Кондак 1

Возбранный воине Христов и боголюбче дивный, преподобне отче Серафиме, веры Православныя посреде мира безбожнаго светильниче и земли Российския благодатный заступниче, чудный образ спасения во дни последния показавый, деланием сокровенным и глубоким смирением Царствие Небесное стяжавый. К твоему благопотребному предстательству ныне прибегающе пение хвалебное приносим ти от сердец наших, любовию зовуще: Радуйся, преподобне Серафиме, Вырицкий чудотворче.

Икос 1

Ангелоподобную красоту души имел еси, светоносне отче, сердцем пламенея ко Господу Сил, и Тому единому в иночестем чине служити от юности восхотел еси, но, отвергнув человеческое мудрование, истинное послушание Творцу своему явил еси. Темже промышлению Божию о тебе дивящеся, с верою зовем ти: Радуйся, благочестивых родителей достойный сыне; радуйся, воспитанный в милосердии и трудех. Радуйся, измлада всею душею Господа возлюбивый; радуйся, Истиною просвещенный с юных лет. Радуйся, службы церковныя благоговейный любителю; радуйся мира духовнаго умиленный тайнозрителю. Радуйся, молитвы чистыя кадило благовонное; радуйся, имеяй сердце, всецело Богу устремленное. Радуйся, отроком дом отеческий покинувый и кормильцем семьи ставый; радуйся, столицы северныя отринувый соблазны. Радуйся, схимнику лаврскому желание сердца своего поведавый; радуйся, от него волю Божию о себе познавый. Радуйся, преподобне Серафиме, Вырицкий чудотворче.

Кондак 2

Видя Господа пред собою выну, и на милость Его уповая, браком законным по заповеди старчестей сочетался еси, блаженне отче, чистоту душевую и телесную усердно соблюдая. Вкупе же с благословенною супругою мысли о скоротечности жизни сея имевый, возрастал еси во всякой добродетели, непрестанно поя Господеви: Аллилуиа.

Икос 2

Разум недоумевает, отче Серафиме, како выразите во словесех веру твою и любовь ко Господу, испытующему люди Своя. Поистине праведному Аврааму подобен еси, он бо николиже усомняшеся в благости Отца Небеснаго, такоже и ты полное доверие к Богу в душе своей питал еси. Сего ради глаголем ти сицевая: Радуйся, обетований непреложных восприятие сердечное; радуйся, веры непоколебимый явление многочудесное. Радуйся, свидений Божиих хранение самозабвенное; радуйся, исполненный за вся благодарения. Радуйся, бояйся Господа и помняй заповеди Его; радуйся, на всяк день поучавыйся правде Его. Радуйся, душу свою в терпении стяжавый; радуйся, Царствия Божия прежде всего искавый. Радуйся, главо союза во Христе единодушнаго; радуйся, образе целомудрия и воздержания супружескаго. Радуйся, кротости и тихаго нрава любомудрый носителю; радуйся, истиннаго благочестия усердный ревнителю. Радуйся, преподобне Серафиме, Вырицкий чудотворче.

Кондак 3

Силою Вышняго укрепляемый и советами духоноснаго старца Варнавы Гефсиманскаго наставляемый, поприще купеческое с деланием внутренним умело сопрягал еси, праведне отче, и делами милосердия, Христа ради творимыми, благословение Божие снискал еси. Покрый убо нас, обнаженных от всякаго дела блага, любовию твоею, да восхвалим купно милостиваго Бога: Аллилуиа.

Икос 3

Имея сострадание сердечное, нуждающимся помогал еси и скорбящих утешал еси, больных и сирых всячески упокоевал еси, милостиве отче, темже славу Евангелия Христова устнами благодарных тебе приумножал еси. Приими и от нас недостойных благодарственную песнь сию: Радуйся, скорый помощниче всем в бедах сущим; радуйся, щедрый подателю неимущим. Радуйся, храмов и обителей тайный благотворителю; радуйся, слабых и убогих доброхотный попечителю. Радуйся, сословия купеческаго украшение; радуйся, неуклонный последователю Евангельскаго учения. Радуйся, образ и подобие Божие в ближнем возлюбивый; радуйся, яко Самому Христу всякому человеку послуживый. Радуйся, пагубное самолюбие из сердца своего изгнавый; радуйся, богатство тленное ни во чтоже вменивый. Радуйся, суетных пристрастий свободивыйся; радуйся, веру делами любве утвердивый, Радуйся, преподобне Серафиме, Вырицкий чудотворче.

Кондак 4

Бури богоборчества, властьми самозванными в России воздвигнутаго, не убоялся еси, богоносне отче, но благодатное время исповедничества познав, потщился еси всех видимых благ отрицатися, во еже совершенным учеником Господа нарицатися, и Ему всецело ся предав, радостно вопияше: Аллилуиа.

Икос 4

Слыша о лютых гонениих и тяжких страданиих, верными за имя Христово претерпеваемых, вслед за апостолом помышляше, премудре: кто разлучит ны от любве Божия? Ибо благоугодно Господу есть крестом избранных Своих спасти. Вемы же, отче, яко любящим Бога вся поспешествуют во благое, молим тя и нам многогрешным душеполезное от Господа испросити, да согласно поем ти: Радуйся, веру православную мужественно исповедавый; радуйся, даже до смерти за Христа пострадати хотевый. Радуйся, Царя и Отечество в трудную годину не предавый; радуйся, безмятежную жизнь на чужбине презревый. Радуйся, чаяний заветных сбытие улучивый; радуйся, Христа ради с женою разлучивыйся. Радуйся, имение свое по слову Господа раздавый; радуйся, за Возлюбленным тобою и тя Возлюбившим последовавый. Радуйся, злато, в горниле искушений очищенное; радуйся, древо, при источниках вод живых насажденное. Радуйся, скорби и испытания в богатство духа обративый; радуйся, сокровенным подвигом в миру к монашеству себе приуготовивый. Радуйся, преподобне Серафиме, Вырицкий чудотворче.

Кондак 5

Богосветлую звезду яви тя Господь в Лавре Александро-Невстей, преподобне отче, егда ко ангельскому чину благодать священства восприяв, души многих скорбящих и во мраце отчаяния пребывающих духом укрепил еси и светом Истины озарил еси, научая премудрым судом Божиим покорятися и среди горькаго лихолетия непоколебимо пети: Аллилуиа.

