, укрепля́ющи ны́ моли́твами Твои́ми в ве́ре и благоде́лании.

 

Конда́к 1.

Равноапо́стольный христиа́нския ве́ры благове́стниче, язы́ческаго злове́рия искорени́телю, ско́рый в беда́х и ско́рбех засту́пниче, благоутро́бия неистощи́мое сокро́вище, святи́телю о́тче Инноке́нтие! Вели́каго тя́ пред Го́сподем хода́тая и чуде́с мно́жеством свиде́тельствованна помо́щника иму́ще, к тебе́ во обстоя́нии от вся́ких ну́жд и зо́л с ве́рою и любо́вию притека́ем, и та́ко ти́ зове́м:

Ра́дуйся, Инноке́нтие, святы́й уго́дниче Спа́са Христа́.

И́кос 1.

А́нгелом уподо́бился еси́ непоро́чным житие́м, святи́телю о́тче Инноке́нтие, и сего́ ра́ди а́нгелов соприча́стия сподо́бился еси́ в немо́лчнем славосло́вии Го́спода Сла́вы. Приими́ у́бо и от на́ших недосто́йных усте́н приноси́мое тебе́ хвале́ние:

Ра́дуйся, по и́мени твоему́, непоро́чность зна́менующему, яви́вый житие́ твое́.

Ра́дуйся, непоро́чности сохране́нием, а́нгелов житию́ подража́тель бы́вый.

Ра́дуйся, ве́рный Христо́ва Ева́нгелиа служи́телю.

Ра́дуйся, архиере́ев удобре́ние.

Ра́дуйся, Це́ркве, неве́сты Христо́вы, драго́е украше́ние.

Ра́дуйся, свя́тости жития́ и непоро́чности нра́вов учи́телю.

Ра́дуйся, Инноке́нтие, святы́й уго́дниче Спа́са Христа́.

Конда́к 2.

Ви́дя Госпо́дь Бо́г благопотре́бен тя́ сосу́д ко прия́тию даро́в благода́ти, оби́льно излия́ в твое́ се́рдце ду́ха прему́дрости и ра́зума, во е́же просвеща́ти язы́ки, во тме́ и се́ни сме́ртней седя́щыя, ду́ха сове́та и кре́пости, во е́же превозмога́ти над враги́ спасе́ния ви́димыми и неви́димыми, ду́ха ве́дения и благоче́стия, во е́же Христо́во ста́до пасти́ уче́нием и житие́м. Мы́ же, тя́ на спасе́ние люди́й та́ко приугото́ванна уразуме́вше, со умиле́нием Пода́телю все́х бла́г Бо́гу зове́м: Аллилу́иа.

И́кос 2.

Ра́зум благопотре́бен к де́ланию прия́тых от Бо́га тала́нтов стяжа́ти хотя́, еще́ ю́н сы́й, водвори́лся еси́ в вертогра́де духо́вныя му́дрости пресла́внаго гра́да Ки́ева: соверше́н же в житии́ хотя́ бы́ти, сожи́тельство восприя́л еси́ в ли́це и́ноков Святопече́рския ла́вры, иде́же дости́гл еси́ в му́жа соверше́нна, в ме́ру во́зраста исполне́ния Христо́ва. Мы́ же, твое́ зва́ние и избра́ние разсмотря́юще, с любо́вию зове́м ти́:

Ра́дуйся, розго́ виногра́да, плодо́в ду́ха испо́лненная, да и́х оби́лием страны́ Сиби́ри обогати́ши.

Ра́дуйся, сладкоуха́нный кри́не Госпо́день, на Ю́зе процветы́й, да те́м страны́ Се́вера облагоуха́еши и украси́ши.

Ра́дуйся, в земне́м учи́лищи небе́сней му́дрости навы́кший, да е́ю язы́ки на пу́ть спасе́ния наста́виши.

Ра́дуйся, я́ко на высоту́ доброде́телей, а́ки свети́льник на све́щнице, поста́влен бы́л еси́, да мглу́ неподо́бнаго жития́ во изгна́нии су́щих разго́ниши.

