Преподобный Амвро́сий Оптинский

Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Це́рковь ны́не торжеству́ет, све́тло пра́зднующи твою́ святу́ю па́мять, и с ра́достию воспева́ет ти́ хвале́бную пе́снь, сла́вящи Го́спода, ди́внаго во святы́х Свои́х.

Позна́л еси́ сла́дость жи́зни во Христе́ и не обину́яся оста́вил еси́ пре́лесть земны́х бла́г и суету́ ми́ра, всего́ себе́ покори́в Бо́гу.

Кто́ изочте́т по́двиги твоя́, я́же поне́сл еси́ ра́ди Ца́рствия Небе́снаго, в пе́нии, бде́нии и поще́нии утвержда́я ду́х сво́й.

Восходи́л еси́ от си́лы в си́лу в доброде́лании за́поведей Христо́вых и стяжа́л еси́ да́р Ду́ха Свята́го, Его́же де́йствием спа́сл еси́ мно́гия души́ христиа́нския.

Богоро́дичен: Богоро́дице Присноде́во Мари́е, простри́ ми́ ми́лостивне десни́цу на по́мощь умоля́ющи Сы́на Твоего́ и Бо́га: я́ко уя́звен е́смь лю́те, и на Тя́ то́чию наде́жду мою́ положи́х, Ты́ мя́ уще́дри.

Пе́снь 3.

Ирмо́с: Утвержде́й в нача́ле Небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Послуша́нием соверше́нным отверга́лся еси́ во́ли своея́ и те́м стра́сти существа́ па́дшаго Ада́ма отри́нул еси́, всего́ себе́ преда́в води́тельству Богому́дрых ста́рцев и отце́в Пу́стыни, и́же и возрасти́ тя́ в ме́ру во́зраста духо́внаго.

Целому́дрия красоту́ стяжа́ла е́сть твоя́ чи́стая душа́, си́лою покая́ния совле́кшися ве́тхаго челове́ка и в духо́вном преспе́янии обле́кшися во Христа́.

Бога́тства тле́ннаго ми́ра возненави́дел еси́ и бы́л еси́ я́ко стра́нник и прише́лец на земли́, взыску́я Гра́да Небе́снаго, те́мже Домовлады́ка введе́ тя́ в черто́г сла́вы Своея́.

Христо́с Бо́г обогати́ тя́ да́ром чуде́с, и мно́гия боле́зни стра́ждущих исцели́л еси́, не оста́ви на́с, ча́ющих от тебе́ благода́тную по́мощь.

Богоро́дичен: Наде́жда и упова́ние на́ше, Влады́чице ми́ра, блага́я Помо́щнице, спаси́ и в кре́пости ро́г вознеси́ правосла́вных и лю́ди на́ша от вся́ких бе́д и от разли́чных обстоя́ний свободи́.

Седа́лен, гла́с 4.

Ли́к мона́хов ны́не славосло́вит тя́, преподо́бне о́тче на́ш Амвро́сие, ублажа́я честну́ю па́мять твою́, и вся́ оби́тель в ра́дости торжеству́ет, почита́ющи твое́ чи́стое в доброде́телех житие́ и мно́жество чудотворе́ний, тобо́ю произлива́емых. Те́мже мы́ вси́ вку́пе вопие́м: спаса́й на́с моли́твами твои́ми, Амвро́сие, о́тче на́ш.

Богоро́дичен: Под твое́ благоутро́бие притека́юще, мо́лим, Богоро́дице Де́во, не пре́зри рыда́ния на́шего и моли́твы, но ускори́ изба́вити от бе́д и скорбе́й лю́ди безотве́тныя: ты́ бо Еди́на еси́ изве́стнейшее христиа́ном Упова́ние, и к Тебе́ прибега́юще вси́ спаса́емся.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Избра́нный сосу́д Ду́ха Свята́го бы́л еси́ и то́ки чуде́с изли́л еси́. Приими́ на́ша моли́твы и исцели́ на́с от ра́н грехо́вных и страсте́й.

Позна́вый си́лу моли́твы во спасе́ние души́, научи́ на́с душеполе́зно моли́тися ко Изба́вителю все́х ми́лостивому Иису́су.

Ве́ру и́стинную Правосла́вную утверди́ в лю́дех Твои́х, чту́щих тя́ я́ко ревни́теля уче́ния Христо́ва.

Что́ воздади́м ти́, преблаже́нне о́тче на́ш, за вся́, я́же возда́л еси́ на́м, ча́дом твои́м, чту́щим твою́ честну́ю па́мять.

Богоро́дичен: Из Твои́х пречи́стых чре́сл, Богороди́тельнице, Сло́во Бо́жие произы́де несказа́нно, Его́же объе́мши, от зо́л изба́вити умоли́ зову́щих: сла́ва си́ле Твое́й, Го́споди.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́, окая́ннаго, но обрати́ мя́, и к све́ту за́поведей Твои́х пути́ моя́ напра́ви, молю́ся.

Све́том уче́ния Христо́ва просвеще́нный, мра́к заблужде́ния грехо́внаго отме́л еси́, наста́ви во све́те повеле́ний Бо́жиих и на́с, омраче́нных страстьми́.

