Песнь 1

Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть, препрославленный Господь славно бо прославися.

В нарочитый день праздника нашего отверзем, людие, уста своя и новыми песньми величия Приснодевы воспоем. Се бо явлением святыя Своея иконы — грешным Споручницы — множеством чудес от нея славно прославися.

Якоже светозарное Солнце, от горы Синайския возсиявшее, облиста нас образ Споручницы грешных, имже благодати залог миру даровася и спасение на земли возвестися, покров и прибежище верным, любовию почитающим Его.

Рукою крепкою люди Своя от горькия работы Избавльшему и из глубины морския Изведшему простри руце Твоя, Дево Чистая, и молися прилежно, да изведет из плена греховнаго души верных, празднующих светло заступление Твое.

Всех падших востание, заблуждающих Наставнице, унывающих радование, болящих исцеление и всех грешных спасение, соблюди и сохрани нас, Госпоже, Божественным к Сыну за ны ходатайством Твоим.

Песнь 3

Ирмос: Неплодствовавший мой ум плодоносен, Боже, покажи ми, Делателю добрых, Насадителю благих, благоутробием Твоим.

Свыше данною Ти благодатию обновила еси, Споручнице мира, многими грехми обветшавшия сердца наша, и, воздеющи руце, молишися к Сыну Твоему за люди согрешившия: спаси, Дево, нас молитвами Твоими.

Яко облак дожденосный, видим образ Твой, Владычице мира, воду бо спасительную чудес от Него испущающи, грехми изсохшия сердца благодатию напаяеши и приводиши нас к творению добродетелей плода, сего ради любовию ублажаем Тя.

Жезл Ааронов процветший именова Тя древле Моисей, Цвет бо живоносный — Христа — прозябла еси, Емуже простерши длани, молися, Богомати, страстьми умерщвленныя души наша оживити плодоносною благодатию Своею.

Ороси нас росою молитв Твоих, Богородительнице, и неплодная в пустыне греховней увядающая сердца наша плодоносны ныне соделай всесильным к Богу ходатайством Твоим.

Песнь 4

Ирмос: Пришел еси от Девы, не Ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.

Пришла еси в мир за грешники Ходатаица, и яко Ангел утешаяй и ко исправлению вся подвизаяй; темже убо, Мати Божия, Споручница буди ми во благо, яко да обращуся и прежде согрешенных разрешение прииму, радостно вопиюще: слава силе Твоей, Господи.

Сокровище безценное обретохом — светоносный образ Твой, Богородице, мироточный и многоцелебный, благодати Божия обильно преисполненный, Емуже покланяющеся, источити просим освящение душам и телесем нашим.

Лествица явилася еси образно Иакову, от земли к высоте утвержденная, еюже сниде Владыка Неба и земли, да Тою путь правый покаяния покажет нам и к чертогам Небесным возведет люди согрешившия.

Едина надежда несумненная и грешным Споручница Ты еси, Пречистая, Тобою бо Христос Бог, преклонь Небеса, на землю сниде обновити падшее создание Свое; темже, проси, Дево, грехов прощение даровати нам, верою поющим Ему: слава силе Твоей, Господи.

Песнь 5

Ирмос: Ходатай Богу и человеком был еси, Христе Боже: Тобою бо, Владыко, к Светоначальнику, Отцу Твоему, от нощи неведения приведение имамы.

Ходатай Богу и человеком, Христос Бог, Ходатаицу Тя миру показа и грешным Споручницу. Егоже милостива соделай нам, Пресвятая Мати Дево, теплым заступлением Твоим.

Паче солнца светлеется образ Твой, Богоневесто, всю страну нашу осиявающий знамении и чудесы, тьму же греховную разгоняющий и благое всем источающий Небесное миро во спасение верных и миру христианскому во обновление.

Руно Тя Гедеон вообрази орошенное, на негоже, яко роса, Христос Бог сниде, да, росою молитв Твоих орошеннии, грешницы к покаянию подвигнутся и к вечным обителем Светоначальника Отца Небеснаго приведение да имут.

Се плачу и рыдаю горце, егда от нощи нерадения во ум прииду от многих моих злых прегрешений. Темже молю Тя, Мати Благая: Споручница буди ми и настави мя на путь, еже ходити во истине, слезы приносяще о своих согрешениях.

Песнь 6

Ирмос: В бездне греховней валялся, неизследную милосердия Твоего призываю бездну: от тли, Боже, мя возведи.

Радости нам вечныя и жизни нетленныя Ходатаица явилася еси, Богородительнице, приносяще за ны руце к Сыну Твоему и Спасу всех, всяку слезу от лица земнаго отъемшему и неизследную милосердия Своего бездну Тобою миру показавшему.