Ра́дуйся, ве́рный учениче́ Спа́са на́шего, во апо́стола язы́ков предъизбра́нный.

Ра́дуйся, ча́до послушли́вое Це́ркве Правосла́вныя, в первосвяти́теля Ирку́тския па́ствы пронарече́нный.

Ра́дуйся, Инноке́нтие, святы́й уго́дниче Спа́са Христа́.

Конда́к 3.

Си́лою свы́ше тя́ облече́нна уразуме́вше благове́рный ца́рь и святы́й Собо́р избра́ша тя́ во апо́стольское служе́ние, пропове́дати Ева́нгелие Ца́рства Христо́ва в земли́ язы́ков, неве́дущих пе́ти во Святе́й Тро́ице еди́ному Бо́гу: Аллилу́иа.

И́кос 3.

Име́я ре́вность апо́стольскую о спасе́нии ду́ш челове́ческих, подви́глся еси́ на вся́ труды́ и беды́ ше́ствия в да́льныя страны́ ца́рства хи́нов: но воспяще́н бы́в в преде́лы его́ вни́ти, во гра́де Селенги́нстем препокое́ние обре́л еси́, иде́же тя́ ма́лое ста́до при́сных ти́ по ве́ре приве́тствии сре́те си́ми:

Ра́дуйся, но́вый апо́столе, на просвеще́ние язы́ков мно́гие страны́ прете́кший.

Ра́дуйся, в ше́ствиих пу́тных, я́коже и Па́вел, язы́ков апо́стол, беды́ Христа́ ра́ди и Ева́нгелиа бо́дре сре́тивый.

Ра́дуйся, лучеза́рное Це́ркве Христо́вы свети́ло, на просвеще́ние восто́ка возше́дшее.

Ра́дуйся, боже́ственнаго огня́ носи́ло, теплоту́ любве́ Христо́вы во страны́ мра́за прине́сшее.

Ра́дуйся, ду́хом ре́вности апо́стольския дви́жимый, ко язы́ком Монго́льским поспеши́вый.

Ра́дуйся, во изгна́нии стра́ждущым поко́й душа́м в сле́довании благо́му и́гу Христо́ву указа́вый.

Ра́дуйся, Инноке́нтие, святы́й уго́дниче Спа́са Христа́.

Конда́к 4.

Бу́рю за́висти дре́вний челове́ческих ду́ш прельсти́тель воздви́же в сердца́х хи́нов сопроти́в тебе́, во страну́ и́х гряду́щаго, благове́стника ми́ра Христо́ва, и возста́ви на тя́ лжебра́тию, во е́же в преде́лы хи́нов твое́ возбрани́ти вхожде́ние, да не навы́кнут хи́нове, вку́пе с правосла́вными, изве́дшему лю́ди из тмы́ во све́т сво́й чу́дный Христу́ Бо́гу пе́ти: Аллилу́иа.

И́кос 4.

Услы́шав ухищре́нныя хи́нов глаго́лы, я́ко не подоба́ет ти́, иера́рху вели́кому Го́спода, бы́ти прия́ту в и́х ца́рство, обрати́лся еси́ па́ки со Ева́нгелием ко язы́ком иноро́дным во стране́ Сиби́рстей, и́же с ве́лию ра́достию тя́ прие́мше, возопи́ша ти́ такова́я:

Ра́дуйся, хи́нами во и́х ца́рство не прия́тый, ко прия́тию же саме́ми а́нгелы в Небе́сное Ца́рство досто́йный.

Ра́дуйся, не ро́ду чужде́му хи́нов, но своего́ ца́рства язы́ком Монго́льским во апо́стола угото́ванный.

Ра́дуйся, я́ко возбране́нием тебе́ благове́стия язы́ком ца́рства чужда́го ве́лие бла́го язы́ком Росси́йскаго ца́рства устро́ися.

Ра́дуйся, я́ко про́поведию Ева́нгелиа язы́ком Монго́льским злоухищре́ние врага́ ду́ш челове́ческих же́стоко посрами́ся.

