Кондак 1

Взбранной Воеводе, невечерняго Света Родительнице, Божественное знамение спасения — Христа Богомладенца на руку Своею держащи, молитвам Церкве земныя внемлющей, струи животворныя от явленныя иконы Своея Озерянския всем верным источающей, благодарственная восписуем Ти раби Твои, Богородице. Но яко имущая державу непобедимую, от всяких нас бед свободи и щедротами Сына Твоего души наша озари, да зовем Ти: Радуйся, благословенная в женах Богородице, светом любве Христовой нас озаряющая.

Икос 1

Архангел Гавриил, спасение наше предвозвещая, благословенную в женах пронарече Тя, Богородице. Мы же, благовестнику Бога Вышняго внемлюще, велию таинству дивящеся, радуемся; Тебе — знамение Лика Своего Озерянскаго нам даровавшую — Матерь Господа нашего исповедуем, и яко Матери милосердия и щедрот, со благоговением вопием Ти: Радуйся, священное сокровище славы Божией, свещеносяще во Святая Святых светло введенная; Радуйся, благоволения Божия предображение и человеков спасения проповедание. Радуйся, пророческих проречений сбытие многоценное, Христа всем предвозвестившая; Радуйся, о Тебе бо Небесная вся удивишася, зряще Духа Святаго в Тя всельшася. Радуйся, Главизно нашего спасения, Триипостасное естество в Едином Божестве миру явившая; Радуйся, Отроча Младо, Отчее Сияние, мир просветившее, нам родившая. Радуйся, Мати Пречистая, прежде рождества и по рождестве Дева пребывшая; Радуйся, яко о Рождестве Сына Твоего вси земнороднии, спасающеся, возвеселишася. Радуйся, благословенная в женах Богородице, светом любве Христовой нас озаряющая.

Кондак 2

Видя благочестивый муж веси Озерянския, егда изыде на делание свое, святую икону Твою, Владычице, внезапу косою его разсеченную, со слезами умиления к Лику Твоему повержеся, и со благоговением разсеченныя части в дом свой принесе, слезно прося умилостивления о гресе своем. Егда же воутрии сих не обрете, страхом и скорбию объят бысть, помысли бо гневу Божию на доме своем быти, со умилением возопи Богу: Аллилуиа.

Икос 2

Разумети хотя тайны сея силу, еюже сокрыся из дому его святая икона Твоя, Владычице, муж сей боголюбивый на место разсечения ея поспеши. И егда же паки сращенну сию обретше, знамение велие в сем уразуме, о нем же иерею Феодору поведа, и людем веси Озерянския о чудеси велие возвести. Тии же о Твоем, Богомати, милосердии слышавше, гласом радования благодарне возопиша: Откуду нам сие, да Мати Господа нашего к нам прииде! Сице умиляющеся, воспеваху Ти таковая: Радуйся, Благодатная, Господь с Тобою, Имже мир от греха и смерти спасеся; Радуйся, благословен бо Плод чрева Твоего, Имже глава змиева сокрушися. Радуйся, Церкве Христовы, седмию Вселенскими Соборы утвержденныя, присное украшение; Радуйся, веры Православныя, Духом Святым ограждаемыя, непоколебимое утверждение. Радуйся, Препрославленная, во дни нашествия иноплеменник всемощно нас охраняющая; Радуйся, мольбы верных Своих, пред Пречистым Твоим образом приносимыя, милостиво приемлющая, Радуйся, сращением святыя иконы Твоея мужа праведна зело возвеселившая; Радуйся, разсеченное диаволом естество наше Рождеством Сына Твоего паки с Богом соединившая. Радуйся, благословенная в женах Богородице, светом любве Христовой нас озаряющая.

Кондак 3

Сила благодати неисповедимая не токмо от святыя иконы Твоея, Пречистая, верным источашеся, но и во источнице, на месте чуднаго явления ея, хромым хождение, глухим слышание, слепым прозрение обильно подавашеся. Тако бо Твоего Матерняго милосердия бездну неизследимую людие видевше, от недугов душевных и телесных исцеляхуся, сердца же своя в любви Божией утверждаху, с веселием поюще Ему: Аллилуиа.