Святителя Николая, предстояща образу Твоему, благоговейный муж узрети сподобися и благоволения Твоего глаголы от Тебе, Царице, услыша, яже верным быша во утверждение и о людех промышления Твоего во свидетельство.

Свиток нов Тебе Исаия, Дево, предвидев, на немже написася живое слово Отчее, Егоже моли, Чистая, Всеблаженная, в книзе мне живых написатися и многих зол моих разтерзати свиток покаяния предобрыми образы.

Из глубины бездны греховныя к Тебе руце простираю и сквернии устне мои к молению отверзаю, подножию же ног Твоих, Владычице, припадаю и, рыдающи, вопию Ти: молися, Заступнице, Сыну Твоему, прощение улучити ми и милость в День судный.

Кондак, глас 1

Честное жилище бывшее неизреченнаго естества Божественнаго выше слова и паче ума и грешным еси Споручница, подаваеши благодать и исцеление, яко Мати всех Царствующаго: моли Сына Твоего получити нам милость в День судный.

Икос

Светоноснаго явления и преславнаго Твоея иконы, Споручницы грешных прославления, чудес же многих пучины и мира многоцелебнаго излияния витийствующих уста не возмогают исповедати достойно; мы же, грешнии и смиреннии, что возглаголем Ти, Богоневестная Дево? Токмо: помилуй нас. Едину бо Тя жизни нашея стяжахом Хранительницу и Надежду крепку спасения. Темже молим Тя, о, Благосердная: Споручница нам покаяния явися и ходатайствуй к Сыну Твоему: да будущих истязаний избавимся и милостива Его обрящем в День судный.

Песнь 7

Ирмос: Богопротивное веление беззаконнующаго мучителя высок пламень вознесло есть. Христос же простре благочестивым отроком росу духовную, Сый благословен и препрославлен.

В нощи, и во дни, и во всяких обстояниих спасение твердо имамы Тя, Богородице, христианом покров и прибежище, выну бо руце ко Господу простерши, росою молитв Твоих, якоже отроки благочестивыя, охраняеши от напастей верныя, зовущия: благословенна еси, Мати Дево, и препрославлена.

Не терпя муж благочестивый зрети неизреченнаго от образа Твоего осияния, на землю ниц паде, моляся; мы же, грешнии, благодатную икону сию зряще, любовно вопием Ти: благословенна буди, Споручнице спасения нашего, и препрославлена во веки.

Серафим древле, клещами угль носяй горящий, во уста коснуся Исаии, попаляя грехи его. Ты же, клеща светозарная сущи, Богородице, Угль Божественный носившая, Христа Иисуса, прикоснися Его милосердию, да опалит грехи наша и беззакония лютая.

Не отвержи мене от лица Твоего, Всенепорочная, егда к Пречистому образу Твоему воззрю, стеняще о гресех тяжких, но милостива буди ми Заступница к Сыну, милосердием бо преклоняется и спасение грешников соделывает ходатайством Твоим.

Песнь 8

Ирмос: В пещь огненную ко отроком еврейским снизшедшаго и пламень в росу преложшаго Бога пойте, дела, яко Господа и превозносите во вся веки.

В пещь огненную страстей мира снизшедшую и пламень греховный в росу покаяния спасительнаго преложшую Богородицу, прекрасный лик весело сплетши, пойте, дела, яко Заступницу мира Деву Чистую, и превозносите во вся веки.

Света Небеснаго в нощи многообразными играньми славят всечестную икону Твою, Владычице, Горнии чини и Тебе, Богоневестную Матерь, ублажают радостно. Юже, яко Световодительницу из тьмы греховныя, людие, превозносите во вся веки.

От древле до ныне Саму Матерь Царя Христа Утешительницу тверду в напастех имущи, в скорбех же и печалех присное избавление, в бедах помощь и в покаянии Споручницу, благословите, сынове человечестии, пойте Сию и превозносите во вся веки.

Даждь рабом Твоим, Всеблагая Царице, прошения спасительная в храме сем, в немже источник преславных чудес показала еси, токи мира источая от святаго образа Твоего, имиже страсти душ и телес врачуеши неизреченным милосердием Твоим.

Песнь 9

Ирмос: Безначальна Родителя Сын, Бог и Господь, воплощся от Девы, нам явися, омраченныя просветити, собрати расточенная, тем Всепетую Богородицу величаем.

Не возмогает слово человеческое, ниже язык всяк похвалити Тя достойно, но Ты, Пресвятая, благодать неоскудную от Господа приимшая и грешным Споручница свыше преднареченная, вретище прегрешений наших расторгни и омраченныя просвети ны, веселием же добродетелей препоясующи, не остави нас заступлением Твоим, да Тя, Всепетую Богородицу, величаем.

