Преподобный Никоди́м Святогорец

Текст утвержден Священным Синодом
Русской Православной Церкви
25 декабря 2012 года (журнал № 131)

Творе́ние Гера́сима мона́ха Микрагианнани́та

Конда́к 1Глас 8

Подо́бен: Взбра́нной Воево́де:

Я́ко боже́ственнаго жи́тельства таи́нника изря́днаго и благоче́стия богоно́снаго учи́теля Правосла́вная Це́рковь тя почита́ет: с небесе́ бо дарова́ние прие́м, озаря́еши боже́ственными твои́ми писа́нии вопию́щия ти:

Ра́дуйся, о́тче Никоди́ме, Горы́ Святы́я сла́вное украше́ние.

И́кос 1

Ангел нра́вы и мно́гий ра́зумом, Никоди́ме, на Афо́не яви́лся еси́; а́нгельское бо имы́й житие́, ангелоле́пным гла́сом изъясни́л еси́ оте́ческая писа́ния, и́миже просвеща́еши вопию́щия:

Ра́дуйся, Накси́йское благоукраше́ние;

ра́дуйся, Афонское озаре́ние.

Ра́дуйся, оте́ческих догма́тов изложе́ние;

ра́дуйся, святы́х глаго́л изъясне́ние.

Ра́дуйся, высото́ мудрова́ния и прему́дрости реко́;

ра́дуйся, глубино́ боже́ственнаго ве́дения и сокро́вище любве́.

Ра́дуйся, я́ко показа́лся еси́ кни́жник богоно́сный;

ра́дуйся, я́ко толковни́к еси́ богоглаго́ливый.

Ра́дуйся, свети́льниче нра́вов че́стности;

ра́дуйся, пла́менниче го́рния све́тлости.

Ра́дуйся, и́мже ве́рнии утвержда́ются;

ра́дуйся, и́мже врази́ устраша́ются.

Ра́дуйся, о́тче Никоди́ме, Горы́ Святы́я сла́вное украше́ние.

Конда́к 2

Жития́ освяще́нна изде́тска иски́й, я́ко о́трасль боже́ственных роди́телей, мирски́й оста́вил еси́ мра́к, и ко Спа́су Христу́ устреми́лся еси́, Ему́же неукло́нне сле́дуя, Никоди́ме, вдохнове́н взыва́л еси́: Аллилу́ия.

И́кос 2

Ра́зумом богоприя́тным, я́ко уя́звлен боже́ственным жела́нием, прише́л еси́ в Го́ру Афо́нскую, и доброде́тельным жи́тельством к гора́м возвы́сился еси́ ве́чным, по Дави́ду, Никоди́ме, слы́ша от нас сицева́я:

Ра́дуйся, жития́ преподо́бнаго сокро́вище;

ра́дуйся, све́та невеще́ственнаго прия́телище.

Ра́дуйся, и́ноком Афо́нским о́бразе;

ра́дуйся, благоче́ствующих всех утвержде́ние.

Ра́дуйся, у́ме богонауче́нный, небе́сных мы́слей испо́лненный;

ра́дуйся, уста́ богодви́жная богодохнове́нных уче́ний.

Ра́дуйся, я́ко от ми́ра всеце́ло удали́лся еси́;

ра́дуйся, я́ко во Афо́не к го́рним напра́вился еси́.

Ра́дуйся, ли́ка преподо́бных прича́стниче;

ра́дуйся, ве́рным ве́лий учи́телю.

Ра́дуйся, враго́в поража́яй помышле́ния;

ра́дуйся, ду́ши утвержда́яй неради́выя.

Ра́дуйся, о́тче Никоди́ме, Горы́ Святы́я сла́вное украше́ние.

Конда́к 3

На сла́ву Госпо́дню у́мне взира́яй, очи́стив себе́ от веще́ственных, небе́сным наставля́яй показа́лся еси́, богоглаго́ливый Никоди́ме, де́лом и сло́вом вся́ к Бо́гу управля́я вопию́щия: Аллилу́ия.

И́кос 3

Име́яй се́рдце твое́ огне́м пали́мо стра́ха Бо́жия, неколеби́мо а́нгельское проше́л еси́ житие́, и я́же в нем благода́ти, я́ко Ду́хом просвеще́н, Никоди́ме, изъясня́еши зову́щим:

Ра́дуйся, сто́лпе воздержа́ния;

ра́дуйся, таи́нниче безстра́стия.

