Кондак 1

Избранной от рода державнаго угоднице Христовой Евфросинии, яко крепкой заступнице и молитвеннице нашей, похвальная восписуем ти, чтущия тя. Ты же, яко имущая дерзновение ко Господу, Того умоли избавитися нам бед и скорбей, и в будущем веце небесное улучити царствие, да зовем ти:

Радуйся, преподобная княгине Евфросиние.

Икос 1

Ангельское воистину безстрастие еще на земли стяжала еси, преподобная, нивочтоже вменяющи княжения славу, богатств обилие, вся мира красная, о юности и красоте телесней нерадивши, непрестанными же к Богу молитвами, бдением и постом плоть изнуривши и душу добродетельми украсивши. Сицевому равноангельному житию твоему удивляющеся, сия вопием ти, преподобная:

Радуйся, от младых лет спасения взыскавшая; радуйся в молитвах к Богу прилежавшая.

Радуйся, в напастех на Него единаго упование полагавшая; радуйся, в сане княжестем смирение сохранившая.

Радуйся, во власти державней кротость ко всем соблюдшая; радуйся, к нищим милосердие неоскудное показавшая.

Радуйся, в чертозе княжестем иночески пожившая; радуйся, в неговании двора царскаго постническое житие явившая.

Радуйся, преподобная княгине Евфросиние.

Кондак 2

Видящи преподобная в доме отчем заповедей Божиих усердное хранение и в благочестии преспеяние, от юности навыче о спасении душевнем паче всего ревновати и в теплых к Богу молитвах Ему воспевати: Аллилуиа.

Икос 2

Разум во благочестии утвержден имущи преподобная, не земныя радости в супружестве взыскаше, но паче всех супругу в добродетелех подражаше и того к делом добрым подвизаше, со тщанием к почести вышняго звания течаше. Сицевое житие преподобныя похваляюще, возопиим к ней таковая:

Радуйся, Бога паче всех возлюбльшая; радуйся, в жизни славней нощи в молитвах пребывати не оставльшая.

Радуйся, во обилии благ земных постнической жизни навыкшая; радуйся, в мирстей жизни чистоту сердца сохраншая.

Радуйся, супружеств христианских удобрение; радуйся, жен благочестивых украшение.

Радуйся, во обилии благ живущим благочестия образ подавшая; радуйся, во славе сущим христианскаго жития правило показавшая.

Радуйся, преподобная княгине Евфросиние.

Кондак 3

Сила Вышняго присно невредиму тя сохрани, преподобная, егда смертоносная язва многи окрест тебе погубляше, и многажды в нахождениих врагов безбожных соблюдаше тя от меча их и пленения. Темже, Бога благодарящи, вопияла еси: Аллилуиа.

Икос 3

Имущи сердце милостивое и к людем страждущим удобь преклонное, во всех града и княжения напастех, в запалениих огненных, в нахождениих и губительствах вражиих первее к Богу обыкла еси, преподобная, с молитвою теплою прибегати и к той вся люди подвизати. Темже, почитающе твое теплое к Богу о людех ходатайство и скорую бедствующим помощь, вопием ти сицевая:

Радуйся, гнев Божий молитвами твоими утолявшая; радуйся, в бедах и напастех помощь Божию обретавшая.

Радуйся, крова лишенным пристанище уготовлявшая; радуйся, от врагов разоренным снабдение подававшая.

Радуйся, состраданием скорби бедствующих утолявшая; радуйся, милосердием нищету обнищавших отгонявшая.

Радуйся, душу ко всем милосерду имевшая; радуйся, во мнозех благотворениих любовь к людем показавшая.

Радуйся, преподобная княгине Евфросиние.

Кондак 4

Буря скорбных помышлений обдержаше тя, преподобная, егда юный князь, блага ради людей своих, волею пойде в жилище ярящихся злонравных агарян, яко овча в ложа дивиих зверей, и паки, егда сын твой два лета проживе в пленении у безбожных врагов. Ты же, скорби сердца твоего пред Господем единым в молитвах теплых изливающи, Ему непрестанно взывала еси: Аллилуиа.