Икос 5

Видевше братия и священноначалие исправное монашеское житие твое, отче, и послушания многотрудная, тобою носимая, паче же смирения глубину, мир и радость о Господе, разумели суть плоды Духа Свята, в тебе обильно прозябшыя. Темже и мы, зряще духовное восхождение твое от силы в силу, тако с благоговением взываем ти: Радуйся, плоть свою со страстьми и похотьми самоотвержением распявый; радуйся скверну греховную ветхаго Адама покаянием омывый. Радуйся, благодатную силу смирения познавый; радуйся, деланием заповедей Евангельских внутренняго человека обновивый. Радуйся, имя Иисуса сладчайшаго непрестанно сердцем призывавый; радуйся, в живое общение с Господом вступивый. Радуйся, мир Христов, превосходяй всяк ум, наитием Духа Божия получивый; радуйся, на земли блаженство будущаго века вкусивый. Радуйся, Богу и ближним нелицемерно служивый; радуйся, пред престолом Вышняго за вся люди слезно воздыхавый. Радуйся, Жертву безкровную со страхом и трептом совершавый; радуйся, словом мудрым всех притекающих к тебе питавый. Радуйся, преподобне Серафиме, Вырицкий чудотворце.

Кондак 6

Совершенную любовь яко венец добродетелей, яко дар Святаго Духа приемый и душу свою за ближних положите готовый, немощи немощных подъял еси, духоносне отче, и ко спасению мнози души управил еси. Твоим боголюбезным предстательством и мы, грешнии, недугов многоразличных исцелевше и веру крепкую обретше, благодарственно вопием Господу: Аллилуиа.

Икос 6

Возсия в лице твоем правда Божия и отгнася прелесть сатанинская, егда лукавии раскольники со престолов своих яко идоли падоша и Лавра ига обновленческаго свободися, иноцы же вси возвеселишася. Сего ради просим тя, миротворче, раздоры и нестроения живота нашего утолити, неправды разорити, да в единодушии глаголем ти: Радуйся, Божественныя Троицы Избранниче; радуйся, Трисолнечнаго света причастниче. Радуйся, радостию совершенных возрадованный; радуйся, милостию ко всякому богатый. Радуйся, храме нерукотворенный Христа Бога нашего; радуйся, щедротами Духа Святаго благолепно украшенный. Радуйся, жертвенник в сердце своем соделавый; радуйся, фимиам молитвы Господу пред ним возносивый. Радуйся, о заблуждающихся зело душею болезновавый; радуйся, всем спастися и в разум истины прийти желавый. Радуйся, гордость, и злобу нечестивых смирением и кротостию победивый; радуйся, христоподражательно любити враги своя учивый. Радуйся, преподобне Серафиме, Вырицкий чудотворче.

Кондак 7

Хотяху боголюбивии архипастырие тебе духовником Лавры избрати, темже подвигоша тя, старче, великаго ангельскаго образа всем сердцем взыскати, душа бо твоя чистая огнем пламенныя молитвы за весь мир воспылала есть, и великую схиму яко печать совершенства от Бога прияв, с трепетом вопияше Ему: Аллилуиа.

Икос 7

В дивном пророческом сне на заре подвижничества твоего, преблаженне, указа ти Господь путеводителя и покровителя Своего, печальника земли Российския, преподобнаго Серафима Саровскаго; егоже именем в схиме нареченный, ты воистинну новым утешителем народу русскому явился еси. Сему благоволению Божию чудящеся, с надеждою поем ти: Радуйся, опытный воине Христова ополчения; радуйся, мрачных бесов горестное посрамление. Радуйся, в куколь смирения и младенческаго незлобия облеченный; радуйся, духовною молитвою на мысленных супостатов вооруженный. Радуйся, к Богу о всех молитвенниче дерзновенный; радуйся, Владычицы Державныя угодниче любезный. Радуйся, духоносных отец сподвижниче; радуйся, ангелов приятный собеседниче. Радуйся, правоверных благодатное заступление; радуйся, блуждающих во тьме безбожия светозарное наставление. Радуйся, грешников с Богом покаянное примирение; радуйся, источниче радости и умиления. Радуйся, преподобне Серафиме, Вырицкий чудотворче.

Кондак 8

Странно и неудобоприятельно суетному миру слышати, како молитвами твоими, чудотворче, богатство милосердия Божия изливается на всех, с верою притекающих к твоему небесному покровительству. Мы же, славяще Троицу Святую, Давшую та благодать сию, радостно восклицаем: Аллилуиа.

Икос 8

Всего себе на старческое служение людем предал еси, но и духовных высот никакоже отступил еси, дивный отче, такожде чадом своим заповедал еси, о горнем всегда помышляти и молитву Иисусову, яко благое средство спасения, усердно стяжати, еюже всякий грех в душе посекается и дух человека с Духом Божиим соединяется. Под твое пречудное благословение прибегающе, доброхвально величаем тя: Радуйся, горнего Иерусалима жителю; радуйся, неизреченныя славы Спасителя мира созерцателю. Радуйся, Богом управляемая душевная колеснице; радуйся, Духа Утешителя сердечное вместилище. Радуйся, от райских обителей в юдоль плачевную нисходяй; радуйся, молитвы наша к стопам Вседержителя и Богородицы приносяй. Радуйся, якоже отец чадолюбивый просящим полезная подаяй; радуйся, яко мати нежная, в скорби утешаяй. Радуйся, Церкве Христовы назидание; радуйся, неисцелимых болезней безмездное врачевание. Радуйся, будущих судеб чудесное прозрение; радуйся, настоящих обстояний скорое избавление. Радуйся, преподобне Серафиме, Вырицкий чудотворче.

Кондак 9

Все силы небесные удивишася премудрому смотрению о тебе Вышняго, старче, мучительным бо тя недугом зряще пораженнаго, обаче промыслительно от рук безжалостных гонителей из Лавры восхищеннаго. Людие же вернии видевше тя чудно под кровом Богородицы в Вырице хранимаго, воспеваху Человеколюбца Господа: Аллилуиа.

Икос 9

Витийство человеческое умолкает пред величием подвигов твоих, преподобне, како убо старец немощный по плоти сый, и таковая творити возмогл еси; но поелику имамы богобоязненное произволение, тако благодерзостне взываем ти: Радуйся, древних пустынников искусный подражателю; радуйся, постнического жития их усердный любителю. Радуйся, молитвенных бдений неусыпный ревнителю; радуйся, внутренняго безмолвия и тишины ума хранителю. Радуйся, Божественною любовию в сердце уязвленный; радуйся, неутолимым стремлением ко Господу распаленный. Радуйся, познание небесных тайн приявый; радуйся, от духовных дарований паче прежняго в собственном мнении обнищавый. Радуйся, истинным смирением добродетели своя покрывый; радуйся, плачем покаянным плоды Божия благодати умноживый. Радуйся, яко дева мудрая, елей радости трезвением сохранивый; радуйся, яко невеста добрая, духовному Жениху Христу вполне благоугодивый. Радуйся, преподобне Серафиме, Вырицкий чудотворче.

