Кондак 1

Избранному от Небеснаго Пастыреначальника и от святаго Духа поставленному в пасты страны Рязанския и Муромския, прославльшему святым житием и чудесы, похвальная пения приносим ти, святителю Христов Василие. Ты же, яко имеяй дерзновение ко Господу, от всяких нас зол и обстояний свобождай, да с радостию и благодарением всегда тебе зовем:

Радуйся, Василие, Первосвятителю Рязанский и предивный чудотворче!

Икос 1

Ангелу Божию подобен был еси, святителю Христов, светлостию ума твоего, чистотою сердца и незлобием, пожив на земли, аки безплотен: сего ради прослави тя Всевышний Господь нетлением честных мощей твоих и дивными чудесы. Темже с любовию благоговейно зовем ти:

Радуйся, прежде рождения твоего на служение спасению людей свыше предизбранный; радуйся, от пелен младенческих Господу Богу посвященный.

Радуйся, от юности твоея всем сердцем Господа возлюбивый; радуйся, вся благая и красная мира сего Господа ради презревый.

Радуйся, в повелениях Господних всегда усердно ходивый; радуйся, всякими боголюбезными добродетельми душу твою украсивый.

Радуйся, ум твой весь ко Господу устремивый; радуйся, высокий образ иноческих подвигов в житии твоем явивый.

Радуйся, Василие, Первосвятителю Рязанский предивный чудотворче!

Кондак 2

Видя благоверный князь муромский Георгий светлость ума твоего и святое житие твое, избра тя, яко мужа мудра, праведна и свята, во епископа града своего Мурома, да просветиши неведущия Божественныя Истины, исправиши беззаконныя, утешиши скорбящия и научиши вся достойно пети Богу: Аллилуиа.

Икос 2

Разум просвещен книжным учением и Богомыслием, паче же благодатию Божиею озарен имея, преславне отче Василие, восхотел еси тьму нечестия и заблуждений в пастве твоей разгнати, просветити же ю светом истиннаго Боговедения и благочестия. Сего ради, восхваляюще тя, глаголем:

Радуйся, истинныя премудрости исполненный; радуйся, благодатию Святаго Духа озаренный.

Радуйся, Божественныя Истины усердный проповедниче; радуйся велений Господних немолчный провозвестниче.

Радуйся, правыя веры и добродетелей ревностный насадителю; радуйся, суеверий и пороков мужественный искоренителю.

Радуйся, яко словесное стадо твое мудре упасл еси; радуйся, яко премногия души вечному спасению наставил еси.

Радуйся, Василие, Первосвятителю Рязанский и предивный чудотворче!

Кондак 3

Силою проповеди твоея, богомудре святителю, благодатию Божиею споспешествуемыя, купно же образом святаго жития твоего, мнози, омраченнии тьмою неразумия и заблуждений, Божественную истину уведеша, мнози нечестивии беззакония и развращения оставиша и на стези спасения обратишася, в покаянии и умилении сердца поюще Богу: Аллилуиа.

Икос 3

Имея непрестанное попечение о разоренней от злочестивых супостат пастве муромстей, яко мудрый пастырь и чадолюбивый отец, во благоустроении сея неусыпно трудился еси, всем духовным чадом твоим, потребную коемуждо помощь подавая. Темже достоин еси прославлятися звании сими:

Радуйся, сирых и вдовиц предстателю; радуйся, не имущих крова теплый крове и алчущих питателю.

Радуйся, скорбящих и унывающих скорый утешителю; радуйся, во вражде сущих примирителю.

Радуйся, ищущих спасения благонадежный к небеси руководителю; радуйся, сомнящихся в вере мудрый просветителю.

Радуйся, сострадательных и милостивых мощный споспешниче; радуйся, нищих духом и чистых сердцем благий наставниче.

Радуйся, Василие, Первосвятителю Рязанский и предивный чудотворче!

Кондак 4

Бурею исконныя злобы волнуем всезлобный диавол, не терпя непорочности жития твоего и благопоспешнаго пастырского служения, святе Василие, воздвиже на тя бурю мятежа буиих и неистовых жителей града Мурома, иже, лукавым мечтанием вражиим прельстившеся, возмнеша тя, аки нецеломудрена и неблагочестна; темже и восхотеша, во ослеплении своем, не точию изгнати тя из града, но и умертвити. Ты же, архиерею Божий, все упование твое на Всеблагаго и Всесильнаго Господа и Пречистую Богородицу возложив, воспевал еси ангельскую песнь: Аллилуиа.

