Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Облиста́в просвеще́нием благода́ти, Па́вел прему́дрый, я́коже зарю́, блаже́нне, тя́ све́тлу испусти́, отгоня́щу многобо́жия, Архи́ппе, тму́ глубоча́йшую ду́хом.

Глаго́л боже́ственными плени́цами уловле́н бы́л еси́ Па́вла пропове́дника, и из глубины́ зло́бы вра́жия лю́ди пресла́вно улови́л еси́, и слове́сно бра́шно на Боже́ственную трапе́зу прине́сл еси́.

В ри́зу оде́ян, Архи́ппе, Боже́ственныя благода́ти, обнажи́вшияся сла́вы Боже́ственныя, в нетле́ния ри́зу и спасе́ния, сла́вне, оде́жду Боже́ственную оде́ял еси́.

Богоро́дичен: Ви́девше проро́ческими очесы́ издале́ча, Всечи́стая, е́же па́че ума́ Твоего́ Боже́ственнаго Рождества́ стра́шное та́инство, богоглаго́ливии, Пречи́стая, разли́чными о́бразы уясни́ша.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Ве́рна тя́ раба́ Христо́ва Па́вел боже́ственный свиде́тельствует, Архи́ппе, и свяще́нна пропове́дника, и сво́ина, блаже́нне.

Распаля́емь мы́сленно Уте́шителя огне́м, попали́л еси́ ве́щь го́рькую, Архи́ппе, идолонеи́стовства, всехва́льне.

Житие́ твое́ светоза́рно доброде́тельными мо́лниями просия́, просвеща́я, Архи́ппе, благоче́стно тя́ почита́ющия.

Богоро́дичен: Хра́м показа́лася еси́ Бо́жий вмести́телен преявле́нно, Всечи́стая, и чи́сто селе́ние, и богоподо́бно жили́ще.

Седа́лен, гла́с 1.

Па́влов учени́к бы́в, богоно́се, просвети́л еси́ лю́ди воспева́ти Тро́ицу, хра́мы же разори́л еси́ па́губныя благода́тию, пострада́в же терпели́вно, венцы́, ра́дуяся, прия́л еси́, о на́с моля́ся, блаже́нне Архи́ппе.

Безневе́стная Чи́стая Богоро́дице Де́во, еди́на ве́рных предста́тельнице и покро́ве, бе́д, и скорбе́й, и лю́тых обстоя́ний все́х изба́ви, и́же на Тя́ упова́ние, Отрокови́це, иму́щия, и ду́ши на́ша спаси́ боже́ственными моли́твами Твои́ми.

Крестобогоро́дичен: Зря́щи Тя́, Христе́, Всенепоро́чная Ма́ти, ме́ртва на Кресте́ просте́рта, вопия́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ пречи́стых ру́к Твои́х, Ще́дре, созда́ние?

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Повеству́юща Боже́ственная и безбо́жныя явле́нне облича́юща, беззако́нный гони́тель бие́нием предаде́ тя́, и ра́нам, Архи́ппе, и различнообра́зным му́кам.

До́бре проходя́ житие́, блаже́нне, кончи́ну обрести́ блаже́нну вои́стинну сподо́бился еси́: му́ченик бо бы́л еси́ Христо́в, до́блественнейше боле́зни претерпе́в теле́сныя.

Жиру́ющую безбо́жия гни́лость, благочести́вых исполне́ние, уста́вил еси́ сла́дкою со́лию слове́с твои́х и, ра́дуяся, взыва́л еси́: сла́ва си́ле Твое́й, Го́споди.

Богоро́дичен: Я́ко присе́нну прови́дя Тя́ дре́вле го́ру Авваку́м, Всенепоро́чная, нося́щу Сло́во, вся́ осеня́ющее от пла́мене преступле́ния и грехо́в, Отрокови́це, жже́ния.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Боже́ственными мо́лниями всему́драго пропове́дания просвети́л еси́ неве́дения но́щию одержи́мыя, богому́дре всеблаже́нне.

Боже́ственная река́, проше́дши из се́рдца твоего́, потопи́ пото́ки ле́стныя и ра́зумы ве́рных, преблаже́нне, напои́.

Вжиля́емь благи́ми наде́ждами, претерпе́л еси́, влеко́мь четы́рьми и зе́млю освяща́я кровьми́, богоприя́тне.

Богоро́дичен: Тя́, Еди́ну от все́х родо́в, избра́ Госпо́дь, Богоро́дице, и из Тебе́ воплоти́ся, обожи́в челове́чество.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Ника́коже прельще́ньми ослабе́вша, льсти́вый неми́лостивно тя́ ссеца́ет ра́нами, богому́дре, смотря́юща к сла́ве, ю́же ти́ Христо́с пода́ст, прославля́я тя́.