Светом невещественнаго светолития сияя, образ Твой, Отроковице Непорочная, омраченныя грехми просвещает и расточенная вся под кров спасительный храма Твоего собирает, тем, веселящеся, Тя, Всепетую Богородицу, величаем.

Якоже Давид праотец древле пред сенным ковчегом взыграше радостно, сице и мы Царице Неба пришедшей песньми взыграем немолчными, славяще образа Ея многоцелебнаго всечестное прославление.

Срадуемся днесь и свеселимся неизреченному Божию дарованию — дивному образу Приснодевы, радость бо вечную от Него источает нам, напастей и печалей свобождая. Темже благодарственныя песни воспеваем веселия Ходатаице и верно любовию вси яко Богоматерь величаем.

Конда́к 1.

Избра́нней от Всевы́шняго, гре́шных Спору́чнице, преклоня́ющей на милосе́рдие Сы́на Своего́, да спасе́т я́же созда́ руко́ю Свое́ю, благода́рственное пе́ние прино́сим Ти́, Ма́ти Де́во и Влады́чице, о явле́нии ди́вныя Твоея́ и чудотво́рныя ико́ны, Ты́ же я́ко предста́тельство ко Го́споду иму́щи, потщи́ся от обстоя́ний многообра́зных изба́вити ны́ и ве́чное спасе́ние на́м соде́лати, да, воспева́юще, вопие́м Ти́:

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

И́кос 1.

А́нгелов ли́ки благогове́йно Тебе́ слу́жат и святи́и вси́ немо́лчными гла́сы Тя́ ублажа́ют, Богоро́дице Де́во, я́ко ро́ждшую А́нгелов Царя́, Христа́ Бо́га на́шего, мы́ же, гре́шнии, подража́ти и́м дерза́юще и благохвали́ти Тя́ недоуме́юще, смиренному́дренно арха́нгельский гла́с вопие́м Ти́, Чи́стая:

Ра́дуйся, Благода́тная, Госпо́дь с Тобо́ю; ра́дуйся, Преблагослове́нная в жена́х, Де́во Всенепоро́чная.

Ра́дуйся; Дщи́ Отца́ Небе́снаго; ра́дуйся, Ма́ти Сы́на Преве́чнаго.

Ра́дуйся, Ду́ха Свята́го селе́ние; ра́дуйся, А́нгелов и челове́к непреста́нное удивле́ние.

Ра́дуйся, Честне́йшая Херуви́м; ра́дуйся, Сла́внейшая без сравне́ния Серафи́м.

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

Конда́к 2.

Ви́дящи Премилосе́рдная Ма́терь Бо́жия земно́е ско́рбное житие́ на́ше, не́мощи и боле́зни, благоизво́ли да́ти на́м в благослове́ние и утеше́ние, в ра́дость и спасе́ние и от вся́ких бе́д и напа́стей огражде́ние ико́ну Свою́ святу́ю, Спору́чницею гре́шным в не́й наре́кшися, да, ра́достная пред се́ю ико́ною Е́й принося́ще, ра́достно всегда́ пою́т Бо́гу: Аллилу́иа.

И́кос 2.

Ра́зум небе́сный открыва́ющи, Богоро́дице Де́во, благоизво́лила еси́ мно́гими чудесы́ просла́вити ико́ну Твою́ святу́ю, Спору́чница гре́шных имену́емую, да вси́, ве́дуще таково́е Твое́ о не́й благоволе́ние, пе́сненно Тебе́ зову́т:

Ра́дуйся, Милосе́рдная, все́х на́с о Христе́ Ма́ти; ра́дуйся, неистощи́мая сокро́вищнице Боже́ственныя благода́ти.

Ра́дуйся, Тобо́ю бо нисхо́дит к на́м Бо́жие благоволе́ние; ра́дуйся, Тобо́ю бо и́мамы вя́щшее к Бо́гу дерзнове́ние.

Ра́дуйся, моли́твы все́х христиа́н прие́млющая; ра́дуйся, и са́мых отча́янных гре́шников моле́ния не отверга́ющая.

Ра́дуйся, я́ко предста́тельством Твои́м спасти́ся упова́ем; ра́дуйся, я́ко моли́твами Твои́ми Ца́рство Небе́сное получи́ти ча́ем.

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

Конда́к 3.

Си́ла благода́тная осеня́ет все́х, Преблагослове́нная Ма́терь Бо́жия, с ве́рою к Тебе́, я́ко Спору́чнице гре́шных, притека́ющих и святе́й ико́не Твое́й поклоня́ющихся: Еди́ней бо то́кмо Тебе́ даде́ся да́р вся́кое благо́е проше́ние ско́ро исполня́ти и гре́шных ми́ловати и спаса́ти, и Еди́на то́кмо Ты́ мо́жеши вои́стину все́м по́мощи ели́ка хо́щеши, Бо́гу пою́щим: Аллилу́иа.

