Сегодня Святая церковь совершает память  Мц. Христины (ок. 300). Мчч. блгвв. князей Бориса и Глеба, во св. Крещении Романа и Давида (1015).

Правдивая страстотерпца/ и истинная Евангелия Христова послушателя,/ целомудренный Романе с незлобивым Давидом,/ не сопротив стаста врагу сущу брату,/ убивающему телеса ваша,/ душам же коснутися не могущу./ Да плачется убо злый властолюбец,/ вы же, радующеся с лики Ангельскими,/ предстояще Святей Троице,/ молитеся о державе сродников ваших богоугодней быти// и сыновом Российским спастися.

Яко плодовита винограда, отрасли добродетелей суще,/ Небесный дождь Христов прилете,/ источающе отечеству своему струю Православия,/ Борисе пречудне с доблим Глебом,/ вкупе молитеся Господеви сохранити град и люди,/ и на враги пособствовати,/ и душам нашим даровати велию милость.

Мученическою кровию порфиру окропивше светло,/ украшени предстоите, страдальцы славнии, Царю Безсмертному,/ и, венцы славы от Него приимше,/ молитеся стране нашей подати на враги одоление/ и душам нашим велию милость.

Возсия днесь преславная память ваша,/ благороднии страстотерпцы Христовы, Романе и Давиде,/ созывающи нас к похвалению Христа Бога нашего./ Тем, притекающе к раце мощей ваших,/ исцеления дар приемлем молитвами вашими, святии:// вы бо божественнии врачеве есте.

Аще и убиени бысте и во гробех положени,/ но на Вышнее Царство преидосте,/ оваго бо копии насунута,/ другаго же, яко агнца незлобива, ножем зарезаша,/ тем и кровь ваша бысть исцеление миру,/ верою призывающим вас, святии, на помощь.

Тезоименит званию твоему,/ яко многоплодное древо,/ насажден сый во обители Божия Матере,/ многая и чудная тщанием твоим исправления показавый,/ мудре Поликарпе,/ моли Христа Бога о нас,/ яко да и мы, многия плоды добродетелей Ему принесше, спасемся.

Яко преподобным Печерским совсельника/ и житий их в себе делом и писанием изобразителя неложна,/ вкупе же славы Небесныя с теми общника явльшагося,/ приидите, вернии, песньми священными преподобнаго Поликарпа ублажим, зовуще:/ радуйся, архимандритов Печерских похвало.

Агница Твоя, Иисусе, Христина/ зовет велиим гласом:/ Тебе, Женише мой, люблю,/ и, Тебе ищущи, страдальчествую/ и сраспинаюся и спогребаюся Крещению Твоему,/ и стражду Тебе ради,/ яко да царствую в Тебе,/ и умираю за Тя, да и живу с Тобою,/ но яко жертву непорочную приими мя,/ с любовию пожершуюся Тебе.// Тоя молитвами, яко Милостив, спаси души наша.

Званием евангельски Христу уневестившися,/ Христино славная,/ славу мира сего и похоть бренную вменила еси ни во что же,/ о самом телеси небрегущи,/ муки претерпела еси доблественно,/ тем твое страдание хвалами почитаем,/ мученице, Христу тезоименитая.

Световидная голубица позналася еси, криле имущи злате,/ и к высоте Небесней возлетела еси, Христино честная./ Темже твой славный праздник совершаем,/ верою покланяющеся твоих мощей раце,/ из неяже истекает всем обильно/ исцеление Божественное,// душам же и телом.

Соборе святых земли Смоленския,/ водами священнаго Днепра омовенныя,/ святителие, преподобнии, страстотерпцы и благовернии,/ апостольскую веру соблюдший,/ се ныне, Святей Троице с Богородицею и лики Безплотных предстояще,/ водами благочестия землю Русскую напаяете,/ дарующе православным помощь Небесную/ во утверждение веры/ и спасение душ наших.

Небесныя Царицы путеводительством,/ подвигоположницы земли Смоленския,/ земный путь в Православной вере прошедший/ и святых отец предания сохраншии,/ молите путь веры и нам соблюсти,/ смирению смирившагося до смерти крестныя Сына Божия подражающе,/ молитвами Богородицы,/ и спастися душам нашим.