Песнь 1

Ирмос: Посеченый несекомаго пресече, и виде солнце землю, юже не виде; лютаго врага вода потопи, и непроходимое пройде Израиль. Песнь же воспевашеся: Господеви поим, славно бо прославися.

Припев: Святителю отче наш Филиппе, моли Бога о нас.

Агнче Божий и Слове, светозарением Святаго Твоего Духа мрачному уму моему светоносную лучу низпосли и слово ми вдохни восхвалити, егоже Сам избрал и приял еси, верх страдальца священнаго Филиппа.

Святителю отче наш Филиппе, моли Бога о нас.

Благодать, святе, Божественную рабу твоему у Бога испроси и разумения мою исполни душу восхвалити житие твое, Филиппе святителю, имже вся удивил еси, подвизався, Господу поя: славно бо прославися.

Слава: Великих добродетелей светозарением сияюща твоя детели, преподобне, удивишася бо царие крепкому твоему мужеству, яко в наказании к ним язык твой не ослабе, и Господу пояше: славно бо прославися.

И ныне: Глаголы Богоглаголивых проповедников о Тебе, Богомати, исполнишася: се бо родила еси, Дево, Младо Отроча, Адама древняго старейшо и сопрестольна Родителю, мира всего на спасение и тления изменение.

Песнь 3

Ирмос: Утвердися сердце мое во Господе, вознесеся рог мой в Бозе моем, разширишася на враги моя уста моя, возвеселихся о спасении Твоем.

Святителю отче наш Филиппе, моли Бога о нас.

Добродетелей на гору востекл еси, и во мрак видения вшел еси, святителю Филиппе, и познал еси, елико вместно, Непостижимаго естеством. Просвещения исполнен быв, отче, приял еси Божественную благодать.

Святителю отче наш Филиппе, моли Бога о нас.

Единаго Бога добротою ища и едину Его получите славу желая, блаженне, славу же и честь земнаго пребывания яко преходящую оставил еси и яко угодник просиял еси всех Владыки Христа.

Слава: Желанием духа плоти желание увядил еси и себе, блаженне, обручил еси сожительницу чистоту, от неяже чада тебе родишася, вся добродетели, приснославне, чадо тя содевающия Невещественнаго Света.

И ныне: Змия мысленнаго умертвила еси, умертвившаго Адама в раи и Еве праматери соделавшаго печать. Жизнь прозябши, Дево Чистая, от тления нас свободи: Бог бо из Твоих ложесн прошед неизреченно.

Господи, помилуй (трижды). Слава, и ныне:

Седален, глас 8-й

Яко Апостола избраннаго тезоименит, отче, и подражатель, беды претерпел еси и гонения. Ревность воображая пророка Илии и Крестителя, мужески обличил еси беззаконующия и престол, вверенный тебе, добре управил еси, равное оных течение скончав. Яко милоть, тело твое на земли оставил еси, испущаеши, яко миро, благоухания аромат и, яко дождь, изливаеши благодать духовну, напояя тайно бразды сердец наших. Филиппе святителю, моли Христа Бога грехов оставление даровати чтущим любовию святую память твою.

Слава и ныне: Яко Деву и Едину в женах, Тя, без семене рождшую Бога плотию, вси ублажаем, роди человечестии: Огнь бо вселися в Тя Божества, и яко младенца доиши Зиждителя и Господа. Тем, Ангельский и человеческий род, достойно славим Пресвятое Рождество Твое и согласно вопием Ти: моли Христа Бога согрешений оставление даровати покланяющимся верою Пресвятому Рождеству Твоему.

Песнь 4

Ирмос: Пророк Аввакум умныма очима провиде, Господи, Пришествие Твое, тем и вопияше: от юга приидет Бог, слава силе Твоей, слава снизхождению Твоему.

Святителю отче наш Филиппе, моли Бога о нас.

Злобою движимии на тя, незлобиваго агнца, яко дивии зверие, восташа, словесы твоими, яко остном, сречеми, не терпяще, яростию поощряхуся, святителю Богомудре.

Святителю отче наш Филиппе, моли Бога о нас.

Имея тя заступника мир весь и помощника в напастех, яко бо поборник верен и скорый предстатель, к твоей пастве пририщущия напастей и бед изымаеши священными твоими молитвами.

Слава: Исполнив добрыя подвиги, тезоимените, желаннаго, Богомудре, сподобился еси безсмертия, идеже, радуяся, венец победы взял еси и вопиеши: слава силе Твоей, слава, Христе, Пришествию Твоему.

И ныне: Крепость всех врагов низложи, Мати Божия, оскорбляющих воспевающия Тя, яко рождшая Господа Славы, невредимо Твое стадо спасай от злых приражений, яко да по долгу Тя ублажаем.