Ра́дуйся, воспери́вый ум к небе́сным;

ра́дуйся, стяжа́вый отту́ду неизглаго́ланная.

Ра́дуйся, благода́ти Духо́вныя до́ме светови́дный;

ра́дуйся, селе́ние многоце́нное жи́тельства доброде́тельнаго.

Ра́дуйся, я́ко ре́ки уче́ний источа́еши;

ра́дуйся, яко пото́ки страсте́й изсуша́еши.

Ра́дуйся, Христо́вым обогати́выйся осия́нием;

ра́дуйся, вра́жие умертви́вый возноше́ние.

Ра́дуйся, глаго́лов душепита́тельных гу́сли;

ра́дуйся, пе́сней богому́дрых цевни́це.

Ра́дуйся, о́тче Никоди́ме, Горы́ Святы́я сла́вное украше́ние.

Конда́к 4

Ревни́тель богодохнове́нный яви́лся еси́ отце́в преподо́бных, умертви́в себе́ су́щим в ми́ре, и учи́телей свяще́нных отпечатле́ние и уста́ богодви́жная: бога́тая бо ти даде́ся благода́ть, Никоди́ме, вопию́щу: Аллилу́ия.

И́кос 4

Сконча́л еси́ богому́дре преподо́бную жи́знь твою́, разли́чным искуше́нием противоста́в, и я́коже зла́то во огни́, искуше́н скорбьми́, Никоди́ме, учи́тель богому́дрый в дея́нии яви́лся еси́ взыва́ющим:

Ра́дуйся, но́вый в преподо́бных;

ра́дуйся, богодохнове́нный во учи́телех.

Ра́дуйся, наставля́яй на́ше помышле́ние;

ра́дуйся, разруша́яй Велиа́рово безу́мие.

Ра́дуйся, сло́вом благода́тным управля́яй ду́ши;

ра́дуйся, мечу́, при́сно посеца́яй страсте́й вины́.

Ра́дуйся, я́ко очища́еши серде́чныя скве́рны;

ра́дуйся, я́ко явля́еши боже́ственная дая́ния.

Ра́дуйся, пла́менниче Прему́дрости лу́чшия;

ра́дуйся, мо́лние на беснова́ние ху́ждшее.

Ра́дуйся, свети́льниче к живо́тным преспе́янием;

ра́дуйся, свети́ло к боже́ственным возвыше́нием. Ра́дуйся, о́тче Никоди́ме, Горы́ Святы́я сла́вное украше́ние.

Конда́к 5

Богоглаго́ливый язы́к прие́м, богогла́сне, свы́шним дохнове́нием дви́жим, глаго́лы жи́зни ве́чныя и я́же в боже́ственных отце́х неудобопости́жная всему́дре изъясни́л еси́, вся сподвиза́я Бо́гови пе́ти: Аллилу́ия.

И́кос 5

Да воспери́ши к Бо́гу, богоно́сне, ума́ твоего́ движе́ния вся, хране́ние чу́вств тве́рдо проше́л еси́, ему́же науча́еши хотя́щия улучи́ти боже́ственнаго едине́ния, во е́же пе́ти ти, о́тче, си́це:

Ра́дуйся, боже́ственных возвести́телю;

ра́дуйся, от ху́ждшаго неве́дения изба́вителю.

Ра́дуйся, боже́ственному науча́яй по́двигу;

ра́дуйся, небе́снаго яви́телю мудрова́ния.

Ра́дуйся, широто́ боже́ственнаго ра́зума и прему́дрый наста́вниче;

ра́дуйся, скрижа́ле богопечатле́нная Духо́внаго веща́ния.

Ра́дуйся, Уте́шителя пречестны́й сосу́де;

ра́дуйся, правосла́вных богода́нная кре́посте.

Ра́дуйся, ча́ше душепита́тельнаго не́ктара;

ра́дуйся, све́та трисо́лнечнаго испо́лненный.

Ра́дуйся, пра́вило отше́льником в де́лех;

ра́дуйся, о́бразе учи́телем в словесе́х.

Ра́дуйся, о́тче Никоди́ме, Горы́ Святы́я сла́вное украше́ние.