Икос 3

Имея сие неописуемое сокровище веры — Твоего, о, Богомати, Лика Пречистаго благословение, и в нем Твой Покров и земли нашея благодатное украшение, иерей Божий Феодор, умиляяся, все имение свое разда и в пределех веси Озерянския, святую обитель — храмину Лику Твоему со пустыннолюбцем Севастианом воздвиже; себе же, в жертву живую — иночествовати в ней, Сыну Твоему и Богу нашему приведе, идеже со инеми пустыннолюбцы о Тебе, Благодатная, радуяся, сынолюбно воспе таковая: Радуйся, Мудрость, Слово и Силу — Сына Отча, из Тебе воплотившагося, миру явившая; Радуйся, Христа — Пасху нетленную мертвым, живым и грядущим уготовившая. Радуйся, Владычице милостивая, Свой Божественный Покров на нас простирающая; Радуйся, Голубице чадолюбивая, утешение благое в сердца наша низпосылающая. Радуйся, Покрове ширший облака, явлением иконы Твоея милостивно нас посетившая; Радуйся, любвеобильная Мати, землю Харьковскую благодатно освятившая. Радуйся, Божия Слова предивное Селение, град наш и люди от нашествия вражия охраняющая; Радуйся, незримая путеводительнице, к небесному Отечеству нас руководящая. Радуйся, благословенная в женах Богородице, светом любве Христовой нас озаряющая.

Кондак 4

Бурю житейских скорбей и напастей в людех утолити хотящи, святую икону Твою на утешение нам даровала еси, Владычице, Юже аки Самую Тя с нами сущую зряще, недоумеюще, взываем: кую Ти похвалу принесем, Заступнице усердная, Яже источник благодатных исцелений пред Пречистым образом Твоим с верою молящимся и Твоея помощи просящим всещедро источаеши, и сице непрестанно нас милуеши, разве неисчерпаемыя щедроты Твоя величающе, благодарственно вопием Триединому Богу: Аллилуиа.

Икос 4

Слышавше ближнии и дальнии людие о пречудном явлении святыя иконы Твоея и о чудесех от нея бываемых, со умилением в святую обитель Озерянскую притекаху, и во всяких скорбех житейских, и в дни нашествия иноплеменник, в надежде спасения своего, о Тебе, Всепетая Мати, уверяшася, и сице ликовствующе, Господа любовию прославляху. Темже и мы, надежду радости сея приемше, о Господе радуемся, Тебе же гласом хваления приносим таковая: Радуйся, Агнице, рождшая Агнца, вземшаго грехи мира, — небесе и земли Царице и Владычице; Радуйся, всех верных от зол ограждение и священное прибежище. Радуйся, Благая Утешительнице, нечаянную радость в святей иконе Твоей нам принесшая; Радуйся, душ немощных Целительнице, благость любве Божия нам открывшая. Радуйся, упование на милосердие Божие в сердца наша благодатно вселяющая; Радуйся, теплотою любве Божественныя сердца наша оживотворяющая. Радуйся, одушевленный Храме, Великаго Царя Божественное жилище; Радуйся, Селение Небесное, Херувим пребольше и Серафим превыше. Радуйся, благословенная в женах Богородице, светом любве Христовой нас озаряющая.

Кондак 5

Боготечней звезде икона Твоя, о, Богомати, уподобися, егда святыя — обители Озерянскую, Куряжскую и Харьковскую обтекаше и цельбоносньми струи, неоскудно от нея источающимися, изобильно верных напаяше и, благодатию Святаго духа тех оживотворяющи, телесне и душевне, по вере их, исцеляше. Мы же душевныма нашима очима к Тебе, Первообразу Ея, возводимся, недугов наших исцеления, грехов прощения и Небесным Утешителем душ наших посещения умильно просим, с верою вопиюще о Тебе Богу: Аллилуиа.

