Икона Богородицы Донская

 

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Отверзи слух мой, Богоизбранная Дево, воеже разумети словеса откровения и познати путь спасения, да веру иму твердую Избавителю Богу и воспою предивное Его о нас промышление.

Отверзи, душе моя, очи веры, и узриши многая благодеяния Божия Матере, во дни тяжких обстояний отечеству нашему издревле являемая, и воспой, радующися, милостивое Тоя заступление.

Немощных здравие, разслабленных исцеление, обидимых защищение, от насилия и злобы спасение, скорбных в нуждах Помощнице, не престай молитися о чтущих Тя.

Познай, душе моя, силу Честнаго и Животворящаго Креста Господня, сим бо присно побеждаем полки враг видимых и невидимых, молитвами Богородицы и всех святых, в земли Российстей просиявших.

Грозное Божественное прещение врази разумеша пришествием чудотворнаго образа Твоего, Небесная Царице, страхом бо одержимии, в бегство внезапное обратишася, силою свыше гонимии.

Глас хвалы и благодарения приносим Ти, Владычице, и покланяемся пречистому образу Твоему, имже многажды на агаряны победу даровала еси и рог наш вознесла еси, Защитнице скорая рода христианскаго.

Песнь 3

Ирмос: Твоя песнословцы, Богородице, живый и независтный Источниче, лик себе совокупльшия, духовно утверди, в Божественней Твоей славе, венцев славы сподоби.

Житейскими попечении и сластьми искушаемии, Тебе, источнику тишины и богомыслия, песни приносим: утоли жажду духовную, ум наш к Небу возведи, превышшая Горних Сил.

Ума моего просвещение, воли слабыя укрепление, сердца унылаго радование Ты еси, Преблагословенная, молю Тя усердно: вся силы души моея обнови.

Слава Тебе, Всенепорочная, любящим Тя девам неотъемлемое сокровище, целомудрия источниче, Небесныя сладости откровение, уныния и печали истребление, смиренных и боголюбцев венчание и постников удобрение.

Изглади грехопадения юности, приими покаяние старости моея, Царице Небесная, се бо от чрева матере моея даже доныне враг не отступает, не попусти мя творити похоти его, но узы греховныя разреши и помилуй мя.

Како умолю Тя, Богоневесто, усты, злословия исполненными, или кую песнь вознесу, совестию обличаемь? Возмогу ли познати истину, лжи сослужитель, сосуд гнева Божия сый? Но, Жизнедательнице, страстьми умерщвленную душу мою оживи.

Врагу лютому подступающу, многое множество старцев и жен простирают Ти немощнеи руце с воплем крепким: прииди, Мати Милосердия, прииди, от лютыя смерти избавляющая, ускори спасти град и люди Твоя.

Седален

Блажим Тя, вси роди, Богородице Дево, в Тя бо Невместимый Христос Бог наш вместитися благоволи. Блажени есмы и мы, предстательство Тя имуще, день бо и нощь молишися о нас, и роди христианстии Твоими молитвами утверждаются. Тем, воспевающе, вопием Ти: радуйся, Благодатная, Господь с Тобою.

Песнь 4

Ирмос: Седяй в славе на Престоле Божества во облаце легце, прииде Иисус Пребожественный, Нетленною Дланию, и спасе зовущия: слава, Христе, силе Твоей.

О, великая сила слез! О, незлобие Владыки! За мене, падшаго, Сам страждет! Ты же, Богомати, у Креста Сына Своего стоявшая, неизследную глубину Божия снизхождения нам покажи и неосужденно причаститися святых и страшных Таин сподоби.

Мати чада злонравнаго побеждается сердоболием и не может его презрети, темже паче Ты, Благоутробная, преукрашенное жилище Божия снизхождения, мене, последнейшаго, не оставляеши и друг друга тяготы носити нас научаеши.