Кондак 10

Спасти Русь святую от полчищ немецких Единаго Спасителя умолил еси, боголюбче дивный: «Иисусе Христе, Сыне Божий, помилуй мя грешнаго и мир Твой», тако со умилением сердечным к Богу взывал еси, и сего ради старцу Саровскому подражая, новый подвиг молитвеннаго стояния на камне подъял еси. Темже тя укрепившаго в брани Господа славим, победную песнь поюще Ему: Аллилуиа.

Икос 10

Стена бе незримая люте страждущим от войны, молитвенниче тепле, и неизсякаемыя надежды источниче, победу бо российскаго оружия пророчествовал еси и разумом духовным смысл попущенных Богом скорбей постигая, возвратитися ко Христу народ некогда Божий призывал еси. Темже соблюди и нас неразумных от всякия вещи сопротивныя, вопиющих таковая: Радуйся, чашу страданий с Отечеством земным до конца испивый; радуйся, о помиловании России Господа просивый. Радуйся, мученичество безкровное волею претерпевый; радуйся, немощи естества человеческаго презревый. Радуйся, столпе непоколебимый Православия; радуйся, пламенный проповедниче веры и покаяния. Радуйся, крепосте неприступная, неприятеля устрашающая; радуйся, надеждо несумненная, верных окриляющая. Радуйся, земли Российския молитвенное ограждение; радуйся, от враг видимых и невидимых досточудное избавление. Радуйся, воинству христолюбивому Богом дарованное поможение; радуйся, душ и телес наших живительное орошение. Радуйся, преподобне Серафиме, Вырицкий чудотворче.

Кондак 11

Пение коленопреклоненное приносим ти, преподобне отче, ублажающе многотрудное земное житие твое, ты же не преставай молитися за ны ко Господу, да дарует нам грехов оставление, страстей же одоление, во всяцей добродетели утверждение и мира душевнаго сохранение и сподобит нас недостойных вкупе с тобою во Царствии Небеснем благодарственная восклицати: Аллилуиа.

Икос 11

Светозарнаго провозвестника сущим во тьме безбожия зрим тя, всеблаженне отче, духовное бо возрождение России провидел еси и, к сыновом сынов с отеческою любовию обращаяся, твердо веры Православныя держатися завещал еси. Мы же, словесы твоими просвещаеми, со слезами умиления взываем ти: Радуйся, Божественнаго Солнца луче; радуйся, духовнаго пробуждения заре. Радуйся, звездо путеводительная в Царствие Небесное; радуйся, светлый облаче, покрываяй жаждущих спасения. Радуйся, росо благодатная, пажить греховную утоляющая; радуйся, радуго многоцветная, сердца наша веселием исполняющая. Радуйся, свет мира, имже мнози человецы просвещаются; радуйся, молние огнезрачная, еюже козни вражия разрушаются. Радуйся, чистоты сердечныя зерцало; радуйся, совершенства христианскаго красото. Радуйся, преподобне Серафиме, Вырицкий чудотворче.

Кондак 12

Блаженную кончину течения твоего, богомудре отче, молением благоговейным ко Всемилостивей Владычице мира предварил еси, Та бо явственне посетивши тя во славе Своей, отшествие близкое на небо десницею указа тебе. Киими похвалами нам грешным достойно венчати тя, Царицы Небесе и земли избранниче, ныне со лики ангельскими воспевающа: Аллилуиа.

Икос 12

Поюще дивнаго во святых Своих Бога, веруем вседушно, яко много может молитва праведнаго ко благосердию Владыки, и сего ради просим тя, приснопамятный отче Серафиме, буди о нас ходатаем теплым у престола Пресвятыя Троицы, вопиющих ти сице: Радуйся, пламенным серафимом тезоименитый; радуйся, старчества духоноснаго восприемниче великий. Радуйся, нивы Христовы неустанный возделателю; радуйся, мира Божия в души человеческия насадителю. Радуйся, сокровище благодати неистощимое; радуйся, милости глубинно неизмеримая: Радуйся, чудотворений тонкое благоухание; радуйся, желаний Божественных исполнение. Радуйся, Русския Православныя Церкве новое украшение; радуйся, велие к Богу, прославльшему тя, за Русь многострадальную дерзновение. Радуйся, рода христианскаго благомощное заступление; радуйся, почитающим тебе ходатаю вечнаго спасения. Радуйся, преподобне Серафиме, Вырицкий чудотворче.

Кондак 13

О, преславный и досточудный угодниче Божий Серафиме, приими усердное сие моление наше, от любве душевныя тебе возносимое, и умоли Всеблагаго и Всемилостиваго Господа избавитися нам всякаго зла и напасти, да благочестие в веце нынешнем поживем и блаженство живота вечнаго молитвами твоими обрящем, о тебе же благодарственно воспевающе Господеви: Аллилуиа.

(Этот кондак читается трижды, затем икос 1 и кондак 1) 

Молитва преподобному отцу нашему Серафиму, Вырицкому чудотворцу

О, богоблаженный и премилосердый отче наш Серафиме! Ведуще тя и по смерти яко живаго суща, с верою припадаем ти и вопием: не забуди убогих твоих до конца, но милостивно призри на стадо твое духовное и упаси е, добрый пастырю, благоприятными твоими к Богу молитвами. Испроси нам от Господа время на покаяние и греховныя жизни исправление, веси бо вся немощи наша душевныя: не имамы дел веры и спасения, не имамы ревности ко истинному богоугождению, пленихомся умом в погубительных страстех, растлехом сердца во гнусных похотех. Что убо чаем, и на что надеемся, неключимии, разоривше храмины душ наших? Ей, святый отче, простри молитвенно руце твои ко Господу и умоли Спасителя рода человеческаго коснутися благодатию окаменелых сердец наших, омыти нас слезами покаяния, возставити в вере, укрепити во благочестии и вся полезная ко спасению даровати. Не посрами упования нашего, еже по Бозе и Богородице на тя возлагаем, но буди нам скорый помощник, утешитель в скорбех и покровитель во обстояниях, да сподобимся молитвами твоими наследником быти Царствия Небеснаго, идеже вси святии непрестанно славят и воспевают Пречестное и Великолепое Имя Отца и Сына и Святаго Духа, ныне и присно и во веки веков. Аминь.