Но́вая свеща́ возсия́ тобо́ю, о́тче, на земли́ Росси́йстей, озаря́я све́том любве́ Боже́ственныя вся́ до́льная. Просвети́, Богоно́се, на́с, недосто́йных ча́д твои́х, све́том за́поведей Христа́.

Возлюби́л еси́ бли́жняго и подъя́л еси́ его́ бре́мя грехо́в и скорбе́й, да у́зрит све́т и́стины и испра́вит стопы́ своя́ к де́ланию за́поведей Христо́вых.

Унасле́довал еси́ Ца́рство Небе́сное, иде́же пра́зднующих гла́с непреста́нный и безконе́чная сла́дость зря́щих лица́ добро́ту Бо́га неизрече́нную.

Богоро́дичен: Нескве́рная А́гница и Богоотрокови́це Мари́е, Твои́ми моли́твами укрепи́вшеся, святи́и победи́ша бесо́вския си́лы: те́мже и на́м, упова́ющим на Тя́, ско́ро предста́ни в по́мощь, да посра́мятся и паду́т вси́ явля́ющии рабо́м Твои́м зла́я.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Кре́пкое заступле́ние бу́ди все́м, притека́ющим к твое́й по́мощи в неду́зех и печа́лех, о́тче на́ш Амвро́сие, О́птинския оби́тели вели́кий Ста́рче.

Изба́ви на́с от кова́рства лука́вых духо́в и изведи́ из глубины́ грехо́вныя, да очи́стит на́с Христо́с Бо́г от беззако́ний на́ших и спасе́т ду́ши на́ша.

Ка́ко рце́м твоя́ благодея́ния лю́дем, стра́ждущим и уничиже́нным? Ка́ко воспои́м ти́ благода́рственную пе́снь? Приими́ ны́не пе́снь хвале́бную недосто́йных ча́д твои́х.

Посети́ на́ша не́мощи по ми́лости твое́й, исцели́ я́звы духо́вныя си́лою да́нною ти́ свы́ше благода́ти, да воста́нем от ме́ртвеннаго сна́ грехо́внаго.

Богоро́дичен: Песносло́вяще, Чи́стая, из утро́бы Твоея́ Вопло́щшагося, Тя́ славосло́вим, я́ко Бо́жию Ма́терь.

Конда́к, гла́с 2.

Заве́т пастыренача́льника испо́лнив, ста́рчества благода́ть насле́довал еси́, боле́знуя се́рдцем о все́х с ве́рою притека́ющих к тебе́, те́мже и мы́, ча́да твоя́, с любо́вию вопие́м ти́: о́тче святы́й Амвро́сие, моли́ Христа́ Бо́га спасти́ся душа́м на́шим.

И́кос.

Доброзра́чное житие́ показа́л еси́ и свои́ми доброде́тельми озари́л еси́ всю́ зе́млю ру́сскую, привле́кл еси́ к себе́ вся́ концы́ оте́чества на́шего, окормля́я неисче́тную па́ству ве́рных ча́д твои́х, и́хже с любо́вию призре́л еси́ я́ко оте́ц чадолюби́вый и ми́лостивый. Те́мже сте́кшеся в де́нь преставле́ния твоего́ во умиле́нии зове́м: ра́дуйся, подви́жниче благоче́стия, восприе́мый бога́тыя да́ры Ду́ха Всесвята́го; ра́дуйся, высото́ смире́ния и терпе́ния, и́миже науча́еши ве́рных ча́д свои́х; ра́дуйся, дре́во плодоно́сное, и́мже напита́л еси́ мно́жество а́лчущих жи́зни ве́чныя; ра́дуйся, цве́те благоуха́нный любве́ Боже́ственныя, е́юже утеша́ются скорбя́щии и боле́знующии; ра́дуйся, исто́чниче приснотеку́щий чуде́с и благотворе́ний от ни́хже боля́щии исцелева́ют и ги́бнущии спаса́ются; ра́дуйся, дерзнове́нный хода́таю на́ш пред пра́ведным Судие́ю; ра́дуйся, помо́щниче на́м пресла́вный во все́х обстоя́ниих; ра́дуйся, Богому́дре Амвро́сие, вели́кий Ста́рче всеросси́йский.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших.

Пресели́лся еси́ в го́рния черто́ги и та́мо зри́ши сла́ву неизрече́нную Преве́чнаго Бо́га, зовя́: благослове́н еси́ Бо́же оте́ц на́ших.

В со́нме святы́х уго́дников ны́не прославля́еши прему́драго Творца́ и Го́спода Си́л, воспева́я: благослове́н еси́ Бо́же оте́ц на́ших.

С ли́ки А́нгелов и Арха́нгелов предстои́ши пред лице́м Вседержи́теля и та́мо немо́лчно пое́ши: благослове́н еси́ Бо́же оте́ц на́ших.

Вни́де в ра́дость Го́спода, я́ко до́брый и ве́рный ра́б Его́ бы́л еси́ на земли́, и ны́не на небесе́х взыва́еши: благослове́н еси́ Бо́же оте́ц на́ших.