Икос 4

Слышавше иногда безбожнии агаряне твое, преподобная, из царствующаго града удаление, гнаша вслед тебе, в плен яти тя хотяще. Ты же, Богом сохраняема, избегла еси рук вражиих, и Бога благодарящи, многи храмы и обители иноческия воздвигла еси. Темже, ведуще твою теплую к Богу любовь, вопием ти сицевая:

Радуйся, непрестанными молитвенными хвалении Бога прославлявшая; радуйся, в непрестанную жертву благодарения Ему храмы многи создавшая.

Радуйся, приметатися во дворех Божиих возлюбившая; радуйся, в мирстей жизни высоту иноческаго жития познавшая.

Радуйся, во славе светлаго княжения суету мирскаго жития уразумевшая; радуйся, мира суету уразумевшим пристанище тихое во обителех уготовавшая.

Радуйся, спасения душевнаго присно желавшая; радуйся, спастися хотящих к жизни иноческой призывавшая.

Радуйся, преподобная княгине Евфросиние.

Кондак 5

Боготечная звезда явилася еси, преподобная, в житии твоем, егда супружеских уз отрешившися, всецело Господу себе предала еси, постом и молитвами работающи Ему день и нощь и непрестанно вопиющи Ему: Аллилуиа.

Икос 5

Видящи, преподобная, себе по смерти мужа сиротствующу, возжела на служение единому Богу себе предати, обаче, воспитания ради чад, до времени в чертозех княжеских жити и о делех земных попечение имети понуждаема, умысли в тайне Богу работати, зельным пощением тело юное изнуряющи, людем же в светлых ризах и красну лицем себе являющи. Той единому Богу ведомыя подвиги почитающе, возопиим к ней таковая:

Радуйся, в тайне Богу послужившая; радуйся, сокровенно от людей Тому угодившая.

Радуйся, Давидски в полунощи на молитву восстававшая; радуйся, во дни бодрственно дела земная совершавшая.

Радуйся, псаломски утро в молениих предварявшая; радуйся, до нощи во обычных о чадех и людех попечениих пребывавшая.

Радуйся, яко пред Богом псаломски во вретищи и стенании душу твою смирила еси; радуйся, яко пред людьми евангельски во умащении главы и в светелости лица и одеяния себе являла еси.

Радуйся, преподобная княгине Евфросиние.

Кондак 6

Проповеднику премудрому согласующися, глаголала еси, преподобная, в сердцы твоем: всяческая в мире суета сует. Темже тихое от суеты убежище — обитель святую сию создала еси, еже бы в ней мира удалившися, в мире и безмолвии пети Богу: Аллилуиа.

Икос 6

Возсия в сердцы твоем, преподобная, светлая благодати луча, тайными молитвами и подвигами возжигаемая, еяже сияния не терпя древний враг, восхоте возмутити душу твою, наустив лукавыя люди хулы глаголати о житии твоем. Ты же клеветы слышащи, духом пребывала еси в Бозе утвержденна и помыслом не смущенна. Темже вопием ти, преподобная:

Радуйся, неправедное поношение без гнева терпевшая; радуйся, злокозненное хуление несмущенно понесшая.

Радуйся, за ревность о чистоте сердца в нечистоте жития оклеветаемая; радуйся, за зельное тела умерщвление в житии сластопитанном укоряемая.

Радуйся, от Бога единаго похвалы на суде Его желавшая; радуйся, славы токмо на небесех искавшая.

Радуйся твердое терпение во озлоблении соблюдшая; радуйся, смирением козни вражия расторгшая.

Радуйся, преподобная княгине Евфросиние.

Кондак 7

Хотяй Господь тайныя твоя в добродетелех подвиги ведомы людем соделати, попусти диаволу бурю воздвигнути на тя поношений и оклеветаний, да известно уведевше святое твое житие, прославят вси Бога, дивнаго в тайных рабех Своих, присно вопиюще Ему: Аллилуиа.

