Блаженный Максим Московский, Христа ради юродивый

Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя// и Твое́ сохраня́я Кресто́м Твои́м жи́тельство.

Перевод: Спаси, Господи, людей Твоих и благослови все, что принадлежит Тебе. Даруй победы над врагами, и сохрани силою Креста Твоего тех, среди которых пребываешь Ты.

Вознесы́йся на Крест во́лею,/ тезоимени́тому Твоему́ но́вому жи́тельству,/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду.

Перевод: Вознесенный на Крест добровольно, соименному Тебе новому народу милости Твои даруй, Христе Боже; возвесели силою Твоею верных людей Твоих, подавая им победы над врагами, – да имеют они помощь от Тебя, оружие мира, непобедимый знак победы.

Я́ко Безпло́тным собесе́дника/ и страстоте́рпцем единовсе́льника,/ соше́дшеся ве́рою, Ми́но, восхваля́ем тя,/ ми́ра ми́рови испроси́// и душа́м на́шим ве́лия ми́лости.

Перевод: Как Бесплотных собеседника и поселившегося вместе с мучениками, собравшиеся с верой, Мина, прославляем тебя, мира испроси миру и душам нашим великую милость.

Во́инства исхити́ привре́меннаго/ и нетле́ннаго показа́ тя Небе́снаго о́бщника,/ страстоте́рпче Ми́но, Христо́с, Бог наш,// И́же му́чеников нетле́нный вене́ц.

Перевод: Из временного земного воинства изъял и явил тебя частью нетленного Небесного, мученик Мина, Христос, Бог наш, Который для всех мучеников нетленный Венец.

О, страстоте́рпче святы́й му́чениче Ми́но! Взира́юще на ико́ну твою́ и помина́юще цельбы́, тобо́ю подава́емые всем, с ве́рою и благогове́инством к тебе́ притека́ющих, припа́даем ти и, прекло́нше коле́на серде́ц на́ших, от всея́ души́ на́шея мо́лим тя, бу́ди нам хода́тай пред Го́сподом и Спа́сом на́шим Иису́сом Христо́м о не́мощех на́ших, сопу́тствуй и утеша́й нас во вре́мя скорбе́й на́ших, да́руя нам па́мять о гресе́х на́ших, помога́й в напа́стех и треволне́ниях ми́ра сего́, и во всех бедах, в сей юдо́ли плаче́вней нас постига́ющих. Ами́нь.

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами// спаси́ ду́ши на́ша.

Перевод: Мученики Твои, Господи, подвигом своим венцы нетленные получили от Тебя, Бога нашего; ибо они, имея силу Твою, мучителей низложили, сокрушили и демонов немощные дерзости. По молитвам их, Христе Боже, спаси души наши.

И́же сла́ве, Го́споди и всех Соде́телю,/ Ты в ми́ре яви́л еси́ украше́нных доброде́тельми страстоте́рпцы и му́ченики,// да и́мут непобеди́мую побе́ду.

Перевод: К славе Твоей, Господи и Создатель всего, явил Ты в мире украшенных добродетелями страстотерпцев и мучеников, чтобы они обрели непобедимую победу.

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ мона́шествующих Богодухнове́нное удобре́ние,/ Фео́доре прему́дре,/ уче́ньми твои́ми вся просвети́л еси́,/ цевни́це духо́вная,// моли́ Христа́ Бо́га спасти́ся душа́м на́шим.

Перевод: Православия наставник, благочестия учитель и чистоты, светильник вселенной, архиереев Богодухновенное украшение, Феодор премудрый, учениями твоими ты всех просветил, лира духовная; моли Христа Бога о спасении душ наших.

По́стническое и равноа́нгельное житие́ твое́/ страда́льческими уясни́л еси́ по́двиги/ и А́нгелом совсе́льник, Богоблаже́нне, яви́лся еси́, Фео́доре./ С ни́ми Христу́ Бо́гу моля́ся// не преста́й о всех нас.

Перевод: Постническую и подобную Ангелам жизнь твою ты прославил мученическим подвигом и поселился вместе с Ангелами, Богоблаженный Феодор, с ними же не переставай молиться Христу Богу обо всех нас.

О, свяще́нная главо́, преподо́бне о́тче, преблаже́нне а́вво Фео́доре! Не забу́ди убо́гих твои́х до конца́, но помина́й нас всегда́ во святы́х твои́х и благоприя́тных моли́твах к Бо́гу! Помяни́ ста́до твое́, е́же сам упасл еси́, и не забу́ди посеща́ти чад твои́х. Моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́; не премолчи́ за ны ко Го́споду, и не пре́зри нас, ве́рою и любо́вию чту́щих тя. Помина́й нас недосто́йных у Престо́ла Вседержи́теля, и не преста́й моля́ся о нас ко Христу́ Бо́гу: и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши. Не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со А́нгельскими во́инствами, со Безпло́тными ли́ки, с Небе́сными си́лами, у Престо́ла Вседержи́телева предстоя́щи, досто́йно весели́тся. Ве́дуще у́бо тя вои́стинну и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в, возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Бо́гу на́шему Иису́су Христу́; Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Терпе́нием свои́м ве́лию мзду на Небесе́х стяжа́л еси́,/ в бу́йство во́лею Христа́ ра́ди преложи́ся/ и на Не́бо мы́сленное, я́ко на колесни́це о́гненней,/ возше́л еси́, прему́дре Макси́ме./ Днесь мы ны́не чтим честны́х моще́й твои́х обре́тение/ вку́пе с благочести́выми и ве́рными людьми́ ца́рствующаго гра́да Москвы́,/ да вси вопие́м ти:/ моли́ Христа́ Бо́га// спасти́ся душа́м на́шим.

Перевод: Терпением своим великую награду на Небесах заслужил ты, по своей воле впал в безумие ради Христа и на Небо духовное, как на огненной колеснице, поднялся ты, премудрый Максим. Сегодня мы почитаем святых мощей твоих обретение вместе с благочестивыми и верующими людьми царствующего города Москвы, да все взываем к тебе: «Моли Христа Бога о спасении душ наших».

Нагото́ю теле́сною и теpпе́нием/ обнажи́л еси́ вpа́жия кова́pствия,/ облича́я неподо́бное его́ дея́ние,/ зе́льне стpажда́ со́лнечный ваp/ и ну́ждныя вели́кия сту́дени,/ мpа́за и огня́ не чул еси́,/ Бо́жиею по́мощию покpыва́емь,/ Макси́ме пpему́дpе,/ о ве́pою твоpя́щих па́мять твою́ че́стно,/ и усе́pдно пpитека́ющих к моще́м твои́м,// моли́ изба́витися от бед и паде́ния избежа́ти.

Перевод: Наготой телесной и терпением ты обнажил коварство врага, обличая нечестивые его дела, очень сильно страдая от солнечного зноя и вынужденно перенося великие холода, мороза и огня не чувствовал ты, покрываем Божией помощью, Максим премудрый, моли обо всех с верой и почтением празднующих память твою и с усердием притекающих к раке с мощами твоими, чтобы им избавиться от бед и избежать падения.

Ве́рою и любо́вию твое́ честно́е обре́тение пра́зднующих, блаже́нне,/ сохрани́ и соблюди́ от вся́кой зло́бы и собла́зна змии́на,/ и́маши бо дерзнове́ние ко Влады́це всех Христу́,/ Его́же моли́ спасти́ лю́ди, моля́щия ти ся,/ да вси вопие́м ти:// ра́дуйся, о́тче Макси́ме, ца́рствующему гра́ду Москве́ похвало́.

Перевод: С верой и любовью твое почитаемое обретение празднующих, блаженный, сохрани и убереги от всякого зла и соблазна диавольского, ибо ты имеешь дерзновение ко Владыке всех Христу, Его же моли о спасении людей, молящихся тебе, да все взываем к тебе: «Радуйся, отче Максим, слава царствующего города Москвы».

Вы́шния красоты́ жела́я,/ ни́жния сла́дости и теле́сная одея́ния в ничто́же вмени́л еси́,/ и нестяжа́ние па́че су́етнаго ми́ра возлюби́л еси́./ А́нгельское житие́ проходя́,/ сконча́лся еси́, блаже́нне Макси́ме:// с ни́миже Христа́ моли́ непреста́нно о всех нас.

Перевод: Небесной красоты желая, ты пренебрег земными наслаждениями и одеждой для тела и возлюбил нестяжание больше, чем суетный мир. Ангельское житие проходя, ты скончался, блаженный Максим. Моли с Ангелами Христа непрестанно обо всех нас.

Уго́дниче Бо́жий, моли́твенниче наш те́плый и ско́рый помо́щниче, блаже́нне Макси́ме! Припа́дающе к ра́це моще́й твои́х прославля́ем многотру́дныя по́двиги юро́дства твоего́ Христа́ ра́ди, возлюби́в бо Еди́наго Бо́га от всея́ души́ твоея́, ты мирски́ми красо́тами не восхоте́л еси́ наслажда́тися; родна́го жили́ща, любве́ сро́дник, бога́тства и сла́вы вре́менныя отре́клся еси́ и безприю́тное житие́ возлюби́л еси́. Прилежа́в о спасе́нии души́, плоть твою́ нагото́ю теле́сною, мра́зом и зно́ем, посто́м и бде́нием, долговре́менным на земли́ лежа́нием изнури́л еси́ и вся стра́сти ея́ ду́хови покори́л еси́, на земли́ пожи́в небе́сно, во пло́ти духо́вно, умо́м весь к преми́рным взе́мся, плотску́ю му́дрость отри́нул еси́ и, быв мудр о Христе́, юро́д ми́рови показа́лся еси́, от неразу́мных мно́гия оби́ды и бие́нии благоду́шно притерпева́я и мно́гих нечести́вых на путь спасе́ния наставля́я. Те́мже, по сконча́нии твои́х подвиго́в, всепра́ведный Судия́ нетле́нием честны́х твои́х моще́й и мно́гими чудесы́ тя просла́ви, ду́шу же твою́ святу́ю в Небе́сныя оби́тели всели́, иде́же, предстоя́ Престо́лу Непристу́пнаго Боже́ственнаго Све́та, в Нем, я́ко в зерца́ле, ви́диши на́ша ну́жды, слы́шиши на́ша к тебе́ проше́ния и я́ко друг Христо́в и́маше ве́лие к Нему́ дерзнове́ние моли́тися о нас. Сего́ ра́ди усе́рдно про́сим тя: помоли́ся Го́споду Бо́гу о нас, к земли́ приве́рженных, да и мы, в подража́ние твоему́ ангелоподо́бному на земли́ житию́, не погря́знем в су́етных жите́йских попече́ниих и в земны́х наслажде́ниих, не прельща́емся и не прилепля́емся все́ю душе́ю к тле́нным ми́ра сего́ бла́гом, но да обрати́т Госпо́дь Свое́ю благода́тию на́ша мы́сли и жела́ния к Небе́сным и укрепи́т жела́ти восприя́тия бу́дущих нетле́нных сокро́вищ, да пода́ст нам, сла́бым, си́лу к побежде́нию страсте́й, мы́слей и жела́ний грехо́вных, да плени́т наш кичли́вый ум в послуша́ние ве́ры, изба́вит от высокоу́мия, суему́дрия, ло́жных па́губных уче́ний и да́рует нам му́дрость духо́вную, да раствори́т окамене́нная сердца́ на́ша слеза́ми умиле́ния и сокруше́ния о на́ших согреше́ниих, согре́ет их любо́вию к Нему́, на́шему Созда́телю, и к бли́жним на́шим. Испроси́ всем, во вся́кой нужде су́щим и к твоему́ заступле́нию прибега́ющим, вся́кий дар, коему́ждо благопотре́бен: больны́м — исцеле́ние, печа́льным — утеше́ние, бе́дствующим — по́мощь, оби́женным — защи́ту. Принеси́ ко Го́споду святу́ю моли́тву о всех нас, многогре́шных, я́ко да не по грехо́м на́шим возда́ст нам, ниже́ по беззако́ниим на́шим нака́жет нас, но отврати́т вся́кий гнев, пра́ведно дви́жимый на ны, и проба́вит ми́лость Свою́, вся́ких нужд, бед, напа́стей, скорбей и боле́зней нас избавля́я, и́миже весть судьба́ми да наста́вит нас на путь спасе́ния, пода́ст про́чее вре́мя живота́ на́шего в покая́нии и благоче́стии прейти́ и христиа́нскую кончи́ну, неболе́зненну, непосты́дну, ми́рну, и Небе́снаго Ца́рствия насле́дие получи́ти со все́ми святы́ми во ве́ки веко́в. Ами́нь.

О, уго́дниче Бо́жий, блаже́нне Макси́ме! Помоли́ся Го́споду Бо́гу о нас, рабе́х Бо́жиих (имена), к земли́ приве́рженных, да обрати́т Госпо́дь на́ша мы́сли и жела́ния к Небе́сным и да укрепи́т бу́дущих нетле́нных сокро́вищ жела́ти, да пода́ст нам си́лу к побежде́нию страсте́й, мы́слей и жела́ний грехо́вных, да плени́т наш ум в послуша́ние ве́ры, да изба́вит от высокоу́мия, суему́дрия и му́дрость духо́вную нам да́рует: та́же окамене́нная сердца́ на́ша слеза́ми умиле́ния о гресе́х сокруше́ния да раствори́т и да согре́ет я́ к на́шему Созда́телю любо́вию и братолю́бием ко бли́жним на́шим. Блаже́нне Макси́ме, принеси́ ко Го́споду моли́тву о нас, я́ко да не по грехо́м на́шим возда́ст нам, ниже́ по беззако́нием на́шим нака́жет нас, но да проба́вит ми́лость Свою́ на нас, от вся́ких нужд, бед, напа́стей, скорбе́й и боле́зней избавля́я, и и́миже весть судьба́ми да наста́вит нас на путь спасе́ния, и да сподо́бит нас христиа́нскую кончи́ну неболе́знену, непосты́дну и ми́рну прия́ти и Небе́снаго Ца́рствия насле́дие получи́ти со все́ми святы́ми во ве́ки веко́в. Ами́нь.

От ю́ности, Богоблаже́нне, Христа́ возлюби́в,/ оте́чество оста́вил еси́/ и, всех мирски́х мяте́жей уклони́вся,/ в ти́хое приста́нище пречестны́я оби́тели Богома́терни дости́гл еси́;/ отню́дуже уве́дев непрохо́дную пусты́ню,/ крестови́дною заре́ю пока́занную,/ жела́тельне ю́ обре́л еси́,/ и, в ней всели́вся,/ и́ночествующих собра́л еси́,/ и сих уче́ньми свои́ми, я́ко ле́ствицею восхо́дною на Не́бо,/ трудолю́бно тща́лся еси́ возводи́ти к Бо́гу,/ Ему́же моли́ся, Богому́дре Марти́рие,// дарова́ти душа́м на́шим ве́лию ми́лость.

Перевод: С юности, в Боге блаженствующий, Христа возлюбив, ты оставил Отечество и от всей мирской суеты удалившись, в тихом пристанище досточтимой обители Богоматери ты оказался, оттуда увидев непроходимую пустыню, крестовидной зарей указанную, нашел ее подходящей, и в ней поселившись, монашествующих собрал и их своим учением, как лестницей восходящей на Небо, в неустанном труде старался ты приводить к Богу, Ему же молись, Богомудрый Мартирий, даровать душам нашим великую милость.

Оте́чества, преподо́бне, и всего́ мирска́го мяте́жа уклони́тися возжеле́л еси́,/ и, в пусты́ню всели́вся,/ та́мо во блаже́ннем безмо́лвии жесто́кое житие́ показа́л еси́,/ и ча́да послуша́ния и смире́ния в нем возрасти́л еси́./ Сего́ ра́ди, дерзнове́ние стяжа́в ко Святе́й Тро́ице,/ е́же моли́тися, Богоблаже́нне, о нас, ча́дех свои́х, и́хже собра́л еси́,/ и о всех правове́рных, да зове́м ти:// ра́дуйся, о́тче Марти́рие, безмо́лвия пусты́ннаго люби́тель.

Перевод: Отечества, преподобный, и всей мирской суеты удалиться ты пожелал и в пустыне поселился, там, в блаженном безмолвии, трудную жизнь явил и детей послушания и смирения [монахов] в ней вырастил. Из-за того обрел дерзновение [смелость, решительное устремление] молиться Святой Троице о нас, детях своих, которых ты собрал, и обо всех верующих, призываем тебя: радуйся, отец Мартирий, безмолвия пустынного любитель.

О, па́стырю до́брый, наста́вниче наш, преподо́бне о́тче Марти́рие! Услы́ши е́же к тебе́ ны́не приноси́мое моле́ние на́ше. Ве́мы бо, я́ко ду́хом с на́ми пребыва́еши. Ты у́бо, преподо́бне, я́ко име́я дерзнове́ние ко Влады́це, Иису́су Христу́, Бо́гу на́шему, и ко Пречестне́й Богома́тери, бу́ди хода́тай и моли́твенник те́плый о оби́тели сей, ю́же возгради́л еси́, и о нас, недосто́йных рабе́х, живу́щих в ней, ея́же ты просвети́тель сый и нача́льник, богосо́бранному твоему́ бра́тству помо́щник и засту́пник, я́ко да твои́м предста́тельством и моли́твами невреди́мы на ме́сте сем пребу́дем; от бесо́в же и злых челове́к ненаве́тованны и от всех бед и напа́стей свобо́дни сохрани́мся. Всем же отвсю́ду приходя́щим во святу́ю оби́тель твою́ и моля́щимся тебе́ с ве́рою и покланя́ющимся ра́це моще́й твои́х, о е́же изба́витися от вся́кия ско́рби, боле́зни и напа́сти, ми́лостивне поспеши́, дарова́ти же правосла́вным мир, тишину́, благоде́нствие и изоби́лие плодо́в земны́х; и о всех нас те́плый предста́тель ко Го́споду и помо́щник душа́м на́шим бу́ди, е́же отпусти́тися согреше́ниям на́шим и моли́твами твои́ми, свя́те, изба́витися нам ве́чнаго муче́ния и сподо́битися ца́рствия со все́ми святы́ми, да сла́ву, благодаре́ние и поклоне́ние возсыла́ем еди́ному Бо́гу, в Тро́ице сла́вимому, Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.

В терпе́нии добрострада́льных по́двиг твои́х/ многообра́зныя ра́ны претерпе́л еси́,/ и по кончи́не свое́й/ вене́ц от Бо́га с му́ченическими ли́ки восприе́млеши,/ и в земли́ кро́тких досто́йно водворя́ешися, блаже́нне,/ о нас Христа́ Бо́га моли́// дарова́ти душа́м на́шим ве́лию ми́лость.

Ца́рство, е́же на земли́ до́бре окормля́я, страда́льче,/ и, багряни́цу нося́, смире́нно стяжа́л еси́ мудрова́ние,/ ни́щих посеща́я и сим хлеб раздробля́я,/ тем Пребоже́ственная Тро́ица// Ца́рствия ку́пно и му́ченичества венце́м увязе́ тя.

В царе́х благоче́стно пожи́в/ и страда́ния путь проше́д, веледу́шне,/ и страда́льцем равноче́стен вене́чник яви́лся еси́,/ и це́рковь твоя́ прославля́ет тя сла́вно,/ святы́ми благоуха́нными мощми́ твои́ми освяща́ема,/ те́мже почита́ем и та́йно вопие́м ти:// от бед изба́ви нас моли́твами твои́ми, свя́те.

Друга́го Константи́на стяжа́ тя Це́рковь благоче́стием, блаже́нне,/ и кро́тостию, пра́вдою и ми́лостынями,/ но и великому́ченика и страда́льца и́стинна./ Те́мже и, тобо́ю кра́сящися, вопие́т:// Стефа́н мне похвала́ и утвержде́ние.

Ца́рскую диади́му обагри́л еси́ кро́вию твое́ю, Богому́дре великому́чениче,/ за скиптр крест в ру́ку прии́м,/ яви́лся еси́ победоно́сец/ и я́ко же́ртву непоро́чну прине́сл еси́ себе́ Бо́гу./ От роди́телей твои́х о́чию зе́ницы лише́н был еси́,/ и в заточе́нии пребы́л еси́,/ и от свои́х уда́влен еси́./ И ны́не, ра́дуяся, предстои́ши Святе́й Тро́ице./ Тем пра́зднуем днесь пренесе́ние честны́х моще́й твои́х/ и обновле́ние честна́го киво́та,/ блаже́нне Стефа́не, моли́ся о держа́ве сро́дник твои́х,/ благоуго́дней бы́ти ей// и сыново́м се́рбским спасти́ся.

Я́ко звезду́ тя пресве́тлу, Це́рковь похваля́ет и почита́ет,/ от восто́ка возсия́вшую/ и на за́пад прише́дшую,/ всю бо страну́ Се́рбскую чудесы́ и добро́тою обогаща́вши и просвеща́вши,/ и ве́рою чту́щия пренесе́ние моще́й и обновле́ние честна́го киво́та,/ великому́чениче, царю́ Се́рбский Стефа́не,/ моли́ спасти́ оте́чество твое́ и вся правосла́вныя христиа́ны,/ притека́ющия к ра́це моще́й твои́х и ве́рно вопию́щия ти:// ра́дуйся, Стефа́не, му́чеников украше́ние.

Бла­жен­ный Мак­сим, Хри­ста ра­ди юро­ди­вый, жил в Москве. О его ро­ди­те­лях, вре­ме­ни и ме­сте рож­де­ния ни­че­го не из­вест­но. Свя­той Мак­сим из­брал один из са­мых труд­ных и тер­ни­стых пу­тей ко спа­се­нию, доб­ро­воль­но, Хри­ста ра­ди при­няв на се­бя ли­чи­ну юро­ди­во­го. Ле­том и зи­мой Мак­сим хо­дил по­чти на­гим, пе­ре­но­ся с мо­лит­вой и зной, и хо­лод. «Хоть лю­та зи­ма, но сла­док рай», – го­во­рил он, по­учая всех тер­пе­нию и пе­ре­не­се­нию жи­тей­ских невзгод.

Русь очень лю­би­ла сво­их юро­ди­вых, це­ни­ла их глу­бо­чай­шее сми­ре­ние, вни­ма­ла их муд­ро­сти, вы­ска­зан­ной до­ход­чи­во и об­раз­но на­род­ным язы­ком по­сло­виц. И слу­ша­ли юро­ди­вых все: от ве­ли­ких кня­зей до по­следне­го бед­ня­ка.

Бла­жен­ный Мак­сим жил в тя­же­лые для рус­ско­го на­ро­да вре­ме­на. Та­тар­ские на­бе­ги, за­су­ха, эпи­де­мии раз­оря­ли и гу­би­ли лю­дей. Свя­той го­во­рил обез­до­лен­ным: «Не все по шер­сти, ино и на­про­тив... за де­ло по­бьют, по­ви­нись да по­ни­же по­кло­нись; не плачь би­тый, плачь неби­тый; от­тер­пим­ся, и мы лю­ди бу­дем; ис­под­воль и сы­рые дро­ва за­го­ра­ют­ся; за тер­пе­ние даст Бог спа­се­ние». Но не толь­ко сло­ва уте­ше­ния го­во­рил свя­той. Его гнев­ных об­ли­че­ний стра­ши­лись силь­ные ми­ра се­го: куп­цы и мос­ков­ская знать. Бла­жен­ный Мак­сим го­во­рил им, знат­ным да бо­га­тым: «Бож­ни­ца до­маш­ня, а со­весть про­даж­на; всяк кре­стит­ся, да не всяк мо­лит­ся; Бог вся­кую неправ­ду сы­щет. Ни Он те­бя, ни ты Его не об­ма­нешь». Об­ли­че­ния юро­ди­во­го не оста­ва­лись бес­плод­ны­ми, мно­гие из моск­ви­чей об­ра­ща­ли свои серд­ца к Бо­гу.

Скон­чал­ся бла­жен­ный Мак­сим 11 но­яб­ря 1434 го­да и был по­гре­бен у церк­ви свя­тых кня­зей Бо­ри­са и Гле­ба. Гос­по­ду бы­ло угод­но про­сла­вить чу­де­са­ми Сво­е­го угод­ни­ка: у гро­ба свя­то­го ста­ли со­вер­шать­ся ис­це­ле­ния. 13 ав­гу­ста 1547 го­да бы­ли об­ре­те­ны нетлен­ные мо­щи бла­жен­но­го Мак­си­ма и то­гда же ему бы­ло уста­нов­ле­но празд­но­ва­ние. В Окруж­ной гра­мо­те мит­ро­по­ли­та Мос­ков­ско­го Ма­ка­рия ска­за­но: «Пе­ти и празд­но­ва­ти на Москве, ав­гу­ста в 13-й день, но­во­му чу­до­твор­цу Мак­си­му, Хри­ста ра­ди юро­ди­во­му». Храм в честь бла­го­вер­ных кня­зей Бо­ри­са и Гле­ба, ря­дом с ко­то­рым был по­гре­бен свя­той Мак­сим, сго­рел в 1568 го­ду. Но свя­тые мо­щи Мак­си­ма оста­ва­лись под спу­дом. Бла­го­го­вей­ные по­чи­та­те­ли па­мя­ти свя­то­го по­стро­и­ли над его мо­ги­лой при­дел в честь свя­то­го Мак­си­ма Ис­по­вед­ни­ка.

В «Уста­ве цер­ков­ных об­ря­дов, со­вер­шав­ших­ся в Мос­ков­ском Успен­ском со­бо­ре» (око­ло 1634 г.) под 11 но­яб­ря ска­за­но: «Мак­си­му юро­ди­во­му: бла­го­вест в ле­бедь, се­ред­ней»; под 12/13 ав­гу­ста: «Празд­но­ва­ли преж­де се­го Мак­си­му бла­жен­но­му: бла­го­вест в ле­бедь, звон се­ред­ней; а ныне толь­ко празд­ну­ют в но­яб­ре, а по­ют по уста­ву».

В 1698 го­ду по усер­дию мос­ков­ских жи­те­лей Мак­си­ма Вер­хо­ви­ти­на и Мак­си­ма Ша­ров­ни­ко­ва ста­рый Бо­ри­со­глеб­ский храм был разо­бран; при этом от­ва­лив­ший­ся от сте­ны ка­мень от­крыл ве­ли­кое со­кро­ви­ще – це­леб­ные мо­щи свя­то­го бла­жен­но­го Мак­си­ма. Они бы­ли с че­стью пе­ре­не­се­ны в один из мос­ков­ских со­бо­ров, где и на­хо­ди­лись во все вре­мя по­строй­ки но­во­го хра­ма. По окон­ча­нии стро­и­тель­ства он был освя­щен во имя бла­жен­но­го Мак­си­ма Мос­ков­ско­го с при­де­лом в честь прп. Мак­си­ма Ис­по­вед­ни­ка. Око­ло со­ро­ка лет хра­ни­лись мо­щи бла­жен­но­го в этом хра­ме. В 1737 го­ду про­изо­шел силь­ный по­жар, во вре­мя ко­то­ро­го сго­рел храм во имя Мак­си­ма Мос­ков­ско­го. Уцелев­шие ча­сти мо­щей бла­жен­но­го Мак­си­ма бы­ли бла­го­го­вей­но со­бра­ны и пе­ре­да­ны в Мак­си­мов­ский храм в 1768 г. Свя­щен­ни­ку это­го хра­ма Ни­ки­те Ива­но­ву бы­ло по­ру­че­но из­го­то­вить ки­па­ри­со­вый ков­чег, укра­шен­ный се­реб­ром, что и бы­ло им ис­пол­ненено в 1770 го­ду.

В «По­ве­сти» о пе­ре­не­се­нии мо­щей бла­жен­но­го Мак­си­ма ска­за­но: «О свя­том же жи­тии его и чу­де­сех его гла­го­лют мно­зи, еже бы­ла не ма­лая кни­га на­пи­са­ная, но не вем, ка­ко из церк­ви из­ги­бе или кто у преж­де быв­ших свя­щен­ни­ков взял ра­ди спи­са­ния».

См. так­же: "Па­мять бла­жен­но­го Мак­си­ма, Хри­ста ра­ди юро­ди­во­го, мос­ков­ско­го чу­до­твор­ца" в из­ло­же­нии свт. Ди­мит­рия Ро­стов­ско­го.

Канон святому блаженному Максиму Московскому, Христа ради юродивому

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святы́й блажéнный óтче Макси́ме, моли́ Бо́га о на́с.

Прича́стием е́же к Бо́гу, преподо́бне, све́т бы́л еси́ и, к Нему́ отлучи́вся, Макси́ме блаже́нне, жела́нием кра́йним, благи́м наде́ждам свои́м, о́тче, исполне́ние прия́л еси́.

Жела́нием е́же к Бо́гу распала́емь, ми́р оста́вил еси́, спу́тника, о́тче, обре́т, Христа́, Макси́ме сла́вне, с Ни́мже стезю́ проше́л еси́ спаси́тельную, ра́дуяся.

Обогати́тися ника́коже истоща́емыми возжеле́в, бога́тство и сла́ву вре́менную, му́дре, и пи́щу мимотеку́щую, и мирско́е достоя́ние доблему́дренно отри́нул еси́.

Богоро́дичен: Кра́сную, и избра́нную, и всечестну́ю разуме́в Тя́, Сы́н Бо́жий, Пренепоро́чная, Сы́н Тво́й бы́сть, сы́ны сотвори́ благода́тию, Влады́чице, чту́щия Тя́.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Усе́рдно к мы́сленным совлече́ся дея́нием, побежда́я вра́жия полки́ Боже́ственным посо́бием Ду́ха.

Ра́нами, и моли́твенным воздержа́нием, и бие́нии, преподо́бне, стра́сти мирски́я, о́тче Макси́ме, уязви́л еси́.

Умори́ша врага́ по́стницы Твои́, Иису́се, умерщвле́ние ра́достно, Влады́ко, Твое́ живоно́сное возжеле́вше.

Богоро́дичен: Избавля́ющаго челове́ки преслуша́ния, лю́таго паде́ния, всему́ Вино́внаго, Чи́стая и Всенепоро́чная, родила́ еси́.

Седа́лен, гла́с 8:

Све́том Боже́ственным озаря́емь, в пу́ть, веду́щий к Боже́ственным сия́нием, ходи́л еси́ ве́рно, о́тче преподо́бне, и вра́жиих отбе́гл еси́ прило́г, и сы́н све́та и дне́ яви́лся еси́, Макси́ме богоблаже́нне.

Сла́ва: О́тче богому́дре и преблаже́нне Макси́ме, кра́сная ми́ра сего́ я́ко уме́ты вмени́в, ве́сь, умо́м измени́вся, изме́ншемуся на́с ра́ди Христу́ после́довал еси́, и юро́д Его́ ра́ди наре́клся еси́ и от неразу́мных ско́рби претерпе́л еси́. И ны́не о на́с моли́ся, па́мять твою́ ве́рно сла́вящих, прехва́льне.

Богоро́дичен: Предста́тельнице ве́рных, Богороди́тельнице, скорбя́щих ра́досте и пла́чущих вели́кое утеше́ние, от чре́ва Твоего́, Де́во, всесвята́го преесте́ственно Ро́ждшагося непреста́нно моли́ с Макси́мом преблаже́нным изба́вити на́с в ча́с испыта́ния лю́таго осужде́ния.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Соедини́вся к стезе́ пра́вды, в богоспаса́емый Боже́ственный гра́д вше́л еси́, преподо́бне, спаси́тельным сия́нием обогати́вся.

Единообра́зный, преподо́бне, смы́сл богоно́сный ви́дев, боже́ственными повестьми́ и боже́ственною оде́ждею оде́ялся еси́.

Се́рдце твое́ скрижа́ль очище́ну, Свята́го Ду́ха благода́ть, обре́тши, о́тче, написа́ соверше́нное безстра́стие и любо́вь нелицеме́рну.

Богоро́дичен: Седя́й на престо́ле превознесе́нне херуви́мстем, я́ко престо́л, Тя́ име́я, на руке́ Твое́й почи́, Мари́е Богоневе́сто, Препросла́вленный Бо́г.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Пресве́тлую зарю́, Макси́ме, прии́мь, я́ко со́лнце, яви́лся еси́ и де́монскую тму́ отгна́л еси́, достосла́вне.

Твои́м жела́нием, Христе́, отве́рг все́ преподо́бный жела́ние теле́сное, я́коже сгре́бие мирско́е оттрясе́.

Си́лою Боже́ственною ду́шу укрепи́в, в ми́р всели́лся еси́, опустева́я стра́сти, о́тче богому́дре Макси́ме.

Богоро́дичен: Раче́ние преста́ тле́нное, Де́ва бо нетле́нно роди́ Бо́га Сло́ва, па́че естества́ и сло́ва Де́ва пребыва́ет.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

У́м тво́й ве́сь к Бо́гу простира́я непреста́нными поуче́нии, плотску́ю любо́вь не пощаде́л еси́, благи́х тебе́ хода́тайству, Макси́ме, присвое́ние.

Ни скве́рны, ни вра́ски прия́л еси́, блаже́нне, посреде́ тебе́ ми́ра живу́щу, честны́ми же па́че мольба́ми твои́ми очища́еши от душе́вныя скве́рны притека́ющия.

Ты́, плотски́х мудрова́ний вы́шше име́я по́мысл, не уязви́лся еси́, посреде́ же́н обнажа́емь: безстра́стия бо оде́ждею, Макси́ме, оде́ялся еси́.

Богоро́дичен: Усты́, и по́мыслом, и се́рдцем, Пресвята́я Богоро́дице, Тя́ пропове́дуем: Тобо́ю Бо́гу примири́хомся, отринове́ннии преступле́нием пе́рвее пра́отца.

Конда́к, гла́с 2:

Вы́шния красоты́ жела́я, ни́жния сла́дости и теле́сная одея́ния в ничто́же вмени́л еси́ и нестяжа́ние па́че су́етнаго ми́ра возлюби́л еси́. А́нгельское житие́ проходя́, сконча́лся еси́, блаже́нне Макси́ме: с ни́миже Христа́ моли́ непреста́нно о все́х на́с.

И́кос:

А́нгел на земли́ житие́м показа́вся, а́нгельския полки́ удиви́л еси́, и де́моны устраши́л еси́, и челове́ки просвети́л еси́ чуде́с твои́х заря́ми, богоно́се и преблаже́нне о́тче на́ш Макси́ме. И ны́не на́с вразуми́ воспева́ти пе́снь к твоему́ хвале́нию, ра́достным гла́сом си́це глаго́лющих: ра́дуйся, оста́вивый тле́нное мудрова́ние и прие́мый нетле́нный вене́ц; ра́дуйся, терпели́вый душе́ю; ра́дуйся, целому́дренный ра́зумом и к Бо́гу воззре́нием; ра́дуйся, предо́блий юро́де, и́же злоко́зненнаго врага́ под нога́ми сотры́й; ра́дуйся, я́ко ни́жнее мудрова́ние оста́вль и вы́шняго Ца́рствия дости́гий; ра́дуйся, цели́телю боле́зней и отгони́телю страсте́й; ра́дуйся, Макси́ме блаже́нне, моля́ непреста́нно о все́х на́с.

Пе́снь 7.

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Содержи́мь Христо́вою подо́бно, о́тче, боже́ственною любо́вию, други́х спасти́ ра́достно ве́сь са́м ся, вопия́, изда́л: благослове́н Бо́г оте́ц на́ших.

С небесе́ тебе́ пода́нную, о́тче, прии́м пи́щу, се́ю препита́л еси́ благопоко́рно прие́млющия твоя́ повеле́ния и до́лу влеку́щий гре́х оставля́ющия, блаже́нне.

После́довав оте́ческим преда́нием, о́тче му́дре, па́губы отринове́ние запове́да, зову́щим: благослове́н Бо́г оте́ц на́ших.

Богоро́дичен: Вы́шняго освяще́нное Боже́ственное селе́ние, ра́дуйся, Тобо́ю бо даде́ся ра́дость, Богоро́дице, зову́щим: благослове́на Ты́ в жена́х, Всенепоро́чная Влады́чице.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Всесве́тлая звезда́ су́щ во тме́ и стра́сти, световодя́ к жи́зни све́тлей: твори́ши бо жены́ нечи́стыя целому́дренно жи́ти и отго́ниши лю́тыя неду́ги, вопия́: благослови́те, вся́ дела́ Госпо́дня, Го́спода.

Ты́ исцели́ у́м мо́й в кро́ве чу́дных и му́дрых, преподо́бне, повеле́ний Бо́жиих, мно́ги улови́л еси́ юро́дствовати Го́спода ра́ди, ве́дый наруга́емь бы́ти, вопия́ чисте́йшею душе́ю: благослови́те, вся́ дела́ Госпо́дня, Го́спода.

Соверше́н еди́н, И́же ве́сть Своя́ прославля́ти, Госпо́дь, преподо́бныя. Се́й бо гро́бу посыла́емь и а́нгелов светлословле́нии почита́емь, вопию́щих: благослови́те, вся́ дела́ Госпо́дня, Го́спода.

Богоро́дичен: Избавля́яй на́с, возсия́ из Тебе́ Госпо́дь, Де́во Чи́стая, Его́же моли́, Влады́чице, просвети́ти пою́щия Тя́ и обстоя́ния на́с изба́вити, вопию́щия: благослови́те, вся́ дела́ Госпо́дня, Го́спода.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Все́м се́рдцем, Макси́ме, Тро́ице усе́рдно предложи́вся и от Нея́ лучи́ богоде́льно прие́м, светови́ден бы́л еси́ и со а́нгелы лику́еши.

Жела́нием боже́ственным приедини́вся и воздержа́нием просвеща́емь, бу́дущих бла́г в прича́стии уже́ бы́в, Макси́ме богоблаже́нне, и в наслажде́нии.

Твоя́ боле́зни и по́ты прия́т весе́лие, ника́коже конца́ иму́щее, в не́мже пита́яся, Макси́ме преподо́бне, на́с непреста́нно помина́й.

Богоро́дичен: Разори́ души́ моея́ о́блаки, Све́та о́блаче, Свята́я Влады́чице, и си́льна соде́лай мя́ на стра́сти, борю́щия мя́, Спа́са все́х ро́ждшая и Изба́вителя.

Свети́лен.

А́нгельскаго жития́ жела́я, преподо́бне, покори́л еси́ стра́сти плотски́я му́жески и равноа́нгелен бы́л еси́, богоно́се о́тче Макси́ме.

Богоро́дичен: Тя́ Предста́тельницу и́мамы вси́ гре́шнии, о Пресвята́я Де́во! Ты́ благопреме́нна сотвори́ Твоего́ Сы́на ма́терними Твои́ми моли́твами.

Канон святому блаженному Максиму Московскому, Христа ради юродивому (2-й)

Пе́снь 1.

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Святы́й блажéнный óтче Макси́ме, моли́ Бо́га о на́с.

Пода́ждь ми́, Христе́, Ду́ха Твоего́ благода́ть, да по достоя́нию воспою́ пе́снь но́ву от усте́н мои́х в па́мять Твоего́ уго́дника Макси́ма преблаже́ннаго.

И́же кре́ст на ра́мо взе́м, блаже́нне, и жела́емаго ти́ оте́чества дости́г, го́рняго Иерусали́ма, и в не́м со а́нгелы лику́еши, юро́де прему́дрый, моли́ся о на́с, чту́щих па́мять твою́ всечестну́ю.

Бу́йством премени́в мирско́е мудрова́ние, о́тче, непокрове́нно те́ло име́я, блаже́нне, покры́й на́ша стра́сти, богому́дре, да твои́ми моли́твами от бе́д избавля́емся.

Богоро́дичен: Успи́ души́ моея́ свире́пую во́лну, я́ко мно́жество прегреше́ний, искуше́ний и печа́ли, Влады́чице, воста́ша на мя́, но Сама́ мя спаси́.

Пе́снь 3.

Ирмо́с: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Умо́м ве́сь к преми́рным взе́мся, блаже́нне, юро́д прозва́лся еси́, о́тче, и на́с, умовре́дных, сохрани́, да неврежде́ни пребу́дем козньми́ чужда́го, и тебе́ ублажа́ем, Макси́ме преблаже́нне.

Ва́ром со́лнечным опаля́емь, о́тче, и на́с, пали́мых грехо́вными страстьми́, ороси́ твои́ми моли́твами, да непреста́нно воспева́ем па́мять твою́, Макси́ме прехва́льне.

Зимо́ю томи́мь, свя́те, небре́гл еси́ о те́ле пе́рстнем и ны́не наслажда́ешися ра́йския добро́ты. И на́м проси́ оставле́ния, озло́бленным прило́ги чужда́го, да тебе́ ублажа́ем, о́тче богому́дре.

Богоро́дичен: Я́же еди́на в напа́стех и ско́рбех защища́ющи, под кро́в Тво́й, Пречи́стая, прибе́гша те́пле, приими́, я́ко Преблага́я, е́же от се́рдца моего́ моле́ние.

Седа́лен, гла́с 8:

Све́том Боже́ственным озаря́емь, в пу́ть, веду́щий к Боже́ственным сия́нием, ходи́л еси́ ве́рно, о́тче преподо́бне, и вра́жиих отбе́гл еси́ прило́г, и сы́н све́та и дне́ яви́лся еси́, Макси́ме богоблаже́нне.

Сла́ва: О́тче богому́дре и преблаже́нне Макси́ме, кра́сная ми́ра сего́ я́ко уме́ты вмени́в, ве́сь, умо́м измени́вся, изме́ншемуся на́с ра́ди Христу́ после́довал еси́, и юро́д Его́ ра́ди наре́клся еси́ и от неразу́мных ско́рби претерпе́л еси́. И ны́не о на́с моли́ся, па́мять твою́ ве́рно сла́вящих, прехва́льне.

Богоро́дичен: Предста́тельнице ве́рных, Богороди́тельнице, скорбя́щих ра́досте и пла́чущих вели́кое утеше́ние, от чре́ва Твоего́, Де́во, всесвята́го преесте́ственно Ро́ждшагося непреста́нно моли́ с Макси́мом преблаже́нным изба́вити на́с в ча́с испыта́ния лю́таго осужде́ния.

Пе́снь 4.

Ирмо́с: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Любве́ сро́дников отре́клся, блаже́нне, любо́вию Христо́вою уязвля́емь, и пло́ть, я́коже рабы́ню, ду́хови покори́в, над страстьми́ ца́рь показа́лся еси́, о́тче. И на́с, плене́нных грехо́вными страстьми́, свободи́, богому́дре.

Стезе́ю приско́рбнаго пути́ ше́ствовав, блаже́нне, и простра́ннаго жили́ща доше́д, с безпло́тными ликовствова́ти сподо́бился еси́, о́тче богоно́се.

Вла́сть прии́м на дусе́х нечи́стых, о́тче Макси́ме, си́х от челове́к прогоня́еши, вся́кими неду́ги боля́щия исцелева́еши, с ве́рою приходя́щия к ра́це моще́й твои́х.

Богоро́дичен: Ми́лости Твое́й сподо́би мя́, благоми́лостивное Сло́во ро́ждши, и ны́не, Влады́чице, прибега́юща мя́ к Тебе́ спаси́.

Пе́снь 5.

Ирмо́с: Возсия́й ми́, Го́споди, све́т повеле́ний Твои́х, я́ко к Тебе́ ду́х мо́й у́тренюет и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра.

Юро́д яви́лся еси́ изволе́нием, о́тче, и о́ному ди́вному Андре́ю после́довал еси́. И я́коже то́й ви́де духо́вныма очи́ма Богоро́дицу на возду́се, за ми́р моля́щуюся, ты́ же ны́не зри́ши Святу́ю Тро́ицу, моля́ся непреста́нно о душа́х на́ших.

Ревни́тель бы́в ди́вному Симео́ну, пусты́ню и све́рстника оста́вльшему, и юро́дство на ся́ возложи́вшему, и го́рния митропо́лии дости́гшу, с ни́мже ны́не и ты́ наслажда́ешися, и на́с помина́й, пра́зднующих па́мять твою́ всечестну́ю.

Вторы́й Твердисло́в в Росси́и показа́лся еси́, о́тче Макси́ме, непокрове́но те́ло име́я, покры́й на́с покро́вом моли́тв твои́х, да не уязви́т на́с уязви́вый пра́отца преступле́нием.

Богоро́дичен: От ко́рене исто́чник и вину́ нетле́ния, Тя́, Де́во, вси́ ве́рнии хвала́ми почита́ем: Ты́ бо Ипоста́сное на́м Безсме́ртие родила́ еси́.

Пе́снь 6.

Ирмо́с: Очище́ние на́м, Христе́, и спасе́ние, Влады́ко, возсия́л еси́ от Де́вы, да я́ко проро́ка от зве́ря морска́го пе́рсей Ио́ну, от тли́ исхити́ши всего́ Ада́ма всеро́дна па́дшаго.

На безстра́стия го́ру возше́д доброде́тельми, на враги́ храбо́рник чу́ден показа́лся еси́: и ны́не моли́ся Христу́ Бо́гу об оте́честве на́шем, я́ко да твои́ми моли́твами проти́внии побежда́ются.

Чуде́с исто́чник ра́ка твоя́ яви́ся, Макси́ме блаже́нне, от нея́же оби́льно вси́ притека́ющии прие́млют телесе́м здра́вие и душа́м спасе́ние твои́ми моли́твами.

Прему́дростию ра́зума объя́т, о́тче, су́етную му́дрость бу́йством премину́л еси́ и утае́ная от му́дрых и разу́мных Тро́ическим благоволе́нием позна́л еси́.

Богоро́дичен: Моисе́й в купине́ Тя ви́де, в горе́ прие́млющу нестерпи́мый Божества́ о́гнь неопа́льно, те́м Тя́ вси́ пе́сньми велича́ем.

Конда́к, гла́с 2:

Вы́шния красоты́ жела́я, ни́жния сла́дости и теле́сная одея́ния в ничто́же вмени́л еси́ и нестяжа́ние па́че су́етнаго ми́ра возлюби́л еси́. А́нгельское житие́ проходя́, сконча́лся еси́, блаже́нне Макси́ме: с ни́миже Христа́ моли́ непреста́нно о все́х на́с.

И́кос:

А́нгел на земли́ житие́м показа́вся, а́нгельския полки́ удиви́л еси́, и де́моны устраши́л еси́, и челове́ки просвети́л еси́ чуде́с твои́х заря́ми, богоно́се и преблаже́нне о́тче на́ш Макси́ме. И ны́не на́с вразуми́ воспева́ти пе́снь к твоему́ хвале́нию, ра́достным гла́сом си́це глаго́лющих: ра́дуйся, оста́вивый тле́нное мудрова́ние и прие́мый нетле́нный вене́ц; ра́дуйся, терпели́вый душе́ю; ра́дуйся, целому́дренный ра́зумом и к Бо́гу воззре́нием; ра́дуйся, предо́блий юро́де, и́же злоко́зненнаго врага́ под нога́ми сотры́й; ра́дуйся, я́ко ни́жнее мудрова́ние оста́вль и вы́шняго Ца́рствия дости́гий; ра́дуйся, цели́телю боле́зней и отгони́телю страсте́й; ра́дуйся, Макси́ме блаже́нне, моля́ непреста́нно о все́х на́с.

Пе́снь 7.

Ирмо́с: Спасы́й во огни́ Авраа́мския Твоя́ о́троки, и халде́и уби́в, я́же пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Прича́стием Свята́го Ду́ха просвеще́н, блаже́нне, измени́вся добро́ты теле́сныя и позо́р бы́в челове́ком, непокрове́но те́ло тле́нными оде́ждами име́я, Христу́ вопия́л еси́: благослове́н Бо́г оте́ц на́ших.

Нищету́ и юро́дство изво́лив, преподо́бне, на́с ра́ди Обнища́вшаго и Сего́ ле́гкий яре́м на ра́мена взе́м, Тому́ после́довал еси́, Христу́, вопия́: благослове́н Бо́г оте́ц на́ших.

Злому́драго врага́ ко́зни премудри́в, юро́де прехва́льне, и сего́, я́ко ры́бу безгла́сну, сотвори́л еси́, богому́дре, Христу́ вопия́: благослове́н Бо́г оте́ц на́ших.

Богоро́дичен: Я́коже ло́жницу Бо́жию и кади́льницу разу́мнаго и светоно́снаго У́гля, Приснора́дованную воспое́м, зову́ще: ра́дуйся, вина́ спаси́тельнаго воззва́ния, Благослове́нная во ве́ки.

Пе́снь 8.

Ирмо́с: Изба́вителю все́х, Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Присво́ився Соде́телю все́х, о́тче, и грехо́вныя я́зи удали́вся, прия́л еси́ небе́сное насле́дие и, со а́нгелы лику́я, вопия́л еси́: благослови́те, вся́ дела́ Госпо́дня, Го́спода.

Ю́ношеских и плотски́х страсте́й удержа́л еси́ взыгра́ния, очи́стив вся́кия скве́рны ду́шу же и те́ло, Макси́ме преблаже́нне, хра́м показа́лся еси́ нескве́рнен Бо́гу, Ему́же непреста́нно вопие́ши: благослови́те, вся́ дела́ Госпо́дня, Го́спода.

Незаходи́мый возсия́ тебе́ све́т, о́тче богому́дре, присносу́щнаго весе́лия, в не́мже ны́не наслажда́ешися, предстоя́ Святе́й Тро́ице и воспева́я Христа́ во вся́ ве́ки.

Богоро́дичен: Тя́ ору́жие непобеди́мое на враги́ предлага́ем, Тя́ основа́ние и наде́жду на́шего спасе́ния, Богоневе́сто, и́мамы и Тя́ воспева́ем во ве́ки.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Я́коже тве́рдый адама́нт душе́ю показа́лся еси́, непоколеби́мь вра́жиими прило́ги, о́тче, и на́м тве́рдое забра́ло бу́ди, блаже́нне, моли́твами твои́ми от нахожде́ний проти́вных.

Освяти́ся возду́х, Макси́ме блаже́нне, па́мятию твое́ю, и на́с торжествова́ти подвиза́ет ра́достно освяще́нное твое́ пра́зднество.

Жезло́м доброде́телей страсте́й мо́ре пресе́к и го́рдаго врага́, я́коже ина́го фарао́на, моли́твами твои́ми погрузи́в, избра́нное ста́до но́ваго Изра́иля невре́дно соблю́л еси́, Макси́ме блаже́нне, моли́твами твои́ми.

Богоро́дичен: Ски́ния свиде́тельства Тя́ прообрази́, Хле́б И́стинный жи́зни прие́мшую, Чи́стая, Сло́во Отца́ Соприсносу́щное.

Свети́лен.

А́нгельскаго жития́ жела́я, преподо́бне, покори́л еси́ стра́сти плотски́я му́жески и равноа́нгелен бы́л еси́, богоно́се о́тче Макси́ме.

Богоро́дичен: Тя́ Предста́тельницу и́мамы вси́ гре́шнии, о Пресвята́я Де́во! Ты́ благопреме́нна сотвори́ Твоего́ Сы́на ма́терними Твои́ми моли́твами.