Кондак 1

Избранной от всех родов Божией Матери и Царице, милостиво внемлющей молитвам болящих, и от водных источников токи целебныя изливающей страждущим, благодарственное приносим пение. Ты же, всемилостивая Целительнице, приклонися благоутробно гласом нашим хвалебным и от всяких недугов душевных и телесных свободи нас, зовущих:

Радуйся, Живоносный Источниче, вся наша болезни исцеляющая.

Икос 1

Ангели святии благоговейно Тебе служат и вси небожителие немолчными гласы Тя ублажают, Богородице Дево, яко Родительницу Царя Христа Бога. Мы же грешнии, подражати им дерзающе, молимся Ти: сподоби нас непрестанно Тебе возносити благодарения за премногую милость Твою ко всему роду христианскому. Аще и недоумевает всяк язык восхвалити Тя по достоянию, но, ведуще благость Твою, и мы, недостойнии служителие Твои, дерзновенно отверзем уста наша, и наполнятся духа, и достойное отрыгнем похвальное слово, Царице Божией Матери зовуще таковая:

Радуйся, благословенная в женах Дево благодатная; радуйся, Всевышняго Бога Мати, Духа Святаго пребывание.

Радуйся, дара Божия благодати источниче преизобильный; радуйся, чудес реко присносущная.

Радуйся, источниче радости непрестанныя; радуйся, источниче милости неизсякаемыя.

Радуйся, молитвы всех христиан приемлющая; радуйся, и самых отчаянных грешников моления не отвергающая.

Радуйся, обидимых заступнице; радуйся, печальных утешительнице.

Радуйся, бедствующих помощнице; радуйся, заблуждающих наставнице.

Радуйся, Живоносный Источниче, вся наша болезни исцеляющая.

Кондак 2

Видящи, премилосердая Мати Божия, земное скорбное житие наше, немощи и болезни, благоизволила еси проявляти милости Твоя к нам, исцеляющи души и телеса страждущих; обаче и мы с радостию несказанною припадаем к Тебе, Владычице, и из глубины души благодарим Тя, нашу дивную целительницу, воспевающе Богу: Аллилуиа.

Икос 2

Разум человеческий воистину превзошла есть любовь Твоя ко всем недужным, егда милостиво призрела еси на страждущаго слепца, томившагося в лесной чащи и повелела еси царю Льву почерпнути воды от живоноснаго источника Твоего и утолити жажду слепаго, да вси, ведуще Твое сострадание к страждущим, песненно Тебе вопиют:

Радуйся, скорбь нашу в радость претворяющая; радуйся, оставленных врачми на Свои всемощнеи руце приемлющая.

Радуйся, милосердая всех нас о Христе Мати; радуйся, презренных и отверженных от погибели избавляющая.

Радуйся, сердца злых человек умягчающая; радуйся, от клеветы и досаждения и иных бед спасающая.

Радуйся, Живоносный Источниче, вся наша болезни исцеляющая.

Кондак 3

Сила благодати Божией осеняет всех, с верою и благоговением прибегающих к Твоему, Пречистая Госпоже Богородице, предстательству; темже и мы к Тебе, Всемилостивейшая Покровительнице наша, приходим и умильно зовем: научи нас прославляти всечестное и всехвальное имя Твое и достойно воспевати Богу: Аллилуиа.

Икос 3

Имущи к роду христианскому Матернее милосердие, всем с верою и упованием прибегающим к Тебе подаеши руку помощи, Владычице: болящим исцеление, страждущим ослабу, слепым прозрение, разслабленным укрепление, скорбящим утешение, и всем коегождо потребу подаеши. О, Божия Мати, со умилением к Тебе припадаем и богатыя Твоея милости ожидающе, усердно тако вопием:

Радуйся, радосте наша, Еюже слезы от очей отъемлются наших; радуйся, нечаянную радость верным дарующая.

Радуйся, яко Тобою наша благая желания исполняются; радуйся, яко много может молитва Твоя пред Сыном Твоим и Богом.

Радуйся, благословение домов и семейств благочестивых; радуйся, отрадо наша и дивное о нас попечение.

Радуйся, Живоносный Источниче, вся наша болезни исцеляющая.

Кондак 4

Бурею многих бед одержимым нам помогаеши, Владычице, ибо всегда пред Господним престолом стоиши и, воздвигши руце Свои, молишися, яко да нашу недостойную молитву приимет Господь, Царь славы, и исполнит прошения призывающих имя Твое святое, зовущих Сыну Твоему: Аллилуиа.

