Мученикам Трофиму, Савватию и Доримедонту

Тропарь, глас 8:

В Тро́ице хвали́мый Бог тро́ицу му́ченик просла́ви,/ Трофи́ма и Савва́тия и Доримедо́нта:/ в Того́ бо ве́ровавше, врага́ низложи́ша.// Тех моли́твами, Христе́ Бо́же наш, поми́луй нас.

Кондак, глас 8:

Я́ко страда́льцев основа́ние и благоче́стия утвержде́ние,/ Це́рковь чтит и сла́вит твое́ светоно́сное страда́ние,/ приснопева́емый блаже́нне страда́льче, доблему́дре сла́вне Трофи́ме,/ со страда́вшими с тобо́ю,// очище́ние пою́щим тя испроси́, я́ко непобеди́мь.

Благоверному князю Феодору Смоленскому

Тропарь, глас 4:

Измла́да яви́лся еси́, богому́дре кня́же,/ боже́ствен сосу́д невозбра́нен Бо́гови,/ ны́не то́чиши нам многоцеле́ния,/ вся е́реси потопля́я и спаса́я при́сно свой град,/ и всех ве́рных сохраня́я, и неви́димо от ви́димых враг,/ ве́рою тя мо́лим, преподо́бне о́тче наш, кня́же Фео́доре,// моли́ спасти́ся душа́м на́шим.

Кондак, глас 8:

Богому́дренно пресели́стеся, святи́и,/ во град, при́сно доброде́тельми цвету́щии,/ в жи́зни сей принося́ще Бо́гови плоды́ бла́ги,/ преподо́бне Фео́доре и блаже́нне Дави́де с Константи́ном сла́вным,/ и яви́стеся, я́ко многоцвету́щая ра́йская древеса́ жи́зни/ и я́ко многосве́тлыя зве́зды, в ми́ре сия́юще благода́тию,/ в доброде́тели испра́вивше жизнь свою́,/ и сего́ ра́ди получи́сте живо́т ве́чный на Небесе́х./ Те́мже благода́рственно вам зове́м:// ра́дуйтеся, всеми́рнии свети́льницы и гра́ду на́шему Яросла́влю вели́кое утвержде́ние.

Преподобному Алексию Зосимовскому

Тропарь, глас 5:

Я́ко звезда́ путево́дная/ и уте́шитель богому́дрый/ в годи́ну лю́тых испыта́ний яви́лся еси́,/ затво́рниче преди́вный о́тче Алекси́е,/ огне́м бо ве́ры распала́емь,/ любо́вь Христо́ву стяжа́л еси́,/ те́мже и, благода́ть Ду́ха Свята́го восприе́м,/ и́мя избра́нника Бо́жия на патриа́рший престо́л/ жре́бием откры́л еси́./ Ны́не же, Святе́й Тро́ице предстоя́,// моли́ спасти́ся душа́м на́шим.

Кондак, глас 1:

Благочести́ваго ко́рене о́трасль свята́я,/ мно́гими доброде́тельми от ю́ности просия́л еси́,/ любо́вию Христо́вою уязви́вся,/ ева́нгельски лю́дем послужи́л еси́,/ и, в пусты́ню Зоси́мову всели́вся,/ неоску́дный исто́чник благода́ти показа́лся еси́,/ преподо́бне ста́рче наш Алекси́е,/ Це́ркве Ру́сския украше́ние./ Сла́ва Да́вшему ти кре́пость,/ сла́ва Избра́вшему тя,// сла́ва Де́йствующему тобо́ю всем исцеле́ния.

