Текст утвержден Священным Синодом
Русской Православной Церкви
25 декабря 2012 года
(журнал № 131)

Творе́ние Гера́сима мона́ха Микрагианнани́та

Конда́к 1

Подо́бен: Взбра́нной Воево́де:

Яко та́инственнаго богосло́вия боже́ственный орга́н

и Све́та Трисо́лнечнаго жили́ще,

Богосло́ве Симео́не, тя восхваля́ем.

Но я́ко испо́лнь Ду́ха осия́ньми,

освети́ луча́ми благода́тей твои́х вопию́щия ти:

Ра́дуйся, преподо́бне Симео́не, све́та боже́ственнаго таи́нниче.

И́кос 1

Ангелоподо́бен яви́лся еси́ доброде́телей преуспея́ньми, богому́дре Симео́не Богосло́ве, и а́нгельским твои́м гла́сом богосло́виши я́же па́че ума́ та́инства. Те́мже твое́й све́тлости дивя́щеся вси вопие́м:

Ра́дуйся, и́мже Тро́ица воспева́ется;

ра́дуйся, и́мже тле́ние попира́ется.

Ра́дуйся, Трисо́лнечнаго Све́та обита́лище;

ра́дуйся, небе́сныя жи́зни созерца́ние.

Ра́дуйся, высото́ боже́ственнаго ра́зума, неудо́бь исправи́мая мно́гими;

ра́дуйся, глубино́ жития́ лу́чшаго, вся́ческия доброде́тели ра́ди.

Ра́дуйся, я́ко показа́лся еси́ Це́ркве сия́ние;

ра́дуйся, я́ко яви́лся еси́ богосло́вов весе́лие.

Ра́дуйся, луче́ невеще́ственных осия́ний;

ра́дуйся, мо́лние проти́ву веще́ственных воображе́ний.

Ра́дуйся, и́мже богосло́ви тайново́дствуются;

ра́дуйся, и́мже новосло́вцы зауща́ются.

Ра́дуйся, преподо́бне Симео́не, све́та боже́ственнаго таи́нниче.

Конда́к 2

О́ко души́ твоея́ житие́м изря́дным очи́стив ди́вно, узре́л еси́ невеще́ственнаго све́та явле́ния, подъе́м и́го Христо́во, преподо́бне, и, впери́вся Ду́хом, Симео́не Боговдохнове́нне, взыва́л еси́: Аллилу́ия.

И́кос 2

Ра́зум боже́ственный имы́й, разу́мне отре́клся еси́ досто́инств мирски́х вседу́шне и, роди́телей любо́вь презре́в, ко оби́тели Студи́йстей ра́дуяся прите́кл еси́: Христу́ бо после́довал еси́, слы́ша от всех сицева́я:

Ра́дуйся, Христо́вы любве́ сокро́вище;

ра́дуйся, све́та невеще́ственнаго прия́телище.

Ра́дуйся, а́нгельскому житию́ подража́яй;

ра́дуйся, бесо́вския де́рзости отвраща́яй.

Ра́дуйся, сосу́де многоце́нный дохнове́ния боже́ственнаго;

ра́дуйся, мечу́ богокова́нный на пристра́стие веще́ственное.

Ра́дуйся, я́ко прия́л еси́ в души́ огнь небе́сный;

ра́дуйся, я́ко всему́дре избра́л еси́ лу́чшее.

Ра́дуйся, страсте́й те́рние исторга́яй;

ра́дуйся, души́ ни́ву обновля́яй.

Ра́дуйся, плодо́в де́лателю безсме́ртных;

ра́дуйся, благ испо́лнивыйся нетле́нных.

Ра́дуйся, преподо́бне Симео́не, све́та боже́ственнаго таи́нниче.

Конда́к 3

Си́лу в по́двизе и во мно́зем разуме́нии прие́м, Симео́не, с небесе́ и в послуша́нии ста́рчестем соверши́вся, плотско́е подчини́л еси́ мудрова́ние, прему́дрости же лу́чшия испо́лнился еси́ и Тро́ице воспева́еши: Аллилу́ия.

И́кос 3

Излия́ся бога́тая благода́ть устна́ма твои́ма, и вла́га ти даде́ся прему́дрости; отню́дуже богосло́вия струи́ Це́ркви источи́л еси́, преподо́бне, и напоя́еши словесы́ твои́ми помышле́ния вопию́щих:

Ра́дуйся, исто́чниче богосло́вия;

ра́дуйся, пла́меню богому́дрия.

Ра́дуйся, реко́ во́д благода́тных;

ра́дуйся, сокро́вище наставле́ний духо́вных.