Икос 4

Слыша царь Лев глас Твой божественный, Пресвятая Владычице, повелевающий помазати очи слепому водою источника и сотвори, якоже глас Твой повеле, и абие прозрев слепец, позна Тя сострадательницу быти всем немощствующим, с верою просящим у Тебе помощи и в болезнех исцеление, и созда тамо у Твоего источника храм имени святому Твоему, да вси, получивше Твою милость, непрестанно благодарственно славят Тя, Богородице, тако:

Радуйся, благодатный Источниче, источаяй нам неоскудныя милости; радуйся, избавляющая нас от бед.

Радуйся, ненадежных надеждо; радуйся, скорбящих отрадо.

Радуйся, Мати Бога Вышняго; радуйся, яко за всех Ты молиши Сына Твоего, Христа Бога нашего.

Радуйся, всех скорбящих и болезнующих утешительнице; радуйся, всех немощей телесных и душевных исцелительнице.

Радуйся, Живоносный Источниче, вся наша болезни исцеляющая.

Кондак 5

Благодатная врачевания Ты изобильно подаеши всем немощствующим, сего ради Тебе, божественной целительнице, на освященных Тобою водных источницех храми созидаются, Пресвятая Дево, да вси вернии довольно наслаждаются знаменьми Твоея милости, еяже не лиши и нас, смиренных чад Твоих, по долгу воспевающих и вопиющих чудес творцу Богу: Аллилуиа.

Икос 5

Видим Животворный источник, Владычице, яко воистину вторую Силоамскую купель, в нейже вся болезни наша исцеляются и не токмо единою в лето и первым входящим здравие тела подаеши, но всегда всякий недуг и всяку язву душевную и телесную врачуеши с верою и любовию к Тебе прибегающих, сего ради вопием Ти:

Радуйся, неусыпная наша Предстательнице пред Богом; радуйся, яко свеща неугасимая, в молитвах за нас у престола Господня присно горящая.

Радуйся, Мати милосердия и щедрот; радуйся, во время безпомощия нашего, егда бедствуем и не имамы помогающего, на помощь нам ускоряющая.

Радуйся, в день отчаяния нашего от обдержащих нас недугов и скорбей матерински утешающая; радуйся, от растлевающих душу и тело соблазнов сохраняющая.

Радуйся, от внезапныя смерти избавляющая; радуйся, при кончине нашей причастия Святых Таин сподобляющая.

Радуйся, Живоносный Источниче, вся наша болезни исцеляющая.

Кондак 6

Проповедует Церковь Христова чудеса Твоя, Богородице, яко песка морскаго и звезд небесных множае суть; от востока бо и до запада хвально имя Твое чудесы, и несть града или страны, идеже не совершися Тобою действо силы Божия во избавление и спасение, просвещение и исцеление людей христианских. Наипаче же обыкла еси чудотворити чрез водное естество; священным призыванием Твоего Святаго имене обильно изливаеши струю милости на всех страждущих; даруй убо всем с верою причащающимся или кропящимся святою водою совершенное исцеление, да славословим Тя и Сыну Твоему Христу Спасителю зовем: Аллилуиа

Икос 6

Возсияла еси в животворном источнице Твоем, Пресвятая Владычице, токи благодатных исцелений всем страждущим от различных недугов, и в нашей стране светиши светом чудес и милостей; притекающии бо к Тебе и скорбей избавление, и недугов исцеление, и радости всякия исполнение приемлют; о, Госпоже Царице и Владычице, Ты всегда воздвизаеши руце Свои на умоление пред Сыном Твоим и Богом, услыши и ныне нас, усердно вопиющих к Тебе таковая:

Радуйся, животворныя воды источниче неистощимый; радуйся, бане, омывающая греховную скверну.

Радуйся, скорбей наших услаждение; радуйся, печалей наших утоление.

Радуйся, болезней наших врачевание; радуйся, от всяких бед наших избавление.

Радуйся, Живоносный Источниче, вся наша болезни исцеляющая.

Кондак 7

Хотящи всем показати любовь Твою велию к страждущим людям, Богородице преблагая, благоизволила еси в водном естестве проявити Твою целительную силу и даровала еси животворную благодать водному источнику в чащи лесной во исцеление слепаго, и научила и нас имя Твое святое пред сею водою призывати, верующе и дерзновенно уповающе, яко и ныне воде сей милостивно даруеши ту же благодатную силу и исцеляеши ею всех нас страждущих, да благодарственно во веки о Тебе вопиют людие Богу: Аллилуиа.