Текст утвержден Священным Синодом
Русской Православной Церкви
19 марта 2014 года
(журнал № 16)

Конда́к 1

Подо́бен: Взбра́нной Воево́де:

Избра́нный уго́дниче Христо́в, преподо́бне о́тче Серафи́ме,

ве́ры правосла́вныя свети́льниче и земли́ Росси́йския благода́тный засту́пниче,

чу́дный о́браз спасе́ния нам яви́вый,

де́ланием сокрове́нным Ца́рство Небе́сное стяжа́вый,

к твоему́ предста́тельству ны́не притека́юще,

пе́ние хвале́бное прино́сим ти, любо́вию зову́ще:

Ра́дуйся, преподо́бне о́тче Серафи́ме, Вы́рицкий чудотво́рче.

И́кос 1

Ангелоподо́бную красоту́ души́ име́л еси́, преподо́бне о́тче, се́рдцем пламене́я ко Го́споду Сил, и Тому́ еди́ному служи́ти от ю́ности восхоте́л еси́, и послуша́ние и́стинное Творцу́ своему́ яви́л еси́. Те́мже промышле́нию Бо́жию о тебе́ дивя́щеся, с ве́рою зове́м ти:

Ра́дуйся, благочести́вых роди́телей о́троче досто́йный;

ра́дуйся, измла́да все́ю душе́ю Го́спода возлюби́вый.

Ра́дуйся, слу́жбы церко́вныя благогове́йный ревни́телю;

ра́дуйся, ми́ра духо́внаго умиле́нный созерца́телю.

Ра́дуйся, моли́твы чи́стыя соверши́телю усе́рдный;

ра́дуйся, се́рдцем сокруше́нным всеце́ло к Бо́гу устремле́нный.

Ра́дуйся, схи́мнику ла́врскому жела́ние се́рдца своего́ пове́давый;

ра́дуйся, от него́ во́лю Бо́жию о себе́ позна́вый.

Ра́дуйся, преподо́бне о́тче Серафи́ме, Вы́рицкий чудотво́рче.

Конда́к 2

Ви́дя Го́спода очесы́ духо́вными и на ми́лость Его́ упова́я, бра́ком зако́нным сочета́лся еси́, блаже́нне о́тче, чистоту́ душе́вную и теле́сную усе́рдно соблюда́я. Вку́пе же с супру́жницею свое́ю возраста́л еси́ во вся́кой доброде́тели, непреста́нно поя́ Го́сподеви: Аллилу́ия.

И́кос 2

Ра́зум наш недоумева́ет, о́тче Серафи́ме, ка́ко словесы́ изъясни́ти ве́ру и любо́вь твою́ ко Го́споду, николи́же бо усумне́лся еси́ во бла́гости Отца́ Небе́снаго и всеце́лое дове́рие к Бо́гу в души́ твое́й пита́л еси́. Сего́ ра́ди глаго́лем ти сицева́я:

Ра́дуйся, о́бразе ве́ры непоколеби́мыя;

ра́дуйся, испо́лненный кро́тости духо́вныя.

Ра́дуйся, боя́выйся Го́спода и храни́вый за́поведи Его́;

ра́дуйся, на всяк день поуча́выйся в пра́вде Его́.

Ра́дуйся, ду́шу твою́ в терпе́нии стяжа́вый;

ра́дуйся, Ца́рствия Бо́жия па́че всего́ иска́вый.

Ра́дуйся, целому́дрия и воздержа́ния супру́жескаго храни́телю;

ра́дуйся, ти́хаго нра́ва любому́дрый носи́телю.

Ра́дуйся, преподо́бне о́тче Серафи́ме, Вы́рицкий чудотво́рче.

Конда́к 3

Си́лою Вы́шняго укрепля́ем, по́прище мирско́е с де́ланием вну́тренним му́дро сочета́л еси́, пра́ведне о́тче, и дела́ми милосе́рдия, Христа́ ра́ди твори́мыми, благослове́ние Бо́жие сниска́л еси́. Покры́й у́бо и нас, обнаже́нных вся́каго де́ла бла́га, любо́вию твое́ю, да восхва́лим ми́лостиваго Бо́га: Аллилу́ия.

И́кос 3

Име́я сострада́ние, ми́лостиве о́тче, скорбя́щих укрепля́л еси́, больны́х и си́рых утеша́л еси́, те́мже и любо́вь Христо́ву стяжа́л еси́. Приими́ и от нас благода́рственную песнь сию́:

Ра́дуйся, ско́рый помо́щниче в беда́х су́щим;

ра́дуйся, ще́дрый пода́телю прося́щим.

Ра́дуйся, хра́мов и оби́телей благотвори́телю;

ра́дуйся, немощны́х и убо́гих попечи́телю.

Ра́дуйся, я́коже Самому́ Христу́, бли́жнему послужи́вый;

ра́дуйся, бога́тство тле́нное ни во что́же вмени́вый.

Ра́дуйся, земны́х пристра́стий свободи́выйся;

ра́дуйся, ве́рою и до́брыми де́лы утверди́выйся.

Ра́дуйся, преподо́бне о́тче Серафи́ме, Вы́рицкий чудотво́рче.

Конда́к 4

Бу́ри богобо́рческия, в Росси́и воздви́гнутыя, не устраши́лся еси́, богоно́сне о́тче, но по́двиг испове́дничества подъе́м, му́жеством вооружи́лся еси́ во е́же соверше́нный учени́к Госпо́день нарица́тися, и Ему́ всеце́ло себе́ преда́в, ра́достно воспева́л еси́: Аллилу́ия.

И́кос 4

Слы́шав о тя́жких страда́ниях, ве́рными за и́мя Христо́во претерпева́емых, со апо́столом вопроша́л еси́: кто ны разлучи́т от любве́ Бо́жия? Ве́дуще же вои́стину, о́тче, я́ко лю́бящим Бо́га вся поспешеству́ют во благо́е, мо́лим тя: и нам многогре́шным душеполе́зная от Го́спода испроси́, да согла́сно пое́м ти:

Ра́дуйся, ве́ру правосла́вную му́жественно испове́давый;

ра́дуйся, да́же до сме́рти за Христа́ постра́дати возжела́вый.

Ра́дуйся, име́ние твое́ по словеси́ Госпо́дню разда́вый;

ра́дуйся, за Возлю́бленным тобо́ю и Возлю́бльшим тя после́довавый.

Ра́дуйся, зла́то, в горни́ле искуше́ний очище́нное;

ра́дуйся, дре́во, при исто́чницех вод живы́х насажде́нное.

Ра́дуйся, ско́рби и испыта́ния в бога́тство ду́ха обрати́вый;

ра́дуйся, сокрове́нным по́двигом ко и́ночеству себе́ предугото́вавый.