Облистай мя светом Божественнаго лика Твоего, Отрадо моя Пречистая, да ночная вознесу Ти моления, услыши воздыхания немолчная и памятию смертною от прелести греха спаси.

Плачет старость моя, лишися бо сынов и дщерей, несть опоры в жизни одиноцей, но буди мне столп и крепость, свобождение печалей, Благая Утешительнице, и до конца дний моих сохрани мя от зла.

Неизреченною силою благодати возбрани скверным помыслом, обуревающим мя, Дево Чистая, запрети им, и далече отгони, и Божественных песнопений делателя мя сотвори, да неленостно послужу Богу моему.

Воинств благопоспешение, борцев мужество, храбрых споборнице, Воеводо Возбранная, молим Тя крепость оружию нашему даровати, да низложены будут востающии на ны, Тобою бо победы воздвижутся.

Песнь 5

Ирмос: Ужасошася всяческая о Божественней славе Твоей, Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя, мир подавающая.

Прамати Ева, в раю согрешивши, мук рождения содела мя причастну, но Ты, Благодатная, неболезненно Христа рождшая, чадородия ради душу мою спаси.

Яко цвет сельный, явися чадо мое в мир скорбей и дыханием смерти уже опалися, но по слову Господню воспою: блаженно детство, ибо Царство Небесное наследит, Ты же, Владычице, прекращение воздыханий, Сама, якоже веси, скорбь мою облегчи.

Очи Твои светлеи с любовию на нищих призирают, и рука всегда сиротам и вдовицам простерта, славим неусыпное о них ходатайство и, образ Твой честный лобызающе, просим: не отврати лица Твоего от нас, в нужде ожесточенных.

Тайны грех моих обличение ужасает мя, Пречистая, но ничтоже возможно утаити от Всевидящаго Ока, се прибегаю к Твоему милосердию, даждь ми силу к покаянию и Твоими молитвами покрый мою наготу.

Гнев, ревнование и злоба в души моей гордей и тщеславней гнездятся, сам падаю и падших осуждати дерзаю, к Тебе прибегох, обуреваемых Спасительнице, страстей моих смрадное море изсуши.

Ужасает мя день Суда Божия, Господу бо ведома вся помышления, не надеюся на добрая дела моя, несть бо тех у мене, но прошу молитв Твоих, грешных Споручнице.

Песнь 6

Ирмос: Божественное сие и всечестное совершающе празднество, богомудрии, Богоматере, приидите, руками восплещим, от Нея рождшагося Бога славим.

Окаянную мою душу, влекомую лукавыми страстьми, свободи из плена, падших востание, радуется бо Владыка Твоему о грешных предстательству, прошения Твоя, яко Сын, исполняяй.

Воздыхания тяжкая слышиши, Преблагословенная, скорбь сердца моего ведущи, миро утешения и вино веселия возлей на раны душевныя, мрак уныния прогоняющи.

Помышляю труды подвижников: пост непрестанный, слезы сокрушения, молитвы всенощныя, послушание нелицемерное, терпение поношений, ужасаюся, Мати Судии Праведнаго, моему нерадению о спасении, от сна безчувствия мя пробуди.

Сущии во аде не могут Господа молити, Ты же, Всемощная Предстательнице, яко Мати, дерзновение к Сыну имаши, молим Тя о сродницех наших и всех преставльшихся, испроси им грехов разрешение.

В смертный час слышу глас Господа, пророком вещающ: предостави Ми чад твоих, Аз поддержу и препитаю сирых твоих. И Ты, Мати Божия, буди чадом моим прибежище в день скорби.

На поли брани смерть царствует, Ты же, Владычице, верным воином молитвою матере жизнь сохраняеши, убиенных же души в Царство света незаходимаго вселяеши и тако от вечныя смерти избавляеши.