Икос 7

Дивная показал еси дела Твоя в Пречистей Матери, Господи, и дивными чудесы преизобилующий даровал еси нам Ея источник, да, в водных струях его изобильно черплюще благодатная врачевания, вси немощнии Твои люди верою сердечною и от души любовию прославляют небесную целительницу, Всесвятую Матерь Твою, и зовут таковая:

Радуйся, алавастре врачевания, на всякий недуг врачевство содержай; радуйся, милосердная Целительнице всех немощей душевных и телесных.

Радуйся, узы греховныя кающихся грешников разрешающая; радуйся, о всем мире усердная предстательнице.

Радуйся, скорбящих матерей тихое веселие; радуйся, вечною радостию нас одевающая.

Радуйся, вдовиц заступление; радуйся, безпомощных сирот благосердное призрение.

Радуйся, детям, неудобь учащимся, разум дающая; радуйся, юности охранительнице.

Радуйся, Живоносный Источниче, вся наша болезни исцеляющая.

Кондак 8

Странно есть видети, яко водный Твой источник, Владычице, чудотворное действо являет и всякия болезни исцеляет всем; темже, познающе силу Божию по Твоему милостивному предстательству, прославляюще Господа Бога, с верою и умилением поем Ему: Аллилуиа.

Икос 8

Все земное житие наше зде болезненно есть и слезно от клеветы, досаждения, укоризны и иных многих бед и напастей; немотствует бо тело, изнемогает и дух наш. К Тебе убо прибегаем, Богомати, пред Твоим пречистым образом припадающе, молимся: исполни радостию сердца наша, да вопием Ти:

Радуйся, Царице неба и земли; радуйся, с Сыном Твоим и Богом вечно царствующая и Ему же о нас моления приносящая.

Радуйся, всех к Тебе прибегающих милостию Твоею покрывающая; радуйся, всех радосте, печали наша утоляющая.

Радуйся, неправедно гонимых и обидимых заступнице; радуйся, гонящих и обидящих праведная отмстительнице.

Радуйся, Милостивная, нас добре милующая; радуйся, отчаянных на путь истины направляющая и к Богу возводящая.

Радуйся, Живоносный Источниче, вся наша болезни исцеляющая.

Кондак 9

Всякая житейская в мире сем сладость печали бывает причастна: слава пременяется, богатство безследно преходит, здравие и красота телесная увядают, друзи и искреннии отъемлются; о, Милосердная, услади и наша скорби, подающи нам истинную радость, вопиющим к Богу: Аллилуиа.

Икос 9

Витийствуяй язык не может изрещи велию славу Твою, Богородице, еюже Ты прославилася еси в дивных делех Твоего милосердия к роду христианскому; о, Мати Божия, Мати Всеблагая, милосердию Твоему несть конца и величие Твое кто исповесть? Да будет же всесвятое имя Твое во век преблагословенно и да будет с Тобою слава, достойная величия святейшаго имене Твоего, от нас же недостойных приими архангельский глас:

Радуйся, Благодатная, яко Господь с Тобою; радуйся, благословенная в женах.

Радуйся, обретшая благодать у Бога; радуйся, освященная Духом Святым.

Радуйся, осененная силою Всевышняго Бога; радуйся, богоизбранная Отроковице, Приснодево.

Радуйся, Невесто Неневестная; радуйся, верная рабо Господня.

Радуйся, яко Тя ублажают вси народи земнии; радуйся, Родительнице Небеснаго Врача.

Радуйся, Живоносный Источниче, вся наша болезни исцеляющая.

Кондак 10

Спасти хотящи многия от находящих зол, скорбей и болезней, даровала еси нам целительную благодать в воде, освященной призыванием имене Твоего святаго, темже мнози скорое получают исцеление: слепии прозревают, хромии ходят, разслабленнии возстают, беснующиися исцеляются, земли плодоносие подается, людие от смертносныя язвы, внезапныя смерти и насильственнаго убийства избавляются, гради, веси и домы от огня и молнии спасаются. О, Пресвятая Мати Божия, кто не ублажит Тя, кто не воспоет Твоя славная чудеса? Темже и мы, прославляюще Бога, дающаго нам таковыя милости по Твоему предстательству, величающе Тя, вопием Ему: Аллилуиа.

Икос 10

Стена еси необоримая и источник милостей и чудес, Всеблагая Владычице Богородице, всем к Твоему покрову прибегающим, темже молим Тя, заступи и спаси с любовию к Тебе взывающих таковая:

Радуйся, яко Ты еси молитвенница наша к Богу усердная; радуйся, яко Матерняя Твоя молитва много может, Владыку Христа умилостивляющи.