Ра́дуйся, преподо́бне о́тче Серафи́ме, Вы́рицкий чудотво́рче.

Конда́к 5

Богоуго́дне в честне́м бра́це пожи́вше, восхоте́сте вы с супру́жницею в ли́це а́нгельстем Спаси́телю послужи́ти, и та́ко во еди́н день восприя́ли есте́ постриже́ние мона́шеское. Егда́ же восприя́л еси́ благода́ть свяще́нства в ла́вре Алекса́ндро-Не́встей, тогда́ я́ко звезду́ све́тлую яви́ тя Госпо́дь лю́дем, во мра́це ско́рби и отча́яния пребыва́ющим, е́же сих укрепля́ти и све́том и́стины их озаря́ти, Бо́гу же пе́ти: Аллилу́ия.

И́кос 5

Ви́деша бра́тия, я́ко потща́вся вседу́шно Бо́гу благоугоди́ти, не вотще́ потруди́лся еси́, па́че же смире́ния глубину́, мир и ра́дость о Го́споде стяжа́л еси́. Те́мже и мы, зря́ще от си́лы в си́лу духо́вное восхожде́ние твое́, с благогове́нием взыва́ем ти:

Ра́дуйся, плоть твою́ со страстьми́ и похотьми́ распе́нший;

ра́дуйся, скве́рну грехо́вную покая́нием омы́вый.

Ра́дуйся, я́ко благода́тную си́лу смире́ния позна́л еси́;

ра́дуйся, я́ко де́ланием за́поведей ева́нгельских ду́шу обнови́л еси́.

Ра́дуйся, и́мя Иису́са Сладча́йшаго непреста́нно призыва́вый;

ра́дуйся, на земли́ блаже́нство бу́дущаго ве́ка вкуси́вый.

Ра́дуйся, Же́ртву безкро́вную со стра́хом и тре́петом приноси́вый;

ра́дуйся, сло́вом му́дрым всех притека́ющих к тебе́ пита́вый.

Ра́дуйся, преподо́бне о́тче Серафи́ме, Вы́рицкий чудотво́рче.

Конда́к 6

Соверше́нную любо́вь я́ко вене́ц доброде́телей и дар Свята́го Ду́ха прие́мый, немощны́х не́мощи подъя́л еси́, духоно́сне о́тче, и ко спасе́нию мно́ги ду́ши упра́вил еси́. Те́мже предста́тельством твои́м и мы гре́шнии неду́гов многоразли́чных исцеле́вше, благода́рственно вопие́м Го́споду: Аллилу́ия.

И́кос 6

Возсия́ в лице́ твое́м пра́вда Бо́жия, и отгна́ся пре́лесть бесо́вская, егда́ ла́вра и́га обновле́нческаго свободи́ся, и́ноцы же вси возвесели́шася. Сего́ ра́ди про́сим тя, миротво́рче: раздо́ры и нестрое́ния жития́ на́шего утоли́, непра́вды разори́, да в единоду́шии глаго́лем ти:

Ра́дуйся, хра́ме нерукотворе́нный Христа́ Бо́га на́шего;

ра́дуйся, щедро́тами Ду́ха Свята́го благоле́пно укра́шенный.

Ра́дуйся, се́рдце твое́ вмести́лище ми́ра соде́лавый;

ра́дуйся, фимиа́м моли́твы Го́споду непреста́нно возноси́вый.

Ра́дуйся, о заблу́ждших зело́ душе́ю боле́зновавый;

ра́дуйся, всем спасти́ся и в ра́зум и́стины приити́ жела́вый.

Ра́дуйся, го́рдость и зло́бу нечести́вых смире́нием и кро́тостию победи́вый;

ра́дуйся, по за́поведи Христо́ве люби́ти враги́ своя́ учи́вый.

Ра́дуйся, преподо́бне о́тче Серафи́ме, Вы́рицкий чудотво́рче.

Конда́к 7

Хотя́ Человеколю́бец Госпо́дь яви́ти в тебе́ но́вое духо́вное свети́ло, даде́ тя бра́тии оби́тели во отца́ духо́внаго. Те́мже вели́кую схи́му я́ко печа́ть соверше́нства от Бо́га прие́мши, душа́ твоя́ чи́стая огне́м пла́менныя моли́твы за весь мир испо́лнися, благоче́стию и братолю́бию всех наставля́ющи и с тре́петом вопию́щи Бо́гу: Аллилу́ия.

И́кос 7

В ди́вном проро́честве, преблаже́нне, указа́ Госпо́дь путеводи́теля и покрови́теля твоего́, преподо́бнаго Серафи́ма Саро́вскаго, его́же и́менем в схи́ме нарече́нный, вои́стину но́вый уте́шитель наро́ду на́шему был еси́. Сему́ благоволе́нию Бо́жию чудя́щеся, вопие́м ти:

Ра́дуйся, те́плый к Бо́гу о всех моли́твенниче;

ра́дуйся, Преблагослове́нныя Влады́чицы Держа́вныя уго́дниче.

Ра́дуйся, А́нгелом прия́тный собесе́дниче;

ра́дуйся, духоно́сных оте́ц сподви́жниче.

Ра́дуйся, правосла́вных благода́тное заступле́ние;

ра́дуйся, блужда́ющих во тьме безбо́жия светоза́рное наставле́ние.

Ра́дуйся, гре́шников с Бо́гом и́скреннее примире́ние;

ра́дуйся, исто́чниче ра́дости и умиле́ния.

Ра́дуйся, преподо́бне о́тче Серафи́ме, Вы́рицкий чудотво́рче.

Конда́к 8

Стра́нно есть и неудобоприя́тельно су́етному ми́ру слы́шати, ка́ко моли́твами твои́ми, чудотво́рче, бога́тство милосе́рдия Бо́жия излива́ется на всех с ве́рою притека́ющих к твоему́ небе́сному покрови́тельству. Мы же, сла́вяще Тро́ицу Святу́ю, дарова́вшую ти благода́ть сию́, ра́достно восклица́ем: Аллилу́ия.

И́кос 8

Всего́ себе́ на служе́ние Бо́гу и лю́дем преда́л еси́, ди́вный о́тче, ча́дом свои́м запове́дав о Го́рнем всегда́ помышля́ти и моли́тву Иису́сову усе́рдно твори́ти, е́юже вся́кий грех в души́ посека́ется и дух челове́чь с Ду́хом Бо́жиим соединя́ется. Под твое́ у́бо пречу́дное благослове́ние прибега́юще, с любо́вию велича́ем тя:

Ра́дуйся, Го́рняго Иерусали́ма жи́телю;

ра́дуйся, неизрече́нныя сла́вы Спаси́теля ми́ра зри́телю.