Икос 4

Слышавшие враждовавшии на тя людие града Мурома зело кроткия глаголы твоя, святителю Христов, имиже просил еси дати тебе мало времене до утрия до третияго часа, укротиша ярость свою и отыдоша в домы своя; ты же, угодниче Божий, по всенощней слезней молитве твоей к Богу Спасителю и Пречистей Богородице во храме святых страстотерпец Бориса и Глеба, приим на руки твоя честную икону Богоматере, отшел еси к реце Оце, хотяй оставити град Муром и по волнам плыти. Воспоминающе убо сие отшествие твое, возглашаем ти сицевая:

Радуйся, высокий образе предивнаго смирения; радуйся, светлое зерцало твердыя веры и непоколебимыя надежды на Бога Вышняго.

Радуйся, столпе терпения, злобою человеческою непоколебимый; радуйся, адаманте, прилоги вражиими несокрушимый.

Радуйся, агнче незлобиве, кротостию твоею гонители твоя аки дивия звери укротивый; радуйся, смирением твоим козни диавола преславно посрамивый.

Радуйся, блаженне миротворче, от мирскаго волнения и мятежа избежавый; радуйся, волнам речным с верою и упованием Господа себе предавый.

Радуйся, Василие, Первосвятителю Рязанский и предивный чудотворче!

Кондак 5

Боготечней звезде уподобился еси, преславне Василие, егда по струям водным, противу течения речнаго, на мантии твоей, аки на легцей ладии, со образом Пречистыя Богоматере, силою Божиею веден был еси из града Мурома ко граду Рязани, поя во умилении сердца чудодеюшему и благодеюшему ти Богу: Аллилуиа.

Икос 5

Видевше тя, отче Василие, людие града Мурома пречудне силою Божиею по волнам, аки безплотна несима, уразумеша свое козньми вражиими прельщение, твою же чистоту и непорочность. Темже, в покаянии и сокрушении сердца, возопиша вслед тебе: прости ны грешныя рабы твоя; согрешихом пред тобою, отче святый; Владыко, не забуди нас раб твоих! Мы же, дивящеся толикому благоволению к тебе Божию, в преславнем чудеси явленному, со благоговением вопием ти:

Радуйся, благоуханный сосуде чистоты и целомудрия; радуйся, пресветлый доме Пребожественныя Троице.

Радуйся, верный слуго Царя Небеснаго; радуйся, возлюбленный рабе Пресвятыя Богородицы.

Радуйся, постом и бдением тело твое изнуривый; радуйся, молитвою и богомыслием ветхаго человека в себе умертвивый.

Радуйся, плаванием твоим по волнам речным струи волныя освятивый; радуйся, тем плаванием жители града Мурома вразумивый и к покаянию обративый.

Радуйся, Василие, Первосвятителю Рязанский и предивный чудотворче!

Кондак 6

Провозвестник дивнаго твоего по водам шествия ко граду Рязани явися устроением Божиим благоговейный диакон града того, егда, хотяй начати вечернее богослужение, не можаше изрещи обычнаго возглашения: благослови, Владыко! Но возопи велегласно: Владыка грядет, сретайте его! И абие весь освященный собор и людие со князем изыдоша с честными иконами во сретение тебе, святителю Божий, и узревше тя предивне волнами речными несима, в радовании сердца, благочестно приветствоваша тя грядуща, чудодеюшему же Богу вопияху: Аллилуиа.

Икос 6

Возсия свет благодати и милости Божия, пришедшу тебе, прехвальне отче, в пределы земли Рязанския, юже просветил еси светом Божественнаго учения и непорочнаго жития твоего. Сего ради возглашаем ти сицевая:

Радуйся, великий избранниче Архиереа Вечнаго, Господа Иисуса; радуйся, чистый, сосуде Божественныя благодати.

Радуйся, Божиих велений вернейший исполнителю; радуйся, Христовых заповедей неуклонный хранителю.

Радуйся, светильниче, на высоте церковней поставленный; радуйся, премудрый управителю корабля духовнаго.