Радуйся, предающихся унынию и скорби в надежде утверждающая; радуйся, нашедший на нас облак греховных страстей скоро разгоняющая.

Радуйся, славящих Тя прославляющая; радуйся, отвергающих Тя посрамляющая и, яко прах, от земли их развевающая.

Радуйся, скорбных родителей в лишении чад их утешающая благодатною Твоею помощию; радуйся, Целительнице наша в страданиих телесных и благая Утешительнице в печалех наших душевных.

Радуйся, Живоносный Источниче, вся наша болезни исцеляющая.

Кондак 11

Пение всеумиленное приими от нас, Небесная Царице, и молитву, приносимую Тебе, Дево Богородице, услыши. К Тебе бо в напастех и скорбех прибегаем и пред Тобою в бедах наших слезы проливаем и молимся: уврачуй наша болезни и утоли печали всех вопиющих о Тебе Богу: Аллилуиа.

Икос 11

Светоподательная свеща, возжженная Духом Святым для озарения сущих во тьме греха и юдоли плача, Ты еси, Пресвятая Дево; светлыми бо лучами чудес Твоих просвещаеши всех нас, помраченных греховною мглою, и приводиши к немолчному славословию Твоего пресвятаго имене, сего ради вопием Ти тако:

Радуйся, в посте и молитве и богомыслии всегда нам спребывающая; радуйся, в час недоумения мысль благую на сердце полагающая.

Радуйся, Мати Света истиннаго; радуйся, солнце правды, нас облистающее.

Радуйся, наставнице непорочнаго девства; радуйся, хранительнице ревнующих о чистоте.

Радуйся, дев величание; радуйся, нищих питательнице и нагих одеяние.

Радуйся, Живоносный Источниче, вся наша болезни исцеляющая.

Кондак 12

Благодати Твоея живоносный источник имуще, Пресвятая Дево, к Тебе прибегаем, яко нерушимей стене и предстательству. Призри благосердием, Пресвятая Богородице, на лютое наше озлобление и исцели душ и телес наших скорби и болезни, да зовем о Тебе Богу: Аллилуиа.

Икос 12

Поюще неизреченное Матернее Твое милосердие к страждущим, хвалим Тя, яко живоносный источник благодатных врачеваний, яко неистощимую реку чудес, яко бездну милости и щедрот и все упование по Бозе возлагаем на Тя и в сей, и в будущей жизни и, прославляюще Тя, вопием:

Радуйся, христиан непостыдное упование; радуйся, верная споручнице о нас пред Богом.

Радуйся, ненадежных надеяние; радуйся, истинное спасение малодушных и отчаянных.

Радуйся, утешительнице во всякой скорби; радуйся, из глубины погибели спасающая.

Радуйся, отрадо в день смерти; радуйся, единая надеждо и по смерти.

Радуйся, Живоносный Источниче, вся наша болезни исцеляющая.

Кондак 13

О, всепетая Мати, Небесная Царице и Владычице, Дево Богородице, рождшая нам Христа, Сына Божия, изволившаго, нашего ради спасения, снити на землю и воплотитися от Духа Свята и от Тебе, Пресвятыя Девы, и вочеловечитися; услыши наша усердныя молитвы и всех здесь предстоящих, со слезами и воздыханьми молящихся, помилуй. Даруй нам всем по коегождо прошению помощи, да никтоже от нас отыдет от Твоего божественнаго лика тощ и не услышан, но вси, получивше Твоя милости, благодарственно о Тебе вопием нашему Богу: Аллилуиа.

Этот кондак читается трижды, затем 1-й икос «Ангели святии …» и 1-й кондак «Избранной от всех родов …».

Молитва

О, Пресвятая Дево, Мати Господа нашего Иисуса Христа! Ты еси Мати и покровительница всех к Тебе прибегающих, призри с благосердием на молитвы грешных и смиренных чад Твоих. Ты, именуемая Живоносный Источник благодатных врачеваний, исцели болезни страждущих и умоли Сына Твоего, Господа нашего Иисуса Христа, да низпослет и всем притекающим к Тебе здравие душевное и телесное и, простив нам вольная и невольная согрешения наша, дарует нам вся яже к вечней и временней жизни потребная. Ты еси всех скорбящих радость, услыши нас, скорбных; Ты еси утоление печали, утоли и нашу печаль; Ты еси взыскание погибших, не попусти и нам погибнути в бездне грехов наших, но всегда избавляй нас от всяких скорбей и напастей и всякаго злаго обстояния. Ей, Царице наша преблагая, надеждо наша несокрушимая и заступнице необоримая, не отврати лица Твоего от нас за множество прегрешений наших, но простри нам руце Матерняго милосердия Твоего и сотвори с нами знамение милости Твоея во благо: яви нам помощь Твою и благопоспеши во всяком деле благом. От всякаго же начинания греховнаго и помышления лукаваго отврати нас, да всегда славим пречестное имя Твое, величающе Бога Отца и Сына Единороднаго Господа Иисуса Христа и Животворящаго Святаго Духа со всеми святыми во веки веков. Аминь.