И́кос 3.

Име́ющи Ма́тернее о все́х всеблаго́е промышле́ние, Ты́, Всеблага́я Ма́ти Бо́жия, и са́мых отча́янных гре́шников ко спасе́нию призыва́еши, глаго́лющи: А́з е́смь Спору́чница гре́шных к Сы́ну Моему́ и Бо́гу, И́же и обеща́ Мне́ слы́шати Мя́ всегда́, да ра́достная Мне́ принося́щии ве́чно ра́доватися бу́дут чрез Мене́. Сего́ ра́ди мы́, гре́шнии, Тебе́, я́ко Спору́чнице на́шей, ра́достно зове́м:

Ра́дуйся, Засту́пнице усе́рдная, от Бо́га на́м дарова́нная; ра́дуйся, к Небе́сному оте́честву Путеводи́тельнице на́ша Благода́тная.

Ра́дуйся, от ро́ва поги́бели исхища́ющая; ра́дуйся, безпомо́щных на Свои́ всемо́щныя ру́це прие́млющая.

Ра́дуйся, непреста́нное уны́ние отгоня́ющая; ра́дуйся, па́дших ко благода́ти возставля́ющая.

Ра́дуйся, сло́во прему́дрости прося́щим да́рующая; ра́дуйся, и неразу́мных разу́мными соде́лывающая.

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

Конда́к 4.

Бу́рею сомне́ний искуша́емая не́кая жена́ не хотя́ше ве́ровати чудесе́м, от ико́ны Твоея́, Спору́чницы, быва́емым, но внеза́пну я́звою смертоно́сною пораже́нная, позна́ си́лу Твою́ всемо́щную, Влады́чице, и чудотво́рныя ико́ны Твоея́ благода́ть, и, раска́явшися, сле́зно моля́ше Тя́ о проще́нии неве́рствия ея́, милосе́рдием же Твои́м исцеле́нная, благода́рственно Бо́гу о Тебе́ всегда́ вопия́ше: Аллилу́иа.

И́кос 4.

Слы́шит Госпо́дь Твоя́ о на́с на Небеси́ хода́тайства, Цари́це Небе́сная, и исполня́ет Твоя́ проше́ния, мы́ же, гре́шнии, я́ко всеблагу́ю Скоропослу́шницу и Спору́чницу на́шу, про́сим и мо́лим Тя́: Влады́чице, ско́ро услы́ши моле́ния на́ша и вся́ на́ша печа́ли на ра́дость преложи́, и проше́ния все́х зде́ моля́щихся ско́ро испо́лни, да ра́достно всегда́ пое́м Ти́:

Ра́дуйся, принося́щая к Сы́ну Твоему́ и Бо́гу моле́ния ве́рных; ра́дуйся и Сама́ у престо́ла Сы́на Твоего́ всегда́ о на́с моля́щаяся.

Ра́дуйся, Спору́чнице гре́шных; ра́дуйся, Взыска́ние поги́бших.

Ра́дуйся, неча́янную ра́дость ве́рным да́рующая; ра́дуйся, и на́ша проше́ния ско́ро исполня́ющая.

Ра́дуйся, Ми́лостивая, всегда́ на́с ми́лующая; ра́дуйся, житие́ на́ше до́брое устроя́ющая.

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

Конда́к 5.

Я́ко лучеза́рную звезду́, ве́сь ми́р озаря́ющую, подава́ла еси́ на́м, Влады́чице Ми́ра, честну́ю Твою́ ико́ну, Спору́чницею гре́шных имену́емую, на ню́же взира́юще, Само́й Тебе́, и́стинней Бо́жией Ма́тери и Де́ве, поклоня́емся, глаго́люще: Влады́чице, приими́ моли́твы ра́б Твои́х и изба́ви ны́ от вся́кия ну́жды и печа́ли, восхваля́ющих Тя́ и Бо́гу воспева́ющих: Аллилу́иа.

И́кос 5.

Не́кий благогове́йный му́ж стра́хом ве́лиим преиспо́лнися, егда́ в но́щь Све́тлаго Христо́ва Воскресе́ния ви́де ико́ну Твою́, Спору́чнице Всеблага́я, све́том Небе́сным блиста́ющуюся и, я́ко дожде́вныя ка́пли, ми́ро источа́ющую и молниеви́дныя и́скры испуща́ющую, позна́в в се́м зна́мении ми́лости Твоея́ к лю́дем, со слеза́ми умиле́ния и благодаре́ния ра́достно воспе́ Тебе́, Преблагослове́нней Ма́тери Бо́жией:

Ра́дуйся, О́гнь Боже́ственный неопа́льно держа́вшая, И́мже грехи́ на́ша попаля́ются; ра́дуйся, Све́т неприкоснове́нный носи́вшая, И́мже ду́ши на́ша просвеща́ются.