Кондак, глас 8

Взбранной Воеводе победительная, яко избавльшеся от злых, благодарственная восписуем Ти, раби Твои, Богородице, но, яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Икос

Ангел Предстатель с Небесе послан бысть рещи Богородице: радуйся! И, со безплотным гласом воплощаема Тя зря, Господи, ужасашеся, и стояше, зовый к Ней таковая: радуйся, Еюже радость возсияет; радуйся, Еюже клятва исчезнет. Радуйся, падшаго Адама воззвание; радуйся, слез Евиных избавление. Радуйся, высото, неудобовосходимая человеческими помыслы; радуйся, глубино, неудобозримая и ангельскима очима. Радуйся, яко еси Царево седалище; радуйся, яко носиши Носящаго вся. Радуйся, звездо, являющая Солнце; радуйся, утробо Божественнаго воплощения. Радуйся, Еюже обновляется тварь; радуйся, Еюже покланяемся Творцу. Радуйся, Невесто Неневестная.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Аще вся веси, Бога же не веси, ничтоже веси, ищущим мудрости вития возвещает. О Мати Божия! Неизследимая глубина Божиих откровений Тобою явися, просвети мой ум, воеже Господа Искупителя познати, Бога отец наших.

Чего ради оскверняются путие грешника? Отвещает пророк Давид: того ради, яко несть Бога пред ним. Открой очи мои омраченнеи, Чистая, да познаю вездесущие Творца всяческих, Бога отец наших.

Вижду покаяние Давидово: во вретище облекается, душу постом смиряет, питие плачем покаяния растворяет, полунощи встает на молитву, моя же молитва Богом отвергается, понеже не являю трудов, ни подвигов, имже мя, Благодатная, научи.

Небесных Сил Царице, разсей облаки печали, смятения и бурю помыслов укроти, даруй ми дух сокрушения и смирения, да из глубины сердца моего принесу чистую молитву Богу отец наших.

Сердце услаждается, егда благодать Твоя является, мир, умиление и слезы раждаются, о Дево, радосте моя неизреченная, не презри мя, ожесточеннаго, но Сама посети, да мук томления избавит мя Бог отец наших.

Никтоже избавит мя от смерти, ни родителие, ни чада, не спасет дар, ниже приношение, знаемии проводят токмо до гроба, греси же мои останутся, услыши, Милосердая, вопль мой, да спасет мя огня вечнаго Бог отец наших.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Возраст юности и жажда наслаждения пленяют мою душу, Благодатная, но к вечному блаженству и славе святых обрати моя помышления, да славословлю Господа моего и превознесу Его во вся веки.

Волны неверия и скорбей лютых покрывают мою душу, но слышу глас Господа, глаголюща: маловерный, почто усумнился еси? К Тебе прибегох, Мати Божия, спаси мя и чада моя, в Тебе бо утверждение веры имамы, да превозносим Господа Творца во веки.

Чревоугодию, нечистоте служу прилежно, за обиды местию воздаю, обличаемь, гневаюся напрасно, злословлю не оказавших ми помощи, сам же немощных презираю, о Споручнице грешных, яви долготерпение и от греха свободи мя во веки.

Невозможно есть малою слезою великия скверны омыти и огнь геенский угасити, о Всемилостивая Мати, вижду ожесточение мое и молюся Ти: даждь ми слезы покаяния, да убелю одеяние души моея.

С мольбою неотступною, надеждою крепкою припадаю Ти, Державная Владычице: зриши врага лютаго приближение, услыши в слезах притекших, востани скоро и, яко Благая, защити, да славлю Тя, Мати Бога моего, во веки.

Плач мой в радость обрати и сетование в веселие, Мати Милосердия, и гордыя замыслы враг моих сокруши, да благословит Тя всяк язык и всяка плоть отныне и до века.

Песнь 9

Ирмос: Всяк земнородный да взыграется, Духом просвещаемь, да торжествует же безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Призри на нищету душевную и всякую горечь услади, непостыдная надеждо наша, скорбящих ободрение, плачущих скорое утешение, неистощима бо сокровища Твоя и, радующися, даеши я всем, помощи требующим.