Молитва:

О, преподо́бне о́тче Алекси́е, преди́вный уго́дниче Христо́в, чудотво́рче и пресла́вный подви́жниче! Ты, мно́гия доброде́тели стяжа́вый и любо́вию Боже́ственною озаре́нный, лю́дем ве́рным уте́шитель и духо́вный наста́вник яви́лся еси́. Во времена́ же ско́рбных испыта́ний ве́ру Правосла́вную утвержда́я, коле́блющияся укрепля́л еси́, немощны́я со одра́ восставля́л еси́ и всем чу́дный помо́щник и моли́твенник был еси́. Ны́не смире́нно мо́лим тя, о́тче святы́й, разсла́бленныя поддержи́, стра́ждущия и больны́я уврачу́й и всем, притека́ющим к тебе́, ми́лостив предста́тель пред Бо́гом бу́ди. О, преподо́бне о́тче Алекси́е! Помози́ нам стяжа́ти смире́ние и кро́тость, да упраздня́тся раздо́ры и нестрое́ния и да пребу́дем в братолю́бии и покая́нии, прославля́юще Тро́ицу Святу́ю, Отца́, и Сы́на, и Свята́го Ду́ха. Ами́нь.

Благоверному князю Игорю (в Крещении Георгию, в иночестве Гавриилу) Черниговскому и Киевскому

Тропарь, глас 4:

Наста́ днесь всечестна́я па́мять страстоте́рпца благове́рнаго кня́зя И́горя,/ созыва́ющая лю́ди в пречестны́й храм Спа́сов,/ иде́же ра́достно соше́дшеся благочести́вых мно́жество/ моли́твенно пра́зднуют святу́ю па́мять твою́,/ и с ве́рою взыва́ют ти:/ моли́ся, свя́те, стране́ Росси́йстей, гра́ду Черни́гову и всем правосла́вным христиа́ном// в ми́ре и благоде́нствии спасти́ся.

Тропарь, глас 4:

Просвети́вся Боже́ственным креще́нием,/ Ду́ха Свята́го светлостьми́ озаря́ем,/ Ева́нгелие Христо́во в се́рдце твое́ восприя́л еси́/ де́лом сло́во Сы́на Бо́жия исполня́я, благове́рный кня́же И́горе,/ моли́ Всеблага́го Спаси́теля на́шего дарова́ти нам мир, и ми́лость,// и спасе́ние душ на́ших, чту́щих честну́ю па́мять твою́.

Кондак, глас 6:

Измени́л еси́ земна́го княже́ния сла́ву/ во и́ночества о́браз смире́нный/ и страда́льчески земно́е житие́ сконча́в,/ ны́не на Небесе́х ра́дуешися,/ усе́рдне моля́ся// о чту́щих тя, И́горе, страда́льцев похвало́.

Кондак, глас 6:

Кня́жескую диаде́му обагри́л еси́ кро́вию твое́ю,/ Богому́дре страстоте́рпче И́горе,/ за ски́птр крест в ру́ку прии́м, яви́лся еси́ победоно́сец/ и же́ртву непоро́чну Влады́це прине́сл еси́ себе́./ Я́ко бо а́гнец незло́бив от раб убие́н был еси́,/ и ны́не ра́дуяся предстои́ши Святе́й Тро́ице,// моли́ся спасти́ся душа́м на́шим.

Молитва:

О, святы́й уго́дниче Бо́жий, страстоте́рпче благове́рный, кня́же И́горе! Ты из мла́да Бо́га возлюби́л еси́, мудрова́ния плотска́я, че́сть и сла́ву кня́жескую ни во что же вмени́л еси́ и мона́шескаго о́браза, еще́ ю́ный ле́ты, дости́гл еси́, к Бо́гу еди́ному все́ю душе́ю твое́ю прилепи́лся еси́, и благо́е и́го Христо́во на ся взем, путе́м спаси́тельным неукло́нно ше́ствовал еси́ да́же до сме́рти му́ченическия. Сего́ ра́ди венча́ тя Госпо́дь, блаже́нне И́горе, венце́м сла́вы и прия́т в Своя́ Небе́сныя селе́ния, иде́же ты ны́не, неизрече́нныя сла́вы и ра́дости наслажда́ющеся в невече́рнем дни Ца́рствия Христо́ва, с ли́ки святы́х страстоте́рпцев и всех святы́х Бо́га о нас умоля́еши. Мо́лимся тебе́, свя́тче Бо́жий, припа́дая к честно́му о́бразу твоему́: моли́ся о нас гре́шных и непотре́бных, испроси́ моли́твами твои́ми ми́ра держа́ве на́шей, гра́ду сему́ (и свято́му хра́му сему́) благода́ти и ми́лости. Це́рковь святу́ю огради́ моли́твами твои́ми от ересе́й и раско́лов, па́стырем ея́ испроси́ ре́вность и благоче́стие, всем же нам любо́вь нелицеме́рную и терпе́ние да́руй, грехо́в на́ших проще́ние, боле́зней и вся́ких неду́гов исцеле́ние. Покры́й и сохрани́ всех нас от вся́ких бед, скорбе́й и напа́стей, да, благодаря́ще, просла́вим Святу́ю Живонача́льную Тро́ицу, Отца́ и Сы́на и Свята́го Ду́ха, во ве́ки веко́в. Ами́нь.