Песнь 5

Ирмос: Мрак души моея разжени, Светодавче Христе Боже, началородную тьму изгнав бездны, и даруй ми свет повелений Твоих, Слове, да, утренюя, славлю Тя.

Святителю отче наш Филиппе, моли Бога о нас.

Яко луча Правды Солнца, явися миру светлостьми добродетелей предстательство твое, святителю Филиппе, разоряющи облак нашедших бед. Тя и ныне поющия в мире сохрани, и прослави я красотою, и просвети.

Святителю отче наш Филиппе, моли Бога о нас.

Меч обоюдуостр язык твой показася, в Христов страх вооружився, блаженне, разумно изобличив начальствующия во свидетельство Христе Всецаря, виновна на среду приводя, и Божественныя Его ученики.

Слава: Нов явился еси ревностию, якоже вторый Моисей, не знамении страшными удивляя, на Божественных словес учении наставляя, к тихому пристанищу новаго Израиля от страстей Египта изводя.

И ныне: Облак разумный Тя именуем, из Тебе бо Христос возсия, Всенепорочная, и пространнейшу Тя Небес показа: Того бо неискусомужно родила еси, Чистая, воплощенна за милосердие неисповедимое.

Песнь 6

Ирмос: Иону в ките, Господи, единаго вселил еси, мене же, связаннаго мрежами вражиими, яко от тли онаго спаси.

Святителю отче наш Филиппе, моли Бога о нас.

Промышление общее творя о пасомых тобою, еже быти им душею и сердцем едино, славне, во Христове единей вере пребывающим, языческия же отревал еси обычаи и разделения бежати, мудре, научил еси.

Святителю отче наш Филиппе, моли Бога о нас.

Ревностию Христовою поострився, ярость самодержавнаго на кротость преложити тщался еси и к прещением царевым непреклонен отшед был еси, яко Христовых заповедей делатель, и показался еси яко крепок храбрник, за паству твою пострадав даже до смерти, радуяся.

Слава: Светоносную лучу, сияющу во мраце жития сущим, святителю Филиппе, видим тя, и яко свещу неугасимую, Невещественному приобщившагося Свету, и вся освешающа концы, и тьму неразумия отъемлюща.

И ныне: Тя иногда написа скрижаль, Богообразне во пророцех Моисей, свещник же Света, и сень, и жезл процветший, Всенепорочная, и стамну, манну носящую, и лествицу, еюже возведохомся от земли к Высоте.

Господи, помилуй (трижды). Слава, и ныне:

Кондак, глас 3-й

Православия наставника и истины провозвестника, Златоустаго ревнителя, Российскаго светильника, Филиппа премудраго восхвалим, пищею словес своих разумно чада своя питающа, тоя бо языком хваление пояше, устнама же пение вещаше, яко таинник Божия благодати.

Икос

Приидите, любострадальцы, пением и песньми духовными память священномученика совершающе, Божественне возвеселимся, время нашего веселия и натрижнения наста, в неже приемлем страстей разрешения дар: яко бо столп огнен явися, попаляющ беззаконнующих главы, верных же просвещающ души ученьми Богоразумия и в Божественный Град, Горний Иерусалим, яко другаго Израиля, вводящ, яко ученик Божия благодати.

Песнь 7

Ирмос: На поле Деире иногда мучитель пещь постави на мучение Богоносных, в нейже три отроки песнословяху Единаго Бога, троично воспеваху, глаголющи: отцев Боже, благословен еси.

Святителю отче наш Филиппе, моли Бога о нас.

Украшен боголепно, Господу предстал еси добродетельными подвиги, венец же нося страдания, испещрен кровавыми каплями, святителю Филиппе. Темже совершающая светоносную память твою присно поминай и поющия: отец наших Боже, благословен еси.

Святителю отче наш Филиппе, моли Бога о нас.

Фараонит мысленных врагов ополчения, блаженне, избег, легко прешел еси к Горним, тамо водворяяся, идеже почесть славы получив терпением во свете праведных, в радовании святых воспевая: отец наших Боже, благословен еси.

Слава: Хвалят тя, блажаще, любовию притичущии к раце твоей, блаженне, в ней бо мощи твоя целующе, обильно благодать приемлют: прикосновением бо вред очес исцелил еси и болезнь зубов облегчил еси поющих: отец наших Боже, благословен еси.

И ныне: От любве душевныя вопию Ти, Владычице: пресветлаго Солнца облаче, спасительная двере, Небесная врата, лествице мысленная, всех христиан мольбу приими, Тя блажащих, надежду душ наших, и Сыну Твоему зовущих: отец наших Боже, благословен еси.

Песнь 8

Ирмос: Покрываяй водами превыспренняя Своя, полагаяй морю предел песок и содержай вся, Тя поет солнце, Тя славит луна, Тебе приносит песнь вся тварь, яко Содетелю всех во веки.