Икос 7

Новую показа добродетели высоту преподобная Евфросиния, егда, видящи чад своих злыми о ней клеветами смущаемых, призва я тайно и часть одежд пред ними откры, яко видети бе мощно тело ея, от поста и зельных подвигов изсохшее и очернелое, и плоть костем прильпнувшу; и тако смущение от сердец их отгнавши, никомуже поведати виденное повеле. Таковей преподобныя добродетели дивящеся, возопиим к ней сицевая:

Радуйся, во глубине смирения подвиги твоя от всех скрывавшая; радуйся, в широте любве чадом твоим оныя явившая.

Радуйся, очищения ради своея души, поношение безчестия терпеливо понесшая; радуйся, избавления ради чад своих от греха осуждения, чистоту жития своего показавшая.

Радуйся, обиды от людей Судии Богу предавшая; радуйся, худыя помыслы чад своих во благо исправившая.

Радуйся, во уверение истины подвиги твоя им открывшая; радуйся, во избежание славы, уста их молчанием заградившая.

Радуйся, преподобная княгине Евфросиние.

Кондак 8

Странное видение плоти твоея, яко уже умершия, зряще сынове твои и жестокое твое житие уразумевше, страхом одержими, Богу, укрепившему тя в подвизех, вопияху прилежно: Аллилуиа.

Икос 8

Весь сонм злословящих людей хотяху чада твоя наказати, егда уведаша твоего жития чистоту и уразумеша велию злобу поношающих тя; ты же, яко незлобивая, никакоже попустила еси отмстити обидящим, от Бога единаго чающи оправдания своего. Темже вопием ти, преподобная:

Радуйся, сердцем кроткая; радуйся, духом незлобивая.

Радуйся, ко обидам терпеливая; радуйся ко обидящим негневливая.

Радуйся, в терпении обид Христу Богу подобящаяся; радуйся, от Бога единаго своего оправдания ожидавшая.

Радуйся, поношение терпением победившая; радуйся, ко обидящим любовь сохранившая.

Радуйся, преподобная княгине Евфросиние.

Кондак 9

Все естество Ангельское возвеселися, егда Архистратиг Небесных Сил, предстояй Престолу Божию, послан бысть к тебе, преподобная, ко исходу душу твою уготовати, и Богу, сице благоизволившему, вопияху: Аллилуиа.

Икос 9

Витии многовещанныя не возмогут по достоянию восхвалити твое ангельское безстрастие и чистоту ока душевнаго, яко, во плоти сущи, от Архистратига Божия посещения сподобилася еси и от него извещение о исходе из сего временнаго жития прияла еси. Мы же, таковую тебе от Бога данную благодать чтуще, вопием ти, преподобная:

Радуйся, безстрастием Ангелом соревновавшая; радуйся, Архангельскаго посещения сподобльшаяся.

Радуйся, сиянием Ангельскаго света осиянная; радуйся, благоуханием святыни от Архангела облагоуханная.

Радуйся, о изшествии из мира от Господа предызвещенная; радуйся, явлением Ангельским от всего земнаго отрешенная.

Радуйся, яко Архистратиг Божий явлением своим князя воздушных мытарств от тебе далече отгна; радуйся, яко своим благодатным посещением победу на диавола тебе дарова.

Радуйся, преподобная княгине Евфросиние.

Кондак 10

Спасти хотящи душу твою, преподобная, егда от Ангела весть о скором от жития сего исходе прияла еси, внити в созданную тобою обитель ускорила еси, да тамо в безмолвии работающи Богу, воспеваеши Ему: Аллилуиа.

Икос 10

Стена еси твердая и ограждение необоримое обители, тобою созданней, преподобная, еже и яви Господь, еще грядущей тебе во обитель: многи бо на пути недужныя исцелила еси и во обитель вошла еси не яко новоначальная, но яко славная чудотворица. Темже, прославляюще тя, вопием ти, преподобная:

Радуйся, явлением твоим слепцу исцеление обещавшая; радуйся, прикосновением ризы зрение тому подавшая.