Богоро́дичен: Ви́ждь Влады́чице, души́ моея́ злосмра́дныя ра́ны, и́хже самохо́тне подъя́х окая́нный, и не могу́ приложи́ти пла́стыря, но е́ле жи́в сы́й вопию́: ми́лостива мне́ Врача́ все́х и Бо́га Ма́терними Твои́ми моли́твами сотвори́, я́ко да воспою́ Ти́: благослове́н, Пречи́стая, Пло́д чре́ва Твоего́.

Пе́снь 8.

Ирмо́с: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Це́рковь ны́не ликовству́ет, пра́зднующи блаже́нную па́мять твою́, достохва́льне о́тче, и с ра́достию пое́т: да благослови́т вся́ тва́рь Го́спода и превозно́сит Его́ во ве́ки.

Собра́шася ны́не во оби́тели святе́й мона́хов мно́жество, ублажа́ющих твою́ честну́ю па́мять и пою́щих с ра́достию: да благослови́т вся́ тва́рь Го́спода и превозно́сит Его́ во ве́ки.

Па́стырие и учи́телие стеко́шася в се́й гра́д оби́тельный, иде́же в доброде́телех ты́ процве́л еси́, поя́: да благослови́т тва́рь вся́ Го́спода и превозно́сит Его́ во ве́ки.

Ста́рии и млади́и, си́льнии и немощни́и приидо́ша ны́не в до́м Госпо́день просла́вити преподо́бнаго Ста́рца и отца́, вопию́ще: да благослови́т тва́рь вся́ Го́спода и превозно́сит Его́ во ве́ки.

Богоро́дичен: О Тебе́, Пресвята́я Богоро́дице, излия́ся вода́ живо́тная, на омове́ние скве́рны всеми́рныя, е́юже благоволи́ и мое́ се́рдце прохлади́ти, и окропи́ти росо́ю моли́тв в кро́ве кри́л Твои́х во ве́ки вся́.

Пе́снь 9.

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее Небе́с. Те́м Тя́ Богоро́дицу, А́нгелов и челове́к чинонача́лия велича́ют.

Пропове́дует ны́не Правосла́вная Це́рковь по́двиги твоя́, я́ко всеросси́йскаго уго́дника Бо́жия, и чти́т твою́ па́мять, восхваля́ющи твое́ ангелоподо́бное житие́.

При́зри с небесе́, о́тче на́ш Амвро́сие, на ве́рныя лю́ди твоя́, и низпосли́ свы́ше ру́ку по́мощи все́м, покланя́ющимся честно́му о́бразу твоему́.

Услы́ши гла́с моле́ния на́шего, посети́ ми́лостию твое́ю боле́зни и не́мощи ча́д твои́х, с ве́рою к тебе́ прибега́ющих, досточу́дне о́тче на́ш.

Припа́даем во умиле́нии серде́ц на́ших к стопа́м твои́м, вели́кий ста́рче земли́ на́шея, про́сим и мо́лим: не забу́ди посеща́ти чту́щия пречестну́ю па́мять твою́.

Богоро́дичен: Ко́е Тебе́ дарова́ние принесе́м Богоро́дице? Или́ что́ веща́ти и́мамы гре́шнии? То́чию уми́льно вопие́м, моля́щеся: спаси́ рабы́ Твоя́, Богоблагода́тная Отрокови́це, я́ко да Тя́ при́сно велича́ем.

Свети́лен.

Мона́шескаго о́браза житие́ избра́в непрело́жно, и отри́нув ми́ра сего́ суету́ и сла́ву, всели́лся еси́ в оби́тель Богоро́дицы, преподо́бне о́тче на́ш Амвро́сие, и процве́л еси́ я́ко кри́н се́льный, мы́ же чту́ще святу́ю па́мять твою́, зове́м ти́: бу́ди на́м помо́щник и засту́пник в беда́х и ско́рбех обстоя́щих.

Богоро́дичен: Ра́дуйся, Тебе́ зове́м, благослове́нная Богоро́дице Де́во, я́ко Тобо́ю присносу́щныя ра́дости прича́стницы бы́хом. Живо́т бо на́ш и Спасе́ние недомы́слимо и превы́ше естества́ родила́ еси́, сего́ ра́ди непреста́нно ублажа́ют Тя́ ро́дове родо́в, я́коже пре́жде прорекла́ еси́.

Кондак 1

Избранный угодниче Божий и чудотворче, великий старче Амвросие, Оптинская похвало и всея Руси дивный наставниче, прославляюще твое в подвизех изрядное житие, приносим многохвальное пение, ты же, яко имеяй дерзновение ко Господу, молися о всех нас, чадех твоих, со умилением зовущих:

Радуйся, преподобне Амвросие, богомудрый учителю веры и благочестия.

Икос 1

Ангельскому житию подражая, отвергл еси вся красная и скоропреходящая тленнаго мира сего и стопы своя направил еси к духовному учителю и прозорливцу старцу Илариону, да наставит тя на путь истиннаго жительства и благословит на подвиги спасения. Он же, провидев грядущее твое богоугодное житие, посла тя в обитель Оптину, и тамо ты обрел еси себе доброе пристанище. Мы же, видяще таковое Божие изволение о тебе, глаголем сицевая:

Радуйся, Богом избранная отрасле благочестия родителей; радуйся, измлада лет твоих Господа возлюбивый.

Радуйся, к книжней мудрости усердие от юности имевый; радуйся, святых отцев духоносное учение познавый.

Радуйся, скорогибнущих благ мира сего отвержение; радуйся, нетленных сокровищ неослабное желание.

Радуйся, Божия произволения о спасении души твоея искавый; радуйся, благословение на путь монашеский получивый.

Радуйся, преподобне Амвросие, богомудрый учителю веры и благочестия.

Кондак 2

Видя сердца твоего благое намерение, Христос предначерта узкий и тернистый путь твоего спасения, и, егда был еси внезапу на смертнем одре болезни, даде Господу обещание: аще исцелит тя, всего себе предати подвигом иночества. Востав же по милости Божией со одра болезни, абие прославил еси всещедраго Бога, Врача душ и телес, зовя: Аллилуиа.

Икос 2

Разум Божественных писаний стяжав, в страсе Божием помышлял еси, како Господь устроит грядущий путь твоего спасения и како вступити на стезю многотруднаго и скорбнаго монашескаго жительства. Мы же, дивящеся твоему благому намерению, воспеваем ти:

Радуйся, на Бога Промыслителя всю надежду возложивый; радуйся, токмо Его благоизволения взыскавый.

Радуйся, всякое испытание во спасение души понести готовый; радуйся, совести своея велению последовавый.

Радуйся, увеселения мирская возненавидевый; радуйся, богатства земная невозлюбивый.

Радуйся, Богу Единому поработати всего себе подвигнувый; радуйся, Тому точию угодити восхотевый.

Радуйся, преподобне Амвросие, богомудрый учителю веры и благочестия.

Кондак 3

Силою любве утверждаяся в вере, поревновал еси Евангельское житие стяжати по образу преподобных отцев Церкве древния. Егда же даде ти Господь разумение сего благоугождения, воспел еси со умилением: Аллилуиа.

Икос 3

Имея крепкую веру во благое промышление Божие о спасении человека, притекл еси к честному образу Пресвятыя Богородицы Тамбовския, еже бысть тебе благословение родительское, и смиренно молил еси Владычицу, да управит путь твой. Мы же, видяще твое неотступное упование на милость Царицы Небесныя, поем ти:

Радуйся, Божия Матере верное и возлюбленное чадо; радуйся, Ея священнаго покрова силы тайное постижение.

Радуйся, благословения родительскаго чрез Ея образ добронравный хранителю; радуйся, Заступницы усердныя благоговейный почитателю.

Радуйся, многочастне в нощи молитвы к Ней слезно возносивый; радуйся, помощь небесную от Нея непостыдно восприемый.

Радуйся, тако утешение в сердце своем обретый сладостное; радуйся, яко умиление приял еси благоотишное.

Радуйся, преподобне Амвросие, богомудрый учителю веры и благочестия.

Кондак 4

Бурею помышлений движимый, пришел еси в обитель преподобнаго Сергия Радонежскаго, да укрепит твое сердце на подвиги предстоящаго иноческаго поприща всея России чудотворец и учитель монашескаго делания, преизливающий от раки своих честных мощей токи благодатныя помощи. Умилився же тамо сердцем, взывал еси с радостию: Аллилуиа.

Икос 4

Слыша велие житие и благочестие богомудрых отцев и старцев Оптины пустыни, тайно оставил еси мир и вся, яже в нем, и пришел еси, не обинуяся, в обитель сию во смирении души, во еже спастися и угодити Богу. Мы же, видяще вящую ревность души твоея, приносим ти хвалебную песнь:

Радуйся, тленная блага мира сего нивочтоже вменивый; радуйся, сладость церковную познавый.

Радуйся, во обитель святую вселивыйся; радуйся, всего себе Богу отдавый.

Радуйся, заповеди Божия неленостно исполнивый; радуйся, плоды Христова учения сладце вкусивый.

Радуйся, подвигов святых отцев ревнителю; радуйся, чистоты душевныя неусыпный хранителю.

Радуйся, преподобне Амвросие, богомудрый учителю веры и благочестия.

Кондак 5

Богозданная пустынь прият тя, яко во объятия отча, в нюже кротко вселился еси и тамо первее понесл еси труды послушания в келии великаго старца, богопросвещеннаго Льва, имже наставлен был еси к духовному деланию. Уведев же сладость отречения воли своея, возопил еси: Аллилуиа.

Икос 5

Видяще твое иноческое преуспеяние, облекоша тя отцы пустыни в ризы схимы великия, и сподоби тя Подвигоначальник Христос благодати ангельскаго чина приобщитися, сего ради вопием ти:

Радуйся, всем сердцем Бога возлюбивый; радуйся, всею душею Ему послуживый.

