МОЛИТВЫ ПРЕПОДОБНОМУ СЕРАФИМУ САРОВСКОМУ

МОЛИТВЫ ПРЕПОДОБНОМУ СЕРАФИМУ САРОВСКОМУ

МОЛИТВА ПЕРВАЯ

О предивный угодниче Божий, пресветлая славо Православия, украшение Земли Русския, великий светильниче всего мира, Духоносче отче Серафиме! С теплою верою умильно прославляем тя, яко паче меры облагодатствован еси Духом Святым. Чистоты бо ради твоея и премногих подвигов и непрестанных молитв твоих, дивными дарами обогати тя Бог: во еже болящия исцеляти, бесы изгоняти, немощныя утешати, зрети будущая, яко настоящая. Паче же и славных явлений Пречистыя многащи сподобился еси, Яже любимцем Своим нарече тя. Единоще же и Господа

Спасителя лицезрети во храме удостоился еси. И сам благодарным несозданным светом Царствия Божия дивно осияй был и мир весь стяжанию благодати Духа Святаго словом и делом учил еси. Но и ныне, блаженнаго света Пресвятыя Троицы наслаждаяся, не забываеши посещати люди, во всем мире имя твое призывающия.

Темже и мы, аще и грешнии суще, в скорбех твоея милости просим: направи нас на путь покаяния, испроси благодать и нам, недостойным, обрадуй сердца наши благими надежда ми на милость Божию: ты бо многажды печальным глаголал еси: несть нам унывати; Христос бо воскресе, смерть умертви, диавола упраздни. Еще же и ко гробу твоему притекати заповедал. Да услышим и мы уветливый глас твой: не унывайте, радости мои! бодрствуйте, спасайтесь! венцы бо таковым готовятся в Царствии Небеснем. Аминь.

МОЛИТВА ВТОРАЯ (о помощи и заступлении, читаемая в унынии и греховных обстояниях)

Частица мощей преподобного Серафима, Саровского чудотворца, в храме святых апостолов Петра и Павла в Шелехове

О великий угодниче Божий, преподобне и Богоносне отче наш Серафиме!

Призри от Горния славы на нас, смиренных и немощных, обремененных грехми многими, твоея помощи и утешения просящих. Приникни к нам благосердием твоим и помози нам заповеди Господни непорочно сохраняти, веру Православную крепко содержати, покаяние во гресех наших усердно Богу приносити, во благочестии христианстем благодатно преуспевати и достойным быти твоего о нас молитвеннаго к Богу предстательства.

Ей, святче Божий, услыши нас, молящихся тебе с верою и любовию, и не презри нас, требующих твоего заступления; ныне и в час кончины нашея помози нам и заступи нас молитвами твоими от злобных наветов диавольских, да не обладает нами тех сила, но да сподобимся помощию твоею наследовати блаженство обители райския. На тя бо упование наше ныне возлагаем, отче благосердый, буди нам воистинну ко спасению путевождь и приведи нас к невечернему свету жизни вечныя богоприятным предстательством твоим у Престола Пресвятыя Троицы, да славим и поём со всеми святыми достопокланяемое Имя Отца, и Сына, и Святаго Духа во веки веков. Аминь.

МОЛИТВА ТРЕТЬЯ (о даровании любви, читается за себя, за близких и за врагов)

Преподобне отче Серафиме, любовию Божественной исполненный, любви Божественной непрестанный служителю, любимиче Матери Божественной Любви, услыши мя, малолюбящего и многоогорчающего тебя.

Даждь и мне быти ныне усердным служителем Богоугодной Любви. Той убо любви, яже долготерпит, не завидует, не превозносится, милосердствует, не гордится, не безчинствует, не ищет своих си, не радуется о неправде, радуется же о другом умоли Любовь изначальную, да послужив любовию Ей на земли, твоим ходатайством, молитвами Богородицы и всех святых достигну Царства любви и славы, и света, и припаду к стопам Владыки моего, давшего нам заповедь об истинной любви.

Отче любящий, не отрини мольбы сердца, любящего тя, и о прощении моих грехов любящего Бога умоли. Помози нам нести тяготы друг друга, не делать другим, чего себе не хотим, вся любит, в истине; вся любит, всему веру емлет, вся терпит, яже николиже отпадает!

Сия любве служителем быти мне и всем моим присным, и знаемым, и любовию покрывать, и с сердечной песнию любви окончив земную жизнь, начать с нею же радостно вечную жизнь в стране истинной любви. Помолись за нас, отче, нами любимый отче, любящий нас! Аминь.

МОЛИТВА ЧЕТВЁРТАЯ (краткая молитва о помощи и заступлении с указанием имени молящегося)

О преподобне отче Серафиме! Вознеси о нас, рабех Божиих (имена), благомощную твою молитву ко Господу сил, да дарует нам вся благопотребная в жизни сей и вся к душевному спасению полезная, да оградит нас от падений греховных и истинному покаянию да научит нас, во еже безпреткновенно внити нам в вечное Небесное Царство, идеже ты ныне в незаходимей сияеши славе, и тамо воспевати со всеми святыми Живоначальную Троицу во веки веков.

• < Назад
• Вперёд >