Радуйся, болящих в житии твоем нужным снабдевавшая; радуйся, тридесяти недужным при вхождении во обитель исцеление даровавшая.

Радуйся, во обитель шедшая по смирению, яко новоначальная; радуйся, в тую вшедшая по благодати Божией, яко чудотворица прехвальная.

Радуйся, благодать Божию с собою во обитель вводящая; радуйся, вхождением своим украшение святолепное ей преподавшая.

Радуйся, преподобная княгине Евфросиние.

Кондак 11

Пение всеумиленное принесла еси, преподобная, благодарственная восписующи Господу, сподобльшему тя иноческое пострижение прияти, к нему же во всем житии душу твою предуготовляла еси, да мира сего отлучившися и ничимже земным смущаема, вопиеши Богу: Аллилуиа.

Икос 11

Светозарная свеща иночествующим показася житие твое во обители, преподобная: аще бо и не многи дни во иночестве пожила еси, обаче всякия иноческия добродетели образ преизящный в себе явила еси. Темже, восхваляюще тя, сицевая вопием ти, преподобная:

Радуйся, вольнаго мира оставления преизящная наставнице; радуйся, правило усерднаго за вся люди моления.

Радуйся, совершеннаго своей воли отсечения премудрое наставление; радуйся, душевныя и телесныя чистоты светило изрядное.

Радуйся, умерщвления плоти образе преизящный; радуйся, мирнаго купножития наставнице.

Радуйся, умныя к Богу молитвы образе; радуйся, святаго на земли жития зерцало.

Радуйся, преподобная княгине Евфросиние.

Кондак 12

Благодати исполнена и благих дел, яко добре течение земное совершившая, в мире преставилася еси от земных к небесным, идеже веселящися предстоиши Господу и вопиеши Ему: Аллилуиа.

Икос 12

Поюще твоя многообразная людем благодеяния, восхваляем тя вси, преподобная мати Евфросиние, независтно подающую исцеления с верою к тебе прибегающим и вопиющим ти:

Радуйся, яко на небесех ныне пред Господем предстоиши; радуйся, яко о людех пред Богом выну предстательствуеши.

Радуйся, града твоего крепкое ограждение; радуйся, обители твоея незыблемое утверждение.

Радуйся, о благом преспеянии иночествующих тепле молящаяся; радуйся, о утверждении добре живущих в мире Бога просящая.

Радуйся, чтущих память твою пред Богом поминающая; радуйся, о прославляющих тя Бога молящая.

Радуйся, преподобная княгине Евфросиние.

Кондак 13

О, прехвальная угоднице Божия, преподобная княгине Евфросиние! Приими смиренное сие хваление наше и твоим теплым предстательством у Царя Славы испроси нам в немощех исцеление, в добродетелех преспеяние, от врагов видимых и невидимых избавление, от вечныя муки свобождение и Царства Небеснаго наследие, да с тобою присно поем Богу: Аллилуиа.

Этот кондак читается трижды, затем читается 1-й икос: «Ангельское воистину...» и 1-й кондак: «Избранной от рода державного...».

Молитва

О, преподобная княгине Евфросиние, добляя в женах подвижнице, прехвальная угоднице Христова! Приими моление о нас, недостоиных, с верою и любовию к тебе припадающих, и теплым к Богу ходатайством испроси граду Москве и людем от бед и напастей сохранение, споспешествуй, яко чадолюбивая мати, чадом, тобою собранным, понести иго Христово во благодушии и терпении и добре подвизатися ко исправлению жития своего, еже ко спасению; в мире благочестно живущим испроси у Господа в вере твердость, во благочестии преспеяние и всем, с верою прибегающим к тебе и твоея просящим помощи и заступления, подавай всегда недугов исцеление, в скорбех утешение и во всем житии благопоспешение, наипаче же умоли Господа в мире и покаянии земное житие преити нам, мытарств горьких и мук вечных избавится и Царство Небесное твоим ходатайством получити, идеже ты со всеми святыми Господу предстоиши, да всегда славим Отца и Сына и Святаго Духа, ныне и в безконечныя веки веков. Аминь.