Ра́дуйся, я́ко твои́м посреде́ на́с вселе́нием неве́дущии Бо́га в позна́ние и́стины приведо́шася, противля́ющиися же и́стине обличи́шася.

Ра́дуйся, я́ко на житие́ твое́ взира́юще, гре́шнии пока́яшася, беззако́ннии же уцелому́дришася.

Ра́дуйся, Инноке́нтие, святы́й уго́дниче Спа́са Христа́.

Конда́к 5.

Богото́чный прему́дрости исто́чник от оби́лия прису́щия ти́ благода́ти прото́ржеся в пусты́ни Монго́льстей, егда́ неразу́мнии хи́нове загради́ша то́ки ея́ в преде́лы и́х омраче́ннаго ца́рства: ре́вностию бо апо́стольскою дви́жимь и во служе́нии па́стырстем тружда́яся, о́во просвеща́л еси́ све́том Ева́нгелиа Христо́ва неве́рующыя язы́ки монго́льски, о́во утвержда́л еси́ ве́рующыя в послуша́нии Правосла́вныя Це́ркве уста́вом; и та́ко научи́л еси́ и си́х и о́нех вку́пе воспева́ти Еди́ному все́х челове́ков Спаси́телю Бо́гу: Аллилу́иа.

И́кос 5.

Ви́дя Вседержи́тель, вся́ на по́льзу стро́яй, я́ко не приспе́ вре́мя, да просветя́тся све́том Ева́нгелиа лю́дие ца́рства хи́нскаго, дарова́ тя́ в первосвяти́теля Ирку́тския Це́ркве и учи́теля язы́ков Сиби́ри, е́же мы́ ны́не ра́достно воспомина́юще, си́це зове́м ти́:

Ра́дуйся, первопресто́льниче Ирку́тския Це́ркве, благове́стием Сиби́рскую о́бласть Росси́йскаго ца́рства огласи́вый.

Ра́дуйся, свято́е нача́ло святи́телей Ирку́тския па́ствы, про́чым пременя́емым, еди́ный ея́ несме́нный блюсти́телю.

Ра́дуйся, о́тче, святы́х оте́ц в насажде́нии благоче́стия и искорене́нии нече́стия подража́телю.

Ра́дуйся, па́стырскому служе́нию уготовля́емых трудолюби́вый учи́телю.

Ра́дуйся, па́стырю до́брый, гото́вый ду́шу твою́ положи́ти за о́вцы твоя́.

Ра́дуйся, неусы́пный стра́же, вве́ренныя ти́ ду́шы, бде́нным моле́нием и пу́тным обхожде́нием, до́бре сохрани́вый.

Ра́дуйся, Инноке́нтие, святы́й уго́дниче Спа́са Христа́.

Конда́к 6.

Богопропове́дников Христо́вых апо́столов труды́ на ся́ подъе́м, о́ных насле́довал еси́ по́двиги и лише́ния, ско́рби и озлобле́ния: но вся́ ра́ди Христа́ и Ева́нгелиа до́блественно поне́сл еси́, и вся́ ны́, не то́чию благоду́шствующия, но и скорбя́щыя, научи́л еси́ пе́ти Бо́гу: Аллилу́иа.

И́кос 6.

Возсия́ла е́сть па́че со́лнца, во огни́ искуше́ний и скорбе́й очище́нная, душа́ твоя́, до́блественный подви́жниче Христо́в: а́ще бо в не́мощех и боле́знех претружде́но бя́ше те́ло твое́, но ду́хом при́сно сы́й бо́др, вы́ну побежда́л еси́ враги́ Христо́вы Це́ркве. Сего́ ра́ди и мы́, тобо́ю в ско́рбех утеша́еми, побе́дная ти́ си́це вопие́м:

Ра́дуйся, во́ине Христо́в, во всеору́жии Бо́жии проти́ву нача́л и власте́й и миродержи́телей тмы́ ве́ка сего́ подвиза́выйся.

Ра́дуйся, и́стиною а́ки по́ясом препоя́санный, язы́ков шата́ния разруши́вый.

