Постническое по Бозе житие возлюбив,/ вся плотская мудрования духу покорил еси/ и воздержанием страсти умертвил еси,/ во трудех, и бдениих, и молитвах образ быв добродетели,/ тем монашескаго жития наставник показался еси,/ отче преподобне Иринарше./ Моли Христа Бога спастися душам нашим.

Бодростию ума жизнь твою управляя,/ прилежанием Бога взыскуя,/ отонудуже и стаду монахов предстатель показался еси,/ и, благодать прием целити души и телеса/ приходящим с верою к честному гробу твоему,/ Иринарше, отче наш,/ моли Христа Бога спастися душам нашим.

Чистотою душевною Божественныя благодати дары стяжав,/ блаженную жизнь совершил еси,/ и путь ко спасению всем указал еси,/ и богомудрый начальник монахов явился еси./ Темже имея дерзновение ко Святей Троице,/ поминай нас, чтущих память твою, да зовем ти:/ радуйся, преподобне Иринарше, монашествующих похвало.

Бденными молитвами,/ теченьми слезными столп омочил еси,/ и из глубины воздыханьми/ во сто трудов уплодоносил еси,/ и был еси пастырь, всем подая прощение,/ преподобне отче наш Лазаре:/ молися Христу Богу// спастися душам нашим.

Яко светильника превеликаго/ Церковь Христова славит тя/ с веселием псаломски,/ темже не престай моляся Христу// дати всем прегрешений прощение.

Божественною любовию и житием духовным/ от юности распалився, преподобне,/ и вся, яже в мире красная, возненавидев,/ Христа единаго от души возлюбил еси, отче,/ легкое иго на рамо взем,/ Божественным Промыслом и Пречистыя Богородицы чудным явлением направляемь/ достиже пустыни/ и в ней многолетне подвизался еси/ в трудех многих и слезах,/ всяким злостраданием плоть свою изнуряя./ Отонудуже Бог, твоя труды видев,/ умножи тебе чада в пустыни./ Но яко имея дерзновение к Богу,/ моли о нас, рабех твоих, отче преподобне Леониде,/ да избавит нас от всех навет вражиих/ и спасет души наша.

Все свое умножив желание и к Богу вперив/ и Тому невозвратно от души последовав,/ в пустыню вселися и в ней многия труды в Бозе показал еси./ В непроходных местех источники водныя ископал еси/ и умертвил еси подвиги твоими телесная мудрования,/ многим путь был еси ко спасению./ Темже молим тя:/ спаси нас и яже собра, мудре, да зовем ти:/ радуйся, Леониде преподобне, пустынный жителю.

Агница Твоя, Иисусе, Марина/ зовет велиим гласом:/ Тебе, Женише мой, люблю,/ и, Тебе ищущи, страдальчествую,/ и сраспинаюся, и спогребаюся крещению Твоему,/ и стражду Тебе ради,/ яко да царствую в Тебе,/ и умираю за Тя, да и живу с Тобою,/ но яко жертву непорочную приими мя, с любовию пожершуюся Тебе./ Тоя молитвами,/ яко Милостив, спаси души наша.

Девства добротами преиспещренна, дево,/ нетленными венцы венчалася еси, Марино,/ кровьми же мученичества обагрена,/ чудесы просветившися исцелений,/ благочестно, мученице, прияла еси почесть победы твоего страдания.

Марина днесь вражию главу сокрушает,/ победы венец с Небесе приемши./ Егоже бо пророцы удержати не возмогоша,/ того она, связавши, уязви./ Сего ради показася мучеником украшение, вкупе же и похвала.