Ра́дуйся, ру́це Свои́ в поруче́ние о на́с Бо́гу принося́щая; ра́дуйся, вхо́д в Ца́рство Небе́сное и на́м, гре́шным, отверза́ющая.

Ра́дуйся, я́ко мо́лния тьму́ грехо́в на́ших разсека́ющая; ра́дуйся, я́ко ми́ро благово́нное, сердца́ на́ша умягча́ющая.

Ра́дуйся, исто́чники чуде́с всю́ду источа́ющая; ра́дуйся, ико́ною Твое́ю вся́ лю́ди возвеселя́ющая.

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

Конда́к 6.

Ве́сь ми́р христиа́нский пропове́дует ми́лости и чудеса́ Твоя́, Препросла́вленная Ма́ти Го́спода, и светлокрасу́ется мно́гими чудотво́рными Твои́ми ико́нами, среди́ ко́их ико́на Твоя́, Спору́чница гре́шных имену́емая, я́ко луна́ по́лная, луча́ми ми́лости Твоея́ и чуде́с немерца́емо сия́ет, просвеща́ющи и освеща́ющи ду́ши на́ша све́том Бо́жия благода́ти, подвиза́ющи на́с хвале́бно Бо́гу взыва́ти: Аллилу́иа.

И́кос 6.

Возсия́ в одну́ из ноще́й све́т небе́сный в хра́ме Нико́ло-Хамо́вническом, егда́ прия́т о́браз Тво́й чудотво́рный, Спору́чнице гре́шным, свети́льники тогда́ и лампа́ды неви́димою си́лою в хра́ме се́м возжига́хуся, свеща́ горя́щая, а́ки в служе́нии, незри́мо ке́м о́крест престо́ла ноша́шеся. Лю́дие же, вне́ хра́ма стоя́вшии и сия́ вся́ ви́девше, дивля́хуся, сла́вяще Тя́, Ма́ти Бо́жия, и Сы́на Твоего́, мы́ же, воспомина́юще ди́вное сие́ виде́ние, с умиле́нием Тебе́ глаго́лем:

Ра́дуйся, ско́рби на́ша в ра́дость претворя́ющая; ра́дуйся, ненаде́ющихся несомне́нною наде́ждою возвеселя́ющая.

Ра́дуйся, Свеще́, у престо́ла Бо́жия присногоря́щая; ра́дуйся, Лампа́до, еле́ем Боже́ственным светя́щая.

Ра́дуйся, Све́те лучеза́рный, пу́ть жи́зни на́м показу́ющий; ра́дуйся, Хра́ме одушевле́нный, все́х на́с освяща́ющий.

Ра́дуйся, упова́ющим на Тя́ непосты́дную жи́знь да́рующая; ра́дуйся, и по сме́рти неотсту́пно о ни́х пред Бо́гом хода́тайствующая.

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

Конда́к 7.

Хотя́ Долготерпели́вый Госпо́дь яви́ти Бе́здну Своего́ человеколю́бия и щедро́т, избра́ Тебе́, Пресвята́я Де́во, в Ма́терь Себе́ и яви́ Тя́ неисчерпа́емый исто́чник ми́лостей Свои́х, да а́ще кто́ пра́ведным судо́м Бо́жиим осужде́ния досто́ин, Твои́м хода́тайством, я́ко гре́шным Спору́чницы, сохране́н бу́дет, велегла́сно зовы́й: Аллилу́иа.

И́кос 7.

Ди́вная дела́ Твоя́ показа́л еси́ на́м, Го́споди, в Пречи́стей Твое́й Ма́тери и ди́вну дарова́л еси́ на́м Ея́ ико́ну, па́че луче́й со́лнечных просвеща́ющу лю́ди, я́ко Са́мую зря́щих Богоро́дицу и ве́рою серде́чною от души́ любо́вию, я́ко Бо́жией Ма́тери и Де́ве, Е́й вопию́щих:

Ра́дуйся, Купе́ле, в Не́йже вся́ ско́рби на́ша погружа́ются; ра́дуйся, Ча́ше, Е́юже ра́дость и спасе́ние вси́ восприе́млем.

Ра́дуйся, Живоно́сный Исто́чниче, все́х на́с оживотворя́ющий; ра́дуйся, Цве́те неувяда́емый, все́х на́с облагоуха́ющий.

Ра́дуйся, скорбе́й на́ших услажде́ние; ра́дуйся, печа́лей на́ших утоле́ние.

Ра́дуйся, боле́зней на́ших врачева́ние; ра́дуйся, от бе́д ско́рое на́ше избавле́ние.

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

Конда́к 8.