Полки́ враго́в неви́димых я́звами уязви́л еси́, блаже́нне, пло́ти твоея́, Архи́ппе, и, облича́я, се́рдце мучи́телево терза́ньми расто́ргл еси́.

И́же ка́мению нечу́вственным се́рдцем служа́щии, ка́мением побива́ют тя́, блаже́нне, живота́ ка́мень испове́дающа и пре́лести утвержде́ние, му́чениче, сокруша́юща.

Богоро́дичен: Умерщвле́ния совле́кся, в жи́знь облече́ся в раи́, Де́во, Ада́м, Твои́м же обезсме́ртвися живоно́сным Рождество́м, Всесвята́я Богоневе́сто.

Конда́к, гла́с 4.

Я́ко звезду́ вели́кую, тя́ Це́рковь иму́щи, Архи́ппе, чуде́с твои́х луча́ми просвеща́ема, зове́т тебе́: спаси́ ве́рою почита́ющия па́мять твою́.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Богоглаго́ланьми богому́дрыми, всеблаже́нне, свиде́тельствован, ра́зумом и́стинным, тму́ неве́дения от ду́ш отгна́л еси́ му́дрости благода́тию честно́му сло́ву твоему́ повину́вшияся.

В ро́ве тя́, му́чениче, до́льнейшем погреба́ют наро́ди злочести́вых и ка́мением неми́лостивно умерщвля́ют, воспева́ющаго: благослове́н еси́ в хра́ме сла́вы Твоея́, Го́споди.

Земля́ те́ло погребе́ное, му́чениче, показу́ет, источа́я исцеле́ний во́ды ве́рным, не́бо же, блаже́нный Архи́ппе, ду́х тво́й страстоте́рпческим душа́м причита́ет.

Богоро́дичен: Зе́млю у́бо мгло́ю, не́бо же о́блаки Госпо́дь, Отрокови́це, одева́я, во́лею в пло́ть ме́ртвенную от крове́й Твои́х одева́ется, во оде́жду сла́вы безсме́ртныя одева́я челове́ка.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Па́вел, похвала́ми свяще́нными похваля́я тя́, Архи́ппе сла́вне, сво́ина тя́, свя́те, написа́, соверши́теля боже́ственных дея́ний, служа́ща ему́ и ве́рою пою́ща: благослови́те, вся́ дела́ Госпо́дня, Го́спода.

Глаго́лы пома́зася честны́ми к муче́нию досточу́дная Апфи́я, лю́бящи, прему́дре, я́ко сы́на тя́ и́скреннейшаго, с не́юже в вы́шних живе́ши Ца́рствиих, вопия́: благослови́те, вся́ дела́ Госпо́дня, Го́спода.

Младе́нцы су́щии ра́зумом, тя́, иму́щаго смы́сл, младе́нцем во игра́ние преда́ша, Архи́ппе, стра́ждуща, терпели́внейше, и от ни́х неми́лостивно пробода́ема и вопию́ща: вся́ дела́, благослови́те, Госпо́дня, Го́спода.

Богоро́дичен: Ме́ртв сне́ди ра́ди еди́ныя Ада́м бы́сть, объе́мь сме́рть са́да разу́мнаго, Чи́стая, Тебе́ же ра́ди оживле́н, и рая́ пи́щу па́ки восприя́т, воспева́я: благослови́те, вся́ дела́ Госпо́дня, Го́спода.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Да ве́чную сла́ву насле́диши, страстоте́рпче, сла́ву земну́ю презре́л еси́, непостоя́нную же и преходя́щую, и ко Христу́ приступи́л еси́, сла́вою Сего́ украша́емь.

Венце́м увязе́ся, богому́дре, побе́дным ве́рх тво́й, и оде́ялся еси́ в багряни́цу, твои́ми кровьми́ омоче́ную, Архи́ппе, и со Христо́м, ра́дуяся, ца́рствуеши, преблаже́нне.

Я́ко верхо́внаго, всеблаже́нне, апо́столов бы́в учени́к, Па́вла му́драго богоглаго́ливаго, с те́м ра́дуешися, ве́чнующее насле́дуеши наслажде́ние, Колосса́ев удобре́ние.

Собра́шася лю́дие в па́мяти светоно́сней твое́й воспе́ти благода́вца Спа́са и до́блия, Архи́ппе, боле́зни твоя́, я́же му́жески претерпе́л еси́, низложи́в многоко́зненнаго.

Богоро́дичен: Нося́щи Христа́ на объя́тиих, ма́нием нося́щаго вся́, Сего́, я́ко Сы́на Твоего́, моли́, от ру́к врага́ мя́, Пречи́стая, изба́вити и за милосе́рдия бе́здну объя́ти и спасти́ мя́.