Вкусите и видите, яко благ Господь, за любовию бо следует Господа познание. О, Трапезо таинственных дарований! Сподоби мя неосужденно Животворящих Таин причащатися, во очищение грехов моих.

Пред иконою Твоею, зри, Владычице, житейское море волнуется, спаси погибающих в волнах неверия и злобою истощенных, волною Твоего милосердия изнеси на брег спасения, да зовут Ти: радуйся, от вечныя смерти избавление.

Самомнением ослеплен, навыкох укоряти брата моего. Како сообщу свет ближнему, тьмою лжи покрыт сый? Даруй ми, о, Мати света, зрети моя прегрешения и брата моего согрешения терпети и с любовию исправляти.

Ангел смерти нападе на мя, презирает моления, плачу не внемлет, разлучает мя безжалостно со чады, влечет мя насильно. О, Богомати, с Сыном Твоим крестныя муки разделившая, матернюю скорбь о ближних утоли.

Землю Российскую в достояние Себе избравшая и утвердившая нас во благочестии, под покровом Твоим соблюди, Всепетая, образом Твоим честным от всех напастей сохрани, да зовем Ти: радуйся, Всемилостивая, в напастех скорая Заступнице.

Светилен

Торжествуем днесь, правовернии, во храме Твоем, Владычице, и Ты, Пречистая, приими любовию приносимыя Тебе песни благодарственныя.

 

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Откуду начну похвалы или кое положу начало нынешняго песнопения Царице Матери? Недоумением содержуся, обаче, языку умолкшу, вся кости моя рекут Тоя преславная чудеса.

Милосердия ради Бог Человек бывает, Имже и преестественная вся содеяшася; тем, Дево, и наше приими с любовию приносимое песнопение, воспевающих Твоя преславная чудеса.

Гряди к славословию, Небо, и радуйся, земле, свет бо велий возсия на вы от лица Матере Господни, освящаяй и просвещаяй всю тварь преславными чудесы.

Собираются пред иконою Твоею, Богородице, чинове святых невидимо, предстоят же и ангельская вся воинства, трепетно благоговеюще. Приими же с ними и нас, воспевающих радостно чудеса Твоя.

Песнь 3

Ирмос: Твоя песнословцы, Богородице, живый и независтный Источниче, лик себе совокупльшия, духовно утверди, в Божественней Твоей славе венцев славы сподоби.

Из начала великая о Тебе прообразоваше и в последняя преславная совершаше от всех родов предызбравый в Матерь Себе Тебе Владыка, Чистая.

Синайская гора, огнепалимая иногда, и разделяющаяся воды Чермнаго моря, егда наставляхуся людие, супостатом потопляемым, точию быта проображение, Чистая, чудес Твоих.

Пламенем купины в Синаи и росою пещи халдейския Девы рождество прообразивый, из Неяже воплотитися благоизволи, спасаяй тварь премудростию, Иисусе, и закон и пророки исполняя.

Радуйся, храме Господень, радуйся, кивоте, радуйся, стамно, радуйся, горо приосененная, радуйся, лествице и двере Небесная, пророки проповеданная, и всея святыни вместилище и носило, Пречистая.

Седален

Блажим Тя, вси роди, Богородице Дево, в Тя бо Невместимый Христос Бог наш вместитися благоволи. Блажени есмы и мы, предстательство Тя имуще, день бо и нощь молишися о нас, и роди христианстии Твоими молитвами утверждаются. Тем, воспевающе, вопием Ти: радуйся, Благодатная, Господь с Тобою.

Песнь 4

Ирмос: Седяй в славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Седяй на Престоле славы Царствия Твоего, Царю высокий, от смиреннаго естества земнородных престол свят Себе предуготовал еси, утробу Девы Матере. Слава неизреченному Твоему совету.

Превознесеннаго именем паче всякаго имене, Егоже всяк язык исповедает, Божию Силу и Премудрость, Единороднаго Сына в славе Бога Отца, