Преподобный Макарий Великий, Египетский

Пустынный житель, и во плоти Ангел,/ и чудотворец явился еси, богоносе отче наш Макарие,/ постом, бдением, молитвою Небесная дарования приим,/ исцеляеши недужныя и души верою приходящих ти./ Слава Давшему тебе крепость,/ слава Венчавшему тя,// слава Действующему тобою всем исцеления.

Блаженную жизнь скончав в житии с мученическими лики,/ в земли кротких достойно водворяешися, богоносне Макарие,/ и пустыню, якоже град, населив, благодать приял еси от Бога чудес,// темже тя почитаем.

От юности Христа усердне возлюбив, вдался еси Тому весь, яко непорочна жертва, и иго Его благое на себе взем, работал в нем, всечестне Макарие, спешне, темже убо молим тя: молися о душах наших.

Вдавшагося Христу Богу на служение от младенства и Тому во иночестве и диаконстве послуживша священнолепно, восхва­ляем тя любовию, Макарие священне, и молим: яко имый дерзнове­ние, моли Христа Бога о нас, поющих тя.

Бывший нестяжателем Христа ради и Того за многия твоя добродетели в сердце твое вселивый, блаженне Макарие, молися о нас, поющих тя.

Вышних ища, нижних не стяжал еси и нестяжание, яко колесницу огненну к небеси, себе уготовав, со Ангелы жити сподобился еси, Макарие славне, с нимиже Христа Бога моли о всех нас.

Рим, отечество твое, оставив, в пустыню вселился еси, и тамо, в пусте месте обрет жилище себе, отбегл еси суеты мира сего, и в безмолвнем пристанищи добре направлял еси себе ко Господу. Сего ради и мы, чтущии тя, притекающе, молим тя, отче Макарие: моли о нас Господа, да помилует нас в день судный.

Отечество твое, ветхий Рим, оставив, во страну Российскую пришел еси, преподобне, и в пустыне блатней вселився, тамо пристанище тихое ко спасению обрел еси и безмолвное житие благоугодно провождал еси, направляя себе ко Господу молитвами непрестанными. Сего ради Христос тя возлюби и чудесы прослави, отче Макарие, явив тя пастыря добра словеснаго стада Своего. Темже и мы, притекающе к тебе, умильно глаголем: моли Прославльшаго тя спастися душам нашим.

От Рима возсиял еси, якоже звезда пресветлая, преподобне отче наш Макарие, и в пустыни вселився, просветил еси чистым жи­тием твоим верно притекающия к тебе. Темже и мы, прославляюще свет­лую память твою, вопием ти: радуйся, преподобне отче Макарие.

Якоже пресветлая звезда, от Рима возсиял еси, преподобне, и Богом наставляемь, Российскую страну светом чудес твоих озарил еси духовно, созывая верный к мощем твоим, от нихже исцеления недужным подаеши. Темже молимся тебе: научи нас, отче, твоему богоразумию и уврачуй недуги наша душевныя и телесныя, да зовем ти: радуйся, преподобне отче Макарие.

Православия наставниче, новшеств противоборниче,/ степень веры, Церкве светильниче,/ учителей Богодухновенная печате, Марко всемудре,/ писании твоими вся просветил еси, цевнице духовная,// моли Христа Бога спастися душам нашим.

Иоанна Евгеника: Богословов Богомудрая писания,/ яко Богоглагольник истинен, прием в сердцы,/ исхождение Духа Святаго возвестил еси, яко должно есть, приснохвальне,/ и всесвятый запечатлел еси Символ,/ сего ради поем:// радуйся, Марко Богоглаголиве.

Премудрыми словес твоих исплетении, всеблаженне,/ всякая уста хульная заградил еси/ и верныя Боговещании просветил еси чести Троицу в тождестве естества.

Пустыни явился еси доброе прозябение, преподобне:/ от юности бо изволил еси чистое житие, духовному твоему учителю последуя,/ и того учением ум к Небесным вперив,/ и стаду твоему премудр наставник показался еси;/ тем и Христос яко пресветла тя светильника чудесы обогати,/ Савво, отче наш,// моли спастися душам нашим.

Господним желанием распалився,/ страсти плотския воздержанием оттряс,/ Божественнаго света незаходимое светило явился еси,/ чудес лучами всех просвещаеши,/ притекающих к мощем твоим,// Савво преподобне, отче наш.

Иже на земли Христа ради волею в буйство преложився,/ мира сего красоты отнюд возненавидел еси/ и, плотская играния увядив постом и жаждею и на земли леганием,/ от зноя же и студени, от дождя и снега/ и от прочил воздушныя тягости никогдаже уклонился еси,/ душу же очистил еси добродетельми, яко злато в горниле,/ отче преблаженне Феодоре,/ и ныне на Небесех предстойши Престолу Пресвятыя Троицы,/ но яко имея дерзновение многое,/ моли Христа Бога спастися душам нашим.

Православно проповедав, изъяснил еси догматы, Бога милостива сотвори, и Его ради во юродство претворися, и шибание великое сотворил еси, и снег и зной приим на своем телеси, по преставлении же своем даеши многа исцеления с верою приходящим к раце мо­щей твоих: сего ради вопием ти, Феодоре блаженне, моли Христа Бога непрестанно о всех нас.

На земли Христа ради в буйство преложився,/ мира сего красоты отнюд возненавидел еси,/ плотская взыграния увядив,/ от дождя и снега и от прочия воздушныя тягости никогда же уклонился еси,/ от неразумных человек поругание, радуяся, претерпел еси,/ подобяся Творцу твоему и вопия:/ Господи, не постави им греха сего;/ душу же предочистил еси, яко злато в горниле,/ и сию Христос прият/ и, яко светозарную звезду, Своей славе причастну содела./ Предстоя ныне Святей Троице, преблаженне Феодоре,/ моли за град же и люди,/ почитающия любовию пречестную память твою.

Вышния красоты желая,/ нижния сладости и телесная одеяния тощно оставил еси/ и нестяжание паче суетнаго мира возлюбил еси,/ ангельское житие проходя, скончался еси, Феодоре блаженне,/ с нимиже Христа Бога моли непрестанно о всех нас.

Яко злато в горниле, Феодоре блаженне, мира сего красоту отнюд возненавидев, плоть свою зноем и жаждою увядил еси и от прочия воздушныя тягости никогда же уклонился еси, и сего ради волею в юродство претворися, Феодоре блаженне.