Песнь 1

Ирмос: Яко по суху, пешешествовав Израиль, по бездне стопами, гонителя фараона видя потопляема, Богу победную песнь поим, вопияше.

Моего разума омрачение твоими молитвами отжени, преподобная Евфросиние, да восхвалю славную и светоносную твою память, поя Божественную песнь.

Яко река многоводная, ты, славная Евфросиние, благодати Божественными струями, напоила еси верных сонмы, вопиющия Богу песнь победную.

Божественными сияньми душу твою озаривши, сладострастие плоти попалила еси воздержанием крайним, воспевающи Христу Богу песнь победную.

Богородичен: Светлыми лучами Твоего Сына, Богородице, просвети омраченную мою душу, страстей смущение отжени, Твоими, Чистая, ходатайствы.

Песнь 3

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Исполншися, мудрая мати Евфросиние, Божественнаго Духа, дом явилася еси Его и, чад твоих по плоти оставльши и Богу прилепившися, Тому воспевала еси: несть свят, паче Тебе, Господи.

От повеления Божественнаго явлься тебе, Архистратиг Михаил осия тя лучами света Небеснаго и удержа язык твой, да известно сотворит всем явление свое тебе.

На гору высокую добродетелей возжелавши внити, преподобная, по явлении тебе Архистратига оставила еси временную княжения славу и, в созданную тобою обитель уклоншися, Христу Богу воспела еси: Ты еси Сын Божий, Избавитель мира.

Богородичен: Се лествица, юже виде иногда Иаков утверждену на земли, на нейже утверждашеся Бог, Светоносная Пречистая Богородица, Приснодевствующая.

Седален

Явилася еси, преподобная Евфросиние, во граде Москве, яко солнце иное, озаряющи верных лучами чудес твоих и исцеления подающи всем, с верою приходящим к тебе и вопиющим ти: радуйся, в мире благочестно живущих похвало и монашествующих удобрение.

Песнь 4

Ирмос: Христос моя сила, Бог и Господь, честная Церковь боголепно поет, взывающи, от смысла чиста о Господе празднующи.

Постом и молитвою, преподобная Евфросиние, себе очистивши, вся света исполнилася еси и дом Святаго Духа показалася еси.

Бдении и пощением, будущаго ради воздаяния, люте плоть твою умерщвляла еси, блаженная Евфросиние, и ныне чисте зриши Святую Троицу.

Облистаема славою красных жития твоего исправлений, явилася еси, яко меч обоюду острый, ссекающий демонская ухищрения, Божественною силою укрепляема.

Богородичен: Светильник всесветлый, Божественная трапеза, Божие селение, кивот и жезл процветший миру Ты показалася еси, Мати Дево.

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Светоподательными благодати блистаньми, осиявай вся ны, преподобная мати, и тьму отжени искушений и греховнаго омрачения.

Тебе вси заступницу имамы, преподобная мати наша Евфросиние: не престай убо о нас молити Господа, да не лишени будем Чертога Его Небеснаго.

Яко звезда светозарная, показалася еси, мати Евфросиние, блуждающих во мраце путеводящая, во искушениих и вражиих наветех скорая и надежная помощница.

Богородичен: Доброта Иаковля, Юже возлюби Бог и в Нюже вселитися изволи Слово Божие, земных слава и грешных прибежище Ты еси, Богородице Чистая.

Песнь 6

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Возсиявши, яко солнце, богосиянными лучами, преподобная Евфросиние, струи изливаеши исцелений всем, похваляющим твоя постническия труды и дивныя подвиги.

Ублажаем и чтим твою память святую и молим тя присно: помяни и нас, мати Евфросиние, у Престола всех Царя.

Егда токмо узрела еси, преподобная Евфросиние, третицею написанный образ явльшагося тебе Архистратига, и абие разрешишася узы языка твоего, и прославила еси Господа, творящаго дивная чудеса.

Богородичен: Вся хотением составивый Бог и содержай всяческая словом, Твоима рукама держится, Пречистая, Иже Божественным Существом неописанный.