Икос 5

Видевше икону Твою, Владычице, косою разсеченную и чудодейственно сращенную сущу, и токи чудес от нея изливаемыя, вси людие, со усердием к ней притекающе, Матерний Покров Твой и защищение, надежду и умилостивление в ней разумеваху. Сице и мы, стрелами врага разсекаеми и волнами страстей потопляеми, душевне изнемогающе, в Тебе, о, Всеблагая, надежду нашего спасения имуще, дерзающе молимся: услыши нас, грешными усты глаголющих Ти сицевая: Радуйся, Преблагая Покровительнице града нашего, Твоими бо молитвами роди христианстии спасаются; Радуйся, всех греховне блуждающих на путь жизни вечныя добре наставляющая. Радуйся, безумства, лени и страстей силою любве Твоея нас милостивно спасающая; Радуйся, бедныя души наша, огнем Духа Святаго, на подвиг любве согревающая и укрепляющая. Радуйся, всех под Твой покров и защищение Матерне приемлющая; Радуйся, в подвиге веры изнемогающих молитвам их внемлющая. Радуйся, болящия и безнадежныя от одра болезни возставляющая; Радуйся, верная Спутнице, путешествующих и по морю плавающих от всяких бед избавляющая. Радуйся, благословенная в женах Богородице, светом любве Христовой нас озаряющая.

Кондак 6

Проповедник немолчен благодатныя помощи Богоматере явися человек некий, суху руку имый, иже со слезами умиления к иконе Ея святей припадая, удобь исцеление прият, и о чудеси, на нем бывшем, с радостию и благодарением всей церкви поведа. Мы же, имуще сию источник благодатных исцелений, наипаче же пред Престолом Божиим Заступницы усердныя за всех нас Матернее заступление, со дерзновением вопием любящему нас Богу: Аллилуиа.

Икос 6

Возсия нам, паче лучь солнечных, святая икона Твоя, Владычице, в пределех Озерянских, егда губительная язва на страну нашу найде, и многи острием смерти изсече. Людие же, гнев Божий видяще, со слезами умиления ко святей иконе Твоей, о, Богомати, повергахуся, и не токмо православнии, но и иновернии, к источнику Твоего милосердия притекавший с верою, исцеляхуся. Сице бо милость Божию Твоими Матерними молитвами на себе видяще, со благодарением воспеваху Ти таковая: Радуйся, в дни мора язвеннаго непреложная наша Надеждо и Спасительнице; Радуйся, всех, в неудобоисцельных недузех страждущих, премилосердная Целительнице. Радуйся, ум наш, небрежением омраченный, благодатными струями, от иконы Твоея изливаемыми, озаряющая; Радуйся, близ смерти сущия и душевне изнемогающия милостивно к жизни возвращающая. Радуйся, светлое благодати познание, о Тебе бо вся силы небесныя хвалятся; Радуйся, надеждо благ вечных, Тобою бо земнороднии к жизни вечней приуготовляются. Радуйся, Мати Предвечнаго Бога, целебную радость верным источающая; Радуйся, Честною Кровию Сына Твоего грехи мира омывающая; Радуйся, благословенная в женах Богородице, светом любве Христовой нас озаряющая.

Кондак 7

Хотящи явити людем страждущим Твоея Матерния любве неисчерпаемую щедрот бездну, аки студенцы в пустыни знойней, чудотворныя иконы Твоя и новая знамения от них, о, Богомати, даровала еси, да вси в болезнех душевных и телесных неисцельно изнемогающи, и ко Твоему милосердию с верою притекающии, спасение обретают. Тако у иконы Твоея Озерянския немощнии и одержимии, исцеления душ и телес своих приемлюще, с веселием и благодарением воспеваша Богу: Аллилуиа.