Священномученику Константину Богородскому (Голубеву)

Тропарь, глас 4:

Украше́ние свяще́нников яви́лся еси́ Константи́не, восприе́м бо кре́ст я́ко ору́жие,/ про́поведию сла́вною устраня́я раско́л и е́реси,/ благовествова́л еси́ Иису́са Христа́ глаго́ля:/ спаса́йтеся от ро́да сего́ развраще́ннаго./ Сего́ ра́ди му́ченическою кро́вию обагри́ся сла́вне,/ и ны́не ра́дуяся с ли́ки а́нгельскими,/ моли́ Христа́ Бо́га Це́рковь Всеросси́йскую/ от ересе́й и раско́лов сохрани́ти/ и спасти́ души́ на́ша.

Кондак, глас 4:

От младе́нчества к Бо́гу устреми́вся,/ благоче́стия ревни́телю и раско́ла искорени́телю,/ священному́чениче Константи́не,/ Христа́ му́жественно испове́дав,/ жесточа́йшая муче́ния прия́л еси́,/ Це́ркве Ру́сския благо́е украше́ние,/ моли́ Христа́ Бо́га/ грехо́в оставле́ние пода́ти/ чту́щим любо́вию святу́ю па́мять твою́.

Молитва:

О, страстоте́рпче Христо́в Константи́не блаже́нне! Кро́вию твое́ю я́ко багряни́цею украси́вся и небе́сных черто́гов и ве́чнующия сла́вы сподо́бився, не забу́ди и на́с на земли́ су́щих, но те́плым хода́тайством твои́м пред Бо́гом изба́ви все́х на́с от вся́кия ско́рби и боле́зни. Се́ бо, к честне́й и многоцеле́бней ра́це святы́х моще́й твои́х благогове́йно припа́дающе и лобыза́юще ю́, мы́ недосто́йнии и многогре́шнии к тебе́, я́ко ско́рому помо́щнику и те́плому моли́твеннику на́шему, прибега́ем, и с сокруше́нным и смире́нным ду́хом вопие́м: не пре́зри моле́ния на́с гре́шных, немощны́х во мно́гая беззако́ния впа́дших, но, я́ко благода́тию Бо́жиею венча́нный, очи́сти на́с от неду́г на́ших и испроси́ на́м у Христа́ Бо́га на́шего здра́вие душе́вное и теле́сное. Ты́ бо неоску́дную благода́ть исцеле́ний от Спа́са на́шего Иису́са Христа́ за ве́ру твою́, кро́вию запечатле́нную, прия́л еси́. Те́мже у́бо помози́ на́м в лю́тых не́мощех лежа́щим и челове́честей по́мощи отча́явшимся, к тебе́ же те́пле с ве́рою прибега́ющим, и исцеле́ние на́м подава́й неоску́дно: все́м же ве́рным грехо́в оставле́ние испроси́, да сла́вят ди́внаго во святы́х Свои́х Го́спода Бо́га и Спа́са на́шего Иису́са Христа́, и Пречи́стую Ма́терь Его́, и твое́ те́плое заступле́ние, всегда́, ны́не и при́сно и во ве́ки веко́в. Ами́нь.

Священномученику Николаю Искровскому

Тропарь, глас 1:

В житии́ твое́м до́бре подвиза́лся еси́, во страда́нии твое́м непоколеби́м в ве́ре пребы́в, незло́биво му́ченическую сме́рть прия́л еси́, священному́чениче, о́тче Нико́лае Искровский, моли́ о на́с Го́спода Спа́са ми́р ми́рови дарова́ти и душа́м на́шим ве́лию ми́лость.