Радуйся, богогласная трубо евангельскаго учения; радуйся, твердый поборниче церкве Христовы.

Радуйся, Василие, Первосвятителю Рязанский и предивный чудотворче!

Кондак 7

Хотя привести паству твою рязанскую ко истинному богопознанию и спасению, еще же успокоити и укрепити ю, прежде разорену бывшую от безбожных иноплеменников, подъял еси великия труды и подвиги, преблагий пастырю, непрестанно поучая, утешая и назидая словесныя овцы твоя, споспешествующему же тебе и укрепляющему тя во трудех Господу Богу поя: Аллилуиа.

Икос 7

Новое место святительских трудов твоих, паки разорену бывшу и конечно опустошену граду Рязани от лютых варвар и храмом Божиим в нем сожженным, указа тебе Благопромыслитель Господь град Переславль Рязанский, аможе чудне преселился еси и был еси первый архиерей граду сему, идеже вельми прослави тя Господь Бог, научая нас взывати к тебе:

Радуйся, высокая похвало и украшение Переславлю Рязанскому; радуйся, святительскаго престола в нем Богоизбранный основателю.

Радуйся, великия труды и подвиги во благоустроении новыя паствы твоея подъемый; радуйся, отеческое попечение о спасении духовных чад твоих всегда имевый.

Радуйся, благодатных даров неоскудный раздаятелю; радуйся, Божественных Таин благочестный стрителю.

Радуйся, апостольских преданий усердный ревнителю; радуйся, уставов Православныя Церкве верный хранителю.

Радуйся, Василие, Первосвятителю Рязанский и предивный чудотворче!

Кондак 8

Странно бе и дивно твое дальнее шествие по водам из града Мурома во град Рязань, паки же странно и преславно бысть твое второе плавание противу стремления воднаго, егда преселялся еси из древняго града Рязани во град Переславль Рязанский по тойжде реце Оце, паки нося с собою чудную икону Богоматере, яко непоколебимое ограждение и утверждение новому граду, Богу же, Помощнику твоему, поя: Аллилуиа.

Икос 8

Всем быти вся восхотев по образу Верховнаго от апостолов, являл еси, любвеобильне отче, духовным чадом твоим благопотребную коемуждо помощь, быв, яко же Иов, око слепым, нога хромым, неусыпно труждаяся в научении, утешении и укреплении паствы твоея. Темже прославляюще тя зовем:

Радуйся, премудрый устроителю града Переславля Рязанского; радуйся, немолчный наставниче веры и благочестия.

Радуйся, крине сада Божественнаго, посреде терния процветый; радуйся, плодоносное древо, питающее алчущих жизни вечныя.

Радуйся, растленных обычаев искоренителю, благих же нравов насадителю; радуйся, лютых болезней и недугов скорый целителю.

Радуйся, архиереев паствы рязанския во благоустроении ея присный пособниче; радуйся, благих начальников и градоправителей в ней незримый советниче.

Радуйся, Василие, Первосвятителю Рязанский и предивный чудотворче!

Кондак 9

Возшед на высоту Богоподобныя святости, сияя светом веры пред человеки в добрых делех, образ был еси пастве твоей словом, житием, учением, верою и чистотою, научая всех разумно пети Богу: Аллилуиа.

Икос 9

Ветии многовещаннии не могут по достоянию восхвалити тя, Богомудре Василие, и воспети святость жития твоего и молитвенныя подвиги, деннонощные труды и попечения, спасения ради пасомых подъятыя, неправедное и лютое озлобление от буиих жителей града Мурома, кротость и незлобие твое, паче же двукратное твое чудное по водам плавание. Мы же со удивлением благочестно зовем ти сицевая:

Радуйся, богомудрых святителей высокая похвало; радуйся, преподобных и праведных пречестная славо.

Радуйся, мучеников и исповедников сопричастниче; радуйся, апостолов единонравниче и сопрестольниче.

Радуйся, пастырей церкве образе достоподражательный; радуйся, монашествующих наставниче и руководителю.

Радуйся, яко тесным и жестоким путем всегда ходил еси; радуйся, яко тем вечныя славы достигл еси.

Радуйся, Василие, Первосвятителю Рязанский и предивный чудотворче!