Икос 7

Новую песнь хваления принесе Ти пажить Харьковская, Мати Врача душ и телес наших, егда некая слепая отроковица с материю своею слезныя молитвы у иконы Твоея Озерянския творящи, внезапну велиим гласом радования возопи: О, мати моя! Свет Божий вижу, тьму непроходную очес моих просвещающий! Людие же, видевше Твоего, о, Богомати, благодатнаго врачевания силу, Твоему милосердию себе вверяху, с верою и любовию ко святей иконе Твоей припадающе, таковыми взываху похвалы: Радуйся, Источниче милосердия неисчерпаемый, неисцельных болезней врачевание содержащий; Радуйся, всех оставленных врачами Твоею благодатною силою исцеляющая. Радуйся, дев благочестивых невестительнице и усердная о нас молитвеннице; Радуйся, во искушениих и соблазнах житейских блуждающих ко спасению Путеводительнице. Радуйся, Звездо неугасимая, зрети Бога Вышняго нас просвещающая; Радуйся, растления душевнаго и совести лукавства нас избавляющая. Радуйся, о Тебе бо матери и дщери, и невесты Христовы надежду имуще, спасаются; Радуйся, божественную радость и вечное спасение уповающим на Тя приуготовляющая. Радуйся, благословенная в женах Богородице, светом любве Христовой нас озаряющая.

Кондак 8

Страшное и ужасное видение людем Божиим бысть, егда у святыя иконы Твоея, Владычице, чудо велие и неизреченное совершися: дщерь бо некая, бесом томимая сущи, хулу страшную на Сию изрекаше, обаче молитв ради Святыя Церкве, наипаче же Твоего предстательства силою, от сего лукавства спасена бысть, и на славословие Твое, Пречистая, подвижеся. Мы же радуемся и, веселимся, яко не посмеются о нас врази наши, ниже погубит нас Господь грех ради наших, молитвами Твоими. Сего ради, благодаряще, о Тебе вопием Богу: Аллилуиа.

Икос 8

Вся в вышних пребывающи и нижних, к Лику Твоему святому припадающих, никакоже оставлявши, Богородице. Сице бо человек, духа злаго имый, с верою моляся пред Пречистым образом Твоим Озерянским, Владычице, исцелен бысть, и в радости душевней о благодеянии на нем бывшем, благодарение Тебе принесе. С ним же и на нас, о, Всеблагая, во время благопотребно посети и от ловления диаволя души наша сохрани, да не постыдимся, ниже посрамимся, принося Ти сицевыя похвалы: Радуйся, яко именем Твоим, паче всякаго имене, пленения диаволя и всея силы вражия человецы свобождаются; Радуйся, яко призывающий имя твое от клеветы человеческия и внезапныя смерти Тобою избавляются. Радуйся, бедствующим на всяком месте всеусердная Предстательнице; Радуйся, за обидимых, озлобленных и уничиженных присная Ходатаице. Радуйся, Ты бо кающихся грешников из челюстей духов злобы изымавши; Радуйся, Ты бо всех на Тя уповающих в любовь Божию вводиши. Радуйся, красотою девства Твоего воспевати величие Божие нас научающая; Радуйся, Рождеством Сына Твоего грозное смерти жало притупляющая. Радуйся, благословенная в женах Богородице, светом любве Христовой нас озаряющая.

Кондак 9

Вси сущии в бедах, болезнех и печалех, радостно восхвалим Святую Заступницу нашу, Богородицу, обретшую благодать у Бога, во еже недужныя исцеляти, немощныя укрепляти, плененныя свобождати и стражущия от духов нечистых и прочих бед избавляти. Темже, яко несомненней Предстательнице нашей умильно глаголем: помози и научи нас, о, Милосердствующая Мати, волю Божию всегда творити, и пребывати в любви Его, и яко кадило благовонное, непрестанно приносити Ему: Аллилуиа.