Кондак, глас 2:

Труды́ и боле́зни на ра́мо свое́ взял еси́/ и, ра́дуяся, путе́м те́сным ше́ствовал еси́,/ страда́ньми за Христа́ Небе́снаго Ца́рства дости́гл еси́,/ моли́ о нас Бо́га Спа́са, священному́чениче Нико́лае,// обрести́ нам ми́лость в День Су́дный.

Молитва:

О, вели́кий уго́дниче Бо́жий и преди́вный па́стырю на́ш, о́тче Нико́лае! При́зри от го́рния сла́вы на на́с тя́жестию грехо́в серде́чно ослепле́нных и теплохла́дностию зараже́нных. Моли́ся, свя́тче Бо́жий, да сподо́бит на́с Госпо́дь стяжа́ти благода́ть для покая́ния, вно́вь обрести́ любо́вь к возстановле́нию утра́ченнаго сострада́ния, и Святу́ю Ру́сь пред Го́сподом очи́стити ве́рою для на́шего спаси́тельнаго оправда́ния. Помози́ на́м, о́тче Нико́лае, в ве́ре устоя́ти, ча́д свои́х под святы́м покро́вом Пречи́стой Де́вы Богоро́дицы досто́йно укрыва́ти, собо́рно в покая́нии благода́ть спасе́ния стяжа́ти, да сподо́бимся с тобо́ю насле́дия Ца́рствия Небе́снаго и ве́чнаго позна́ния творе́ний Бо́жиих и благода́тнаго славосло́вия Пресвяте́й Тро́ице: Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.

Преподобномученице Марии Мамонтовой-Шашиной

Тропарь, глас 5:

Христа́ Го́спода Иису́са ве́рная учени́це,/ Пресвяты́я Богоро́дицы смире́нная послу́шнице,/ преподо́бная страстоте́рпице Мари́е,/ ле́гкое и́го Христо́во взе́мшая и я́звы Госпо́дни любо́вию нося́щи,/ ле́ствицею му́чений к Нему́, я́ко Небе́сному Жениху́, востекла́ еси́,/ Его́же моли́ сохрани́тися нам во благоче́стии/ и спасти́ся душа́м на́шим.

Кондак, глас 4:

Я́ко крин багрянови́дный,/ посреде́ те́рний безбо́жия/ в земне́м Оте́честве твое́м процвела́ еси́,/ преподобному́ченице Мари́е честна́я,/ по́двиги же воздержа́ния страда́нием украси́вши,/ я́ко голуби́ца чи́стая в черто́г Небе́снаго Жениха́ возлете́ла еси́,/ И́же увенча́ тя красото́ю сла́вы нетле́нныя.

Молитва:

О, всехвальная преподобномученице Марие, кроткая Христова агнице, земли нашея цвете благоуханный, избранная, непорочная и добрая в женах! Ты, Христа всем сердцем возлюбивши, во обитель Колычевскую притекла еси и благое иго заповедей евангельских терпеливно подъяла еси. Во дни же гонений на Церковь Русскую мужественне во исповедании Православныя веры пребыла еси и, житие монашеское подвигом мучения увенчавши, в чертог Небеснаго Жениха вошла еси. Темже молим тя, славная в женах мученице: моли Церкви нашей в мире и благоденствии пребывати; стране нашей непоколебимей в Православии и мире сохранитися и всех врагов сокрушити; женам, подвиг иночества воприимшым, во благочестии и послушаниих монашеских укрепитися, в ревности по Бозе не оскудевати и неропотным, бодренным и благодарным всегда быти. Нам же, любовию тя почитающым, испроси время на покаяние, твердость во исповедании веры истинныя, заступление от козней вражиих и на Страшнем Суде предстояние одесную Господа нашего Иисуса Христа, Емуже со Отцем и Святым Духом подобает всякая слава, честь и поклонение ныне и присно и во веки веков. Аминь.