Святителю отче наш Филиппе, моли Бога о нас.

Целиши независтно верно призывающия тя, яко представ, абие разслабленна возставил еси и страждущему ятро прикосновением ручным уврачил еси, унынием скорбяща явлением твоим в радость претворил еси, присно действуя вся, блаженне, всем во веки.

Святителю отче наш Филиппе, моли Бога о нас.

Честь многоценную твоему верху страдания венец, яко победоносцу, живоносною десницею Зиждитель возложи, всеблаженне, тело же твое соблюде невредимо от боков земленых, испущающе благоухания аромат. Сице тя прослави Подвигоположник во вся веки.

Слава: Шатания и брани междоусобныя укроти, и свирепеющия волки на стадо твое, блаженне, яко истинный пастырь, молитв твоих палицею далече отжени, и востания языков покори: да яко предстателя тя воспеваем во веки.

И ныне: Щитом веры храм Твой святый, Богородице Дево, сохрани, и в нем славословящия Тя купно славы Твоея сподоби, и нахождения варварскаго и томления их избави ны, ума нашего волны свирепыя укроти молитвою Твоею, Всепетая.

Песнь 9

Ирмос: Благословен Господь, Бог Израилев, воздвигнувый рог спасения нам в дому Давидове, отрока Своего, в нихже посети нас Восток с высоты и направил ны есть на путь мира.

Святителю отче наш Филиппе, моли Бога о нас.

Едино естество Троицы богословил еси, суетным же поучающияся смело, всемудре, обличив и Божественными наказании твоими верныя увещав, мудре укрепил еси, Ангелов сожителю, святителю Филиппе, память твою празднующия в мире соблюди.

Святителю отче наш Филиппе, моли Бога о нас.

Юношам немование сродно присвоение бывает, но отцем любезно воистинну. Ты же, отче, приими наше сие благодарение, не яко достойно истинно твоея хвалы, но яко от усердия тебе приносимо: не бо можем лепотно хвалити тя и величати.

Слава: Яко апостолов сопрестолен и учеников сликовен, святителем равночестен, страстотерпче Филиппе, предстательством твоим поющия тя в мире сохрани и православных рог возвыси, варварская же свирепства низложи, да, радующеся, поем, тя величающе.

И ныне: О, Света приятелище, Богорадованная Владычице, святителем воистинну утверждение и преподобным похвало! Спаси ны от бед, и обстояний, и языков нашествия, воспевающия Тя, Многопетую.

Кондак 1

Избранный от Господа сил Российских первопрестольников преемниче, славным подвигом исповедничества, яко светило златозарное, озаривый Церковь православную, чудесы велиими и нетлением твоих мощей от Бога прославленный, святителю отче наш Филиппе, величая дивнаго во святых Своих Господа, восхваляем тя с любовию, яко усерднаго пред престолом Господним молитвенника, чуднаго пастыря и мученика, и от всего сердца вопием ти:

Радуйся, святителю Христов Филиппе, исповедниче великий и преславный чудотворче.

Икос 1

Ангельския силы радовахуся, святителю отче наш Филиппе, чистому и святому житию твоему, видяще, яко издетска кротость дивную, благочестие и святое послушание являл еси; мы же, благодаряще Господа, тако о тебе благоволившего, прославляем тя яко Божия избранника восхвалениями сими:

Радуйся, родителей твоих плод благословенный.

Радуйся, из млада Господа Бога возлюбивый.

Радуйся, в чистей молитве твоей пред Господем дитя незлобивое.

Радуйся, с отрочества житиями угодников Божиих сердце твое питавый.

Радуйся, служб Божиих неленостный посетителю.

Радуйся, книжнаго церковного учения искренний любителю.

Радуйся, наказанию отца твоего духовного зело прилежавый.

Радуйся, пустошным играм, яже детей обычай, нимало же внимавый.

Радуйся, родителей твоих радость и утешение.

Радуйся, всех знаемых твоих похвало и удивление.

Радуйся, наш святый молитвенниче.

Радуйся, наш дивный учителю.

Радуйся, святителю Христов Филиппе, исповедниче великий и преславный чудотворче.

Кондак 2

Видел еси, святителю Филиппе, отрок млад сый, храмов Божиих благолепие, святых обителей украшение, честных мощей и икон святых от народа почитание, ярких свещей горение, фимиама воскурение и купно с материю твоею службами церковными зело умилялся еси, красоту же храмов Божиих вседушно возлюбил еси; и тако благочестиво возрастая, от юности твоея Отечества Небеснаго искал еси, идеже Господь во славе, идеже непрестанная песнь: Аллилуиа.

