ПРЕПОДОБНЫЙ ЕВФИМИЙ СЯНЖЕМСКИЙ, ВОЛОГОДСКИЙ

Веселися, пустыня нераждающая,/ благодушствуй, неболящая,/ яко умножи тебе чада муж желаний духовных,/ благочестием насадив,/ воздержанием воспитав добродетелей в совершенство./ Того молитвами, Христе Боже,// умири живот наш.

В честнем рождестве твоем радость тварь обрете/ и в Божественней памяти твоей, преподобне,/ благодушие прият многих твоих чудес,/ от нихже подаждь богатно в души наша и очисти грехов скверны,// яко да поем: аллилуия.

Евфимие всечестне, преподобным единоревнителю и Ангелом собеседниче, получивый с ними житием своим чистым и безмолвным вечная благая, молися Господеви присно о всех нас, да и мы тех же благ сподобимся.

Яко приял еси схиму, бысть выну тих и молчалив, препо­добне, никогдаже бо ни с ким, разве молитв ко Господу, ничесоже глаголал еси, и пищи, разве зелия сурова, никоея же вкушал еси. Тем обрет днесь пищу неиждившую на небеси, Евфимие, моли и нам тояжде причаститися.

Затворивый себе Господа ради в темней пещере, / преподобне отче Лаврентие, многолетне / и Оному добре в ней угодивый, / подаждь и нам от всякаго зла чувствия затворити, / и тьмы страстей отвратитися, / и светлость получити Царствия Небеснаго.

Бог, рекий из тьмы свету возсияти,/ просил тебе из темна места, яко свет,/ и знаема всем показа, Лаврентие,/ яви же и Свету невечернему тя причастника, преподобне,/ в немже ликуя, поминай нас, хвалящих тя.