Стра́нники и прише́льцы есмы́ на земли́ и, по глаго́лу Апо́стола, не и́мамы зде́ пребыва́ющаго гра́да. Но к кому́ прибе́гнем, Влады́чице, в ско́рбех жития́ на́шего, а́ще не к Тебе́, Всеблага́я Спору́чнице о на́с гре́шных! Не отве́ржи на́с, Ма́ти Бо́жия, и не рцы́ на́м: Не ве́м ва́с грехо́в ра́ди ва́ших, но поми́луй на́с, си́рых и безпомо́щных, и приими́ на́с в ве́чныя кро́вы, Покрови́тельнице на́ша, да ра́достно вопие́м во сла́ве Небе́сней Царю́ сла́вы Христу́: Аллилу́иа.

И́кос 8.

Все́м ве́рным уте́шительно е́сть взира́ти на святу́ю ико́ну Твою́, Влады́чице, Спору́чнице гре́шным, на не́йже зри́м Тя́, на руку́ Твое́ю держа́щую Преве́чнаго Младе́нца, Го́спода на́шего Иису́са Христа́, Ему́ же покланя́ющеся боголе́пно, я́ко Творцу́ и Бо́гу на́шему, Тебе́, и́стинней Богоро́дице, уми́льно глаго́лем: Влады́чице, помози́, на ны́ милосе́рдовавши, потщи́ся, погиба́ем от мно́жества прегреше́ний, не отврати́ Твоя́ рабы́ тщы́, Тебе́ вопию́щия:

Ра́дуйся, а́лчущих Пита́тельнице; ра́дуйся, наги́х одея́ние.

Ра́дуйся, вдо́в Защи́тительнице; ра́дуйся, сиро́т Покрови́тельнице.

Ра́дуйся, гони́мых и оби́димых Засту́пнице; ра́дуйся, стра́ждущих и плене́нных ско́рая Освободи́тельнице.

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

Конда́к 9.

Все́ естество́ а́нгельское похва́льныя песнопе́ния прино́сит Тебе́, Бо́жией Ма́тери и Спору́чнице все́х припа́дающих Тебе́ и прося́щих Твоея́ по́мощи и Твоего́ утеше́ния, я́ко тве́рдым и кре́пким Твои́м предста́тельством пра́ведных весели́ши, гре́шных заступа́еши и от бе́д избавля́еши и печа́ли утоля́еши, и мо́лишися о все́х, ве́рою зову́щих о Тебе́ Бо́гу: Аллилу́иа.

И́кос 9.

Вити́йствующий вся́к язы́к недоуме́ет благохвали́ти Тя́ по достоя́нию, изумева́ет же у́м и преми́рный пе́ти Тя́, Богоро́дице; оба́че, Блага́я су́щи, ве́ру приими́, и́бо любо́вь ве́си боже́ственную на́шу; Ты́ бо христиа́н еси́ Предста́тельница, Тебе́ зову́щих:

Ра́дуйся, сия́нием Пречи́стыя души́ Твоея́ всю́ зе́млю просвети́вшая; ра́дуйся, чистото́ю телесе́ Твоего́ вся́ небеса́ возвесели́вшая.

Ра́дуйся, все́х на́с при Кресте́ Сы́на Твоего́ усынови́вшая; ра́дуйся, всегда́ Ма́тернюю любо́вь Твою́ к на́м явля́ющая.

Ра́дуйся, все́х даро́в духо́вных и теле́сных всемо́щная Пода́тельнице; ра́дуйся, бла́г вре́менных и ве́чных усе́рдная на́м Хода́таице.

Ра́дуйся, две́ри Ца́рствия Христо́ва ве́рным отверза́ющая; ра́дуйся, и на земли́ ра́достию и весе́лием сердца́ на́ша исполня́ющая.

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

Конда́к 10.

Спасти́ хотя́ ро́д челове́ческий от ве́чныя му́ки и непрестаю́щия ско́рби, Человеколю́бец Госпо́дь Тебе́, Ма́терь Свою́, дарова́ земны́м на по́мощь, глаго́ля: сы́нове челове́честии, се́ Ма́ти Моя́ покро́в и прибе́жище ва́м да бу́дет, печа́льным — утеше́ние, скорбя́щим — ра́дование, оби́димым — Засту́пница, бе́дствующим — по́мощь, больны́м — Цели́тельница, гре́шным — Спору́чница, да все́х из глубины́ грехо́вныя воздви́гнет, вопию́щих: Аллилу́иа.

И́кос 10.