Ра́дуйся, пра́вдою а́ки в броня́ оболче́нный, вся́ наве́тник клеветы́ неде́йственны сотвори́вый

Ра́дуйся, но́зе во благовествова́ние ми́ра обуве́нне име́вый, главу́ дре́вняго зми́я попра́вый.

Ра́дуйся, ве́рою а́ки щито́м покрове́нный, вся́ разжже́нныя лука́ваго стре́лы угаси́вый.

Ра́дуйся, шле́м спасе́ния и ме́ч духо́вный восприя́вый, и вся́ враги́, а́ки воево́да возбра́нный, низложи́вый.

Ра́дуйся, Инноке́нтие, святы́й уго́дниче Спа́са Христа́.

Конда́к 7.

Хотя́й милосе́рдый Госпо́дь не то́чию па́стве Ирку́тстей, но и вся́кому бли́жнему же и да́льнему тя́ дарова́ти в ско́рбех уте́шителя, в беда́х ско́раго помо́щника и от боле́зней цели́теля, ускори́ тя́ разреши́ти от у́з сея́ бре́нныя пло́ти, да по все́м градо́м и ве́сем чудесы́ и исцеле́ньми Бо́га просла́виши и вся́ Ему́ воздви́гнеши пе́ти: Аллилу́иа.

И́кос 7.

К но́вому и нестаре́ющемуся на небесе́х жи́тельству уготовля́я тво́й восхо́д, писа́нием со одра́ боле́зни всесмире́нно проси́л еси́ иере́и гра́да Ирку́тска со христиа́ны правосла́вными, да воспою́т во хра́мех Богоро́дице пара́клисис: мы́ же, зря́ще тя́ по преставле́нии просла́влена Бо́гом, к тебе́ самому́ си́це взыва́ем:

Ра́дуйся, ратобо́рче Христо́в, по́двигом до́брым подвиза́выйся.

Ра́дуйся, быстротеку́щий орле́, тече́ние твое́ в превы́спренних селе́ниих сконча́вый.

Ра́дуйся, во́ине Царя́ Небе́снаго, вся́ обе́ты Христу́ Царю́ и Бо́гу на́шему ве́рно соблюды́й.

Ра́дуйся, я́ко про́чее уже́ вене́ц пра́вды тебе́ соблюде́ся.

Ра́дуйся, по преселе́нии во оби́тели Отца́ Небе́снаго не оставля́яй посеща́ти на́ш гра́д и оби́тель сию́.

Ра́дуйся, те́плый о на моли́твенниче, не престаю́щь о на́с у Престо́ла Царя́ Небе́снаго хода́тайствовати.

Ра́дуйся, Инноке́нтие, святы́й уго́дниче Спа́са Христа́.

Конда́к 8.

Стра́нное все́м чу́до показа́ся, егда́ древя́ная це́рковь, под ея́же олтаре́м почива́л еси́ от трудо́в сего́ вре́меннаго жития́, посреде́ всея́ оби́тели запале́ния, я́ко дре́вняя купина́, огне́м опаля́ема не сгара́ше. Чту́щии же па́мять твою́, я́ве уразуме́вше, я́ко твои́х ра́ди моще́й соверша́ется сие́ чу́до, со стра́хом и ра́достию, храня́щему тя́ Бо́гу, мно́жицею взыва́ху: Аллилу́иа.

И́кос 8.

Вси́ лю́дие, прите́кшии во оби́тель твою́ и це́рковь, в не́йже почива́ху мо́щи твоя́, огне́м опаля́ему ви́дяще, приступи́вше ко архипа́стырю, те́пле его́ моля́ху, да изнесу́т ра́ку святы́х моще́й твои́х: о́н же, ду́хом ве́ры испо́лнь, наде́ждею сохране́ния от огня́ не то́чию моще́й твои́х, но и всея́ це́ркве, все́х ободря́ше. Лю́дие же, сбытие́ слове́с архипа́стыря а́бие узре́вше, благода́рными ти́ гла́сы, чудотво́рче, воззва́ша:

Ра́дуйся, свети́льниче Це́ркве, из-под спу́да па́че блиста́ния о́гненнаго возсия́вый.