Радуйся, веру чрез многия труды непреложно утвердивый; радуйся, надеждою на помощь свыше себе вооруживый.

Радуйся, любве евангельския сокровище; радуйся, даров Духа Святаго вместилище.

Радуйся, подвигов монашеских воине доблественный; радуйся, равноангельнаго жития подражателю предивный.

Радуйся, преподобне Амвросие, богомудрый учителю веры и благочестия.

Кондак 6

Проповедник православныя веры и истиннаго жития во Христе Иисусе явился еси, противныя Евангелию и Церкви учения отрицая, и многия от пути заблуждения обратил еси ко Христу Жизнодавцу, поя благодарственно: Аллилуиа.

Икос 6

Возсиял еси, яко свеща многосветлая, в земли Российстей, просвещая всякаго человека, приходящаго к тебе, светом истины, людие же, обремененнии грехми и скорбьми многими, обретоша в тебе богоразумнаго наставника благочестия и добраго отца всем немощствующим, страждущим и уничиженным, воспевающе таковая:

Радуйся, светильниче православныя страны Российския; радуйся, зерцало Божественныя любве.

Радуйся, столпе веры апостольския; радуйся, каменю надежды жизни вечныя.

Радуйся, наставниче во всяких обстояниих боговдохновенный; радуйся, проповедниче покаяния рачительный.

Радуйся, врачу недугов телесных; радуйся, целителю болезней душевных.

Радуйся, преподобне Амвросие, богомудрый учителю веры и благочестия.

Кондак 7

Хотя последовати Самому Христу, подражал еси Ему всеусердно, взем иго Его на себе и, научився от Него кротости и смирению, обрел еси покой души своей, зовущей присно: Аллилуиа.

Икос 7

Новая и дивная звезда святости явися на небе церковнем, егда восшел еси по лестнице духовней к совершенству ангелоподобному, простерл еси лучи любве своея по лицу всея земли Русския и привлекл еси к себе знатная и худородная, мудрая века сего и немудрая, вопиющая к тебе сицевая:

Радуйся, граде, верху горы стояй; радуйся, светило, мрак неведения прогоняющее.

Радуйся, вся немощная врачуяй; радуйся, от бед и прельщений вражеских избавляяй.

Радуйся, печальных утешителю; радуйся, жаждущих духовный напоителю.

Радуйся, хитрословеснаго мудрования века сего обличителю; радуйся, многих заблудших на путь истины исправителю.

Радуйся, преподобне Амвросие, богомудрый учителю веры и благочестия.

Кондак 8

Странником и пришельцем в земном мире предстал еси, взыскующим града небеснаго, и понесл еси тяготы и немощи ищущаго у тебе помощи ближняго, и тако исполнил еси закон Христов, поя с благодарением: Аллилуиа.

Икос 8

Весь огнем Божественныя любве исполненный, крест многотрудный болезней телесных пронесл еси чрез все твое иноческое житие, в терпении стяжав душу твою, по слову Евангелия Христова, и всех нас научил еси безропотному крестоношению, зовущих ти:

Радуйся, вождю ищущих спасения; радуйся, образе истиннаго послушания.

Радуйся, сам тяжкие недуги до конца претерпевый; радуйся, приходящия к тебе в болезнех и печалех терпению научивый.

Радуйся, паствы твоея изрядный душепопечителю; радуйся, алчущих жизни вечныя питателю.

Радуйся, обидимых покровителю; радуйся, непокорных воли Божией вразумителю.

Радуйся, преподобне Амвросие, богомудрый учителю веры и благочестия.

Кондак 9

Все естество человеческое в болезнех и телесных немощех испытал еси, плоть распяв со страстьми и похотьми, и молитвою неустанною отгонял еси напасти и искушения лукавых духов и тем вся научал еси противостати кознем диавольским, взывая с верою: Аллилуиа.

Икос 9

Витийства суемудрых, неведавших силы веры православныя, отметал еси словом Божиим и чистым житием твоим и воистину возсиял еси, яко светозарный столп благочестия и хранитель святоотеческаго предания, усердно прелагая древняя писания отцев в письмена удобовразумительная. Мы же, дивящеся трудом твоим, воспеваем сице:

Радуйся, веры правыя адаманте; радуйся, жития по вере крепосте.

Радуйся, духа благочестия насадителю; радуйся, добродетелей христианских сеятелю.

Радуйся, подвигов старчества преуспеяние; радуйся, множества иноков духовное просвещение.

Радуйся, приведый тех ко спасению; радуйся, обративый многия грешныя к покаянию.

Радуйся, преподобне Амвросие, богомудрый учителю веры и благочестия.

Кондак 10

Спастися взыскующим Царства Небеснаго вспомоществуя, верный путеводитель явился еси, мирския и духовныя управляя; на конец же лет своих многия труды положил еси, обитель Шамординскую убогим устрояя, да сестры тоя обретут душевный покой и спасение, воспевающе песнь хвалебную: Аллилуиа.

Икос 10

Стена и прибежище был еси чадом твоим, молитвами неусыпными от демонских наваждений охраняя; на невидимую брань с духи злобы вдохновлял еси их, гордость и славолюбие смирением упраздняя. Темже радующеся зовем ти:

Радуйся, стрелы вражия угасивый; радуйся, демонския полки победивый.

