Текст утвержден Священным Синодом
Русской Православной Церкви
25 декабря 2012 года (журнал № 131)

Конда́к 1

Подо́бен: Взбра́нной Воево́де:

Избра́нника Бо́жия и чудотво́рца, Иорда́на насе́льника и храни́теля, отше́льником же о́браз и миря́ном, восхваля́ем тя, чти́тели твои́, богоно́се. Но я́ко име́яй дерзнове́ние ко Го́споду, от враг, тесня́щих ны, защити́, да зове́м ти; Ра́дуйся, преподо́бне Гера́симе, всепочита́емый пустынножи́телю.

И́кос 1

А́нгел от челове́к был еси́, преподо́бне, прите́к от земли́ к небе́сным. Ны́не же со беспло́тными ра́дующася тя зря, ужаса́юся и стра́хом зову́ ти от души́ сия́:

Ра́дуйся, Лики́и боже́ственный пло́де;

ра́дуйся, Иорда́на нетле́нная сла́во.

Ра́дуйся, доброде́тели дру́же и́стинный;

ра́дуйся, Христа́ моего́ служи́телю велича́йший.

Ра́дуйся, я́ко вся отда́л еси́ и приобре́л Христа́;

ра́дуйся, я́ко вся в тщету́ вмени́л еси́ Его́ ра́ди.

Ра́дуйся, я́ко удиви́шася ти А́нгели;

ра́дуйся, я́ко тебе́ и зве́рие почто́ша.

Ра́дуйся, преподо́бне Гера́симе, всепочита́емый пустынножи́телю.

Конда́к 2

Ви́дя ми́ра сего́ тщету́ и жите́йских треволне́ний отреши́вся, богому́дре, разу́мно пре́жним отце́м подража́л еси́, и́хже за́поведем после́дуя, восхожде́ния путь обре́л еси́, Гера́симе. Сего́ ра́ди и Влады́це твоему́, блаже́нне, любо́вию вопия́л еси́: Аллилу́ия.

И́кос 2

Ра́зум имы́й пра́вый, ре́вностию дыша́ боже́ственною, я́ко ины́й Анто́ний, свя́те Гера́симе, собра́ния мона́шеская созва́л еси́, я́ко дре́вле от Еги́пта той. Мы же, к тебе́ взира́юще, взыва́ем от се́рдца си́це:

Ра́дуйся, сто́лпе безмо́лвия;

ра́дуйся, чу́до воздержа́ния.

Ра́дуйся, в мона́шеском житии́ ве́лий;

ра́дуйся, изря́дный сего́ защи́тниче.

Ра́дуйся, Бо́гу ничто́же предпочты́й;

ра́дуйся, благоче́стно во и́мя Его́ подвиза́выйся.

Ра́дуйся, А́нгелов купножи́телю;

ра́дуйся, Сил Небе́сных слико́вниче.

Ра́дуйся, преподо́бне Гера́симе, всепочита́емый пустынножи́телю.

Конда́к 3

Си́лою свы́ше оболки́йся, блаже́нне, в пусты́ню удали́лся еси́, и я́ко ни́ву благопло́дну и до́бру сию́ показа́л еси́, му́дре, жела́ющим Ца́рство Христо́во стяжа́ти; те́мже Христу́ пое́м: Аллилу́ия.

И́кос 3

Имы́й боже́ственную ре́вность, Гера́симе, в се́рдце твое́м, и боже́ственный свет, исполня́яй е́, восхожде́ния твори́л еси́ непреста́нно, и до́брую ку́плю тала́нтом соде́яв, ра́довался еси́, мы же, чудя́щеся, вопие́м ти разу́мно сицева́я:

Ра́дуйся, высото́ богомы́слия;

ра́дуйся, смире́ния глубино́.

Ра́дуйся, безмо́лвия пла́меню неусы́пный;

ра́дуйся, воздержа́ния пра́вило ве́рнейшее.

Ра́дуйся, украше́ние мона́хов трезвя́щихся;

ра́дуйся, похвало́ подви́жников доброде́тельных.

Ра́дуйся, све́тлая преподо́бных красото́;

ра́дуйся, сла́вная святы́х добро́то.

Ра́дуйся, преподо́бне Гера́симе, всепочита́емый пустынножи́телю.

Конда́к 4

Ре́вности Госпо́дни горя́щей в души́ твое́й, Гера́симе, соедини́лся еси́ А́нгелом, и себе́ сама́го сокро́вище свяще́нное Тро́ицы показа́в, преподо́бне, возглаша́л еси́ с ни́ми боже́ственную песнь: Аллилу́ия.

И́кос 4

Слы́шаша живу́щии во стране́ Иорда́нстей сла́ву твою́, и теко́ша в пусты́ню ви́дети тя: мы же, сла́ву твою́ у престо́ла Вседержи́телева до́бре ве́дяще, моли́твенно к тебе́ в пусты́ни жития́ на́шего притека́ем, хва́ляще тя пе́нии таковы́ми:

Ра́дуйся, му́дрый стадонача́льниче;

ра́дуйся, па́стырю наш до́брый.

Ра́дуйся, мона́хов руководи́телю;

ра́дуйся, в по́двизе су́щих предста́телю.

Ра́дуйся, свети́ло Иорда́на ясне́йшее;

ра́дуйся, лампа́до пусты́ни пресве́тлая.

Ра́дуйся, и́мже просла́вися Бог;

ра́дуйся, и́мже враг посрами́ся.

Ра́дуйся, преподо́бне Гера́симе, всепочита́емый пустынножи́телю.

Конда́к 5

Богоно́сец ве́лий и сла́вный и́ноков нача́льник всех приима́ше ра́достно и я́ко свети́льник просвеща́ше поуче́ньми свои́ми, ве́дый вся, да дости́гнут Недостижи́маго и лику́юще возопию́т: Аллилу́ия.

И́кос 5

Ви́деша ли́цы пусты́нных отце́в Гера́сима честна́го на Иорда́не, и я́ко Па́вла почита́юще его́ и но́ваго Анто́ния, тща́щагося сих путе́м сле́довати, дивя́щеся вопия́ху си́це:

Ра́дуйся, звездо́, боже́ственную све́тлость явля́ющая;

ра́дуйся, огню́, тьму вра́жию отгоня́ющий.

Ра́дуйся, я́ко попра́л еси́ напа́сти диа́вольския;

ра́дуйся, я́ко смири́л еси́ де́монскую горды́ню.

Ра́дуйся, из глубины́ страсте́й воззва́ние;

ра́дуйся, омраче́нных зло́бою исправле́ние.

Ра́дуйся, ста́да твоего́ защи́тителю и изба́вителю;

ра́дуйся, учени́к твои́х наста́вниче и учи́телю.

Ра́дуйся, преподо́бне Гера́симе, всепочита́емый пустынножи́телю.

Конда́к 6

Прибе́жище боже́ственное пусты́ню Иорда́нскую ве́дый, та́мо поспеши́л еси́, жестоты́ ея́ и зно́я ника́коже убоя́вся, всему́дре, но ра́дуяся от се́рдца вопия́л еси́ Спа́су, поя́: Аллилу́ия.

И́кос 6

Возсия́ твоея́ оби́тели сла́ва, ю́же на Иорда́не созда́л и распространи́л еси́, треблаже́нне, подвиза́ния ра́ди в чи́стем житии́: мно́жества же неисче́тная мона́хов в сей прия́л еси́, и́же, ви́дяще по́двиги твоя́, взыва́ху тебе́ такова́я:

Ра́дуйся, я́ко земна́я премени́л еси́ в небе́сная;

ра́дуйся, я́ко от ю́ности после́довал еси́ Христу́.

Ра́дуйся, за́поведей Христо́вых пропове́дниче;

ра́дуйся, отмета́ющих их секи́ро прео́страя.

Ра́дуйся, преда́ний пусты́ни сохране́ние;

ра́дуйся, всех сопроти́вных упраздне́ние.

Ра́дуйся, и́мже и́ноцы хва́лятся;

ра́дуйся, и́мже мирсти́и возвыша́ются.

Ра́дуйся, преподо́бне Гера́симе, всепочита́емый пустынножи́телю.

Конда́к 7

Хотя́ ко исто́чнику воды́ живы́я прини́кнути, вы́ну поуча́лся еси́ в зако́не Госпо́дни, и сего́ ра́ди непоколеби́мь я́ко ка́мень показа́лся еси́, и яви́лся кре́пок во искуше́ниих, и позна́лся от отце́в соверше́н, и́же ви́дяще льва, во́ду нося́ща, чудя́хуся, вопию́ще: Аллилу́ия.

И́кос 7

Но́вый показа́л еси́ град пусты́ню Иорда́нскую, Гера́симе, всечестны́й о́тче, и́бо сию́ я́ко ину́ю Фиваи́ду и Нитри́ю мона́хов испо́лнил еси́, вопию́щих ти ны́не во Ца́рствии та́ко:

Ра́дуйся, Евфи́мию единонра́вне;

ра́дуйся, Анто́нию единоре́вностне.

Ра́дуйся, Ону́фрию равноче́стне;

ра́дуйся, Пахо́мию раностоя́тельне.

Ра́дуйся, я́ко Агафо́ну подража́л еси́ честно́му;

ра́дуйся, я́ко Паи́сию поревнова́л еси́ сла́вному.

Ра́дуйся, имы́й Арсе́ниево горе́ние;

ра́дуйся, подвиза́выйся в Па́мвовом несмея́нии.

Ра́дуйся, преподо́бне Гера́симе, всепочита́емый пустынножи́телю.

Конда́к 8

Насажде́нное при исхо́дищих вод дре́во ду́ха яви́лся еси́, богому́дре, и сего́ ра́ди и́ноцы, плоды́ неувяда́емыя на тебе́ ви́дяще, дивля́хуся, пою́ще: Аллилу́ия.

И́кос 8

Весь быв в вы́шних, пречу́дный, ни́жних же отдаля́яся, отхожда́ше Гера́сим боже́ственный, укра́шен доброде́тельми, от всех же люби́мь и восхваля́емь си́це:

Ра́дуйся, пусты́ни ди́вный цве́те;

ра́дуйся, в безво́дней исто́чниче чу́дный.

Ра́дуйся, освяще́ние спаси́тельное;

ра́дуйся, кади́ло богоприя́тное.

Ра́дуйся, ве́лий в подвиза́нии;

ра́дуйся, бо́лий в мудрова́нии.

Ра́дуйся, и́мже преле́стник посрами́ся;

ра́дуйся, и́мже сатана́ низве́ржеся.

Ра́дуйся, преподо́бне Гера́симе, всепочита́емый пустынножи́телю.

Конда́к 9

Вся́кое естество́ челове́ческое удиви́ся, богому́дре, всесоверше́нно стра́нному и чуде́сному: льва бо послушли́ва зря́ху вси и во́ду нося́ща, и всех подвиза́юща пе́ти: Аллилу́ия.

И́кос 9

Подвиза́ющимся изба́витель в пусты́ни показа́лся еси́, Гера́симе, и чуде́с испо́лнь, се́рдце бо твое́ храм Бо́жий бе чист и присносве́тел, преподо́бне. Сего́ у́бо ра́ди дивя́щеся, ве́рно вопие́м ти:

Ра́дуйся, ли́ки и́ноческия обра́довавый;

ра́дуйся, на лу́чшее тех наста́вивый.

Ра́дуйся, мона́хов боже́ственное похвале́ние;

ра́дуйся, ве́рных непрестаю́щее весе́лие.

Ра́дуйся, я́ко победи́л еси́ диа́вольская шата́ния;

ра́дуйся, я́ко порази́л еси́ того́ ко́зни.

Ра́дуйся, чту́щих тя при́сная защи́то;

ра́дуйся, помина́ющим тя по́моще изве́стная.

Ра́дуйся, преподо́бне Гера́симе, всепочита́емый пустынножи́телю.

Конда́к 10

Созда́теля на́шего и Спаси́теля, со преподо́бными на Небесе́х пребыва́я, моли́, о́тче, да ми́лостивно пре́зрит грехи́ на́ша: нас бо ра́ди показа́ся по нам челове́к, да изба́вит ны бу́дущия гее́нны. Тем благода́рно взыва́ем Ему́: Аллилу́ия.

И́кос 10

Стена́ мона́шествующим на Иорда́не показа́лся еси́ и всем к тебе́ притека́ющим, сего́ ра́ди моли́ся о нас, вельми́ чту́щих тя и любо́вию воспева́ющих си́це:

Ра́дуйся, святы́х благоукраше́ние;

ра́дуйся, ли́ка преподо́бных соприча́стниче.

Ра́дуйся, Иларио́на подо́бниче;

ра́дуйся, Харито́на ревни́телю.

Ра́дуйся, Симео́на юро́диваго сла́во;

ра́дуйся, Иоа́нна по́стника си́ло.

Ра́дуйся, боже́ственнаго Кириа́ка управи́телю;

ра́дуйся, свята́го Ни́кона ликова́ние.

Ра́дуйся, преподо́бне Гера́симе, всепочита́емый пустынножи́телю.

Конда́к 11

Пе́нию всегда́ прилежа́й и бде́нию непреста́нну, А́нгелом уподо́бился еси́, блаже́нне: Евфи́мию бо усо́пшу, ду́шу его́ на Небеса́ восходя́щую зрел еси́, Го́споду же усе́рдне со А́нгелы пел еси́: Аллилу́ия.

И́кос 11

Свет сый в пусты́ни, просвеща́л еси́ ученики́ твоя́ во стране́ Иорда́нстей: вжига́яй бо огнь невеще́ственный, наставля́л еси́ к ра́зуму боже́ственному вся, му́дре просвеща́я их, и́же благода́рно вопия́ху ти сия́:

Ра́дуйся, мона́хов слу́хи возвеселя́яй;

ра́дуйся, сих мно́жества к Бо́гу приведы́й.

Ра́дуйся, новонача́льных в кинови́ю приима́вый;

ра́дуйся, усоверши́вшихся в пусты́ню отсыла́вый.

Ра́дуйся, подви́жников свяще́нная сла́досте;

ра́дуйся, и́ноков небе́сная ра́досте.

Ра́дуйся, и́мже похваля́ются благогове́йнии;

ра́дуйся, и́мже охраня́ются целому́дрии.

Ра́дуйся, преподо́бне Гера́симе, всепочита́емый пустынножи́телю.

Конда́к 12

Ра́дуяся, преподо́бне, подвиза́лся еси́ во мно́зем безмо́лвии со отцы́ богоно́сными, удаля́яся в пусты́ню вре́мене ра́ди поста́ и вку́пе со все́ми поя́: Аллилу́ия.

И́кос 12

Пое́ши ны́не со А́нгелы на Небеси́, я́ко не́когда на земли́ с челове́ки, трисвяту́ю песнь Бо́гу, Его́же, сла́вне Гера́симе, всегда́ моли́ о нас, чту́щих тя и сла́вящих пе́сньми сицевы́ми:

Ра́дуйся, хода́таю на́шего спасе́ния;

ра́дуйся, це́ркве сла́во и благоуха́ние.

Ра́дуйся, правосла́вных стено́ и огражде́ние;

ра́дуйся, христиа́ном вели́кий наста́вниче.

Ра́дуйся, любве́ сугу́быя сокро́вище;

ра́дуйся, те́плый наш предста́телю.

Ра́дуйся, соблюда́яй ны в час сме́ртный;

ра́дуйся, непосты́дный о нас моли́твенниче.

Ра́дуйся, преподо́бне Гера́симе, всепочита́емый пустынножи́телю.

Конда́к 13

О, всечестны́й о́тче Гера́симе, мона́хов све́тлосте, Христа́ моего́ служи́телю! Приими́ моле́ние сие́ ма́лое и твои́ми к Бо́гу моли́твами от вся́кия изба́ви напа́сти всех вопию́щих Тому́: Аллилу́ия.

Сей конда́к глаго́лется три́жды.

И па́ки чте́тся 1-й и́кос и 1-й конда́к.

Моли́тва

О, свяще́нная главо́, преподо́бне о́тче, преблаже́нне а́вво Гера́симе! Не забу́ди убо́гих твои́х до конца́, но помина́й нас всегда́ во святы́х твои́х и благоприя́тных моли́твах к Бо́гу. Помяни́ ста́до твое́, е́же сам упа́сл еси́, и не забу́ди посеща́ти чад твои́х. Моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя. Помина́й нас недосто́йных у престо́ла Вседержи́телева, и не преста́й моля́ся о нас ко Христу́ Бо́гу: и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши. Не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и мо́щи твоя́ сокрове́ны бы́ша на земли́, но свята́я твоя́ душа́ со А́нгельскими во́инствы, со Безпло́тными ли́ки, с Небе́сными Си́лами, у Престо́ла Вседержи́телева предстоя́щи, досто́йно весели́тся. Ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя муки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние, со безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.