Кондак, глас 2

Вся красная мира сего, яко суетная, презревши и тело твое постом и бдением изнуривши, непрестанными молитвами Богу угодила еси, преподобная Евфросиние, и, дар исцелений от Него прияти сподобльшися, слепому прозрение и многим недужным исцеление даровала еси. Темже радостно взываем, глаголюще: слава Богу, прославляющему святыя Своя.

Икос

Приидите, постническое сословие и чистоты усерднии хранителие, песньми духовными воспоим преподобную Евфросинию, красоты мира сего возненавидевшую, временную княжения славу оставльшую, во обители, ею созданней, образ монашествующим показавшую, многими бдении и постом тело свое удручившую, и многих ради подвигов еще в житии сем дар исцелений от Бога приявшую, и по смерти исцеления неоскудно источающую всем, с верою приходящим к честней раце мощей ея. Темже радостно взываем, глаголюще: слава Богу, прославляющему святыя Своя.

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.

Евангельским словесем внемлющи, крест свой на рамена твоя восприяла еси и Христу последовала еси, преподобная Евфросиние, Тому непрестанно взывающи: благословен еси, Боже отец наших.

Доброты тлеющия, Евфросиние, небрегла еси, будущаго чающи воздаяния, и прияла еси славу нестареющую Небеснаго блаженства и веселия вечнаго. Токи чудес изливаеши, и подаеши исцеления телесных болезней, и души исполняеши Божественнаго веселия верою почитающих святую память твою.

Богородичен: Велие содеяся на Тебе таинство, Дево Мати: Сын Божий из Тебе воплотися и Человек бысть. Емуже, веселящеся, поем: благословен еси, Боже отец наших.

Песнь 8

Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

В законе Божием часто поучающися и в заповедех Божиих безпорочно ходящи, дом Духа Святаго была еси, блаженная Евфросиние. Темже по смерти твоей не отлучи тебе Господь лика преподобных, с ними же ныне Богу поеши: Превозносимый во веки Боже, благословен еси.

Кротостию ко всем землю кротких наследовала еси, нищелюбием и милостынями помилование от Бога улучила еси, чистотою сердца и целомудрием Бога зрети сподобилася еси, Емуже со всеми святыми поеши: Превозносимый во веки Боже, благословен еси.

Ум твой к Богу часто возводящи и доброту вечнаго покоя смотряющи, плотския страсти духу покорила еси и, иноческим образом украсившися, вечное блаженство улучила еси, поющи Христа во веки.

Богородичен: Божия и несекомая гора явилася еси, Дево, от неяже отсечеся камень краеугольный—Христос, Иже сокруши крепость идольскую и двери отверзе Царствия Небеснаго.

Песнь 9

Ирмос: Бога человеком невозможно видети, на Негоже не смеют чини Ангельстии взирати; Тобою бо, Всечистая, явися человеком Слово воплощенно, Егоже величающе, с Небесными вои Тя ублажаем.

Не терпя лукавый враг твоих всенощных бдений и зельнаго воздержания, славы же земныя и красных мира сего презрения, клеветами и злоречием возмути душу чад твоих со служители их, ты же, преподобная, Бога ради поношения клеветы с терпением велиим понесла еси, Богу себе вручающи.

Егда крайнее измождение тела твоего обличила еси пред чады твоими, клеветы всячески клеветником отмщати воспретила еси, Богу себе предающи, Иже и прослави тя чудес дарований, блаженная Евфросиние.

Твоих подвигов прияла еси венцы и ныне с преподобных лики на Небесех присно радуешися, поминай убо и нас, преподобная мати Евфросиние, да молитвами твоими сподобимся улучити Небеснаго Царствия.

Богородичен: Пособствуеши верным во бранех, Пресвятая Владычице, темже и стране нашей на вся сопротивныя даждь победы, да Тя выну величаем.

Светилен

Избегла еси козней врага исконнаго, возгнушавшися всея его и мира сего прелести, и прешла еси в Небесныя чертоги, идеже ныне ликуеши со всеми преподобными.