Радуйся, пленных от духов злобы свободивый; радуйся, из темницы страстей многия души изведый.

Радуйся, любовию и молитвами заблудшия к Богу обративый; радуйся, сирот и вдовиц добрый попечителю.

Радуйся, водительства иноков и инокинь богоносный зиждителю; радуйся, смиренномудрия и кротости доброгласный проповедниче.

Радуйся, преподобне Амвросие, богомудрый учителю веры и благочестия.

Кондак 11

Пение умиленное приносим ти, скорому помощнику в нуждах и печалех всем, к тебе с верою и любовию притекающим, до конца бо дней своих был еси чадолюбивый отец страждущих и обремененных, чающих утешения души. Темже неложно прославляется тобою Бог, дивный во святых Своих, зовущих непрестанно: Аллилуиа.

Икос 11

Светильника добродетелей видеша в тебе вси концы, отче наш Амвросие, яко в терпении и смирении земное странствие скончал еси и исполнил еси вся, яже заповеда нам Христос во святем учении, и преселился еси от земли на небо, внидя в радость Господа своего, яко верный раб Христов. Темже радующеся воспеваем ти таковая:

Радуйся, усердный слуго, сотворивый волю Господина своего; радуйся, воине Христов, суету житейскую оставивый.

Радуйся, Богу Единому послуживый; радуйся, вся заповеди Божия исполнивый.

Радуйся, обители небесныя удостоивыйся; радуйся, горния славы приобщивыйся.

Радуйся, наследниче жизни вечныя; радуйся, угодниче Божий прехвальный.

Радуйся, преподобне Амвросие, богомудрый учителю веры и благочестия.

Кондак 12

Благодати Божия сокровище некрадомое унаследовал еси и тихое, безмятежное пристанище на небесех обрел еси. Действием же промысла Божия во дни торжествуемаго тысящелетия Крещения Руси прославлен и к лику святых причислен был еси. Ныне, ублажающе память твою святую, поем вси: Аллилуиа.

Икос 12

Поюще твое всероссийское прославление, возносим ти, яко благоухание кадильное, смиренныя наша молитвы: не забуди чад твоих, почитающих имя твое святое и взывающих к тебе в благодарении:

Радуйся, Амвросие, Божественнаго безсмертия тезоименитый; радуйся, Церкве Православныя честная похвало.

Радуйся, лика святых угодников причастниче; радуйся, сонма преподобных отцев сотаинниче.

Радуйся, пред Престолом Бога Всевышняго наш твердый предстателю; радуйся, пред судом Божиим наш теплый ходатаю.

Радуйся, нас, странствующих во юдоли плачевней, путеводителю; радуйся, о всей земли Российстей неусыпный молитвенниче.

Радуйся, преподобне Амвросие, богомудрый учителю веры и благочестия.

Кондак 13

О, дивный угодниче Христов и чудотворче, преподобне старче наш Амвросие, приими ныне малое моление недостойных чад твоих, не остави нас в скорбех и болезнех, прииди и простри руку помощи, настави нас на путь покаяния и спасения, во еже избавитися муки вечныя, да тобою присно славим Бога, вопиюще: Аллилуиа.

Этот кондак читается трижды, затем 1-й икос «Ангельскому житию …» и 1-й кондак «Избранный угодниче…».

Молитва 1-я

О, великий старче и угодниче Божий, преподобне отче наш Амвросие, Оптинская похвало и всея Руси учителю благочестия! Славим твое во Христе смиренное житие, имже Бог превознесе имя твое, еще на земли тебе суща, наипаче же увенча тя небесною честию по отшествии твоем в чертог славы вечныя. Приими ныне моление нас, недостойных чад твоих, чтущих тя и призывающих имя твое святое, избави нас твоим предстательством пред Престолом Божиим от всех скорбных обстояний, душевных и телесных недугов, злых напастей, тлетворных и лукавых искушений, низпосли Отечеству нашему от великодаровитаго Бога мир, тишину и благоденствие, буди непреложный покровитель святыя обители сия, в нейже в преуспеянии сам подвизался еси и угодил еси всеми в Троице славимому Богу нашему, Емуже подобает всякая слава, честь и поклонение, Отцу и Сыну и Святому Духу, ныне и присно, и во веки веков. Аминь.

Молитва 2-я

О, преподобне и богоносне отче наш Амвросие! Ты, поработати Господеви желая, зде вселился еси и неленостно во трудех, бдениих, молитвах и постех подвизался еси и был еси наставник монашествующим, всем же людям учитель ревностный. Ныне убо, по отшествии твоем от земных, Небесному Царю предстоя, моли благость Его, еже ущедрити место селения твоего, святую обитель сию, идеже духом любве твоея неотступно пребываеши, и всем людем твоим, с верою к раце мощей твоих припадающим, во благая прошения их исполнити. Испроси у милостиваго Господа нашего, да низпослет нам обилие благ земных, паче же яже на пользу душ наших да дарует нам, и скончати житие сие привременное в покаянии да сподобит, в день же судный деснаго предстояния и наслаждения во Царствии Своем да удостоит во веки веков. Аминь.