Царю́ Небе́сный, Сы́не и Бо́же Мо́й, — та́ко мо́лит за на́с всегда́ Небе́сная Цари́ца, — приими́ вся́каго челове́ка, сла́вящаго Тя́ и призыва́ющаго И́мя Твое́ Свято́е, и прославля́ющих Мя́ И́мени Твоего́ ра́ди, и не отри́ни и́х от лица́ Твоего́, но благоволи́ в ни́х и приими́ от ни́х вся́кое благо́е моле́ние и все́х от бе́д изба́ви. Мы́ же, гре́шнии, наде́ющиися на Твоя́ Ма́терния моли́твы, зове́м Ти́:

Ра́дуйся, я́ко Ты́ еси́ Моли́твенница на́ша к Бо́гу те́плая; ра́дуйся, я́ко Твоя́ моли́тва всегда́ пред Бо́гом многомо́щна.

Ра́дуйся, Твои́ми моли́твами и на́ша убо́гая моле́ния богоприя́тными соде́ловающая; ра́дуйся, и на́ше недосто́инство Твои́м предста́тельством восполня́ющая.

Ра́дуйся, ка́ющихся гре́шников непосты́дная Спору́чнице; ра́дуйся, все́х христиа́н правосла́вных Засту́пнице.

Ра́дуйся, вся́ на́ша боле́зни исцеля́ющая; ра́дуйся, о́блак страсте́й и искуше́ний разгоня́ющая.

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

Конда́к 11.

Пе́ние всеумиле́нное приими́ от на́с, Небе́сная Спору́чнице на́ша, и моли́тву, приноси́мую Тебе́, Де́во Богоро́дице, ско́ро услы́ши; к Тебе́ бо в напа́стех, ско́рбех и печа́лех прибега́ем и пред Тобо́ю в беда́х на́ших сле́зы пролива́ем и мо́лим: Влады́чице, утоли́ печа́ли и приими́ моли́твы ра́б Твои́х, о Тебе́ пою́щих: Аллилу́иа.

И́кос 11.

Све́тлыми луча́ми зна́мений и чуде́с немерца́емо сия́ет свята́я ико́на Твоя́, Богоро́дице Де́во, и все́х благода́тно озаря́ет, с ве́рою пред не́ю Тебе́ моля́щихся, прогоня́ющи вся́кое вра́жие де́йство си́лою Бо́жиею, от нея́ исходя́щею. Те́мже ра́дуемся мы́, гре́шнии, иму́ще такову́ю чу́дную ико́ну Твою́ в хра́ме свое́м, я́ко зало́г Твоего́ к на́м и хра́му на́шему благоволе́ния, и Тебе́, Спору́чнице на́шей и Скоропослу́шнице моле́ний на́ших, благода́рственно взыва́ем:

Ра́дуйся, ра́дость благода́тную на́м излива́ющая; ра́дуйся, утеше́ние духо́вное ско́ро на́м подаю́щая.

Ра́дуйся, жела́ния богоуго́дныя исполня́ющая; ра́дуйся, во вся́ких ско́рбных обстоя́ниих на по́мощь на́м поспеша́ющая.

Ра́дуйся, в ве́ре и благоче́стии живу́щих зело́ лю́бящая; ра́дуйся, сердца́ и́х любо́вию к Бо́гу и лю́дям воспламеня́ющая.

Ра́дуйся, в ча́с недоуме́ния мы́сль бла́гу на се́рдце полага́ющая; ра́дуйся, во все́м упова́ние на Бо́га име́ти на́с науча́ющая.

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

Конда́к 12.

Благода́ть Бо́жия, прису́щая святе́й Твое́й ико́не, Спору́чницею гре́шных имену́емой, Богома́ти Влады́чице, влече́т к не́й все́х скорбя́щих и грехми́ мно́гими и напа́стьми обремене́нных, и не тщи́ отхо́дят они́ от сего́ исто́чника многообра́зных Твои́х ми́лостей и щедро́т, но в ско́рбех — отра́ду, в напа́стех — защи́ту, в боле́знех — цельбу́ и вся́ для души́ и теле́с благопотре́бныя неоску́дно получа́ют от чудотво́рнаго о́браза Твоего́, Всеблага́я, а́ще по Бо́зе все́ упова́ние на Тя́ возлага́ют, пою́ще: Аллилу́иа.

И́кос 12.

Пою́ще неизрече́нное Твое́ Ма́тернее к на́м гре́шным милосе́рдие, хва́лим Тя́, я́ко Всемо́щную Спору́чницу на́шу, благослови́м Тя́, я́ко Всеблагу́ю Скоропослу́шницу моле́ний на́ших, и со умиле́нием поклоня́емся Тебе́ в честне́й Твое́й ико́не, ве́руем бо и упова́ем, я́ко и ны́не испро́сиши на́м у Сы́на Твоего́ и Бо́га, да в жи́зни се́й и по сме́рти на́шей милосе́рдие Его́ неотсту́пно бу́дет о все́х, с любо́вию пою́щих Ти́:

Ра́дуйся, Твои́ми моли́твами ве́сь ми́р спаса́ющая; ра́дуйся, Твои́ми хода́тайствы всю́ Вселе́нную заступа́ющая.