Кондак 10

Спасти хотя, просветити же и утешити люди страны рязанския, Всеблагий Господь избра тя, предчудне святителю, во исполнителя Его Всеблагия Воли и велия милости, да укрепиши немощныя, утешиши печальныя, исправиши порочныя, научая всех благочестно пети Богу: Аллилуиа.

Икос 10

Стена и утверждение, отец и заступник древния паствы рязанския, прехвальне Василие, был еси. Буди и нам, новым чадом твоим, щит и ограждение от враг видимых и невидимых, помощник в бедах и скорбех и искушениих, да с любовию блатодарственно зовем ти:

Радуйся, чистоты и целомудрия твердый охранителю; радуйся, одержимых студными помыслы верный помощниче.

Радуйся, неправедно злословимых и оклеветаемых надежный защитниче; радуйся, злословящих и оклеветающих ближния своя сильный обличителю.

Радуйся, плавающих по водам и путешествующих благий путеводителю; радуйся, обуреваемых волнами морскими тихое пристанище.

Радуйся, усердно труждающихся во благих делех звания своего присный споспешниче; радуйся, тепле молящихся и с верою под кров твой прибегающих скорый предстателю.

Радуйся, Василие, Первосвятителю Рязанский и предивный чудотворче!

Кондак 11

Пение смиренное и усердное приими от нас, преблаженне отче Василие, не отрини нас, грешных и недостойных, к помощи твоей прибегающих, но услыши благосердно моления наша, да с радостию поем о тебе Богу: Аллилуиа.

Икос 11

Светозарная свеща, светло горевшая и светившая на триех высоких светильницех Божия Церкве, во триех градех страны рязанския, достославне отче, был еси, блистая и озаряя всех светом Боговедения и спасения. Озари и нас, святе, омраченных мглою страстей и суемудрия, да со умилением тебе зовем:

Радуйся, проповедников Божественныя Истины споспешниче, радуйся, хулителей православныя веры и врагов Христовы Церкве противоборниче.

Радуйся, напаствуемых и невинно гонимых защито и утешение; радуйся, девственников и постников твердое укрепление. Радуйся кротких и смиренных вернейший покровителю; радуйся, заблуждших на путь правый наставниче.

Радуйся, яко ухищрения демонская разрушаеши и стужаемыя от бесов свобождаеши; радуйся, яко волнения водная и свирепыя бури укрощаеши.

Радуйся, Василие, Первосвятителю Рязанский и предивный чудотворче!

Кондак 12

Благодать имеяй от возлюбившаго тя Господа, святе Василие, исполняти вся благая прошения наша, испроси Богоприятными твоими молитвами вся благая и полезная душам и телесем нашим, паче же оставление согрешений наших, да со умилением сердца благодарно поем Богу: Аллилуиа.

Икос 12

Поюще твое равноангельское святое житие, многотрудное и многоплодное служение твое Церкви Божией, еще же велия и дивная чудеса, тебе ради явленная возлюбившим тя Господем, восхваляем тя, угодниче Христов Василие. Обаче не могуще достойно изобразити величие и славу твою, со благоговением и радостию зовем ти:

Радуйся, богомудре и богоизбранне первопастырю града Перяславля Рязанского, паче всех пастырей его превознесенный; радуйся, венцем славы от Архиереа Вечнаго, Сына Божия, увенчанный.

Радуйся, яко бурное житейское море со славою преплыл еси и в тихое небесное пристанище достигл еси; радуйся, яко течение служения твоего добре совершил еси и веру твою непорочну соблюл еси.

Радуйся, яко со апостолы и святители водворяешися; радуйся, яко с сонмом мучеников, преподобных и всех праведных веселишися.

Радуйся, яко пред лицем Господа ныне предстоиши и с лики ангельскими его славословиши; радуйся, яко паству рязанскую непрестанно назираеши и вся благая ей у Царя Царей ходатайствуеши.

Радуйся, Василие, Первосвятителю Рязанский и предивный чудотворче!

Икос 13

О преславный отче наш Василие, святителю Христов и чудотворче! Приими сие малое моление наше, и действенным твоим пред Богом ходатайством избави нас от козней вражиих и всякого зла, да в мире и покаянии прочее время жития нашего скончаем и достигнем блаженного упокоения в вечных обителех, идеже купно с тобою и всеми святыми гласом радования во веки воспоем Богу: Аллилуиа.