Молитва 3-я

О, всечестный старче преславныя и дивныя Оптины пустыни, преподобне и богоносне отче наш Амвросие! Церкве нашея доброе украшение и благодатный светильниче, небесным светом всех озаряяй, красный и духовный плод России и всея подсолнечныя, души верных обильно услаждаяй и увеселяяй! Ныне с верою и трепетом припадаем пред цельбоносною ракою святых мощей твоих, ихже на утешение и помощь страждущим милостивно даровал еси, смиренно молим тя сердцем и усты, отче святый, яко всероссийскаго наставника и учителя благочестия, пастыря и врача душевных и телесных недуг наших: воззри на чад твоих, зело согрешающих в словесех и делех, и посети нас многою и святою своею любовию, еюже славно преуспел еси еще во дни земныя, наипаче по праведней твоей кончине, наставляя в правилех святых и богопросвещенных отцев, вразумляя нас в заповедех Христовых, в нихже добре поревновал еси до последняго часа твоея многотрудныя иноческия жизни; испроси нам, немощствующим душею и бедствующим в скорбех, благоприятное и спасительное время на покаяние, истинное исправление и обновление нашего жития, в немже мы, грешнии, осуетихомся умом и сердцем, предахом себе непотребным и лютым страстем, пороком и беззаконием, имже несть числа; приими убо, соблюди и покрый нас кровом твоея многия милости, низпосли нам благословение от Господа, да понесем благое иго Христово в долготерпении до конца дней наших, чающе будущаго живота и Царствия, идеже несть печаль, ни воздыхание, но жизнь и радость безконечная, изобильно проистекаемая от Единаго, Всесвятаго и Блаженнаго Источника безсмертия в Троице покланяемаго Бога, Отца и Сына и Святаго Духа, ныне и присно, и во веки веков. Аминь.

Для келейного чтения

Тропарь, глас 4. Подобен: Вознесыйся:

Богоносное Господа приятелише, благоуханное благодатей вдохновение и сладость присноживую, струящуюся обильно, мудраго Амвросия восхвалим в гимнех, крепости взыскующе душам и телесем, тебе вопиюще, отче предивный: твоими молитвами нас покрый.

Слава и ныне, богородичен: Не умолчим:

ПСАЛОМ 8, И КАНОН.

Песнь 1, Воду прошед:

Амвросие отче, от Бога приемый дерзновение, не престаеши о нас, моления принося о всех воспевающих любовию память твою.

Ум мой нестоянный видя, сладчайший отче, утверди мой помысл ползок, во еже ми бежати беззакония и твердо шествовати ко Господу.

Благодать погубих Христову, Амвросие блаженне, работою сластем, темже молитвами твоими богатство Духа Божия независтна ми даруй.

Богородичен: Богоневесто, Мати Содетеля, простершая руце, имиже понесла еси Христа: Егоже о нас молящи не оскудей, Дево, всегда.

Песнь 3. Небеснаго круга:

От нощи неведения, чудотворче преподобне, изми окаянную душу мою мольбами твоими, к свету невечерню Христовых повелений, тайно возведи и просвети.

Осиянный Троицы молениями, преподобне, и наслаждаяся о Господе, присно поминай молящихся тебе, и теплыми мольбами твоими избави от зол и обстояний.

Враг ми ругается, творя мя работна страстем, и в пропасть адову низводит и срамляет, божественный Амвросие, крепким твоим предстательством того мя исхити и спаси, молюся.

Богородичен: Преблагословенная Дево, прежде всех родов Господь, яко краснейшую скинию Тя избра, в нюже вселися, и Необоримую Стену постави Тя, Пречистая, поющим Тя.

Спаси от всякия нужды и вреда Тя воспевающих, от болезней и скорбей, богомудре Амвросие, и исполни верных прошения.

Призри благосердием:

Седален глас 2. Подобен: Моление теплое:

Свирепства вражия не убоявся, священнейше, подвиги сокровенными сатану злохитраго победил еси совершенно. и моления исполняеши ныне рабов твоих, иже коленопреклонении верно лобызают божественную икону твою.

Песнь 4. Услышах, Господи:

Врачебница безсребрена, святе Амвросие, келия твоя явися и прибежище всем тепле призывающим тя.

Унынием одержим есмь и грехи углебаем, в корабли любве твоея потопления спаси мя, преподобне.

Искушаяй не престает уязвляти и стужати мя, досточудне: святыми твоими мольбами ослабу ми даруй, Амвросие.

Богородичен: От пречистых кровей твоих Владыку всех родила еси, Егоже моли, Всенепорочная, избавление даровати страждущим.

Песнь 5. Просвети нас:

Умертви плоти моея всегубительная движения, Иисуса Спаса моего, Отче преподобне, житие и божество насаждая в сердце моем.

Пощади мя, люте бедствующа всегда, и подвигшагося утверди молитвами твоими божественными ко Господу, Амвросие.