Ра́дуйся, моли́твы на́ша к стопа́м Вседержи́теля и Богоро́дицы принося́й;

ра́дуйся, я́коже оте́ц чадолюби́вый прося́щим поле́зная подава́яй.

Ра́дуйся, ве́рный Це́ркве Христо́вы служи́телю;

ра́дуйся, неисце́льных боле́зней духо́вный врачева́телю.

Ра́дуйся, гряду́щих време́н чуде́сное предзре́ние;

ра́дуйся, настоя́щих обстоя́ний ско́рое избавле́ние.

Ра́дуйся, преподо́бне о́тче Серафи́ме, Вы́рицкий чудотво́рче.

Конда́к 9

Вся Си́лы Небе́сныя удиви́шася смире́нию и терпе́нию твоему́, свя́тче, мучи́тельным тя неду́гом зря́ще пораже́ннаго, оба́че промысли́тельно от рук гони́телей из ла́вры восхище́ннаго. Лю́дие же ве́рнии, ви́девше тя, чу́дно под кро́вом Богоро́дицы в Вы́рицкой ве́си храни́маго, воспева́ху Человеколю́бцу Го́споду: Аллилу́ия.

И́кос 9

Вити́йство челове́ческое умолка́ет пред вели́чием по́двиг твои́х, преподо́бне: ка́ко у́бо, ста́рец пло́тию не́мощен сый, мно́гия труды́ подъя́л еси́? Те́мже, си́ле Бо́жией в не́мощех соверша́емой дивя́щеся, взыва́ем ти:

Ра́дуйся, дре́вних пусты́нников иску́сный подража́телю;

ра́дуйся, по́стническаго жития́ изря́дный люби́телю.

Ра́дуйся, моли́твенных бде́ний усе́рдный ревни́телю;

ра́дуйся, теле́сных не́мощей чу́дный победи́телю.

Ра́дуйся, и́стинным смире́нием доброде́тели своя́ сокры́вый;

ра́дуйся, пла́чем плоды́ Бо́жия благода́ти умно́живый.

Ра́дуйся, еле́й ра́дости трезве́нием сохрани́вый;

ра́дуйся, Христу́ Бо́гу житие́м твои́м благоугоди́вый.

Ра́дуйся, преподо́бне о́тче Серафи́ме, Вы́рицкий чудотво́рче.

Конда́к 10

Спасти́ Русь Святу́ю от наше́ствия иноплеме́нник Го́спода умоля́л еси́, боголю́бче ди́вный: Иису́се Христе́, Сы́не Бо́жий, поми́луй страну́ на́шу и мир Твой. Та́ко со умиле́нием серде́чным к Бо́гу взыва́я, подо́бне ста́рцу Саро́вскому но́вый по́двиг моли́твеннаго стоя́ния на ка́мени подъя́л еси́. Те́мже тя укрепи́вшаго Го́спода сла́вим, побе́дную песнь Ему́ пою́ще: Аллилу́ия.

И́кос 10

Стена́ бысть незри́мая моли́тва твоя́, уго́дниче Бо́жий, во́инству и наро́ду на́шему в годи́ну испыта́ний тя́жких. Ра́зумом духо́вным смысл попу́щенных Бо́гом скорбе́й постига́я, обрати́тися ко Христу́ отступи́вшия лю́ди призыва́л еси́. Те́мже и нас от вся́кия ве́щи сопроти́вныя соблюди́, вопию́щих ти такова́я:

Ра́дуйся, ча́шу страда́ний со оте́чеством земны́м до конца́ испи́вый;

ра́дуйся, о поми́ловании Росси́и Го́спода проси́вый.

Ра́дуйся, во́инству христолюби́вому Бо́гом дарова́нное поможе́ние;

ра́дуйся, душ и теле́с на́ших живи́тельное ороше́ние.

Ра́дуйся, му́ченичество безкро́вное во́лею претерпе́вый;

ра́дуйся, не́мощи естества́ челове́ческаго презре́вый.

Ра́дуйся, земли́ Росси́йския моли́твенное огражде́ние;

ра́дуйся, от враг ви́димых и неви́димых досточу́дное избавле́ние.

Ра́дуйся, преподо́бне о́тче Серафи́ме, Вы́рицкий чудотво́рче.

Конда́к 11

Пе́ние умиле́нное прино́сим ти, преподо́бне о́тче Серафи́ме, ублажа́юще многотру́дное земно́е житие́ твое́, ты же не преста́й моли́тися за ны ко Го́споду, да да́рует нам грехо́в оставле́ние, страсте́й одоле́ние, во вся́цей доброде́тели утвержде́ние и ми́ра душе́внаго хране́ние, и да сподо́бит нас недосто́йных вку́пе с тобо́ю во Ца́рствии Небе́снем благода́рственно воспева́ти: Аллилу́ия.

И́кос 11

Светоза́рнаго пропове́дника су́щим во тьме безбо́жия зрим тя, всеблаже́нне о́тче, духо́вное бо возрожде́ние Росси́и прови́дел еси́ и сооте́чественником тве́рдо ве́ры правосла́вныя держа́тися завеща́л еси́. Мы же, словесы́ твои́ми просвеща́еми, со умиле́нием взыва́ем ти:

Ра́дуйся, сла́вы Предве́чнаго Царя́ прича́стниче;

ра́дуйся, Боже́ственнаго Со́лнца луче́.

Ра́дуйся, милосе́рдия свети́ло, согрева́ющее ду́ши;

ра́дуйся, наста́вниче, духо́вно пробужда́ющий умы́.

Ра́дуйся, свети́льниче, и́мже мно́зи челове́цы просвеща́ются;

ра́дуйся, моли́твенниче, и́мже ко́зни вра́жия разруша́ются.

Ра́дуйся, чистоты́ серде́чныя храни́телю;

ра́дуйся, соверше́нства христиа́нскаго учи́телю.

Ра́дуйся, преподо́бне о́тче Серафи́ме, Вы́рицкий чудотво́рче.

Конда́к 12

Блаже́нную кончи́ну твою́, богому́дре о́тче, моле́нием ака́фистным Богома́тери предвари́л еси́: Та бо я́вственне посети́вши тя, отше́ствие твое́ бли́зкое на Не́бо десни́цею указа́ ти. Ки́ими похвала́ми досто́йно ублажи́м тя, избра́нниче Цари́цы Небе́сныя, ны́не со ли́ки а́нгельскими пою́ща: Аллилу́ия.