Икос 2

Разум твой учением слова Божия и молитвою умудряя, явился еси, святителю Филиппе, юноша благонравен, и за премногую твою добродетель излюблен был еси юным царем Иоанном, иже тя яко отрасль высокого рода приблизи к своему престолу царскому и многими почестьми тя украси; ты же, земную славу ни во чтоже вменяя, искушения земных почестей победил еси и о едином на потребу попечение имел еси, сего ради мы тебе радостно восхваляем тако:

Радуйся, от юности добрый и благочестивый рабе Христов.

Радуйся, благоговейныя матере твоея верный и послушный сыне и друже.

Радуйся, старцы и старицы добре почитавый.

Радуйся, нищия и убогия зело возлюбивый.

Радуйся, юношеских похотей победителю.

Радуйся, целомудрия рачителю.

Радуйся, церковных песен и Божественныя псалтири усердный любителю.

Радуйся, песен срамных, смехотворства и безчинства злаго нелицемерный презрителю.

Радуйся, всякую буесть юности отгнавый.

Радуйся, мудрость Евангельскую возлюбивый.

Радуйся, всех добродетелей вместилище.

Радуйся, благодати Божия искренний причастниче.

Радуйся, святителю Христов Филиппе, исповедниче великий и преславный чудотворче.

Кондак 3

Силою благодати Божия влекомь, всем сердцем познал еси, угодниче Божий, суету жизни мира сего: того ради внимание к себе царево видя и общение со избранными слугами того имея, услады душевныя в сих мирских прелестех не обретал еси, но об иноческом житии в сердце твоем помышляя, молился еси о благодатней небесней помощи, и тую в себе ощутив, благодетелю Богу радостно взывал еси: Аллилуиа.

Икос 3

Имея возраст совершен, услышал еси, преподобне отче, в храме Божием словеса Господа не можете Богу работати и мамоне (Мф.6:24), сими словесами Христа Спасителя восхищенный, не приложился еси плоти и крови, но Божию призыву повинуяся со усердною молитвою на устах, заступлением Богоматери и угодников Божиих окормляемь, оставил еси царское приближение, отчий дом, богатство тленное, и нищ быв, тайне душевнаго ради спасения ко обители преподобных Зосимы и Савватия устремился еси. Таковому твоему послушанию гласу Господа дивящеся, сице восхваляем тя:

Радуйся, по завету Господа мир и вся, яже в мире, презревый.

Радуйся, крест Христов на рамена твоя с веселием возложивый.

Радуйся, путь тесный к Царствию Небесному избравый.

Радуйся, узкими враты за Господем последовавый.

Радуйся, богатство мира сего возненавидевый.

Радуйся, Христовой нищете себе смиренно покоривый.

Радуйся, Господа и Спасителя паче родителей и дома твоего возлюбивый.

Радуйся, царя земнаго оставивый, да Царю Небесному всего себе поработиши.

Радуйся, добрый странниче ко Отечеству Небесному.

Радуйся, безбоязненный путниче к морю-окиану ледовитому.

Радуйся, земный ангеле.

Радуйся, небесный человече.

Радуйся, святителю Христов Филиппе, исповедниче великий и преславный чудотворче.

Кондак 4

Буря смущений найде на тя, святителю Христов, егда Господь, испытуяй любящия Своя, не попусти тя дойти до Лавры Соловецкия, но остави тя в пределах земли Новгородския, у езера Онежского, идеже, в веси Киже, прилепился еси ко единому от житель страны тоя пасти овцы его. Но в сих напастех ты, угодниче Божий, унынию не вдался еси, радостно же вся Господа ради терпевый. Умильно взывал еси, овцы господина твоего пасый, истинному Пастырю Христу ангельскую песнь: Аллилуиа.

Икос 4

Слышаны быша на езере Онежском подвиги иноков обители Соловецкия, и паки, аки огнь, возгореся желание твое, святителю Филиппе, в сей святей обители во славу Божию потрудитися. Таже, оставль Кижу, устремился еси на оток Соловецкий, идеже никим же знаемь, паче же высокородие твое скрывая, смиренныя ради мольбы твоея принят был еси во обитель, да послушание твое Господеви истинно явиши. И послушник быв, вся повеленная тебе во обители радостно творил еси и своея воли вседушно отреклся еси. Сего ради в похвалу тебе сице глаголем:

Радуйся, кроткий и смиренный послушниче обители Соловецкия.

Радуйся, повеления игумена и старцев, яко веления Самого Господа, исполнявый.

Радуйся, сечением дров во обители смирение стяжавый.

Радуйся, земли копанием и камения ношением плоть свою обручивый.

Радуйся, аки вторый Дамаскин, скаредныя места очищавый.

Радуйся, всякие тягчайшия работы радостно исполнявый.