Скорбьми многими, напастьми и недуги искушаема мя, богоносне, молитвами твоими в терпении укрепи.

Богородичен: Мати воистину Бога, Пречистая, Ты еси: Емуже и предстоиши служащи и Твоих рабов любовию соблюдающи.

Песнь 6. Молитву пролию ко Господу:

Язв ми целитель ныне явися прикасанием святых твоих мощей: плоти врачуя моея страсти, и души утишая болезни, Амвросие чудотворче, с дерзновением ко Господу приближаяйся.

Амвросие, смятение мое устави, и малодушия облаки развей, и щит ограждения твердый буди, отче, противу грозящаго мне змия, и святыми твоими молитвами душу мою невреждену сохрани.

Спящаго мя леностию, преподобне, памятию воздвигаеши твоих трудов, ихже радостно свершил еси, отче, Господа любовь стяжав: cочетай и мене Христу теплыми и непрестанными мольбами.

Богородичен: Всепетая Богородице, предвари, и сетей соблазна избави мя, и теплым и твердым предстательством от навета вражия сохрани, и исполни мя радости Сына и Бога Твоего, неискусомужная.

Спаси от всякия нужды и вреда тя воспевающих, от болезней и скорбей, богомудре Амвросие, и исполни верных прошения.

Пречистая, яже словом Слово неизреченно в последняя времена рождшая, Того умоли, яко имущее Матернее дерзновение.

Кондак глас 2. Подобен: Кровей твоих струями:

Поты трудов, блаженне, души твоея ризу убелил еси, и просветив ю светом благодати, прибегающим к тебе ходатай был еси болящим и спаситель, Амвросие.

Глас 6. Подобен: Всю отложивше:

Отче досточудне, с мольбами к тебе прибегаю, дерзая на милость твою. Слезы приношу ти, недостойный, избави мя змия лютаго, божественне, и Христу Вседержителю раба мя соделай святыми твоими молитвами, и недуг свободи, страсти же всякия мя очисти, и православных паству от вражия навета и от ересей избави, святе Амвросие.

Песнь 7. От Иудеи:

Мучимый болезньми, яко мученик многострадальный претерпел еси страдания, и врачеватель недугов всяческих явился еси благодатию, данною ти от Бога, Амвросие богомудре.

Чревоболение и кровей течение, отче Амвросие, и недуги неисцельны отжени скоро прикасанием святых твоих мощей, и добре утешение подаждь душам скорбящим.

Обитель оптинскую, Богородицею хранимую, блаженне Амвросие, мощей твоих раку чтущую, от всякаго вреда и от огня сохрани, с Богородицею молитвы принося ко Господу.

Богородичен: Прежде рождества Дева и рождестве Дева, Марие, пребыла еси и паки по рождестве Дева сущи, Отроковице: сердце мое просвети, и помыслов скверных свободи мя скоро.

Песнь 8. Царя небеснаго:

Страждущаго унынием, богомудре, и в скорбех люте отчаяннаго крилома любве твоея мене осени.

От безместных деяний и от пропастей злобы нас избави, Амвросие треблаженне, сонмища демонов удаляя молитвами твоими.

Тучами слез и умиления питием напой мя, теплыми твоими мольбами, к Животодавцу, Амвросие всеблаженне.

Богородичен: Неискусобрачно Бога Слова рождшая, осени мя покровом, Пречистая Марие, и озари мя светом богоразумия.

Песнь 9. Воистину Богородицу:

Гноения души моея и язвы телесе моего силою благодати исцели Христа умоляя, отче Амвросие.

Божественную мудрость стяжав, богомудре, лжемудраго злобу истни, егоже сетей избегати добре наставляй мя.

Христово мя яви отроча, Амвросие всеблаженне, благоприятным твоим ходатайством к Богу, и наследника славы его мя соделай.

Ересей безбожных расторгни приражения и православных рог утверди, Христу приседяй, славне Амвросие.

Богородичен: Почитаем Тя, Дево, яко рождшую Слово, и превышшую ангелов сущую, неусыпным предстательством Твоим утверждаеми.

Достойно есть, и величания.

Со слезами припадем благоговейно к образу божественному Амвросия чуднаго, просяще вси о дарованиих многоразличных душу ко спасению присно устремляющаго.

Радуйся, Владыки рабе верный, талантов богатство возрастивый труды многими, радуйся, иже раздаваяй нищим благодать и всех освящаяй, блаженнее Амвросие.

Приидите, оптинстии монаси, благочестно собори сошедшеся радостно: почтим достойно Амвросия великаго, раце мощей его припадающе.

Придите оптинстии монаси, благочестно собори сошедшеся радостно: почтим достойно Амвросия великаго, раце мощей его припадающе.

По отпусте поем:

Глас 2. Подобен: Егда от древа:

Свет Христов радостотворный, соль вселенныя ты еси, божественный Амвросие, всем сияя изрядно светильником жития твоего, и управляя словесы твоими к тебе приходящих, верных молитвами твоими от лютых избавляй, всех сердца ведый, страсти же душ исцеляй и телесныя недуги.

Владычице, приими:

Все упование мое: