Песнь 1

Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше.
Припев: Святии мученицы Адриане и Наталие, молите Бога о нас . (Поклон.)
В нощи мя жития, сном лютым одержима деяний, к свету покаяния, Боже, воздвигни молитвами мученик Твоих, Христе, да славлю Тя.
Святии мученицы Адриане и Наталие, молите Бога о нас.
Востоком мысленнаго солнца озарившеся мученицы, и дне сынове бывше, всю идольскую мглу крепко потребисте.
Слава: От устен, искапающих сладости божественнаго разума, насладився, Адриане, яд изблевал еси прежняго неразумия, воистинну, богоблаженне.
И ныне: Твоего приемши Содетеля, яко Сам восхоте, от безсеменна Твоего чрева паче ума воплощаема, Чистая, тварей воистинну явилася еси Владычица.

Молите Бога о нас, святии мученицы Адриане и Наталие, яко мы усердно к вам прибегаем, скорым помощником и молитвенником о душах наших. (Поклон.)

Песнь 3

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Святии мученицы Адриане и Наталие, молите Бога о нас.
Уз избежав идольскаго суетства, мучениче, связался еси желанием любве Христовы и узам, страдалец, Его радостию приобщился еси.
Святии мученицы Адриане и Наталие, молите Бога о нас.
Заворами железными голени сокрушаеми, страстотерпцы Господни, нечестия кости терпения заворами и мужеством воистинну сокрушисте.
Слава: Огнем любве божественныя душу опаляему супруга распалила еси желанием ко Христу, любовь плотскую, Наталие, до конца возненавидевши.
И ныне: Божественнаго рождества Твоего Чистая, всякий естества чин превосходит чудо; Бога бо преестественне зачала еси во чреве, и, рождши, пребываеши Приснодева.

Молите Бога о нас, святии мученицы Адриане и Наталие, яко мы усердно к вам прибегаем, скорым помощником и молитвенником о душах наших. (Поклон.)

Господи помилуй. (Трижды.)
Седален, глас 4
Нечестия запаление благочестия орошением угасил еси, страстотерпче, сокрушением твоих удов идольскую крепость истнил еси, супружницу обрет помощницу ко всем лютым, мучениче, ополчением, с неюже в вышнее вселился еси Царство, Адриане крепкодушне. Христу молися дати всем чтущим тя милость.
Слава, и ныне, Богородичен: Треволнении страстными безсовестный аз обуреваемь, Чистая, призываю Тя тепле, да не презриши мене, окаяннаго, погибнути, бездну милосердия рождши, разве бо Тебе, надежды не имам. Да не, врагом убо обрадование и смех, надеявся на Тя, явлюся, ибо можеши, елико хощеши, яко Мати сущи всех Бога.

Песнь 4

Ирмос: Христос моя сила, Бог и Господь, честная Церковь боголепно поет, взывающи от смысла чиста, о Господе празднующи.
Святии мученицы Адриане и Наталие, молите Бога о нас.
Христа мученицы крепость стяжавше, некрепкое суровство гонителей воистинну поправше и венцы победы с Небесе прияша.
Святии мученицы Адриане и Наталие, молите Бога о нас.
Гноем, всюду обтекающим святых телесем, миро Богу воистинну принесеся, гноение прелести очищающее державно.
Слава: Твоими кровьми одежду обагрил еси себе нетления, совлек тления одежду, и Христу, Адриане, со славою ныне предстоиши.
И ныне: Яко воистинну неизвещанна и непостижима яже Твоего боголепнаго, Богородице, суть рождества, сущим на земли и на небеси, Приснодево, таинства.

Молите Бога о нас, святии мученицы Адриане и Наталие, яко мы усердно к вам прибегаем, скорым помощником и молитвенником о душах наших. (Поклон.)

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Святии мученицы Адриане и Наталие, молите Бога о нас.
Десятица сугуба страдалец с простою троицею, Христа ныне моляще, разрешиша соуз нечестия, суща безкрепостна, крепостию Троичною, доблественнии.
Святии мученицы Адриане и Наталие, молите Бога о нас.
Якоже солнце, посреде стоя звезд светлых, Адриане, с тобою страждущих облистал еси светом благочестия, нечестия мглу отгнав, и просветил еси мира концы.
Слава: Роса глагол твоих честных исцеление болезней воистинну твоему супружнику бысть, вкусившу лучших любовь, богомудрая Наталие, мучеников сожительнице.
И ныне: Богородицу Тя от души, Владычице мира благая, исповедающих спаси: Тя бо предстательство непоборимое имамы, истинную Богородительницу.

Молите Бога о нас, святии мученицы Адриане и Наталие, яко мы усердно к вам прибегаем, скорым помощником и молитвенником о душах наших. (Поклон.)

Песнь 6

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Святии мученицы Адриане и Наталие, молите Бога о нас.
Христовою окормляеми дланию благочестно, безбожия пучину преидосте и ко пристанищу тихому вышния светлости, страдальцы Господни, устремистеся.
Святии мученицы Адриане и Наталие, молите Бога о нас.
Яко цвети, благоухают подвиг твоих, мудре, яже паче естества одоления, ибо Божие явился еси, Адриане, благовонно кадило, огнем мук опаляемь.
Слава: Добротою веры святая твоя душа украшена, всечестная, и, доброту ищущи, яко воистинну Христову безмерную, Наталие, желания не погреши.
И ныне: Всечистая Владычице, рождшая человеком кормчия Господа, страстей моих непостоянное и лютое утоли смущение и тишину подаждь сердцу моему.

Молите Бога о нас, святии мученицы Адриане и Наталие, яко мы усердно к вам прибегаем, скорым помощником и молитвенником о душах наших. (Поклон.)
(Поклон.)

Господи помилуй. (Трижды.) Слава, и ныне.
Кондак, глас 4
Мученик возсия божественная память и земныя озари вся концы светло, с веселием зовущих: Ты еси мучеников, Христе, радование.
Икос
На Древе Крестнем плотию пригвожденнаго Христа Царя возжелавше доблественне, воини, усердно болезни лютыя и муки страшныя претерпеша, поправше идольское нечестие все, и беззаконных сопротивления низложше, десятица сугубая и троица мученик. Темже Адриан и Наталия, супруг красный, сих зряще, поревноваша им и, радующеся, вопиют: Ты еси мучеников, Христе, радование.

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.
Святии мученицы Адриане и Наталие, молите Бога о нас.
Необоримы якоже столпы явистеся, Сиона вышняго мученицы, низложивше утверждения вся вражия терпением страдания вашего. Темже почитаем благочестно вашу память присно.
Святии мученицы Адриане и Наталие, молите Бога о нас.
Помощница Адриана Наталия яко единодушна от Бога даровася, извлачащи углебша сего во глубине прелести, и уверяющи вопити: благословен Бог отец наших.
Слава: Яко многоценно сокровище, мученика руку скрывши, не предала еси целомудрия твоего сокровища украсти тщащимся, честная, окормляема рукою отцев Бога.
И ныне: Священнии пророцы провозвестиша, Чистая, явленно таинство честнаго рождества Твоего, и ныне мы, сбытия издалеча смотряще, благочестно Тя ублажаем.

Молите Бога о нас, святии мученицы Адриане и Наталие, яко мы усердно к вам прибегаем, скорым помощником и молитвенником о душах наших. (Поклон.)

Песнь 8

Ирмос: Из пламене преподобным росу источил еси и праведнаго жертву водою попалил еси, вся бо твориши, Христе, токмо еже хотети. Тя превозносим во вся веки.
Святии мученицы Адриане и Наталие, молите Бога о нас.
Огнем мучения всесожигаеми, нечестия пламень весь угасисте кровьми вашими, страдальцы, зовуще: Тя превозносим, Христе, во вся веки.
Святии мученицы Адриане и Наталие, молите Бога о нас.
Жены чудныя кто не удивится сущия к Богу любви? Яко возненавиде желание плотское и супружника увери чести и славити Христа во веки вся.
Слава: Посрамив безбожных суетства и возжелав Христову красоту, столп благочестия верным был еси, мучениче, страстотерпче Адриане всеблаженне.
И ныне: От Света Светодавца Слова зачала еси, и рождши несказанно Пресущественнаго, Дух бо в Тя, Дево, Божий вселися. Темже Тя поем, Чистая, во веки.

Молите Бога о нас, святии мученицы Адриане и Наталие, яко мы усердно к вам прибегаем, скорым помощником и молитвенником о душах наших. (Поклон.)

Песнь 9

Ирмос: Бога человеком невозможно видети, на Негоже не смеют чини ангельстии взирати; Тобою же, Всечистая, явися человеком Слово воплощенно. Егоже величающе, с небесными вои Тя ублажаем.
Святии мученицы Адриане и Наталие, молите Бога о нас. (Поклон.)
Удов сокрушение, лютых прещения ни меч, ни огнь, ни смерть плоти тленныя Христовы любве разлучити вас, славнии страдальцы, отнюд возмогоша. Темже во веки с Ним присно веселитеся.
Святии мученицы Адриане и Наталие, молите Бога о нас.
Свещи богосветлы, звезды сияющия, светильницы, нам свет благочестия озаряюще, солнца славы сияния, чада невечерняго блаженства, мученицы явистеся Христовы всечестнии.
Слава: Источник, вод исполнен духовных, и река божественных дарований исполнена, и чаша страдания проливающая токи, пучины спасения, мученицы, явистеся, бури напастей различных нас избавляюще.
И ныне: Мертвым востание ныне даровася Твоим несказанным и неизреченным Рождеством, Богородице всечистая: Жизнь бо из Тебе, плотию обложена, всем возсия и смертную дряхлость яве разруши.

Молите Бога о нас, святии мученицы Адриане и Наталие, яко мы усердно к вам прибегаем, скорым помощником и молитвенником о душах наших. (Поклон.)

Кондак 1

Избраннии служителие Божии и всехвальнии мученицы Христови, всю мира сего суету презревшии любве ради ко Христу, Сыну Божию, и живот свой положившии, яко жертву непорочную и чистую, паче желая прияти мучения и смерть, неже отрещися Бога истиннаго, восхваляем вы любовию, святии Адриане и Наталие! Вы же, в веселии предстояще Престолу славы Господни и выну наслаждающеся Того лицезрением, молитеся о нас, грешных, с верою и благоговением к вам притекающих, да благодарственно вопием вам:

Радуйтеся, святии Адриане и Наталие, мученицы Христови всехвальнии и страдальцы непобедимии!

Икос 1

Ангельскою ко Господу горящи любовию, нерестанно возсылала еси усердныя молитвы к Богу Спасителю твоему, Наталие всеблаженная, да просветит лучем Своея благодати помраченное сердце супруга твоего и обратит е к познанию Его, Творца и Владыки твоего, дондеже Царь царей услыша слезныя прошения твоя и коснуся сердца Адрианова, и абие уверова супруг твой от всея души, и бодренным сердцем претерпе лютейшия муки, и самую смерть за Христа не убояся прияти. Темже благоговейно удивляющеся вашей ко Христу любви и ревности по Бозе, радостно взываем вам:

Радуйтеся, светильницы всесветлии, горящии любовию Божественною;

радуйтеся, столпи непоколебимии противу озлоблений идолослужителей нечестивых.

Радуйтеся, Крест Христов с терпением и преданностию понесшии;

радуйтеся, сим победы святыя знамением победившии диавола и его козни посрамившии.

Радуйтеся, нетления венцы восприявшии и славою от Господа венчаннии;

радуйтеся, яко ныне на Небеси предстоите Престолу Вседержителеву и молитеся за ны, грешныя.

Радуйтеся, святии Адриане и Наталие, мученицы Христови всехвальнии и страдальцы непобедимии!

Кондак 2

Видя Господь чистоту сердца твоего, Адриане всечестне, аще и помраченнаго тьмою многобожия, обаче готоваго прияти Истину, благоволи призвати тя в чудный Свой свет и открыти тебе двери Царствия Своего, молитвами святыя супружницы твоея, с неюже в веселии взывал еси Триединому Богу, просветившему твою душу, хвалебную песнь: Аллилуиа.

Икос 2

Разум истиннаго боговедения внезапу объя душу твою, Адриане, егда, по повелению цареву, вписывал еси с прочими нотарии имена святых мученик, на страдание и смерть за имя Христово ведомых, егда бо вопросил еси служителей Господних, кое воздаяние имут прияти от Господа во Царствии Его за вся муки, тии отвещаша ти, яко несть мощно бренному языку изрещи и уму слабому постигнути, яже уготова Бог любящим Его. Ты же, абие оставль все идольское зловерие, всем сердцем ко Христу устремился еси и возопил еси дерзновенно: «И аз христианин есмь!» Почитающе убо твое обращение ко истинному Солнцу Правды молим тя, приими вкупе с супружницею твоею, святою Наталиею, от нас, грешных, похвалы сицевыя:

Радуйтеся, истиннаго Бога святии служителие;

радуйтеся, Того воли ревностнии исполнителие.

Радуйтеся, яко вся красная и сладкая мира сего любве ради Христовы презрели есте;

радуйтеся, яко любовь земную и супружеское счастие в жертву Возлюбившему вы принесли есте.

Радуйтеся, научающии нас не прилеплятися к земным благам, но возноситися духом горе, к Богу;

радуйтеся, немощь нашу просвещающии и восходити на лествицу святыни нам помогающии.

Радуйтеся, святии Адриане и Наталие, мученицы Христови всехвальнии и страдальцы непобедимии!

Кондак 3

Силою свыше укрепленный, шествовал еси, блаженне, мужественно на предлежащий ти подвиг, жаждая умрети за возлюбленнаго Спасителя и Бога твоего. Супружница же твоя, святая Наталия, молитвами и увещании помогаше ти подъяти крест, от Господа тебе посылаемый, и прияти и венец нетления, уготованный ти на Небесах, и дерзновенно Богу воспевати: Аллилуия.

Икос 3

Имеяй изыти на беззаконное судище Максимианово, затворен был еси в темницу мрачную, идеже с прочими святыми мученики всю нощь в молитвах, песнопениих и беседах духовных провел еси. Любвеобильная же супружница твоя, немощь женскую презревши и естественную любовь плотскую ни во чтоже вменивши, всячески тя убеждаше не отступати от веры Христовы, но до конца пребыти непоколебимым исповедником имене Иисусова и не боятися смерти. Темже вам, яко истинным воином Христовым, в духовном веселии взываем:

Радуйтеся, правоверия мужественнии ревнителие;

радуйтеся, зловерия неустрашимии обличителие.

Радуйтеся, терпением, яко крепкою бронею, облекшиися;

радуйтеся, Крест Христов яко непобедимое оружие в руце приемшии.

Радуйтеся, яко беззаконных мучителей преестественным мужеством вашим удивили есте;

радуйтеся, яко вами имя Божие прославися.

Радуйтеся, святии Адриане и Наталие, мученицы Христови всехвальнии и страдальцы непобедимии!

Кондак 4

Бурю малодушия и боязни от сердца твоего отгоняющи, славно Адриане, и на предлежащий мученический подвиг тя укрепляющи, блаженная жена твоя Наталиа всю нощь не преставаше с тобою беседовати о чудном и велицем воздаянии, еже Бог уготова за Него живот свой положившим, и тако вещаше тебе: «Блажен еси, господине мой, яко обрел еси сокровище безценное, драгоценный бисер – Христа Господа твоего! Не отступай паки во тьму идольскую, но выну пребывай верен Возлюбившему тя, вопия Ему от всего сердца: Аллилуия».

Икос 4

Слыша святая Наталиа, в дому своем седящая, яко грядеши к ней из темницы, и возмневши, яко мук убоялся еси и отверглся еси Христа, плакася горько и, предтекши тебе из дверей дома, нача укоряти тя, почто от веры Христовы отступил еси. Ты же, радуяся духом и паче укрепляяся на страдания, со слезами ей поведал еси, яко не токмо не отступил еси от Христа, но паче желаеши за имя Его Святое страдати. Таковей высоте любве христианския удивляющеся, со умилением вам взываем:

Радуйтеся, образ истинный супружества христианскаго явившии;

радуйтеся, любовь небесную в себе поистинне показавшии.

Радуйтеся, на подвиг самоотвержения Христа ради нас одушевляющии;

радуйтеся, вся красная мира сего преходящаго презирати нас научающии.

Радуйтеся, дольняя оставляти и духом взлетати к горним нас увещевающии;

радуйтеся, во всех, бываемых с нами, волю Божию зрети нам помогающии.

Радуйтеся, святии Адриане и Наталие, мученицы Христови всехвальнии и страдальцы непобедимии!

Кондак 5

Чудное милосердие и любовь показующи, о, Наталие, припадала еси к ногам узников, в темнице вкупе с мужем твоим за имя Христово заключенных, и священныя язвы их лобызающи, отирала еси гной их, облегчение и отраду всячески им содевая и в сердечном умилении к Богу Небесному вопиющи ангельскую песнь: Аллилуия.

Икос 5

Узрев мучитель злочестивый узники святыя, в темнице с тобою затворенныя, толикаго от ран изнеможения достигшия, яко отнюд не мощи им претерпети лютейшия муки, повеле единаго тя, Адриане, привести пред судище свое и всячески тя увещеваше отрещися Христа, устрашая тя предлежащими муками. Обаче, выше укрепляемый и блаженною супругою твоею утешаемый, пребыл еси тверд, аки адамант, противу искушения вражескаго. Сего ради твое за Христа страдание любовию ублажающе и святую супружницу твою величающе, радостно вам взываем:

Радуйтеся, Бога Вышняго победоноснии служителие;

радуйтеся, веры Христовы громогласнии исповедницы.

Радуйтеся, идольския прелести дерзновеннии обличителие;

радуйтеся, славы Божия неустрашимии проповедателие.

Радуйтеся, Максимианова гнева не убоявшиися;

радуйтеся, того ярость ни во чтоже вменившии.

Радуйтеся, святии Адриане и Наталие, мученицы Христови всехвальнии и страдальцы непобедимии!

Кондак 6

Проповедник велегласный явился еси, Адриане, егда, предстоя судищу цареву, небоязненно исповедывал еси Христа быти Бога истиннаго, сотворившаго небо и землю, идольскую же прелесть обличил еси, и за сие исповедание и обличение жесточайшее биение подъял еси, к Подвигоположнику твоему вопия: Аллилуиа.

Икос 6

Свет славы Небесныя осия лице твое, мудрый страдальче, егда по чреву биемый, яко и утробе твоей излиятися от жестоких ударов, не преставал еси славити Христа и пред всем народом имя Его Святое исповедати. Блаженная же Наталиа радовашеся духом, зрящи терпение твое и мужество, и молитвенно тя укрепляше, да не изнеможет душа твоя и да пребудеши до конца верный служитель Христов, ейже вкупе с тобою мы, грешнии, воспеваем сице:

Радуйтеся, Духа Святаго священная жилища;

радуйтеся, благодати Христовы славная вместилища.

Радуйтеся, душевно и телесно светом Божественным осияваемии;

радуйтеся, от Христа Царя свыше просвещаемии.

Радуйтеся, силою Божества Его укрепляемии;

радуйтеся, на подвиг страдания небоязненно шествовавшии.

Радуйтеся, святии Адриане и Наталие, мученицы Христови всехвальнии и страдальцы непобедимии!

Кондак 7

Хотя царь злочестивый паки тя призвати на судище, славно Адриане, в темницу тя затвори с прочими святыми мученики, идеже приступи к тебе Наталиа святая и нача терпение твое ублажати и укрепляти тя, глаголющи: «Блажен еси, господине мой, яко сподобился еси части святых мучеников Христовых!» С неюже радуяся, Богу взывал еси: Аллилуия.

Икос 7

Новую кознь измышляя мучитель злый, повеле воем своим отнюд не впускати в темницу к узником жен, из града приходящих утешения ради и облегчения страдальцев Христовых. Тогда и тебе, святая Наталие, возбранено бысть мужа твоего видети и служити ему; обаче повеление царево небрегши, в мужеском одеянии в темницу приходила еси и якоже прежде святаго супруга твоего подкрепляла еси, да мужественно грядет на мучения и смерть за Христа Господа. Сего ради достойно восхваляем тя вкупе со святым мужем твоим и сице вам вопием:

Радуйтеся, служителей Христовых украшение пресветлое;

радуйтеся, исповедников имене Иисусова велелепная славо.

Радуйтеся, путь узкий возлюбльшии и нам его указующии;

радуйтеся, яко путем сим тихаго пристанища, Царствия Христова, достигосте.

Радуйтеся, яко ныне в славе и блаженстве нескончаемем пребываете;

радуйтеся, яко нас молитвами вашими от бед и напастей сохраняете.

Радуйтеся, святии Адриане и Наталие, мученицы Христови всехвальнии и страдальцы непобедимии!

Кондак 8

Странное и чудное зримо бысть в темнице, идеже заключен был еси, Адриане, с прочими страдальцы Христовыми, егда по повелению грознаго мучителя голени твои сокрушати хотяху. Тогда бо святая жена твоя сама подъя нозе твои и положи их на наковальню, да пребиются от мук мучительских, и ты скорее соединишися с Господом твоим, воспевая непрестанно Ему: Аллилуиа.

Икос 8

Весь горя любовию ко Христу, мучениче Адриане, в терпении пребывал еси до самыя блаженныя кончины твоея, егда чистая душа твоя с Господом твоим соединися, за Егоже имя толико страдал еси, яко и руце твоей отсеченной быти. Почитающе убо твою мученическую кончину, верою тебе и святей Наталии взываем:

Радуйтеся, душевные муки вкупе с телесными за Христа претерпевшии;

радуйтеся, крилами небесныя любве горе к Богу возлетевшии.

Радуйтеся, яко орли, к Солнцу Правды воспарившии;

радуйтеся, к Свету Невечернему из юдоли плача возвысившиися.

Радуйтеся, в сонме святых мученик водворившиися;

радуйтеся, вкупе со всеми святыми на Небесех чудную песнь Богу воспевающии.

Радуйтеся, святии Адриане и Наталие, мученицы Христови всехвальнии и страдальцы непобедимии!

Кондак 9

Вся гордыня мучителя безчеловечнаго посрамлена бысть, егда сильный дождь погаси пламень огненный и не допусти сгорети честным останком святых мученик Христовых, еще же и град весь потоплен бысть водою, и люди нечестивии громом и молниею устрашени быша. Ты же, блаженная Наталиа, в веселии воспевала еси Христу, вся благоустрояющему: Аллилуиа.

Икос 9

Витийство похвал земных не довлеет ко восхвалению подвигов ваших, святии мученицы Христови Адриане и Наталие, ов убо о временней славе и величии земном небрег, вся остави и положи душу свою за веру во Христа, ова же, естественную женскую немощь преодолевши, мужески подвизася, укрепляющи супруга своего в его мучениих и радующися его блаженней кончине. Толикая деяния ваша достойно восхвалити недоумеюще, с любовию вам взываем:

Радуйтеся, бодренным сердцем Крест Христов на рамо подъемшии;

радуйтеся, под тяжестию его не изнемогшии.

Радуйтеся, подражателие Христовых страстей бывшии;

радуйтеся, плоть вашу со страстьми и похотьми распявшии.

Радуйтеся, образ любве и кротости в себе показавшии;

радуйтеся, друг друга тяготы носити нас научившии.

Радуйтеся, святии Адриане и Наталие, мученицы Христови всехвальнии и страдальцы непобедимии!

Кондак 10

Спасти хотя телеса святых мученик от поругания и безчестия, прииде некий благочестивый муж с женою своею ко святей Наталии и прочей братии христианстей, прося их соизволити ему, да возмет с собою в Византий святыя мощи и положит их тамо честно до времене, егда умрет Максимиан злочестивый. Христиане же града Никомидии соизволиша прошению сего мужа и препоручивше ему многоценное сокровище, Богу радостно вопияху: Аллилуиа.

Икос 10

Яко стеною ограждаеми есмы вашими святыми молитвами, святии Адриане и Наталие, се бо во всяких бедах и напастех наших нам всегда помогаете, наипаче же егда память вашу с любовию празднуем и славим о вас Христа Бога нашего. Сохраняемии убо вашими теплыми о нас молитвами, верно восхваляем вас звании сими:

Радуйтеся, о нас к Богу непрестаннии молитвенницы;

радуйтеся, любовию к нам горящии теплии наши помощницы.

Радуйтеся, скории заступницы наши и наставницы;

радуйтеся, учителие наши, жити богоугодно нас научающии.

Радуйтеся, любвеобильнии друзи наши, к немощем нашим снизходящии;

радуйтеся, на высоту девственныя чистоты и безстрастия нас возводящии.

Радуйтеся, святии Адриане и Наталие, мученицы Христови всехвальнии и страдальцы непобедимии!

Кондак 11

Пение Богу от всего сердца приносила еси, блаженная Наталие, егда избави тя от руки трибуна, желавшаго тя себе в жену пояти. Ты бо, яко верная супруга мученика Христова Адриана, не восхотела еси второе посягнути за мужа и с молитвою бежала еси, седши на корабль, в Византий, идеже тело святаго мужа твоего положено бысть. Достигши убо града сего, с любовию взывала еси Господу Богу: Аллилуиа.

Икос 11

Светильник пресветлый явися корабль, на немже морскую пучину проплыла еси, имея с собою многоценный бисер, руку святаго мужа твоего, егоже молитвами преследования трибуна избегнувши, невредимо Византия достигла еси и, с радостною душею лобызающи тело блаженнаго господина твоего, в душевном умилении душу твою в руце Господни предала еси. Величающе убо твое ко Господу отшествие вкупе с Адрианом святым, воспеваем вы сице:

Радуйтеся, супрузи блаженнии, на земли в любви пожившии и по смерти не разлучившиися;

радуйтеся, ближнии друзи Господни, у Престола Его пребывающии.

Радуйтеся, лицезрением Его всесветлым выну наслаждающиися;

радуйтеся, блаженство вечное всецело вкушающии.

Радуйтеся, в селениих праведных упокоение обретшии;

радуйтеся, на земли святыя мощи своя на исцеление нам оставившии.

Радуйтеся, святии Адриане и Наталие, мученицы Христови всехвальнии и страдальцы непобедимии!

Кондак 12

Благодати исполненнии сосуди показашася честныя ваша мощи, Христом Богом нам дарованныя, к нимже усердно притекающе святии мученицы Христови, грехов разрешение молитвами вашими приемлем, всем сердцем вопиюще Богу: Аллилуиа.

Икос 12

Поюще честное ваше срадание и блаженную кончину, еюже взыдосте в Горняя, ко всем святым, от века Богу угодившим, хвалим вас, всеславнии мученицы Христови, Адриане и Наталие, и усердно молим непрестанно поминати у Престола Славы нас, ублажающих вы сице:

Радуйтеся, мученицы прехвальнии и доблии воини Христови;

радуйтеся, непобедимии страстотерпцы и победоносцы славнии.

Радуйтеся, истинныя веры поборницы изряднии;

радуйтеся, добродетелей светильницы неугасимии.

Радуйтеся, углие, любовию Божественною горящии;

радуйтеся, венценосцы, небесными благами от Христа венчаннии.

Радуйтеся, святии Адриане и Наталие, мученицы Христови всехвальнии и страдальцы непобедимии!

Кондак 13

О, святии мученицы Христовы, Адриане и Наталие! Услышите нас, усердно вам молящихся и в храм ваш притекающих, и молите милостиваго Владыку Господа нашего Иисуса Христа даровати нам мир и здравие душ и телес, и спасти души наша, да выну поем Ему: Аллилуиа.

(Этот кондак читается трижды, затем икос 1 и кондак 1)

Молитва

О, священная двоице, святии мученицы Христови, Адриане и Наталие, блаженнии супрузи и доблии страдальцы! Услышите ны, молящиися вам со слезами, и низпослите на ны вся благопотребная душам и телесем нашим, и молите Христа Бога, да помилует нас и сотворит с нами по милости Своей, да не погибнем во гресех наших! Ей, святии мученицы, приимите глас моления нашего и избавите ны молитвами вашими от глада, губительства, труса, потопа, огня, града, меча, нашествия иноплеменников и междоусобныя брани, от напрасныя смерти и от всех бед, печалей и болезней, да выну, вашими молитвами и предстательством укрепляемии, прославим Господа Иисуса Христа, Емуже подобает всякая слава, честь и поклонение, со Безначальным Его Отцем и Пресвятым Духом, во веки веков. Аминь.