Ра́дуйся, я́ко все́м с ве́рою притека́ющим ско́ро помога́ющая; ра́дуйся, и Небе́снаго Ца́рствия и́м испроша́ющая.

Ра́дуйся, я́ко на ико́ну Твою́ взира́юще, Само́й Тебе́, и́стинней Богоро́дице, поклоня́емся; ра́дуйся, Твои́м предста́тельством вся́ блага́я жела́ния на́ша ско́ро исполня́ющая.

Ра́дуйся, и в ча́с сме́ртный ве́рных Свои́х не оставля́ющая; ра́дуйся, и по сме́рти о ве́чно блаже́ннем и́х упокое́нии хода́тайствующая.

Ра́дуйся, гре́шным Спору́чнице, всегда́ о на́с ру́це Свои́ в поруче́ние Бо́гу принося́щая.

Конда́к 13.

О, Всепе́тая Ма́ти, Всеблага́я Спору́чнице спасе́ния гре́шных, Богоро́дице Де́во! Приими́ ми́лостиво и ны́нешнее на́ше моле́ние, е́же от усе́рдия на́шего во благодаре́ние Ти́ принесо́хом, и испроси́ на́м у Всеще́драго Бо́га в ве́ре правосла́вней непоколеби́мость, в любви́ христиа́нской преспе́яние и грехо́в на́ших проще́ние, да предста́тельством Твои́м унасле́дим Ца́рствие Небе́сное и сподо́бимся со все́ми святы́ми пе́ти Бо́гу: Аллилу́иа.

Этот конда́к чита́ется три́жды, зате́м 1-й и́кос и 1-й конда́к.

Моли́тва.

О, Влады́чице Преблагослове́нная, Защи́тнице ро́да христиа́нскаго, прибе́жище и спасе́ние притека́ющих к Тебе́! Ве́м, вои́стину ве́м, я́ко зело́ согреши́х и прогне́вах, Преми́лостивая Госпоже́, рожде́ннаго пло́тию от Тебе́ Сы́на Бо́жия, но и́мам мно́гии о́бразы пре́жде мене́ прогне́вавших Его́ благоутро́бие: мытари́, блудни́цы и про́чия гре́шники, и́мже даде́ся проще́ние грехо́в и́х, покая́ния ра́ди и испове́дания. Ты́я у́бо о́бразы поми́лованных очесе́м гре́шныя души́ моея́ представля́я и на толи́кое Бо́жие милосе́рдие, о́нех прие́мшее, взира́я, дерзну́х и а́з, гре́шный, прибе́гнути с покая́нием ко Твоему́ благоутро́бию. О, Всеми́лостивая Влады́чице, да пода́си ми́ ру́ку по́мощи и испро́сиши у Сы́на Твоего́ и Бо́га Ма́терними и святе́йшими Твои́ми моли́твами тя́жким мои́м грехо́м проще́ние. Ве́рую и испове́дую, я́ко То́й, Его́же родила́ еси́, Сы́н Тво́й, е́сть вои́стину Христо́с, Сы́н Бо́га Жива́го, Судия́ живы́х и ме́ртвых, воздая́й кому́ждо по дело́м его́. Ве́рую же па́ки и испове́дую Тебе́ бы́ти и́стинную Богоро́дицу, милосе́рдия исто́чник, утеше́ние пла́чущих, взыска́ние поги́бших, си́льную и непрестаю́щую к Бо́гу Хода́таицу, зело́ лю́бящую ро́д христиа́нский, и Спору́чницу покая́ния. Вои́стину бо не́сть челове́ком ины́я по́мощи и покро́ва, ра́зве Тебе́, Госпоже́ Преми́лостивая, и никто́же, упова́я на Тя́, постыде́ся когда́ и, Тобо́ю умоля́я Бо́га, никто́же оста́влен бы́сть. Того́ ра́ди молю́ Твою́ неисче́тную бла́гость: отве́рзи две́ри милосе́рдия Твоего́ мне́, заблу́ждшему и па́дшему в тиме́ние глубины́, не возгнуша́йся мене́, скве́рнаго, не пре́зри гре́шнаго моле́ния моего́, не оста́ви мене́, окая́ннаго, я́ко в поги́бель зло́бный вра́г похи́тити мя́ и́щет, но умоли́ о мне́ рожде́ннаго от Тебе́ милосе́рдаго Сы́на Твоего́ и Бо́га, да прости́т вели́кия моя́ грехи́ и изба́вит мя́ от па́губы моея́; я́ко да и а́з со все́ми, получи́вшими проще́ние, воспою́ и просла́влю безме́рное милосе́рдие Бо́жие и Твое́ непосты́дное о мне́ заступле́ние в жи́зни се́й и в несконча́емом ве́це. Ами́нь.