Радуйся, яко биемь бываем, никакоже злом за зло воздавал еси.

Радуйся, яко многия обиды и уничижения благодушно претерпевал еси.

Радуйся, Христовых заповедей добрый исполнителю.

Радуйся, церковных заветов усердный хранителю.

Радуйся, терпения учителю.

Радуйся, смиренномудрия наставниче.

Радуйся, святителю Христов Филиппе, исповедниче великий и преславный чудотворче.

Кондак 5

Богомыслие пустынное ко святому послушанию приложил еси, отче наш Филиппе, сего ради игумен обители радостно по благому твоему хотению сопричисли тя ко избранному стаду иноков Соловецких и твой постриг во инока соверши; ты же, со страхом и трепетом обеты иночества изрекая, о содействии благодати Божия молился еси и со слезами великого умиления взывал еси Господу: Аллилуиа.

Икос 5

Видеша игумен и братия обители Соловецкия в тебе воистину избранный сосуд Божия благодати: ангельский бо чин восприяв, великих подвигов твоих не оставил еси, преподобне, но всяко смиряя себе, носил еси дрова и воду, огнь возгнешал еси, в поварне и пекарне прилежно трудился еси, вкупе же паче прежняго в молитве и прочих духовных трудех ходил еси. Егда же иноцы обители начаша восхваляти тя блаженне, ты сея славы людския не стерпел еси, но оставль обитель, удалился еси на том же отоце во едино пусто место. И тамо денно и нощно не едино лето в молитве, чтении Слова Божия и богомыслии пребывал еси. За таковыя твоя во славу Господа подвиги восхваляем тя усердно:

Радуйся, истинного монашеского жития великий образе.

Радуйся, иноческих обетов пламенный исполнителю.

Радуйся, дневными и нощными подвигами плоть твою всецело духови покоривый.

Радуйся, молитве Иисусовой усердно прилежавый.

Радуйся, умную молитву от Господа стяжавый.

Радуйся, древним восточным подвижником искренний подражателю.

Радуйся, токмо в молитве ко Господу все утешение полагавый.

Радуйся, сладостным общением с Господом в пустыни дух твой питавый.

Радуйся, Божия Матере любимиче.

Радуйся, Ангелов собеседниче.

Радуйся, наше верное прибежище.

Радуйся, наше светлое упование.

Радуйся, святителю Христов Филиппе, исповедниче великий и преславный чудотворче.

Кондак 6

Проповедник словом и делом чистаго и святаго монашеского жития был еси, святителю Филиппе, сего ради игумен, престарелый в летех, вкупе с братиею обители умоли твое смирение прияти высокое звание иноков начальника и священства, да водимая тобою святая обитель яко яркий светильник всея Руси православныя явится, да иноцы и мирстии людие, молящиеся в ней, возрастают от силы в силу, воспевая Богу: Аллилуиа.

Икос 6

Возсия светом велиим обитель Соловецкая, егда святитель Филипп, гласу Божию повинуяся, восприял бремя тяжкое игуменства монастырского. Святый игумен, по заповеди Господа, себе самого яко слугу всех вмени, телесным бо трудом и молитвенным подвигом паче прежняго себе предавая, Христоподражательным своим нравом и иноческим житием братию без слова пленяше, таже чин церковного богослужения исправляше и о благоукрашении святыя обители попечение имеяше. Воспоминающе убо славные труды сего дивнаго игумена, восхваляем его тако:

Радуйся, Соловецкия обители мудрый управителю.

Радуйся, братии обители кроткий и смиренный начальниче.

Радуйся, о вечном спасении братии слезно ко Господу взывавый.

Радуйся, скорби и радости иноков в сердце твоем не тесно вмещавый.

Радуйся, яко поучения инокам усердно вещал еси.

Радуйся, яко Евангельския законы в сердца их глубоце внедрял еси.

Радуйся, добрым иноком сугубую честь воздававый.

Радуйся, строптивыя и нерадивыя иноки судом Божиим вразумлявый.

Радуйся, Христовыя любве и небеснаго мира усердный благовестниче.

Радуйся, вечныя правды Христовы твердый поборниче.

Радуйся, иноческих уставов ревнителю.

Радуйся, красоты церковных служб рачителю.

Радуйся, святителю Христов Филиппе, исповедниче великий и преславный чудотворче.

Кондак 7

Хотящих честне изобразити чудныя дела игуменства твоего вразуми, святителю Филиппе: недоумеет бо язык человеческий изрещи достойныя хвалы денным и нощным трудам твоим: твоему о благоукрашении обители попечению, твоему уставом церковным послушанию, твоим слезам молитвенным, твоим воздыханием сердечным, твоему пустынному уединению. Обаче в толиких безмерных трудех твоих силу благодари Божественныя видяще, усердно вопием щедродателю Господу Богу ангельскую песнь: Аллилуиа.