Ра́дуйся, таи́нниче богопросвеще́нный высо́ких виде́ний;

ра́дуйся, устне́ богодви́жимеи небе́сных помышле́ний.

Ра́дуйся, я́ко вещества́ преше́л еси́ преде́лы;

ра́дуйся, я́ко догма́тов раскры́л еси́ смы́слы.

Ра́дуйся, жи́зни святы́я учи́телю;

ра́дуйся, честны́м а́нгелом ра́вне.

Ра́дуйся, хра́ме Тро́ицы та́инственный;

ра́дуйся, заре́ свети́льника небе́снаго.

Ра́дуйся, преподо́бне Симео́не, све́та боже́ственнаго таи́нниче.

Конда́к 4

Живота́ боже́ственнаго ма́нна, и не́ктар безсме́ртный, и мед, из ка́мене источи́выйся, боготво́рных твои́х уче́ний кни́га быва́ет, ду́ши очища́ющая и к боже́ственному соверше́нию наставля́ющая вопию́щих: Аллилу́ия.

И́кос 4

Взя́лся еси́ к виде́нием высо́ким, по Па́влу, и Ду́хом неизрече́нная узре́л еси́, отню́дуже богосло́в прему́дрый, богосло́вствуя всем преми́рная язы́ком богоречи́вым, Симео́не, яви́лся еси́ вопию́щим:

Ра́дуйся, боже́ственный богосло́ве;

ра́дуйся, всему́дрый богоглаго́льниче.

Ра́дуйся, Иоа́нна вели́каго отпечатле́ние;

ра́дуйся, Григо́рия боже́ственнаго подо́бие.

Ра́дуйся, орга́не многозву́чный высо́ких виде́ний;

ра́дуйся, псалти́рю одушевле́нный светоза́рных наставле́ний.

Ра́дуйся, я́ко вше́л еси́ к незаходи́мому мра́ку;

ра́дуйся, я́ко узре́л еси́ ми́р небе́сный.

Ра́дуйся, ве́рныя изумля́яй словесы́ твои́ми;

ра́дуйся, ду́ши устроя́яй нра́вы твои́ми.

Ра́дуйся, живота́ небе́снаго изъяви́телю;

ра́дуйся, Бо́га нам чу́дный яви́телю.

Ра́дуйся, преподо́бне Симео́не, све́та боже́ственнаго таи́нниче.

Конда́к 5

Боже́ственным раче́нием, о́тче, сла́дце уя́звлен, подъя́л еси́ небому́дренным ра́зумом искуше́ния, ско́рби же и гоне́ния, и я́ко зла́то во огни́ искуси́лся еси́, я́ко а́нгел же, свя́те, всем яви́лся еси́, Христу́ воспева́я: Аллилу́ия.

И́кос 5

Испра́вил еси́ ума́ твоего́ движе́ния, богому́дре, к сла́ве Спа́сове и испо́лнь прему́дрости боже́ственныя показа́лся еси́, Симео́не, Ду́хом Святым, возбужда́я к покая́нию с любо́вию ти вопию́щих:

Ра́дуйся, сто́лпе воздержа́ния;

ра́дуйся, о́бразе терпе́ния.

Ра́дуйся, тайнописа́телю му́дрый обоже́ния;

ра́дуйся, разруши́телю жесточа́йшаго окамене́ния.

Ра́дуйся, уста́ медоточи́вая, ка́плющая боже́ственную сла́дость;

ра́дуйся, о́блаче богонапое́нный, ро́су жи́зни источа́яй.

Ра́дуйся, я́ко апо́стольскую благода́ть изъявля́еши;

ра́дуйся, я́ко спаси́тельное блиста́ние возсиява́еши.

Ра́дуйся, свети́ло благода́ти всесве́тлое;

ра́дуйся, звездо́ Лу́чшаго незаходи́мая.

Ра́дуйся, исто́чниче во́д живоно́сных;

ра́дуйся, све́точу глаго́лов богодохнове́нных.

Ра́дуйся, преподо́бне Симео́не, све́та боже́ственнаго таи́нниче.

Конда́к 6

Очи́стився се́рдцем, по́двига ра́ди духовнаго, испо́лнился еси́ осия́ний боже́ственных, и всесве́тел священноде́йствуя явля́лся еси́ ученико́м твои́м, блаже́нне. Обоже́н бо прича́стием, всехвальне Симео́не, вопия́л еси́: Аллилу́ия.