(Этот кондак читается трижды, затем икос 1 и кондак 1)

Молитва 1-я

Богоизбранне первосвятителю наш и угодниче Христов Василие, просиявый святостию жития твоего, чудным плаванием по водам и нетлением мощей твоих, предстояй престолу Вседержителя и имеяй велие дерзновение ко Христу Богу нашему! Смиренно молим тя, во умилении сердца, моли Господа, да пробавит милость Свою к нам, грешным и недостойным рабом своим, пастырем Церкви да подаст человеколюбие и ревность о спасении пасомых: градоначальником и судиям страх Божий, правоту и безкорыстие, воином терпение, мужество и одоление на враги: супругом взаимную любовь, верность, единомыслие и домостроительность, куплю деющим честность и праводушие, земледельцем трудолюбие и трезвенность, сирым призрение, болящим исцеление, обидимым заступление, оклеветаваемым оправдание, и всем людем паствы твоея вся ко временней и вечней жизни потребная. Паче же моли Господа, молитвенниче наш, да простит нам всякое согрешение вольное и невольное, и очистит от всякия скверны плоти и духа: да избавит от козней исконнаго врага, ненавистника и человекоубийцы, и сохранить от клеветы человеческия, да утвердит в истинной спасительной вере и нелицемерном благочестии: да соблюдет от суемудрия и душетленных учений духов лестчих, действующих в веце сем в сынех противления, да охранит сердца наша от красных мира сего, и да научит огребатися плотских похотей и страстей, горняя мудрствовати, а не земная. Моли, отче наш, Всесвятаго и Божественнаго Духа, да возсияет свет благодати Его братиям нашим по плоти, во тьме лжеверия сидящим, и да познают Христа, Бога истиннаго, единаго Спасителя всех человек: да возсияет свет сей и блуждающим на распутиях раскола, да вразумятся и приидут во ограду православныя Церкве, в нейже единей несомненно содевается вечное спасение верных. О, святителю Христов, молитвенниче наш! Моли Христа Бога и пречистую Матерь Его, да упразднит вражды и нестроения, соединит же всех нас братнею богоподобною любовию, да в мире и единомыслии, желанием спасения горяще, Господеви работающе, друг друга тяготы носяще, добрым подвигом подвизаемся, течение скончаем и достигнем в тихое пристанище Небеснаго царствия, и славим неизреченное человеколюбие и милосердие Спасителя нашего, Иисуса Христа, Сына Божия, со Безначальным Его Отцем и Пресвятым Духом во веки веков. Аминь.

Молитва 2-я

Святителю Отче Василие! Умоли Господа Бога, да простит нам всякое согрешение, вольное и невольное, и очистит нас от всякия скверны плоти и духа: да избавит нас от козней исконнаго врага нашего, и сохранит от клеветы человеческия: да утвердит нас в истинной спасительной вере и нелицемерном благочестии: да соблюдет от суемудрия и душетленных учений века сего: да охранит сердца наша от соблазнов мира, и да научит огребатися от плотских страстей и похотей, горняя мудрствовати, а не земная. Аминь.

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Приидите, благочестия рачителие, согласно воспоим вси священнаго иерарха Василия и похвальными песньми почтим память его, яко молитвенника о душах наших и хранителя граду Рязани.

Ангельски на земли пожив, Богомудре Василие, ликом избранных рабов Божих вчинился еси, темже молим тя: моли Христа Бога избавитися нам от бед и огня вечнующаго.

Молитвами твоими, святителю Василие, сохрани стадо твое духовное от напастей чувственных и мысленных и даже до конца невреждены нас соблюди.

Богородичен: Яко стену и прибежище стяжахом Тя, Богомати: спаси нас от бед и скорбей и от мук будущих избави молитвами Твоими.

Песнь 3

Ирмос: Ты еси утверждение притекающих к Тебе, Господи, Ты еси Свет омраченных, и поет Тя дух мой.

Треволнения житейскаго пучину преплавая и не имея управителя помышлений, к тебе, святителю Василие, прибегаю и от тебе ожидаю скорыя помощи.

В мори мя плавающа и на пути шествующа соблюди, святителю, и настави творити волю Господню, яко да обрящу в День судный содеянных мною согрешений разрешение.