Текст утвержден Священным Синодом
Русской Православной Церкви
28 декабря 2018 года (журнал № 127)

Кондак 1

Избра́нней от всех родо́в Влады́чице Богоро́дице, благода́тную по́мощь нам явля́ющей, похва́льная воспису́ем Ти раби́ Твои́ Богоро́дице. Ты же, я́ко Преблага́я Ма́ти Бо́жия, изле́й на нас вели́кия и бога́тыя ми́лости Твоя́, неду́ги на́ша исцели́ и ско́рби утоли́, да благода́рственно зове́м Тебе́: Ра́дуйся, Влады́чице, Живоно́сный Исто́чниче ми́лости неоскудева́ющия.

Икос 1

Арха́нгел и А́нгел мно́жество недоумева́ют Тебе́, Ма́терь Бо́га Сло́ва, на вода́х зе́млю утверди́вшаго, разу́мно хвали́ти по достоя́нию. Мы же, Честне́йшая Херуви́м, и Сла́внейшая без сравне́ния Серафи́м, во умиле́нии о Твои́х благодея́ниих, на нас бы́вших, дерза́ем зват́и Тебе́:

Ра́дуйся, Влады́чице, Бо́гом Отце́м избра́нная;

ра́дуйся, Ду́хом Святы́м осия́нная.

Ра́дуйся, рождество́м Сы́на Бо́жия превознесе́нная;

ра́дуйся, в жена́х благослове́нная.

Ра́дуйся, Богоро́дицею велича́емая;

ра́дуйся, от всех родо́в ублажа́емая.

Ра́дуйся, Влады́чице, Живоно́сный Исто́чниче ми́лости неоскудева́ющия.

Кондак 2

Ви́дящи, Премилосе́рдная Ма́ти, слепца́, в пусты́ни блужда́ющаго и от жа́жды стра́ждущаго, исто́чник воды́ живы́я цели́тельныя показа́ла еси́; он же, исцеле́ние улучи́в благода́рственно возопи́: Аллилу́иа.

Икос 2

Разуме́в воево́да глас Твой Боже́ственный, исцеле́ния ра́ди слепца́, исто́чник воды́ указу́ющий, позна́ его́ я́ко купе́ль Силоа́мскую, и́же не то́кмо жа́ждущаго напоя́ет, но и от слепоты́ того́ свобожда́ет; мы же ми́лости Твоея́, Де́во Богоро́дице, и́щуще, взыва́ем Тебе́ си́це:

Ра́дуйся, Влады́чице, купе́ль спасе́ния живопису́ющая;

ра́дуйся, слепоту́ душе́вную и теле́сную исцеля́ющая.

Ра́дуйся, разсла́бленных утвержде́ние;

ра́дуйся, хромы́х хожде́ние.

Ра́дуйся, Ма́ти Све́та, слепы́м о́чи отверза́ющая;

ра́дуйся, све́том и́стины во тьме седя́щия озаря́ющая.

Ра́дуйся, Влады́чице, Живоно́сный Исто́чниче ми́лости неоскудева́ющия.

Кондак 3

Си́ла Вы́шняго осеня́ет всех, с ве́рою и благогове́нием притека́ющих к Живоно́сному Исто́чнику Твоему́, Пречи́стая Госпоже́ Влады́чице. Сего́ ра́ди си́лою благода́ти Его́ осени́ и нас, Богома́ти, смире́нно к Тебе́ припа́дающия и моле́бно о Тебе́ вопию́щия: Аллилу́иа.

Икос 3

Иму́щи бога́тство милосе́рдия неизрече́нное, Влады́чице, всем боля́щим ру́ку по́мощи Твоея́, неду́ги врачу́ющую, стра́сти исцеля́ющую, в Живоно́снем Исто́чнице Твое́м простира́еши: сего́ ра́ди вопие́м Тебе́ си́це:

Ра́дуйся, Исто́чниче непрестаю́щия ра́дости;

ра́дуйся, Ча́ше неизрече́нныя бла́гости.

Ра́дуйся, сокро́вище благода́ти неоскудева́емое;

ра́дуйся, ми́лости у Тебе́ прося́щим ско́ро сию́ подаю́щая.