И́кос 6

Сия́я виде́нии, а́ки живы́й вне́ ми́ра и еди́ному Бо́гу соедини́выйся, огнеобра́зен и богови́ден, и ра́достен лице́м, и кро́ток явля́лся еси́ всем, благогове́йно ти вопию́щим:

Ра́дуйся, цевни́це Уте́шителева;

ра́дуйся, дре́во ра́йское.

Ра́дуйся, и́же в веществе́ и телеси́ безпло́тен;

ра́дуйся, и́же зра́ком и нра́вы равноа́нгелен.

Ра́дуйся, звездо́ многосве́тлая Восто́ка та́инственнаго;

ра́дуйся, колесни́це златоиспещре́нная де́йствия боже́ственнаго.

Ра́дуйся, трубо́, возглаша́ющая песнь спасе́ния;

ра́дуйся, язы́че, подава́яй кре́пость богодарова́нную.

Ра́дуйся, све́та боже́ственнаго сокро́вище;

ра́дуйся, стремле́ния о́гненнаго угаше́ние.

Ра́дуйся, честны́х та́инств зри́телю;

ра́дуйся, Бо́га трисо́лнечнаго служи́телю.

Ра́дуйся, преподо́бне Симео́не, све́та боже́ственнаго таи́нниче.

Конда́к 7

Ве́лий в виде́ниих и честны́х богозре́ниих показа́лся еси́, Симео́не Богосло́ве, моли́твою бо у́мною е́же в Бо́зе восхище́ния та́инство позна́л еси́, блаже́нне, я́ко ины́й Моисе́й, взыва́я: Аллилу́ия.

И́кос 7

Не́ктар живы́й нетле́ния кни́га слове́с твои́х подае́т ве́рным, Богосло́ве, Уте́шитель бо тобо́ю Це́ркви глаго́лет и провещава́ет, и пробужда́ет вся вопия́ти ти, Симео́не, сицева́я:

Ра́дуйся, сла́во Це́ркве;

ра́дуйся, вети́е Богонача́лия.

Ра́дуйся, очища́яй душе́вная оскверне́ния;

ра́дуйся, просвеща́яй на́ша помышле́ния.

Ра́дуйся, пла́меню, пояда́яй те́рния страсте́й;

ра́дуйся, у́ме, открыва́яй у́мная и зря́й.

Ра́дуйся, я́ко разреши́лся еси́ вещества́ плени́ц;

ра́дуйся, я́ко испо́лнился еси́ богото́чных во́д.

Ра́дуйся, зря́й Бо́жия сия́ния;

ра́дуйся, ненави́дяй вра́жия зло́бы.

Ра́дуйся, прему́дрых уче́ний наводне́ние;

ра́дуйся, честны́х дарова́ний гу́сли.

Ра́дуйся, преподо́бне Симео́не, све́та боже́ственнаго таи́нниче.

Конда́к 8

Стра́нное чу́до явля́шеся, о́тче Симео́не, в тебе́, изумля́юще и веселя́ще вся: боже́ственным бо богатя́ся просвеще́нием, прему́дрых и разу́мных яви́лся еси́ прему́дрейший, неве́жда пре́жде, и ны́не всему́дре Бо́гови поя́: Аллилу́ия.

И́кос 8

Весь измени́выйся и к Бо́гови весь отше́д изступле́нием боже́ственнейшим, богому́дре, и по прича́стию обоже́н, к вожделе́нному возбужда́еши обоже́нию, Симео́не богосла́вне, с любо́вию ти вопию́щия:

Ра́дуйся, у́глю огня́ невеще́ственнаго;

ра́дуйся, сия́ние све́та боже́ственнаго.

Ра́дуйся, краснопи́сче обоже́ния всему́дрый;

ра́дуйся, потреби́телю ле́ности держа́внейший.

Ра́дуйся, добро́ту обоже́ния явля́яй де́ятельне;

ра́дуйся, трезве́нию спаси́тельному науча́яй разу́мне.

Ра́дуйся, я́ко наставля́еши и́ночествующих ли́ки;

ра́дуйся, я́ко отвраща́еши враго́в полки́.

Ра́дуйся, на́ше просвеща́яй мудрова́ние;

ра́дуйся, страсте́й прекраща́яй стремле́ния.

Ра́дуйся, ве́рным боже́ственную благода́ть подава́яй;

ра́дуйся, Бо́га за все́х умоля́яй.

Ра́дуйся, преподо́бне Симео́не, све́та боже́ственнаго таи́нниче.

Конда́к 9

Стра́сти душе́вныя очища́я уче́нии твои́ми святы́ми, ко обре́тению на́с пробужда́еши, трезве́нием и моли́твою, о́тче, многоце́ннаго ка́мене живо́тнаго, его́же дре́вле погуби́хом; те́мже ны́не ко Христу́ возопии́м: Аллилу́ия.