И́кос 12

Пою́ще ди́внаго во святы́х Свои́х Бо́га, ве́руем, я́ко мно́го мо́жет моли́тва пра́веднаго ко благосе́рдию Влады́ки, и сего́ ра́ди про́сим тя, преподо́бне о́тче, бу́ди о нас хода́тай те́плый у Престо́ла Пресвяты́я Тро́ицы, вопию́щих ти си́це:

Ра́дуйся, пла́менным Серафи́мом тезоимени́тый;

ра́дуйся, ста́рчества восприе́мниче духоно́сный.

Ра́дуйся, ни́вы Христо́вы неуста́нный де́лателю;

ра́дуйся, ми́ра Бо́жия усе́рдный насади́телю.

Ра́дуйся, Правосла́вныя Це́ркве но́вое украше́ние;

ра́дуйся, ве́лие к Бо́гу за Русь многострада́льную дерзнове́ние.

Ра́дуйся, ро́да христиа́нскаго благомо́щное заступле́ние;

ра́дуйся, почита́ющим тя хода́таю ве́чнаго спасе́ния.

Ра́дуйся, преподо́бне о́тче Серафи́ме, Вы́рицкий чудотво́рче.

Конда́к 13

О, пресла́вный и досточу́дный уго́дниче Бо́жий Серафи́ме, Вы́рицкий чудотво́рче, приими́ усе́рдное сие́ моле́ние на́ше, с любо́вию тебе́ возноси́мое. Умоли́ Всеми́лостиваго Го́спода изба́вити нас от вся́каго зла и напа́сти, да в ны́нешнем ве́це благоче́стно поживе́м и блаже́нства жи́зни ве́чныя моли́твами твои́ми сподо́бимся, о тебе́ благода́рственно Го́сподеви пою́ще: Аллилу́ия.

Сей конда́к глаго́лется три́жды.
И па́ки чте́тся 1-й и́кос и 1-й конда́к.

Моли́тва

О, богоблаже́нный и премилосе́рдый о́тче наш Серафи́ме! Ве́дуще тя и по сме́рти я́ко жи́ва су́ща, с ве́рою припа́даем ти и вопие́м: не забу́ди убо́гих твои́х до конца́, но ми́лостивно при́зри на ста́до твое́ духо́вное и упаси́ е́, до́брый па́стырю, благоприя́тными твои́ми к Бо́гу моли́твами. Испроси́ нам от Го́спода вре́мя на покая́ние и грехо́вныя жи́зни исправле́ние, ве́си бо вся не́мощи на́ша душе́вныя: не и́мамы дел ве́ры и спасе́ния, не и́мамы ре́вности ко и́стинному богоугожде́нию, плени́хомся умо́м в поги́бельных страсте́х, растле́хом сердца́ во гну́сных по́хотех. Что у́бо ча́ем и на что наде́емся, неключи́мии, разори́вше хра́мины душ на́ших? Ей, святы́й о́тче, простри́ моли́твенно ру́це твои́ ко Го́споду и умоли́ Спаси́теля ро́да челове́ческаго косну́тися благода́тию окамене́нных серде́ц на́ших, омы́ти нас слеза́ми покая́ния, возста́вити в ве́ре, укрепи́ти во благоче́стии и вся поле́зная ко спасе́нию дарова́ти. Не посрами́ упова́ния на́шего, е́же по Бо́зе и Богоро́дице на тя возлага́ем, но бу́ди нам ско́рый помо́щник, уте́шитель в ско́рбех и покрови́тель во обстоя́нии, да сподо́бимся моли́твами твои́ми насле́довати Ца́рствие Небе́сное, иде́же вси святи́и непреста́нно сла́вят и воспева́ют пречестно́е и великоле́пое и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Песнь 1

Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть, препрославленный Господь, славно бо прославися.

Како возможем достойно воспети твое богоугодное житие, преподобне; от юности бо Христовою любовию уязвився, огнь сей Божественный в сердце твоем невредимо соблюл и приумножил еси, темже и нам подаждь просвещение по долгу тя славити.

Ангельстии чини радовахуся, зряще твое усердие и желание послужити Богу во иночестем чине, но воля Божия бысть исперва тебе в мире благочестно пожити, созидая святыя обители и храмы, имея попечение о нищих и сирых, душу же свою уготовляя Господу в сосуд избранный.

Корыстолюбие и сребролюбие отринул еси, отче преподобне, гордаго змия смирением твоим поправ, плотская взыграния умертвил еси и житейския сласти терпением посекл еси, в радости послужил еси всем требующим твоея помощи.

Богородичен: О, Пречистая Дево Богородице, не презри нас грешных, требующих Твоея помощи и заступления, буди Ходатаица о народе нашем, да покаянием обрящем отпущение грехов и живот вечный.

Песнь 3

Ирмос: Процвела есть пустыня, яко крин, Господи, языческая неплодящая церковь пришествием Твоим, в нейже утвердися мое сердце.

В мирстем житии твоем старцу Варнаве за духовным наставлением притекал еси, усердно послушание ему во всем являя, темже и сподобился еси от него благословения и даров духовных.

О убогих присно попечение имея, преподобне, не возгнушался еси послужити оным своима рукама, показуя, яко всяк человек сердцу твоему возлюблен есть.

Словеса аввы твоего Варнавы добре сохраняя, очистив ум, тело и душу, преподобне, дом был еси Трисолнечнаго Света, украшен добродетельми.

Богородичен: Преблагословенная, Всенепорочная Богородице Марие, Слово Божие нам рождшая, свобождшаго избранныя Своя от тленнаго мира, ихже молитвами и нас спаси.

Седален

Умиленным сердцем прославляем тя, добрый наш пастырю и кроткий наставниче Серафиме, буди нам скорый помощник во всех бедах и напастех и помози заповеди Господни добре сохраняти во спасение душ наших.

Песнь 4

Ирмос: Пришел еси от Девы, не ходатай, ни ангел, но Сам Господи воплощься, и спасл еси всего мя человека, тем зову Ти: слава силе Твоей, Господи.

Око сердца управив ко Творцу всяческих, Серафиме, согласно с супружницею иноческий образ восприяв, претерпел еси козни гонителей, на Бога Единаго упование возлагая.

Евангелия Христова истинный послушник явился еси, преподобне, и скоро восшел еси лествицею добродетелей к совершенству, всякое послушание добре исполняя и молитву в сердце непрестанно совершая.

Монашеским добродетелем в мире навыкнув и изрядный опыт житейский имея, добрый наставник миряном и иноком показался еси, отче, сотаинник священномученика Вениамина быв, от него же и посвящение иерейское приял еси.