Ра́дуйся, неду́гов разли́чных исцеле́ние;

ра́дуйся, печа́лей на́ших утоле́ние.

Ра́дуйся, Влады́чице, Живоно́сный Исто́чниче ми́лости неоскудева́ющия.

Кондак 4

Бу́рею недоуме́ния слепе́ц смуща́шеся, воды́ ища́ жа́жду утоли́ти. И се́, я́коже дре́вле, си́лою Бо́жиею из ка́мене вода́ источи́ся: та́ко и ны́не в пусты́не безво́дней исто́чник яви́ся; та́мо Моисе́й, источи́тель воды́: зде же Ты Сама́, о Богома́ти, служи́тельница чудесе́; те́мже мо́лимся: жа́ждущия ду́ши на́ша благоче́стия напо́й вода́ми, да зове́м о Тебе́: Аллилу́иа.

Икос 4

Слы́ша воево́да ди́вный глас Твой, Ма́ти милосе́рдия, исто́чник воды́ указу́ющий, во е́же жа́ждущаго напои́ти и слепоту́ его́ исцели́ти, и сбытие́ слове́с Твои́х зря, возопи́ си́це:

Ра́дуйся, Влады́чице, страда́льцев утеша́ющая;

ра́дуйся, боля́щих возставля́ющая.

Ра́дуйся, немы́м уста́ разреша́ющая;

ра́дуйся, всех немощны́х врачу́ющая.

Ра́дуйся, бе́дствующим поможе́ние;

ра́дуйся, уныва́ющих утеше́ние.

Ра́дуйся, Влады́чице, Живоно́сный Исто́чниче ми́лости неоскудева́ющия.

Кондак 5

Боже́ственную во́ду от Живоно́снаго Исто́чника Твоего́, то́ки благода́ти излива́ющаго, почерпа́юще во исцеле́ние неду́гов душе́вных и теле́сных, Де́во Богороди́тельнице, благода́рственно вопие́м о Тебе́: Аллилу́иа.

Икос 5

Ви́деша лю́дие слепца́, водо́ю Живоно́снаго Исто́чника Твоего́ прозре́вшаго, Богома́ти, потща́шася пе́сньми я́ко дара́ми послужи́ти Тебе́ си́це:

Ра́дуйся, Влады́чице, милосе́рдия две́ри ве́рным отверза́ющая;

ра́дуйся, наде́ющихся на Тебе́ не посрамля́ющая.

Ра́дуйся, бе́дствующих утеша́ющая;

ра́дуйся, от напа́стей свобожда́ющая.

Ра́дуйся, изнемога́ющих укрепля́ющая;

ра́дуйся, неду́гующих врачу́ющая.

Ра́дуйся, Влады́чице, Живоно́сный Исто́чниче ми́лости неоскудева́ющия.

Кондак 6

Пропове́дник чу́да Твоего́, Ма́ти Бо́жия, бысть воево́да, я́ко ди́вно слепе́ц водо́ю от Живоно́снаго Исто́чника Твоего́ прозре́, си́це и нам те́мныя зе́ницы душе́вныя просвети́, да благода́рственно пропове́дуем ми́лости Твоя́, зову́ще: Аллилу́иа.

Икос 6

Возсия́ нам Живоно́сный Исто́чник Твой, Премилосе́рдная Ма́ти, многоразли́чную благода́ть Сы́на Твоего́ и Бо́га на́шего, Христа́ Жизнода́вца источа́яй. Сего́ ра́ди прино́сим Ти пе́ния сицева́я:

Ра́дуйся, Влады́чице, усе́рдная на́ша Засту́пнице;

ра́дуйся, хра́мов Бо́жиих Храни́тельнице.

Ра́дуйся, святы́х оби́телей пресла́вная Игу́мение;

ра́дуйся, в и́ночестве подвиза́ющихся вразумле́ние.

Ра́дуйся, мона́шествующих в послуша́нии укрепле́ние;

ра́дуйся, всех христиа́н покро́в и защище́ние.

Ра́дуйся, Влады́чице, Живоно́сный Исто́чниче ми́лости неоскудева́ющия.

Кондак 7

Хотя́ благочести́вый Лев воево́да, ему́же ца́рство предрекла́ еси, благода́рственная принести́ Тебе́, храм на ме́сте явле́ния Твоего́ чудесе́ устро́и, Живоно́сный Исто́чник наименова́в о́ный, да вси, по́мощи Твоея́ и́щущия, зде обрета́ют ю́, вопию́ще о Тебе́: Аллилу́иа.