Аз, любострастный, яко ладия, обуреваюся от прегрешений моих, но во благоутишное пристанище покаяния настави мя молитвами твоими, пречудне святителю.

Богородичен: Страсти моего сердца исцели, Мати Всеблагая, ум мой умири и просвети и направи мя ходити непреткновенно путем спасения, яко да присно Тя ублажаю.

Седален, глас 2

Окрилив ум верою и любовию к Богу, мирскаго смешения возгнушался еси, святителю Василие, и, крест на рамена твоя взем, последовал еси Владыце Христу, и был еси храм Духа Святаго. Темже вопием ти: моли Христа Бога грехов оставление даровати празднующим любовию святую память твою.

Песнь 4

Ирмос: Ты моя крепость, Господи, Ты моя и сила, Tы мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.

Иовли крепости во искушениих не стяжах, и враг спасения поглотити мя тщится, но ты, святителю, помози мне сети лукаваго сокрушити молитвами твоими ко Владыце Христу, да зову Ему: силе Твоей слава, Человеколюбче.

Любовию сочетався Христу, святитель богоприятен и пастырь истинен явился еси, отче Василие. Темже тя благочестно ублажающе, молим: молися Христу Богу, да явит нам силу Свою во благовременную помощь.

Иерарха тя, яков нам подобаше, стяжавше, тобою хвалимся и, в заступлении твоем помощь обретающе на видимыя и невидимыя враги, вопием к Богу Спасителю: силе Твоей слава, Человеколюбче. ,

Богородичен: Ангельских чинов превышшая, Мати Божия, буди ми скорая в бедах Помощница, крепость моя и утверждение и от врагов защищение, да не убоюся вражия прещения, но присно пою Тя и славлю, Всепетая.

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго? Но обрати мя и к свету заповедей Твоих пути моя направи, молюся.

Святолепным житием и учением твоим, Богомудре Василие, многия ко Христу привел еси; темже и мы, чада твоя, ныне молим тя помощь нам даровати, да ходим непреткновенно в путех заповедей Господних.

Во стране пришельствия течение добре совершив, ко Свету невечернему восхождение обрел еси, преблаженне, и венец светел приял еси от Царя Славы Христа, к Немуже ныне молися, от помрачения и уныния душевнаго нас свободити и на стези спасения стопы наша направити.

Яко первопрестольника и святителя нашего чтуще тя, молим, чада твоя, блаженне: от тьмы греховныя избави и светом благодати просвети души наша.

Богородичен: Ты еси просвещение и избавление мое, Мати Незаходимаго Света, на Тя по Бозе надежду спасения моего возлагаю и молю Тя: избави мя от належащих бед и скорбей, да славлю Тя во веки.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Избавитися нам от бури страстей и от потопления в пучине зол молися, святителю отче Василие, да, молитвами Твоими направляемы, достигнем во пристанища тихая Божественныя воли.

Тя, досточудне Василие, от воднаго потопления, якоже Иону во чреве китове, Господь сохранил есть. О, чудесе новаго и преславнаго! Темже молим тя: твоими ко Христу молитвами избави нас от потопления в молве житейских попечений и тлетворных страстей.

Ежечасно волнами житейскими погружаюся, и буря искушений потопляет мя. К тебе, отче Василие, чудно по водам шествовавшему, ныне прибегая, вопию: молися Христу Богу, да изведет из глубины греховныя жизнь мою, яко Человеколюбец.

Богородичен: Лютыми страстьми одержимым скорая Помощница и готовое обуреваемым пристанище сущи, Мати Божия, сохрани мя от злобы и клеветы человеческия и не даждь ми разбитися о камень маловерия и отчаяния, да не погублю вконец душу мою.

Кондак, глас 8

Яко многосветлая звезда, от града Мурома возсиял еси, святителю Василие, по водам же дошед до града нашего Рязани, Церковь Божию добре упасл еси, просвещая люди учением и житием твоим. Поминай и ныне чада твоя, молим тя, наставниче наш добрый, и за ны Христу Богу и Пречистей Его Матери молися, да благодарною душею зовем ти: радуйся, угодниче Христов и теплый к Богу о нас молитвенниче.