Икос 9

Витии многовещаннии недоумеют, что глаголати о Тебе, Мати Божия, видяще тайну необъемлемую и величие неописуемое святаго Лика Твоего, Дево Чистая, даром чудотворений сияющаго и всех, припадающих к нему с верою, цельбоносными дарами снабдевающаго. Мы же, неисчетная благодеяния сия ведуще, аще и от скверных устен наших, обаче умиленною душею и сердцем сокрушенным, дерзаем воспевати Тебе сия похвалы: Радуйся, Отца Небеснаго благоволения предображение, кающихся грешников милосердием Божиим снабдевающая; Радуйся, Едина Мати милосердия, вдов и сирот милующая и питающая. Радуйся, на горе Афонстей, Почаевстей и в иных обителех иконами Твоими преславно чудодействующая; Радуйся, новую купель Силоамскую в пустыне Озерянстей верным на утешение источившая. Радуйся, иноков благоподвизающихся к Отечеству Небесному верная Предводительнице; Радуйся, супружеств христианских благословение и чад их Преблагая Покровительнице. Радуйся, Церкве Небесныя присное радование, земныя же от всех козней вражиих непреодоленное избавление; Радуйся, в вечнем Царствии Сына Твоего, радости неизреченныя верным уготовление. Радуйся, благословенная в женах Богородице, светом любве Христовой нас озаряющая.

Кондак 10

Спасительное прибежище и Твоего Предстательства уверение, и милосердия Твоего явление — икона Озерянская нам, Владычице, показася, пред Нею же души наша в молитве изливаем и верою Тебе вопием: воззри, Милосердая, на люди Твоя, вся скорби наша и печали утоли, утешение благое в сердца наша низпосли, и спасение вечное душам нашим, Пречистая, испроси, да спасаеми Тобою, Сыну Твоему и Богу нашему благодарно зовем: Аллилуиа.

Икос 10

Стену тверду и от бед ограждение, противу козней вражиих спасительное прибежище, недугов исцеление и ины дары многи в святей иконе Твоей, Владычице, обильно даровала еси нам. Сию благоверный христолюбец, иже ушесы своими зело страдаше, в трикратном явлении видев, со умилением к Той припадая, благодатнаго исцеления сподобися. Тако видяще любве Твоея, Богомати, неисчерпаемое море, дерзающе, молимся: услыши нас убогих, грешными усты глаголющих Ти сицевая: Радуйся, Предвечнаго Царя Родительнице, Церкве Православныя забрало и ограждение; Радуйся, народа нашего от бед Хранительнице, и от всех врагов избавление. Радуйся, наша всеусердная Благодетельнице, паству Харьковскую матерински опекающая; Радуйся, Цвете Небеснаго благоухания, благодатным миром сердца наша растворяющая. Радуйся, незримая Предстательнице, Ты бо воистину крепость наша и спасение; Радуйся, благоутробная и милостивая к человеком, болезней наших надежное исцеление. Радуйся, благая хлебодательнице, дождями ранними и поздними землю нашу напояющая; Радуйся, от враг видимых и невидимых, возстающих на ны, нас избавляющая. Радуйся, благословенная в женах Богородице, светом любве Христовой нас озаряющая.

Кондак 11

Пение всеумиленное приносим Ти, Всемилостивая Владычице! Не вемы бо, что сотворим, егда внезапу найде на нас страшный час смерти? На Тя все упование наше возлагаем, и к Твоей святей иконе, юже на утешение нам даровала еси, припадающе, просим: буди милостива к нам грешным и не презри молений наших, но всели в сердца наша печаль по Бозе Спасителе нашем, да пламенною любовию зовем Ему: Аллилуиа.

Икос 11

Светозарную свещу, во мраце жития сущим неугасимую, зрим святую икону Твою, Всенепорочная, — Твоего милосердия источник, благодать всем источающий, у него же мнози грешницы, кающеся, спасение улучиша, и Твоим ходатайством Царствие Небесное обретоша. Помози и нам, Всемилостивая, да Твоими Матерними молитвами с мудрыми девами Царствию Христову приобщимся, идеже веселящеся вопием Ти таковая: Радуйся, приятное молитвы кадило, за спасение мира у престола Святыя Троицы присно благоухающая; Радуйся, органе молитвы неумолкающия, милосердия Божия миру просящая. Радуйся, равноапостолов и проповедников евангельския истины благодатное вдохновение; Радуйся, верных иерархов Церкве Христовы правило веры и от скорбей избавление. Радуйся, храмов Божиих усердных строителей и верных в них служителей любовию Христовою обогащение; Радуйся, трудолюбивых земледельцев хлебом жизни вечныя насыщение. Радуйся, Божественною красотою Сына Твоего и Бога нашего непрестанно наслаждающаяся; Радуйся, Его же, яко Судию и Бога, о спасении мира неотступно умоляющая. Радуйся, благословенная в женах Богородице, светом любве Христовой нас озаряющая.