Ра́дуйся, несгара́нием храни́лища моще́й твои́х, о нетле́нии и́х пресла́вно провозвести́вый.

Ра́дуйся, таковы́м зна́мением о твое́м с на́ми сопребыва́нии удостове́ривый.

Ра́дуйся, це́ркве сохране́нием, в тебе́ от бе́д засту́пника на́м откры́вый.

Ра́дуйся, и гра́да на́шего, посреде́ запале́ний о́гненных, мно́гажды удоборазумева́емый храни́телю.

Ра́дуйся, наипа́че о избавле́нии на́с от огня́ гее́нскаго при́сный на́ш пред Го́сподем хода́таю.

Ра́дуйся, Инноке́нтие, святы́й уго́дниче Спа́са Христа́.

Конда́к 9.

Вси́ ли́цы а́нгелов да́ша сла́ву, че́сть и благодаре́ние Седя́щему на Престо́ле, живу́щему во ве́ки веко́в Бо́гу и А́гнцу, егда́, убеле́нная све́тлостию непоро́чности, душа́ твоя́, святи́телю Христо́в Инноке́нтие, вознесе́ся на не́бо, в сожи́тельство а́нгелов. Мы́ же, прославле́нием на земли́ святы́х моще́й твои́х уве́рившеся о твое́й на небесе́х сла́ве, с весе́лием просла́вльшему тя́ Бо́гу при́сно взыва́ем пе́снь: Аллилу́иа.

И́кос 9.

Вети́ям любому́дрым на се́рдце не взыдо́ша, я́же ти́, Христо́в уго́дниче, угото́ва Госпо́дь во оби́телех небе́сных. Мы́ же, пра́зднующе твое́ на небеси́ прославле́ние, си́це тя́ на земли́ ублажа́юще зове́м:

Ра́дуйся, мно́гу на небесе́х, многообра́знаго ра́ди на земли́ служе́ния, мзду́ восприе́мый.

Ра́дуйся, де́вственниче, в пе́рвенцы Бо́гу и А́гнцу впи́саный.

Ра́дуйся, страда́льче, вку́пе со прише́дшими от ско́рби ве́лия, в ри́зах бе́лых пред престо́лом спасе́ние и сла́ву воспева́яй.

Ра́дуйся, апо́столе язы́ков, престо́лом апо́стольским на небеси́ почте́нный.

Ра́дуйся, па́стырю научи́вый и сотвори́вый, и сего́ ра́ди ве́лиим во Ца́рствии Небе́снем от Христа́ нарече́нный.

Ра́дуйся, воево́до возбра́нный, соседе́ния Победи́телю а́да и сме́рти на престо́ле сподо́бивыйся.

Ра́дуйся, Инноке́нтие, святы́й уго́дниче Спа́са Христа́.

Конда́к 10.

Спасе́ния посреде́ земли́ соде́лавый, Человеколю́бец Госпо́дь посети́ страну́ Сиби́рскую свое́ю ми́лостию и щедро́тами: в ра́це бо моще́й твои́х, вели́кий уго́дниче Христо́в, откры́л е́сть на́м зна́мение твоего́ те́плаго о на́с на небеси́ хода́тайства, его́же сподобля́еми вси́ благове́рнии лю́дие страны́ Сиби́рския, еди́неми усты́ и се́рдцем пою́т Бо́гу: Аллилу́иа.

И́кос 10.

Стена́ еси́ необори́мая, засту́пниче на́ш, гра́ду и стране́ се́й от нахожде́ний вся́ких зо́л и скорбе́й: явле́нием бо чуде́с твои́х уве́рихомся, я́ко ве́лие стяжа́л еси́ дерзнове́ние у Го́спода. Сего́ ра́ди си́це зове́м ти́:

Ра́дуйся, страны́ Сиби́рския богодарова́нный храни́телю и засту́пниче, хода́таю и помо́щниче.