Икос

Умная очеса всегда к Вышним возводя, Небесных непрестанно желал еси, святаго же ради жития твоего архиерейства саном украшен быв, Церковь и люди твоими учении обогатил еси и, течение благочестно совершив, к Богу преславно духом прешел еси, нам святыя мощи твоя в память и освящение оставив, имже ныне со умилением покланяющеся, молимся от страстей треволнения нас сохранити, яко да в тишине богоугодно поживше, тебе благодарно вопием, глаголюще: радуйся, отче Василие, скорый помощниче и теплый к Богу о нас молитвенниче.

Песнь 7

Ирмос: В начале землю основавый и Небеса словом утвердивый, благословен еси во веки, Господи, Боже отец наших.

Якоже пресельник от града Мурома быв, к Богоматери руце простирая, спасение обрел еси, святителю отче Василие: водам бо, послужившим тебе Божиим мановением, града Рязани достигл еси и, тамо Христу Богу угодив, Тому ныне радостно поеши: благословен еси, Господи Боже, во веки.

Рязанския области благовернаго князя и христоименитыя люди радости исполнил еси твоим дивным по водам пришествием, сопутника и хранителя Христа обрет, к Немуже ныне радостно зовеши: благословен еси, Господи Боже, во веки.

Якоже трие отроцы в пещи Вавилонстей огненную силу угасиша молитвою, тако и ты, святый отче, огнь злобы вражия и клеветы человеческия верою и молитвою угасил еси, поя Богу Спасителю: благословен еси, Господи Боже, во веки.

Богородичен: Земле святая, безсеменно произрастившая Спасение мира, Христа Бога нашего, от бури сопротивныя и искушений избави мя и из глубины зол возведи, да пою непрестанно милости и щедроты Твоя, Мати Всеблагая.

Песнь 8

Ирмос: Покрываяй водами превыспренняя Своя, полагаяй морю предел песок и содержаяй вся, Тя поет солнце, Тя славит луна, Тебе приносит песнь вся тварь, яко Содетелю всех во веки.

Ангелоподобным житием возсиял еси, святителю отче Василие, благочестия рачитель быв неусыпаемь, темже со Ангелы предстоя ныне Престолу Владыки всяческих, моли избавитися нам от всякаго прилога вражия, поющим верно: благословите, вся дела Господня, Господа и превозносите Его во веки.

На земли пожив, яко Ангел, с плотию, яко безплотен, безплотныя враги под ноги покорил еси. Темже ныне со Ангелы на Небесех светло ликуя, Христу вопиеши: благословите, вся дела Господня, Господа и превозносите Его во веки.

Источник благодатных дарований стяжав, Богоблаженне, подаждь ми источник умиления и слез, да омыю душевныя моя страсти и светом покаяния убелю очерневшую мою душу, радостно поя: благословите, вся дела Господня, Господа и превозносите Его во веки.

Богородичен: Христа нам родившая, радость вечную, горестных слез моих не забуди и стенания души моея не презри, Всеблагая, но яви на мне милость и человеколюбие Сына и Бога Твоего.

Песнь 9

Ирмос: Воистину Богородицу, Тя исповедуем, спасеннии Тобою, Дево Чистая, с Безплотными лики Тя величающе.

Велие чудо на тебе видится, преблаженне Василие, яко блаженное тело твое чрез многа лета соблюдеся невредимо мановением Бога, дивнаго во святых Своих, Егоже моли грехов прощение нам даровати.

Адамант крепкий явился еси, святителю Василие, веру яко основание непоколебимо в души твоей имея: многи бо враги видимыя и невидимыя победил еси, яко добр воин Владыки Христа, Емуже молися, да спасет тебе ради души наша.

Любовию чтуще твою память, молим тя, святителю и предстателю наш: моли прилежно Христа Бога о граде твоем и людех, избавити нас от всякия скорби и напасти, да тя сердцем и усты непрестанно ублажаем.

Богородичен: Юже поют ангельстии чини и славят патриарси со архиереи яко Матерь Божию, Тебе, Дево Богородице, и мы, грешнии, припадающе, молим: пристанище тихое буди нам, обуреваемым страстьми, и от всех бед сохрани нас матерними Твоими молитвами ко Христу, Сыну Твоему и Богу нашему.

Светилен

Царственное имя нося, Всецарю Христу житием твоим последовал еси, Емуже ныне в чертозе Небеснем соцарствуеши, преблаженне Василие, Того моли и нас облистати славою Его Божественною.