Кондак 12

Благодати Твоея земное знамение дати восхотевши, источник чудес неисчетных пажити Харьковстей в иконе Твоей Озерянской отверзла еси, Владычице. В ней же Божественная благодать, еюже Всевышний облагодатствова Тя, знамения и чудеса выну содевает, душевных и телесных недугов исцеление всем с верою притекающим подает. Темже и нам благодати сея помощь у Сына Твоего, Пречистая, испроси, да не погибнем люте без покаяния, но Тобою спасаемии, немолчно поем Единому Светозарному Богу: Аллилуиа.

Икос 12

Поюще любве Твоея бездну неизреченную, юже изливаеши роду христианскому, благодарно припадающе, молим Тя, Богородице: яко в животе сем, тако и в страшный час смерти не остави нас, но ускори на помощь и, яко воистину Матерь Божия и над всеми владычествующая, от лютых мытарств и руки бесовския души наша исхити, и Сыну Твоему и Богу нашему спасены приведи, да якоже на земли, тако и на небеси, со всеми святыми воспеваем Ти таковыя похвалы: Радуйся, щедрот бездно, от начала веков во главизну нашего спасения предъизбранная; Радуйся, источниче любве неизреченныя, Материю милостивою Страстотерпцем Голгофским миру указанная. Радуйся, у Креста Сыну Своему сострадавшая, и с Ним мир возлюбившая; Радуйся, Церковь Сына Твоего от всех зол избавляющая, род христианский возвеличившая. Радуйся, цвете девства неувядаемого, венец всех добродетелей в Себе сплетшая; Радуйся, радуго Божественнаго Знамения, небесныя и земныя у Престола Божия Собою совокупльшая. Радуйся, всесвятый бо Лик Твой, благодатию и жизнию дышущий, яко рай Божественный, на Тя взирающим; Радуйся, превыше Небес Превознесенная, Отрадо и Утешение непрестанно Тя величающим. Радуйся, благословенная в женах Богородице, светом любве Христовой нас озаряющая.

Кондак 13

О, Преблагословенная Мати Христа Бога нашего, Церкве Небесныя предивное украшение, земныя же щит и утверждение, всем во всяких скорбех Матернее заступление, и среди соблазнов мира сего благодатное душ наших озарение! Приими, Всемилостивая, сие убогое моление наше, пред Пречистым образом Твоим Тебе приносимое, и умоли Всеблагаго Бога явити милость Свою на ны и на народы наша, во еже в силе и благодати Духа Святаго всякое зло препобеждая, николиже в любви Божией не насытитися, и тако чистым сердцем зде и в будущем веце воспевати святых Святейшему Слову: Аллилуиа.

(Этот кондак читается трижды, затем икос 1 и кондак 1)

Молитва к Пресвятой Богородице перед Ея иконой, именуемой «Озерянской»