Ра́дуйся, я́ко вку́пе со а́нгелы по́слан еси́ во служе́ние за хотя́щих насле́довати спасе́ние, и все́м стра́ждущым неоску́дное подае́ши утеше́ние.

Ра́дуйся, драгоце́нное на́м в ра́це моще́й твои́х насле́дие оста́вивый.

Ра́дуйся, я́ко во оби́тели Вознесе́нстей все́х притека́ющих к тебе́ срета́еши с любо́вию.

Ра́дуйся, и на вся́ком ме́сте тя́ с ве́рою призыва́ющым ско́рый помо́щник явля́яйся.

Ра́дуйся, и не и́щущым тя́, ниже́ ве́дущим, я́ко до́брый наста́вник, вра́ч же и покрови́тель мно́гажды познава́емый.

Ра́дуйся, Инноке́нтие, святы́й уго́дниче Спа́са Христа́.

Конда́к 11.

Пе́ние вся́кое не довле́ет к прославле́нию чуде́с твои́х, чудотво́рче преди́вный, и́миже не то́чию ве́рныя, но и неве́рныя удивля́еши: ве́руем же и наде́емся, я́ко твои́ми моли́твами и во мра́це идолослуже́ния су́щии из тмы́ и се́ни сме́ртныя изы́дут и с на́ми ку́пно просла́вльшему тя́ Бо́гу воззову́т: Аллилу́иа.

И́кос 11.

Свети́льник не поставля́ется под спу́дом, но на све́щник возлага́ется, да входя́щии ви́дят све́т: сего́ ра́ди и твоя́ святы́я мо́щи изведе́ из-под спу́да Госпо́дь, я́ко да входя́щии во оби́тель твою́, от сего́ чу́днаго све́та ве́рою просвеща́еми и исцеле́ния от тебе́ прие́млюще, взыва́ем к тебе́ си́це:

Ра́дуйся, наста́вниче прему́дрый, мы́сли бла́ги и хоте́ния свя́та на се́рдце полага́яй.

Ра́дуйся, вождю́ благонаде́жный, на пу́ть спасе́ния направля́яй.

Ра́дуйся, пред Престо́лом Царя́ Небе́снаго о спасе́нии ду́ш на́ших хода́тайствуяй.

Ра́дуйся, ско́рый помо́щниче, от нахожде́ния зо́л и скорбе́й сохраня́яй.

Ра́дуйся, врачу́ сострада́тельный, от боле́зней душе́вных же и теле́сных свобожда́яй.

Ра́дуйся, оста́вленных врачми́ от одра́ сме́рти воздвиза́яй.

Ра́дуйся, Инноке́нтие, святы́й уго́дниче Спа́са Христа́.

Конда́к 12.

Благода́тиею Бо́жиею испо́лнена тя́ позна́вше не то́чию бли́з су́щии, но и во страна́х да́льних обита́ющии, с ве́рою притека́ют к ра́це моще́й твои́х: ты́ же, вне́мля и́х моле́нием, не преста́ни напу́тствовати все́х да́ры исцеле́ний и чуде́с твои́х, да от восто́к со́лнца до за́пад вси́ воспою́т чудоде́йствующему Бо́гу: Аллилу́иа.

И́кос 12.

Пою́ще чудеса́ твоя́, и́миже по преставле́нии, па́че же по обре́тении святы́х моще́й твои́х, Бо́га просла́вил еси́, благода́рно тебе́ си́це зове́м:

Ра́дуйся, жи́лами разсла́бленныя со одра́ боле́зни возста́вивый.

Ра́дуйся, сокруше́нием но́г и ру́к стра́ждущыя, а́ки николи́же страда́вшыя устро́ивый.

Ра́дуйся, стру́пами покры́тыя и ра́нами уя́звленныя це́лы и здра́вы соде́лавый.

Ра́дуйся, зре́ние слепы́м возврати́вый и изумле́нныя на здра́вый смы́сл наста́вивый.

Ра́дуйся, во отча́янии живота́ к сме́рти уготовля́емыя к жи́зни па́ки возврати́вый.