Конда́к 6

Вертогра́д боже́ственных благода́тей се́рдце соверши́в, Никоди́ме, жи́тельством твои́м, "Вертогра́д благода́тей", яко вои́стину испо́лнь благоуха́ния благода́тнаго, твою́ кни́гу наре́кл еси́, е́юже наслажда́ющеся, вопие́м: Аллилу́ия.

И́кос 6

Возсия́в на Горе́ Афо́нстей, я́ко новоявле́нная звезда́, просвеща́еши Христо́ву Це́рковь доброде́телей твои́х заря́ми, неботаи́нниче Никоди́ме преподо́бне; отню́дуже возжиза́еми све́том твои́м зове́м:

Ра́дуйся, звездо́ церко́вная;

ра́дуйся, све́точу благоче́стия.

Ра́дуйся, богосло́вов дре́вних изъясне́ние;

ра́дуйся, чужды́х уче́ний низверже́ние.

Ра́дуйся, боже́ственных преда́ний храни́телю и тайноводи́телю;

ра́дуйся, доброде́тельных дея́ний светоно́сче свяще́нный.

Ра́дуйся, я́ко облича́еши уче́ния нововво́дная;

ра́дуйся, я́ко явля́еши доброде́тели богода́нныя.

Ра́дуйся, Бо́жий служи́телю тепле́йший;

ра́дуйся, ве́рных защи́тниче неколеби́мый.

Ра́дуйся, раю́ многоразли́чныя прему́дрости;

ра́дуйся, свети́ло е́же во Христе́ науче́ния.

Ра́дуйся, о́тче Никоди́ме, Горы́ Святы́я сла́вное украше́ние.

Конда́к 7

Пребыва́яй в Горе́ Афо́нстей, я́коже в го́рнице, усе́рдною моли́твою и посто́м Духо́вную благода́ть, прему́дре, прия́л еси́, та́инственно в тя все́льшуюся, я́коже апо́столи, и́хже подража́тель яви́лся еси́, взыва́я: Аллилу́ия.

И́кос 7

Побе́ду благочести́вым уче́ние твое́ подае́т, ве́рно поуча́ющимся, Никоди́ме, о́тче свяще́нный, проти́ву страсте́й и вся́кия е́реси: во Святе́м бо Ду́се де́йствует при́сно вопию́щим:

Ра́дуйся, побе́до правосла́вных;

ра́дуйся, паде́ние злосла́вных.

Ра́дуйся, Це́ркве ве́лий учи́телю;

ра́дуйся, святы́м дре́вним ра́вне.

Ра́дуйся, я́ко бога́тство оста́вил еси́ нам кни́г свяще́нных;

ра́дуйся, я́ко прекраща́еши вся́кое убо́жество страсте́й.

Ра́дуйся, до небесе́ досяза́яй сто́лпе богопросвеще́нный;

ра́дуйся, Уте́шителя свети́льниче невече́рний.

Ра́дуйся, о́блаче, осеня́яй ве́рныя;

ра́дуйся, свеще́, возсиява́ющая лу́чшая.

Ра́дуйся, боже́ственных догма́тов пропове́дниче;

ра́дуйся, струй невеще́ственных исто́чниче.

Ра́дуйся, о́тче Никоди́ме, Горы́ Святы́я сла́вное украше́ние.

Конда́к 8

Диви́т помышле́ния ве́рных, богоглаго́ливе, мно́жество прему́дрых писа́ний твои́х: ты́ бо прему́дростию боже́ственною и си́лою небе́сною, Никоди́ме, пи́шеши и веща́еши, преподо́бне, и вся побужда́еши пе́ти: Аллилу́ия.

И́кос 8

Всю Це́рковь, я́коже богоде́тельнии све́ти, твоя́ богопре́данная словеса́ просвеща́ют, о́тче, та́инственне, и к соверше́ннейших разуме́нию веду́т я́же в сия́ приница́ющия и вопию́щия ти единогла́сне:

Ра́дуйся, трубо́ неизрече́нных;

ра́дуйся, таи́нниче небе́сных.

Ра́дуйся, Ду́ха кни́жниче богоглаго́ливый;

ра́дуйся, от свы́шняго вдохнове́ния науче́нный.