Икос 7

Но́вая купе́ль Силоа́мская, па́че о́ныя дре́вния, яви́ся, Пречи́стая Влады́чице, храм Твой, в Не́мже поклоня́емся ико́не Живоно́снаго Исто́чника, и́бо не еди́ною в ле́то и то́кмо пе́рвее входя́щим здра́вие те́ла подае́ши, но вы́ну вся́кий не́дуг душе́вный и теле́сный врачу́еши. Сего́ ра́ди вопие́м Тебе́:

Ра́дуйся, купе́ле, ско́рби на́ша погружа́ющая;

ра́дуйся, ча́ше ра́дования, в печа́ли утеше́ние подаю́щая.

Ра́дуйся, ка́меню, жа́ждущия жизни напоя́яй;

ра́дуйся, дре́во, го́рькия во́ды мо́ря жите́йскаго услажда́ющее.

Ра́дуйся, исто́чниче животво́рныя воды́ неистощи́мый;

ра́дуйся, ба́не, грехо́вную скве́рну со́вести на́шея омыва́ющая.

Ра́дуйся, Влады́чице, Живоно́сный Исто́чниче ми́лости неоскудева́ющия.

Кондак 8

Стра́нное и пресла́вное чу́до яви́ся храм Живоно́снаго Исто́чника Твоего́, Богоро́дице, в не́мже жа́жда духо́вная и телес́ная утоля́ется, и боле́зньми одержи́мии исцеля́ются. Мы же, благода́ть такову́ю прославля́юще, вопие́м Ти: Аллилу́иа.

Икос 8

Всем с ве́рою приходя́щим на Живоно́сный Исто́чник Твой, вся потре́бная подае́ши, Преми́лостивая Госпоже́ Богоро́дице. Те́мже благода́рственно вопие́м Тебе́ си́це:

Ра́дуйся, Влады́чице, я́ко Тобо́ю Безпло́тный воплоти́ся;

ра́дуйся, Де́во, я́ко чистоте́ Твое́й А́нгели удиви́шася.

Ра́дуйся, стра́ждущих ма́терей утеше́ние;

ра́дуйся, чад безма́терних охране́ние.

Ра́дуйся, младе́нцев воспита́ние;

ра́дуйся, ю́ных Наста́внице.

Ра́дуйся, Влады́чице, Живоно́сный Исто́чниче ми́лости неоскудева́ющия.

Кондак 9

Вся́кое естество́ А́нгельское и челове́ческое диви́тся милосе́рдию Твоему́, Пресвята́я Де́во, я́ко всегда́ и всем явля́ешися Помо́щница и Засту́пница, пою́щим о Тебе́: Аллилу́иа.

Икос 9

Вети́и многовеща́ннии не мо́гут воспе́ти досто́йно Живоно́сный Исто́чник неистощи́мыя благода́ти Твоея́, ниже́ изъясни́ти си́лу чуде́с Твои́х, во исцеле́ние неду́жных и на вся́кую по́льзу душе́вную и теле́сную челове́ком явля́емую. Мы же похва́льная воспису́ем Тебе́ си́це:

Ра́дуйся, хра́ме Бо́га Жива́го;

ра́дуйся, жили́ще Ду́ха Свята́го.

Ра́дуйся, А́нгелов сла́во;

ра́дуйся, вселе́нныя Держа́во.

Ра́дуйся, ми́ра спасе́ние;

ра́дуйся, ве́рных упова́ние.

Ра́дуйся, Влады́чице, Живоно́сный Исто́чниче ми́лости неоскудева́ющия.

Кондак 10

Спасти́ хотя́ вся стра́ждущия, исто́чник жи́зни яви́ла еси́ ми́рови, Пресвята́я Богоро́дице, в вода́х благода́ти, да вси, в ско́рбех и печа́лех исцеле́ние и утеше́ние прие́млюще, благода́рно зове́м о Тебе́: Аллилу́иа.

Икос 10

Стена́ и покро́в в беда́х и ну́ждах по́мощи Твоея́ прося́щим су́щи, Влады́чице ми́ра, Живоно́сный Исто́чник всем яви́ла еси́, да бу́дет от вся́ких боле́зней огражде́ние, в напа́стех и печа́лех утеше́ние, вопию́щим Ти такова́я:

Ра́дуйся, Влады́чице, го́рдых и строптив́ых челове́к усмире́ние;

ра́дуйся, лука́вых и злых наме́рений пресече́ние.

Ра́дуйся, оби́димых заступле́ние;

ра́дуйся, неви́нных оправда́ние.