Ра́дуйся, ни еди́ней же боле́зни ко исцеле́нию тебе́ бы́ти неудо́бней, чуде́с мно́жеством засвиде́тельствовавый.

Ра́дуйся, Инноке́нтие, святы́й уго́дниче Спа́са Христа́.

Конда́к 13.

О, вели́кий Христо́в уго́дниче, ми́лостивый на́ш наста́вниче, благоутро́бия сокро́вище, правове́рия учи́телю, архиере́ев похвало́, безпомо́щных засту́пниче, о́тче на́ш Инноке́нтие! Моли́ Христа́ Бо́га, да сподо́бит на́с земно́е по́прище без поро́ка прейти́ и егда́, я́ко Пра́ведный Судия́, со а́нгелы свои́ми во сла́ве прии́дет суди́ти живы́х и ме́ртвых, да не отлучи́т на́с от со́нма спаса́емых, но да сотвори́т на́с прича́стники Ца́рства Небе́снаго, во е́же та́мо вку́пе с тобо́ю, отце́м на́шим, вы́ну сла́вити его́ и воспева́ти Ему́ со Отце́м и Святы́м Ду́хом во ве́ки веко́в: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

Моли́тва святи́телю Инноке́нтию, Ирку́тскому чудотво́рцу.

О, вели́кий Христо́в уго́дниче, святи́телю о́тче Инноке́нтие! Услы́ши на́с, тебе́ моля́щихся. Ты́ ве́си на́ша ско́рби и неду́ги, слы́шиши воздыха́ния мно́жества к тебе́ притека́ющих; сего́ ра́ди к тебе́, я́ко отцу́ на́шему, ско́рому помо́щнику и те́плому моли́твеннику, зове́м: не оста́ви на́с твои́м у Бо́га хода́тайством. Мы́ при́сно заблужда́емся от пути́ спасе́ния — руководи́ на́с, ми́лостивый на́ш наста́вниче. Мы́ немощни́и в ве́ре — утверди́ на́с, правове́рия учи́телю. Мы́ зело́ убо́зи сотвори́хомся до́брых де́л — обогати́ на́с, благоутро́бия сокро́вище. Мы́ при́сно наве́туеми есмы́ от вра́г ви́димых и неви́димых и озлобля́еми — помози́ на́м, безпомо́щных засту́пниче. Гне́в Бо́жий, пра́ведно дви́жимый на ны́ за беззако́ния на́ша, отврати́ от на́с твои́м хода́тайством у Престо́ла Судии́ Бо́га, Ему́же ты́ предстои́ши на небеси́, о́тче иера́рше, архиере́ев похвало́. Услы́ши, мо́лим тя́, вели́кий Христо́в уго́дниче, и зде́ с моле́нием тебе́ предстоя́щыя, и вся́, на вся́ком ме́сте тебе́ с ве́рою призыва́ющыя: и испроси́ моли́твами твои́ми у Отца́ Небе́снаго все́м на́м проще́ние грехо́в на́ших и от бе́д избавле́ние. Ты́ бо еси́ свиде́тельствованный безчи́сленными чудесы́ помо́щник, засту́пник и моли́твенник, и о тебе́ сла́ву возсыла́ем Отцу́ и Сы́ну и Свято́му Ду́ху, и ны́не и при́сно, и во ве́ки веко́в. Ами́нь.

Моли́тва ина́я.

Свя́тче Бо́жий, па́стырю до́брый, де́лателю ве́рный виногра́да Христо́ва, святи́телю о́тче Инноке́нтие! При́зри на гра́д се́й и на лю́ди сия́! Моли́ Христа́ Бо́га, да сохрани́т па́ству твою́ от волко́в, губя́щих ю́; да ниспо́слет Ду́ха Своего́ Свята́го во е́же умудри́ти на́с ходи́ти пред Ни́м во вся́ком благоче́стии и чистоте́ во вся́ дни́ живота́ на́шего, да славосло́вяще И́мя Его́ Всесвято́е во дни́ и в но́щи, сподо́бимся бы́ти насле́дницы жи́зни ве́чныя, и просла́вим Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.