И́кос 9

Вети́я богосло́вия та́инственнаго показа́лся еси́, стяжа́в свы́шняго ра́зума: всего́ бо тя Уте́шитель привлече́, о́тче, я́коже благоволи́, и стра́нная и пресла́вная провеща́л еси́ вопию́щим:

Ра́дуйся, гла́се Бо́жий святы́й;

ра́дуйся, молча́ние враго́в соверше́нное.

Ра́дуйся, испо́лнь небе́снаго тайнонауче́ния;

ра́дуйся, проро́че лу́чшаго раче́ния.

Ра́дуйся, вети́е богонауче́нный прему́дрости Бо́жия;

ра́дуйся, мечу́ обоюдуо́стрый проти́ву пре́лести вра́жия.

Ра́дуйся, я́ко учи́ши восхожде́нием боже́ственным;

ра́дуйся, я́ко направля́еши к пути́ спасе́ния.

Ра́дуйся, Христо́ву ме́ртвость нося́й;

ра́дуйся, боже́ственное осия́ние на́м подава́яй.

Ра́дуйся, да́ром сло́ва обогати́выйся;

ра́дуйся, всем боже́ственная глаго́лавый.

Ра́дуйся, преподо́бне Симео́не, све́та боже́ственнаго таи́нниче.

Конда́к 10

Уста́ боже́ственная показа́лся еси́ и Но́вый Богосло́в Христо́вой Це́ркви, богому́дре, в не́йже но́вая и ве́тхая от сокро́вища отры́гну се́рдца твоего́, я́ко кни́жник богоприя́тен, я́коже глаго́лет Спаси́тель, Ему́же пое́ши: Аллилу́ия.

И́кос 10

Све́та невеще́ственнаго боже́ственное зерца́ло яви́лся еси́, прише́д ко открове́нием боже́ственным, Богосло́ве о́тче Симео́не, и вся ве́рныя зове́ши ко причаще́нию благи́м, и́хже обре́л еси́. Те́мже ти жела́нием вопие́м:

Ра́дуйся, уста́ неизрече́нных;

ра́дуйся, о́ко небе́сных.

Ра́дуйся, светоза́рности боже́ственныя сокро́вище;

ра́дуйся, дарова́ний святы́х водворе́ние.

Ра́дуйся, розго́ многоплодоно́сная Лозы́ живо́тныя;

ра́дуйся, гро́зде всеспе́лый равноа́нгельнаго жи́тельства.

Ра́дуйся, я́ко к небе́сному жела́нию воспламеня́еши;

ра́дуйся, я́ко зако́н благода́тный явля́еши.

Ра́дуйся, Христа́ просла́вивый житие́м твои́м;

ра́дуйся, ве́рныя устроя́яй сло́вом твои́м.

Ра́дуйся, о́бразе свята́го стремле́ния;

ра́дуйся, раю́ ди́внаго безстра́стия.

Ра́дуйся, преподо́бне Симео́не, све́та боже́ственнаго таи́нниче.

Конда́к 11

Вше́д, Богосло́ве, в пресве́тлый мрак, прия́л еси́ во скрижа́лех серде́чных богосло́вия та́инственнаго богозапечатле́нныя скрижа́ли в Ду́се, и́миже тайново́дствуемся к боже́ственному раче́нию, вопию́ще: Аллилу́ия.

И́кос 11

Свет, Све́ту трисо́лнечному прибли́жився, яви́лся еси́ ми́ру, я́коже глаго́лет Влады́ка, и просвеща́еши ду́ши на́ша и светотвори́ши твои́ми уче́нии, свя́те, и́миже мра́ка избавля́емся страсте́й, любо́вию ти вопию́ще:

Ра́дуйся, я́ко свет в ми́ре возсия́вый;

ра́дуйся, кре́пость словеси́ прида́вый.

Ра́дуйся, де́йства боже́ственнаго учи́телю;

ра́дуйся, в по́двизе небе́сный челове́че.

Ра́дуйся, трисо́лнечныя благода́ти оби́теле явле́нная;

ра́дуйся, даро́в духо́вных орга́не боголе́пный.

Ра́дуйся, я́ко подъя́л еси́ искуше́ния му́жественне;

ра́дуйся, я́ко подае́ши просвеще́ние богода́нне.

Ра́дуйся, пра́вило преподо́бнаго жития́;

ра́дуйся, свети́льниче неизрече́ннаго обоже́ния.