Богородичен: Тебе, Дево, Едину вси вернии стяжахом Заступницу тверду, Ты бо Бога родила еси нам, сего ради хвалами, Чистая, Тя ублажаем, роди земнии, по глаголу Твоему.

Песнь 5

Ирмос: Ходатай Богу и человеком был еси, Христе Боже, Тобою бо Владыко, к Светоначальнику Отцу Твоему, от нощи неведения приведение имамы.

Язык человечь не возможет по долгу восхвалити труды и подвиги твоя, яже в келлии втайне совершал еси, отче преподобне, но не может укрытися светильник верху горы стоя, сего ради притекаху к тебе лаврская братия и мирстии людие, совета ради и наставления духовнаго.

Посреде бури гонений и нестроений тверд и незыблем явился еси, преподобне, очи сердца твоего выну ко Господу имея и от Него просвещение приемля творити волю святую Его.

Образ великия ангельския схимы приял еси, отче, и наречен был еси в память преподобного Серафима, угодника Саровскаго, егоже от юности всем сердцем возлюбив, потщался еси житию онаго подражати в Дусе и истине.

Богородичен: Дивно превознесеся слава Твоя, Богородице Дево, се бо во чреве Христа Бога паче слова имела еси, якоже Исаия провозгласи, и выше естества Сего, Богородительнице, родила еси.

Песнь 6

Ирмос: В бездне греховней валяяся, неизследную милосердия Твоего призываю бездну, от тли, Боже, мя возведи.

Озаряем свыше светом Христовым, богомудре, и по преселении твоем к Богу неоскудно исцеления источаеши всем с верою притекающим к тебе.

Любовь божественная, яже в души твоей, отче преподобне, попаляет духи нечистыя, темже и одержимых оными свобождает и к жизни во Христе возрождает.

Гласом тихим и кротким наставлял еси притекающия к тебе любви, смирению и молитве непрестанной, попаляющей всякий грех.

Богородичен: Ужасошася ангелов воинства и человеков роди, Всенепорочная, страшнаго и паче ума Рождества Твоего, како и Дева пребыла еси, и Мати Божия быти сподобилася еси, сего ради достойно Тя вси славим.

Кондак, глас 5

Подражая богоносному угоднику Саровскому, Духа Святаго благодать обильно стяжал еси: Александро-Невския Лавры крине благоуханный, Вырицкия веси похвало, сего ради и мы тебе зовем: радуйся, преподобне Серафиме, милостивый наш предстателю пред Господем.

Икос

Ангелов Творец и Господь сил небесных предызбра тя от юности твоея, преподобне, быти Ему служителем верным и наставником на путь спасения притекающим к тебе, темже и мы, дивящеся величию чудес твоих, с любовию вопием ти: радуйся, яко измлада Богу послужити возжелел еси; радуйся, яко в мире пребывая, добродетельным житием Богу угождал еси; радуйся, яко был еси утешитель страждущих; радуйся, яко стяжал еси пламенную любовь ко Христу; радуйся, преподобнаго Варнавы учениче прилежный; радуйся, дивнаго Серафима подражателю усердный; радуйся, Александро-Невския Лавры чудное прозябение; радуйся, веси Вырицкия Божие благословение; радуйся, скорый помощниче в скорбех и болезнех; радуйся, светильниче веры православныя и благочестия; радуйся, преподобне Серафиме, милостивый наш предстателю пред Господем.

Песнь 7

Ирмос: Богопротивное веление беззаконнующаго мучителя высок пламень вознесло есть, Христос же простре богочестивым отроком росу духовную, Сый благословен и препрославлен.

Серафиму и Варнаве преподобным подражая, святыми их молитвами укрепляем был еси, святе, темже от Бога сподобился еси пророческаго дара: грядущая народу нашему и Церкве Российстей предвозвещати.

Еленю подобно, стремяшеся душа твоя, преподобне, к горним обителем, промыслом Божиим соблюдаема от пленения безбожных, поющи: благословен еси, Боже отец наших.

Руце твои, отче Серафиме, ко Господу непрестанно воздевая, моление на камени совершал еси, подобно угоднику Божию Саровскому, поя: благословен еси, Боже отец наших.

Богородичен: Ангельския силы воспевают Тя немолчно, Богородительнице, и мы, грешнии, взывати дерзаем: наше житие, Пречистая, к Твоему всетихому пристанищу направи, Сыну Твоему зовущих: благословен еси, Боже отец наших.

Песнь 8

Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите вся дела Господня Господа.

Фарисейскую гордыню отвергше, усердно приступим ко гробу твоему, Серафиме, источает бо оный неоскудную струю исцелений и пети нас воздвизает: благословите вся дела Господня, Господа. (дважды)

Молитвою твоею, преподобне, чудеса дивная сотворил еси: слепорожденная бо прозре, немая проглагола, одержимии же от духов злобы свобождашася, темже вси пояху: благословите вся дела Господня, Господа.

Богородичен: Естество всякое обожил есть из Тебе воплощься Господь, Владычице, земных существо, поющих: благословите вся дела Господня, Господа.

Песнь 9

Ирмос: Безначальна Родителя Сын, Бог и Господь, воплощься от Девы нам явися, омраченная просветити, собрати расточенная, тем всепетую Богородицу величаем.

Чисте зрети сподобился еси Царицу Небесную, преподобне, предвозвестившую Ти скорое отшествие твое от мира сего, темже духом возрадовався, Бога прославил еси.

Утверди сердца наша, отче преподобне, да в радости душевней предстоя Богу, испросим одоление на враги видимая и невидимая, и спасение душам нашим.

Душею твоею, яко огненный Серафим, пламенея, научаеши нас, отче, истинней любви ко Господу, помози же нам святою твоею молитвою земный подвиг совершати, призывая сладчайшее имя Господа Иисуса.

Недостойными усты песнь тебе принесохом, преподобне, и ныне сподоби нас твоего отеческаго благословения, да делы благими прославляем Бога нашего, дивнаго во святых Своих.

Богородичен: Емуже предстоят со страхом Серафими и Херувими, Мати по плоти не ложно сподобилася еси быти, Всенепорочная, яко родила еси нам Бога Спасителя, Единаго от Троицы, Сына и Слова, Крестом разоршаго смерть, Егоже о нас с ликом преподобных моли спастися душам нашим.

Светилен

Благодать Святаго Духа всельшаяся в тя крин благоуханный сада Божия тя показа, Христос же ти вручи словесныя овцы Своя пасти на пажитех духовных, темже на земли добре потрудився, ныне на небесех, радуяся, живеши.