Икос 7

Новый Зосима явился еси обители твоей, святителю Филиппе. Всею душею твоею живя в Господе, присно в молитве пребывая, слезами умиления покрывая ложе твое, ты, святителю великий, не забыл еси и великого дела домовного строительства: новые храмы и скиты воздвигал еси, блатныя места осушал еси, пути по отоку Соловецкому исправлял еси, братския домы, больницы и прочия строения обители созидал еси. Таковому твоему доброделанию дивящеся, тако похваляем тя:

Радуйся, преподобному Савватию в молитве и духовнем делании подобный.

Радуйся, по домовому строительству и во игуменстве великому Зосиме равный.

Радуйся, преподобному Герману в твердей вере и светлем на Господа уповании подражавый.

Радуйся, добродетели всех Соловецких подвижников усвоивый.

Радуйся, честнаго Успения Богоматере и Боголепаго Спасова Преображения храмов мудрый зиждителю.

Радуйся, пустыни твоего имене и скитов обители основателю.

Радуйся, пресныя воды Соловецких источников во единем Святем езере совокупивый.

Радуйся, в красотах севернаго неба славу Премудраго Творца вселенной умильно созерцавый.

Радуйся, всякую пядь земли отоков Соловецких твоими честными стопами освятивый.

Радуйся, чащи лесныя и брега морския слезами умиления обильно орошавый.

Радуйся, пред Богом молитвенниче наш усердный.

Радуйся, святителю Христов Филиппе, исповедниче великий и преславный чудотворче.

Кондак 8

Странник безвестен и проситель смиренный иноческого послушания у врат обители Соловецкия явился еси, Филииппе, но како духовных твоих доблестей ради содеяся славно имя твое блаженнее, град бо Москва и вся Русь православная познаша в тебе яве добродетелей твоих светлость и молитв твоих силу; сего ради и был еси вождь духовен всея Руси святыя и всех, спасения ищущих, во еже взывати Господу: Аллилуиа.

Икос 8

Всею душею и телом обители преподобных Зосимы и Савватия поработал еси, отче преподобне, сего ради о нуждах обители сея зело прилежал еси и о сих царя Иоанна Грознаго извещал еси. Грозный же царь, юношеския дружбы твоея и подвигов твоих иноческих ради щедро обители твоей снабдение творяще, подражающе же ему, и прочии града Москвы обитателие от трудов твоих обители прилежаху, и к молитвенному твоему заступлению притекающе, тако прославляху тя:

Радуйся, от царских чертогов до иноческия нищеты нисшедый.

Радуйся, честь земную на богатство неоскудевающее пременивый.

Радуйся, Божественныя литургии пламенный совершителю.

Радуйся, слова Божия усердный изъяснителю.

Радуйся, иноческими подвигами твоими родительницу твою возвеселивый и житием твоим ко иночестей жизни склонивый.

Радуйся, нужды отечества твоего земнаго в сердце твоем имевый и о них пред Богом слезы источивый.

Радуйся, мирских людей наставниче.

Радуйся, столпе православия непоколебимый.

Радуйся, истины поборниче неодоленный.

Радуйся, утешение всех скорбящих.

Радуйся, отрадо к твоей помощи всех прибегающих.

Радуйся, святителю Христов Филиппе, исповедниче великий и преславный чудотворче.

Кондак 9

Всяк возраст и чин града Москвы зело возрадовася, егда изыде весть о приятии тобою, смиренным игуменом Соловецким, чести и сана первосвятителя Церкви Российския. Ведомо бо бе людем русским и прежнее твое к царю приближение, и царское твоих иноческих подвигов почитание. Сего ради упованием светлым сердца их исполнишася: новый бо первосвятитель истинный и мощный печальник и заступник пред Грозным царем о всех обидимых и правды ради гонимых восстанет, и в сей великой радости и надежде возгласиша Благодателю всех Богу благодарственно хвалебную песнь: Аллилуиа.

Икос 9

Ветийствующий язык человеческий не возможет достойне изобразити труды и скорби твоя, святителю Филиппе, на первосвятительском престоле Церкве Российския. Грозный бо царь в тыя дни свою державу злою опричниною возмути: люди русские зело сокрушахуся, егда о убиении мужей неповинных слышаху и козни жестокия видяху. И ты, ревнителю Божий, сию неправду цареву видя, в защищение верных сынов русских дерзновенно глас свой возвысил еси и, входя к царю, кротко того поучал еси, и опричнину злую упразднити и убиения невинных прекратити умолял еси. И благослови Господь святительское твое пред царем Грозным печалование. Царь Иоанн, твоим мольбам и слезам внемля, гнев свой на время укроти. Народ же русский и град Москва твое мощное пред царем заступление видяще, сице радостно восхваляху тя:

Радуйся, архиерею истинный.