Ра́дуйся, я́ко боже́ственная вла́га ти даде́ся с небесе́;

ра́дуйся, я́ко облагодати́лся еси́ от руки́ Бо́жия.

Ра́дуйся, богосло́вия та́инственнаго гу́сли;

ра́дуйся, богоглаго́лания небе́снаго цевни́це.

Ра́дуйся, страсте́й отсеца́яй те́рние; ра́дуйся, душ очища́яй ни́ву.

Ра́дуйся, Бо́жия благоутро́бия язы́че; ра́дуйся, ве́рных правосла́вных сла́во.

Ра́дуйся, о́тче Никоди́ме, Горы́ Святы́я сла́вное украше́ние.

Конда́к 9

К по́двигом наставля́я проти́ву враго́в мы́сленных, Никоди́ме, преподо́бных исполне́ние, "Неви́димую брань" нарица́еши ю́же прему́дре списа́л еси́ кни́гу, свя́те: от сея́ бо науча́емся к Бо́гу возводи́тися, пою́ще: Аллилу́ия.

И́кос 9

Спа́совых пра́здников рече́ния богодохнове́нная и пе́сни всему́дрыя в широту́ распространя́я и глубину́, ю́же в них благода́ть всем по́дал еси́, е́юже ду́ши веселя́тся, Никоди́ме, тебе́ вопию́щих:

Ра́дуйся, пе́сней толкова́телю боже́ственных;

ра́дуйся, дщи́це слове́с святы́х.

Ра́дуйся, ве́яния боже́ственнаго сокро́вищнице;

ра́дуйся, Це́ркве Христо́вы украше́ние.

Ра́дуйся, Ду́ха сокро́вище и храни́лище доброде́телей;

ра́дуйся, орга́не богодохнове́нный пе́сней духо́вных.

Ра́дуйся, я́ко очища́еши ве́рных сердца́;

ра́дуйся, я́ко произлива́еши живоно́сная ороше́ния.

Ра́дуйся, ду́ш наста́вниче богому́дрый;

ра́дуйся, честны́м отце́м равноче́стный.

Ра́дуйся, ума́ хране́нию науча́яй;

ра́дуйся, ра́дость та́инственную возсиява́яй.

Ра́дуйся, о́тче Никоди́ме, Горы́ Святы́я сла́вное украше́ние.

Конда́к 10

Усты́ боговеща́нными и руко́ю, двиза́емою Ду́ха благода́тию, о́тче, духо́вных степе́ней изъясня́я в широте́ смы́слы, ле́ствицу и́ну поста́вил еси́ жела́ющим Го́сподеви пе́ти: Аллилу́ия.

И́кос 10

Прему́дрости боже́ственныя вла́га, я́коже Соломо́ну, даде́ся ти, Никоди́ме, отню́дуже Це́ркве учи́тель прему́дрый яви́лся еси́ и пресла́вный, на вся лу́чшая наставля́я, о́тче, зову́щия:

Ра́дуйся, у́ме богосло́вия;

ра́дуйся, струе́ боговеща́ния.

Ра́дуйся, пото́че наслажде́ния духо́внаго;

ра́дуйся, во словесе́х и де́лех пресве́тлый.

Ра́дуйся, вети́е многому́дрый глаго́л живо́тных;

ра́дуйся, уста́ блаже́нная гла́са Духо́внаго.

Ра́дуйся, насади́телю доброде́телей небе́сных;

ра́дуйся, искорени́телю нра́вов зле́йших.

Ра́дуйся, те́плыя моли́твы водворе́ние;

ра́дуйся, ве́рных богода́нное хвале́ние.

Ра́дуйся, Бо́жий песнопе́вче богоглаго́ливый;

ра́дуйся, вождю́ наш богоно́сный.

Ра́дуйся, о́тче Никоди́ме, Горы́ Святы́я сла́вное украше́ние.

Конда́к 11

Возвы́сив ума́ твоего́ к Бо́гу стремле́ния, умертви́л еси́ плотска́я движе́ния, и, боже́ственным све́том озаре́н, явле́нне во Афо́не просия́л еси́, сло́вом и де́лом, преподо́бне, к Бо́гу направля́я вопию́щия: Аллилу́ия.