Ра́дуйся, во́инов во бране́х огражде́ние;

ра́дуйся, плене́нных от злых свобожде́ние.

Ра́дуйся, Влады́чице, Живоно́сный Исто́чниче ми́лости неоскудева́ющия.

Кондак 11

Пе́ние всеумиле́нное пред Живоно́сным Исто́чником Твои́м па́ки и па́ки прино́сим Тебе́, Богоро́дице, в покая́нии зову́ще из глубины́ души́: Влады́чице, приими́ моли́твы раб Твои́х и изба́ви нас от вся́кия ско́рби и боле́зни, ну́жды и печа́ли, да вопие́м о Тебе́ Бо́гу: Аллилу́иа.

Икос 11

Светоза́рною свеще́ю сия́ет в ми́ре луча́ми благода́ти Боже́ственный Исто́чник Твой, Пресвята́я Богоро́дице, чудесы́ явле́нными умы́ и сердца́ просвеща́яй и наставля́яй зва́ти Тебе́:

Ра́дуйся, Влады́чице, помысло́в просвеще́ние;

ра́дуйся, серде́ц на́ших очище́ние.

Ра́дуйся, ду́ха обновле́ние;

ра́дуйся, душ освяще́ние.

Ра́дуйся, здра́вия укрепле́ние;

ра́дуйся, целому́дрия соблюде́ние.

Ра́дуйся, Влады́чице, Живоно́сный Исто́чниче ми́лости неоскудева́ющия.

Кондак 12

Благода́ти Твоея́ Живоно́сный Исто́чник иму́ще, Пресвята́я Де́во, к Тебе́ прибега́ем, я́ко к неруши́мей стене́ и предста́тельству: при́зри благосе́рдием, Пресвята́я Богоро́дице, на лю́тое на́ше озлобле́ние и исцели́ душ и теле́с на́ших ско́рби и боле́зни, да зове́м о Тебе́ Бо́гови: Аллилу́иа.

Икос 12

Пою́ще Твоя́ чудеса́, хва́лим и сла́вим Живоно́сный Исто́чник Твой, Пресвята́я Де́во, от него́же почерпа́юще то́ки многоразли́чныя благода́ти, велича́ем Тя похвалы́ сицевы́ми:

Ра́дуйся, Отрокови́це Богоизбра́нная;

ра́дуйся, Неве́сто Боговенча́нная.

Ра́дуйся, в жена́х благослове́нная;

ра́дуйся, па́че го́рних превознесе́нная.

Ра́дуйся, Престо́лу Госпо́дню вы́ну предстоя́щая;

ра́дуйся, Засту́пнице на́ша, за мир всегда́ моля́щаяся.

Ра́дуйся, Влады́чице, Живоно́сный Исто́чниче ми́лости неоскудева́ющия.

Кондак 13

О, Всепе́тая Ма́ти, Живоно́сный Исто́чник Твой ми́ру да́вшая, от него́же излива́еши нам вели́кия и бога́тыя ми́лости, приими́ благода́рственное сие́ моле́ние на́ше, напо́й нас от исто́чника милости Твоея в ве́це ны́нешнем и гряду́щем: да вы́ну зове́м о Тебе́: Аллилу́иа.

Этот кондак читается трижды, затем 1-й икос и 1-й кондак.

Молитва

О, Пресвята́я Де́во, Всеми́лостивая Госпоже́ Влады́чице Богоро́дице, Живоно́сный Исто́чник Твой, целе́бныя да́ры на здра́вие душ и теле́с на́ших и на спасе́ние ми́ру точа́щий, подала́ еси́ нам, те́мже благода́рни су́ще усе́рдно мо́лим Тя, Цари́це Пресвята́я, моли́ Сы́на Твоего́ и Бо́га на́шего да́ти нам оставле́ние прегреше́ний и вся́кой души́ скорбя́щей и озло́бленней ми́лость и утеше́ние, и от бед, скорбе́й и боле́зней свобожде́ние. Пода́ждь, Госпоже́, хра́му сему́ и сим лю́дем покрове́ние [и святе́й оби́тели сей соблюде́ние], гра́ду сему́ [или́: ве́си сей] сохране́ние, стране́ на́шей от напа́стей избавле́ние и огражде́ние, да ми́рное зде поживе́м житие́, и в бу́дущем ве́це сподо́бимся ви́дети Тебе́, Засту́пницу на́шу, во сла́ве Ца́рствия Сы́на Твоего́ и Бо́га на́шего, Ему́же сла́ва и держа́ва со Отце́м и Пресвяты́м Ду́хом во ве́ки веко́в. Ами́нь.