Ра́дуйся, у́мная движе́ния облиста́яй;

ра́дуйся, на́ша сердца́ просвеща́яй.

Ра́дуйся, преподо́бне Симеоне, све́та боже́ственнаго таи́нниче.

Конда́к 12

Лие́т во́ду боже́ственную, теку́щую, о́тче, в жизнь ве́чную, непреста́нне и благоуха́ние источа́ет живо́тное и весели́т мы́сль на́шу кни́га уче́ний твои́х, в не́йже поуча́ющеся вопие́м: Аллилу́ия.

И́кос 12

Песнососта́вный вене́ц честно́му ве́рху твоему́ прино́сим, ча́да твоя́, о́тче, его́же прие́м оте́чески, лучу́ боже́ственнаго све́та нам да́руй: ве́рно бо к тебе́ притека́ем и не престае́м вопия́ти:

Ра́дуйся, отце́в добро́то;

ра́дуйся, преподо́бных украше́ние.

Ра́дуйся, иере́ев пра́вило свяще́ннейшее;

ра́дуйся, и́ночествующих о́тче боже́ственнейший.

Ра́дуйся, богосло́вов похвало́, Богосло́ве чу́дный;

ра́дуйся, благоче́ствующих утвержде́ние и тайноводи́телю сла́вный.

Ра́дуйся, Це́ркве богоза́рнейший сто́лпе;

ра́дуйся, правосла́вных небесносве́тлый свети́льниче.

Ра́дуйся, и́мже све́та исполня́емся;

ра́дуйся, и́мже страсте́й избавля́емся.

Ра́дуйся, му́дрый вождю́ твои́м ча́дом;

ра́дуйся, и на́м при́сно предста́тельствуяй.

Ра́дуйся, преподо́бне Симео́не, све́та боже́ственнаго таи́нниче.

Конда́к 13

О, боже́ственный о́тче, Симео́не Богосло́ве, свети́ло Христо́вы Це́ркве, прие́м на́ша гла́сы, све́том благода́ти, в тебе́ су́щия, облиста́й благоче́стне пою́щия тя и Тро́ице вопию́щия: Аллилу́ия.

Сей конда́к глаго́лется три́жды.

И па́ки чте́тся 1-й и́кос и 1-й конда́к 

Моли́тва преподо́бному Симео́ну Но́вому Богосло́ву

Творе́ние преподо́бнаго Никоди́ма Святого́рца

О, богоно́сный и христоно́сный и духоно́сный о́тче Симео́не, Но́вый Богосло́ве, преподо́бных похвало́, иерее́в сла́во, богосло́вов услажде́ние, моли́твы у́мныя учи́телю, Бо́га просла́вльший и от Бо́га просла́вленный в житии́ твое́м, па́че же по сме́рти, земны́й а́нгеле и небе́сный челове́че, ра́досте духо́вная и душе́вное весе́лие нам, смире́нным твои́м рабо́м и недосто́йным твои́м сыно́м, со благогове́нием и любо́вию пра́зднующим свяще́нную и светоно́сную па́мять твою! Приими́ песнь сию́, ю́же прино́сим ти я́ко да́р ничто́жный и мале́йший, за вели́кия благода́тныя да́ры, и́хже вси́ наслади́хомся, прие́мше я́ от тебе́, из кни́ги свяще́нных слове́с твои́х, и не отве́ржи сию́, я́ко твоего́ великоле́пия недосто́йну: отню́д бо не́мощни есмы́, е́же досто́йно восхвали́ти тя, толи́каго богосло́ва ве́лия. И в житии́ сем сохраня́й нас моли́твами твои́ми от вся́каго вре́да душе́внаго и теле́снаго, ви́димых же и неви́димых враг, моля́ непреста́нно И́же в Тро́ице Бо́га, да сподо́бит и нас, смире́нных, та́инственно ощути́ти посреде́ се́рдца на́шего у́мная де́йства боже́ственныя благода́ти Свята́го Ду́ха, ю́же погуби́хом, увы! нераде́нием на́шим и страстьми́; в бу́дущем же ве́це изба́ви ны твои́ми си́льными хода́тайствы от стра́шнаго осужде́ния и му́ки ве́чныя, и сподо́би на́с ве́чнаго блаже́нства во Христе́ Иису́се, Го́споде на́шем, Ему́же подоба́ет вся́кая сла́ва, че́сть и поклоне́ние, со безнача́льным Его́ Отце́м и Пресвяты́м и Животворя́щим Его́ Ду́хом, ны́не и при́сно и во ве́ки веко́в. Аминь.