Радуйся, яко вторый Моисей бремене всего народа русскаго носителю.

Радуйся, граду Москве и всему народу русскому словес Божественных усердный изъяснителю.

Радуйся, российский Златоусте, устами златыми Божия правды и суда Христова провозвестниче.

Радуйся, царя и людей русских во апостольских и отеческих преданиях мудрый наставниче.

Радуйся, непокоряющихся Божьему закону грозный запретителю.

Радуйся, Грознаго царя искренний, нелицеприятный и нельстивый друже.

Радуйся, об исполнении пути его и о вечном его спасении усердный и слезный молитвенниче.

Радуйся, злых опричнины деяний безбоязненный обличителю.

Радуйся, обидимых защитниче и скорбящих душею утешителю.

Радуйся, всех заветов Евангелия Христова смиренный исповедниче.

Радуйся, о земных наших скорбех милостивый печальниче.

Радуйся, святителю Христов Филиппе, исповедниче великий и преславный чудотворче.

Кондак 10

Спасти хотя всю Русь православную от суемудренного свирепства царского, яко пастырь добрый, душу твою за паству положити готовый, ты, святителю Христов, всенародно ярость самонравного царя на кротость преложити потщался еси. О новых же злодеяниях опричнины уведев и гнев царский на себе испытав, к венцу мученическому приуготовил себе и в благодатном умилении ко Господу взывал еси чистыми твоими устами хвалебную песнь: Аллилуиа.

Икос 10

Царя Грознаго ярость и свирепство зело угобзил еси, святителю отче наш Филиппе, егда Христову учению внимая, во храме Владычицы честнаго Ея Успения новыя беззакония царя Грознаго обличив еси, еще же и опричника в глумлении над Евангелием укорил еси. За сие твое дерзновение судом неправедным святительского сана лишен был еси, в храме Божием злыми опричниками во святительском одеянии обезчестен был еси и муки жестокия, в темницу ввержен, претерпел еси. Последи же, от смерти избавлен быв, во Отрочь монастырь во изгнание послан был еси. Чада же твоя духовная, твое поругание и страдание видяще, со слезами возглашаху тебе сия:

Радуйся, страдальче наш незлобивый.

Радуйся, паству твою до смерти возлюбивый.

Радуйся, пророку Илии и Предтече Господню во обличении царя беззаконнаго уподобивыйся.

Радуйся, учение Христово в доме царстем аки вторый Павел проповедавый.

Радуйся, великому Амвросию, епископу Медиолана, единоправный.

Радуйся, безбоязненный правды поборниче.

Радуйся, аки вторый Златоуст безчестие и изгнание от царя претерпевый.

Радуйся, о вразумлении царя Грознаго яко верный Христов пастырь непрестанно моливыйся.

Радуйся, наш благий и великий святителю.

Радуйся, наш златословесный учителю.

Радуйся, яко твоему подвигу Ангели возрадовашася.

Радуйся, яко твоему исповедничеству вся вселенныя дивится.

Радуйся, святителю Христов Филиппе, исповедниче великий и преславный чудотворче.

Кондак 11

Пение надгробное со слезами скорбными град Москву, обитель Соловецкую и всю Русь православную огласи, егда во вся концы отечества нашего изыде весть о мученической кончине твоей, наш дивный исповедниче. Смерть бо неправедную, горькую, во Отроче монастыре от рук злаго слуги царского восприял еси. Присно со Христом пребывая, молитву за убийц твоих творил еси, святителю, егда праведная душа твоя от тела нуждею разлучашеся. Мы же, прославляюще твою страдальческую кончину, со слезами умиления вопием премудрому Господу: Аллилуиа.

Икос 11

Свет благодатных исцелений обильно возсия от честных мощей твоих, святителю Филиппе, первее в Соловецкой обители, а послежде во граде Москве, в нюже многоцелебныя мощи твоя великим Никоном пренесошася. К сим мощем припадающе, в похвалу тебе, наш великий святителю, тако глаголем:

Радуйся, возвращением твоим в Соловецкую обитель братию обители зело возвеселивый.

Радуйся, игуменство твое в ней духовне возобновивый.

Радуйся, яко Соловецкая обитель части мощей твоих благодарне поклоняется.

Радуйся, яко сию часть мощей твоих обитель твоя, яко драгоценную жемчужину, почитает.

Радуйся, яко прославлением честнаго твоего тела и град Москву и все отечество наше возвеличил еси.

Радуйся, яко чудесами от нетленных мощей твоих благочестие в стране нашей умножил еси.

Радуйся, святителем Христовым Петру, Алексию и Ионе единоправный.