О, Преблагословенная Владычице наша Богородице! К Тебе, обретшей благодать пред Богом, во еже родити миру Спаса душ наших, с Ним же у Креста Его молитвою за мир сраспинавшаяся, и Материю Света Им пронареченная, припадающе, молимся. Призри, Всемилостивая, на нас, Предвечным Советом Пресвятыя Троицы, к благодатному наследию жизни вечныя созданных, жалом же греховным уязвленных и смерти телесней и душевней поверженных сущих, и якоже святую икону Твою Озерянскую пречудне срастивши, всем верным источник чудес от нея источила еси, сице же и нас, на Твою, Богомати, икону, благоговейно взирающих, душевне и телесне исцели, и немощное естество наше, сечением греховным разсекаемое, паки с Богом соедини, и чадами Его Божественныя любве, силою и действием Святаго Духа, нас соделай. Сердца же наша, Всемилостивая, благодатию Христовою раствори, и волю нашу ко исполнению заповедей Божиих спешну сотвори, ноги же наши на путь мирен — Истину Христову направи. И сице, о, Всеблагая, все естество наше любовию к Богу воспламени. Владычице Пресвятая, якоже в тяжком нашествии иноплеменник в пределы наша святою иконою Твоею Озерянскою Православныя люди укрепляла еси, тако и ныне знамением Лика сего Пресвятаго паству Харьковскую и всех верных чад страны нашея в единомыслии веры утверди, и от тлетворных расколов и ересей злочестивых и иных бед сохрани, Отечеству же нашему незыблемаго мира от Бога испроси, и от всех враг, мыслящих нам злая, нас избави. Верных же Твоих, пред святою иконою Твоею припадающих и в скорбех Тебе молящихся, прошения исполни, и вся, яже ко спасению потребная, всем нам даруй. Убогия же слезы и воздыхания наша благоприятны пред Богом сотвори и прощение грехов наших испроси. И тако, Преблагословенная Мати, воздвигни нас на благодарственное Ти славословие, и в подвизе покаяния нас укрепляющи, неосужденных причастников Пречистаго Тела и Честныя Крове Господа нашего Иисуса Христа по кончине жития нашего быти нас милостивно сподоби. В час же исхода нашего молитву Матернюю о нас пред Богом сотвори, и бедныя души наша чрез мытарства лютыя, начала и власти тмы, невозбранно в Царствие Небесное, идеже мир и радость безконечная, приведи, — во еже в Церкви Небесней, Тобою, Честнейшею Херувим и Славнейшею без сравнения Серафим, украшенной, непрестанно славословити и воспевати смерти Победителя — Агнца Божия, вземшаго грехи мира. Ему же, о, Благодатная, Тебе ради, осанна и благодарение, слава, честь и поклонение, со Безначальным Его Отцем и со Пресвятым, Благим и Животворящим Духом — Утешителем Святым, ныне и присно, и во веки веков. Аминь!

Молитва иная

От суеты житейския возникше и ума своего помыслы во едино собравше, ко Твоей, Богородице, иконе очи душ и телес наших воздвизаем, и Тебе взываем сице: не остави, Пречистая, нас немощных во гресех наших растлетися, не попусти злому демону души наша от Сына Твоего в дебри страстей отгнати, но помози нам Того заповеди присно памятовати, да ниже блудным возбешением себе предаем, ниже друг друга злобою угрызаем, но якоже днесь, святыни Твоей предстояще, о исправлении жития нашего ревностию распаляемся, тако и от храма Твоего в дома своя отшедше, сие доброе намерение сохранити потщимся. По сих же и телесныя наша нужды утоли, и горести Твоею молитвою исцели, Всепетая. Вемы, яко подобаше нам паче вся сия благодушне претерпевати и точию о терпении в скорбех Господа просити: но понеже изнемогают в печалях душы наша и помыслы уныния нашу колеблют веру, сего ради в сокрушении сердец к Тебе сице взываем: якоже безчисленныя болящыя страдальцы исцелила еси и скорбящыя утешила еси, тако и нас пред чудотворною Твоею иконою припадающих и в скорби Тебе молящихся услыши, и всех прошения во благое исполни, болящым здравие, скорбящым утешение подающи, во вражде сущым мир от Бога низпосылающи, сомнящымся же веры утверждение. Услыши грешныя рабы Твоя, Пречистая, воздвигни нас на благодарственное Ти славословие, да умножится вера людей Твоих, да прославится в них Твое заступление, да тако Царствие Сына Твоего посреди нас утвердится. Емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Духом, ныне и присно и во веки веков. Аминь.