И́кос 11

Све́том Уте́шителевым прему́дрых писа́ний твои́х благода́ть, Никоди́ме, везде́ сия́ет и вдыха́ет в ду́ши та́инственное благоуха́ние, и́мже страсте́й избавля́емся злово́ния, взыва́юще:

Ра́дуйся, цве́те ра́йский;

ра́дуйся, тро́сте Уте́шителева.

Ра́дуйся, мирополо́жнице боже́ственныя бла́гости;

ра́дуйся, благоуха́ние жития́ чи́стаго.

Ра́дуйся, ми́ро всеблагово́нное подви́жническия жи́зни;

ра́дуйся, арома́те небе́сный жи́тельства духо́внаго.

Ра́дуйся, тайнописа́телю святы́х догма́тов;

ра́дуйся, краснопи́сче свяще́нных смы́слов.

Ра́дуйся, свире́ле пе́сней благода́тных;

ра́дуйся, ли́ку святы́х сопричте́нный.

Ра́дуйся, душ утвержде́ние коле́блющихся;

ра́дуйся, прему́дрый мона́хов наста́вниче.

Ра́дуйся, о́тче Никоди́ме, Горы́ Святы́я сла́вное украше́ние.

Конда́к 12

Благода́ть и води́тельство к путе́м спаси́тельным и вся́цей по́льзе боже́ственней во Святе́м Ду́се при́сно книг твои́х мно́жество, о Никодиме, подае́т и веде́т к боже́ственней сла́ве вопию́щия: Аллилу́ия.

И́кос 12

Пою́ще тебе́ пе́снь, я́ко учи́теля вели́каго и боже́ственнаго и прему́драго наста́вника Це́ркве Христо́вы, о боговеща́нне, тя почита́ем, Никоди́ме: но не преста́й, свя́те, вся просвеща́ти зову́щия:

Ра́дуйся, Афо́на ве́лия сла́во;

ра́дуйся, На́ксоса боже́ственная похвало́.

Ра́дуйся, мона́шествующих свети́ло присносве́тлое;

ра́дуйся, правосла́вных пла́менниче неусыпа́емый.

Ра́дуйся, о́бразе и пра́вило и́ноков богоприя́тных;

ра́дуйся, да́ре и ве́нче безмо́лвников благогове́йных.

Ра́дуйся, Це́ркве стено́ неколеби́мейшая;

ра́дуйся, благоче́стия свети́льниче светоза́рнейший.

Ра́дуйся, и́мже восприе́млем лу́чшая;

ра́дуйся, и́мже отвраща́ем ху́ждшая.

Ра́дуйся, Богоро́дицы таи́нниче;

ра́дуйся, соиме́нных тебе́ предста́телю.

Ра́дуйся, о́тче Никоди́ме, Горы́ Святы́я сла́вное украше́ние.

Конда́к 13

О Никоди́ме о́тче, Горы́ Афо́нския чу́до и всея́ Це́ркве сла́во, настоя́щее на́ше приноше́ние ми́лостивно приими́ и подава́й всем свет боже́ственный моли́твами твои́ми, яко да при́сно Бо́гови вопие́м: Аллилуия.

Сей конда́к глаго́лется три́жды. И па́ки чте́тся 1-й и́кос и 1-й конда́к.

Моли́тва

О богодохнове́нный и вселе́нский и́стины учи́телю, изря́дная Святоимени́тыя Горы́ похвало́, светле́йшая звездо́ Правосла́вныя Це́ркве Собо́рныя, всепреподо́бный и святы́й о́тче Никоди́ме! Да́ждь нам просвеще́ние моли́твами твои́ми во исполне́ние боже́ственныя во́ли, напра́ви стопы́ на́ша ко стезя́м доброде́тельнаго жития́, осени́ нас да́нною тебе́ благода́тию и вразуми́ ум наш, во е́же разуме́ти богому́драя поуче́ния твоя́, да обря́щем в них покая́ние, исцеле́ние, ра́дость, мир, кро́тость, поко́й, любо́вь, и а́ще что добро́ и бла́го и спаси́тельно, и в конце́ живо́т ве́чный, и моли́ся всегда́ ко Го́споду о всех нас, и́скренне лю́бящих тя и на всяк день и час призыва́ющих оте́ческую твою́ бла́гость и по́мощь. Аминь.