Радуйся, подвигом твоим святителя Ермогена на великое пастырское дерзновение воодушевивый.

Радуйся, светозарное солнце земли Российския.

Радуйся, разумного света заре.

Радуйся, светило церковное и архиерейская красото.

Радуйся, небесных законов на земли живая проповедь и христоподражательного жития образе.

Радуйся, святителю Христов Филиппе, исповедниче великий и преславный чудотворче.

Кондак 12

Благодать святаго дерзновения безбоязненно делом и словом вещати Христово учение подаждь нам, немощным, великий угодниче Божий и святителю Филиппе, наипаче подаждь сию благодать пастырем Церкви Христовыя, да возмогут они немолчно свою духовную паству учити и вразумляти, лицеприятия избегати, да таковое дерзновение стяжавше, вси мы на благом пути ко спасению обрящемся и сподобимся в вечном Небесном Царствии выну воспевати Господу: Аллилуиа.

Икос 12

Поюще твое дивное житие, твоя иноческия подвиги на отоце Соловецком воспевающе, твою святительскую ревность и дерзновение восхваляюще, поклоняющеся твоему до крове правдолюбию и исповедничеству, святителю отче наш Филиппе, молим тя в борениях и искушениях многоразличных не оставляти нас, но наипаче твоими молитвами укрепити, да возможем и мы твоими подражательми быти и тебе, нашего отца и наставника, восхваляти сице:

Радуйся, звездо Российская.

Радуйся, чистый сосуде Святаго Духа.

Радуйся, вселенским мучеником и исповедником подобниче.

Радуйся, Церкви Российския похвало и всего священства украшение.

Радуйся, иноческия кротости образе.

Радуйся, монашеского постнического жительства истинное правило.

Радуйся, безплотных сожителю.

Радуйся, Христова смирения ревнителю.

Радуйся, чудес велиих совершителю.

Радуйся, о скорбех земнаго отечества твоего милостивый пред Богом печальниче.

Радуйся, яко тобою Соловецкая обитель славится.

Радуйся, яко тобою град Москва и вся Россия украшается.

Радуйся, святителю Христов Филиппе, исповедниче великий и преславный чудотворче.

Кондак 13

О, великий святителю Христов Филиппе! Приими от нас, грешных, сие похвальное пение и священными твоими молитвами тя поющия в мире сохрани, от напастей и бед избави, во святей православной вере укрепи, угодное Богу житие проводити помози, уныние наше в радость претвори, дух крепкого стояния за церковныя законы и церковныя предания обнови в нас, да тако сподобимся во веки в райских обителех воспевати нашему Пастыреначальнику и Господу: Аллилуиа. Аллилуиа. Аллилуиа.

(Этот кондак читается трижды, затем икос 1 и кондак 1)

Молитва святителю Христову и чудотворцу Филиппу

О, великий печальниче земли Российския, святителю Христов Филиппе! Великими и многими даровании обогати тя щедродаровитый Владыка Господь, ты же, яко раб благий и верный, дарования сия зело умножил еси, от отроческих лет даже до кончины твоея заповедем Господним внимая, пребывая в них и возрастая, полн сый любве и милосердия, кротости и смирения, сими добродетельми ты богатно служил еси Господу и присным твоим, образ евангельского жития показуя, благочестивым житием Бога прославляя. За сие житие твое от Бога прославлен еси, велим даром чудес обогатился еси, святое дерзновение стяжал еси и до днесь земному отечеству и народу твоему служиши, и воздыхания наши предворяеши.

И мы, грешнии, заступничеству твоему перед Богом верующе, молимся тебе усердно. Буди нам, якоже в земнем твоем житии, отец и заступник, помози всем нам крест земнаго жития с терпением и радостию носити. Малодушныя молитвою твоею подкрепи и от житейских соблазнов любовию твоею отврати, сеющия соблазны рукою твоею крепкою вразуми. Даждь нам, святителю Христов, прежде кончины нашея, радость твоего мощнаго заступления ощутити, даждь многострадальному твоему отечеству силы благодатныя присно Христу работати, якоже благочестивии отцы наши своим церковным житием славу Божию и веру Христову на земли множаху, даждь нам их благочестию подражати, уставы церковныя хранити, заповеди Божии благоговейно соблюдати, нищия любити и щедро им благотворити, обидимыя заступати, веру Христову и закон Божий безбоязненно исповедати, всякого греха гнушатися и одеждою всякия правды светло украшатися. Да тако твоими молитвами укрепляеми, возможем и мы житие свое богоугодне устроити, грехов прощение от Господа получити и милостию и человеколюбием Спаса нашего и Господа в небесных селениях водворитися, идеже ангели и вси святии славят великолепое имя Отца и Сына и Святаго Духа.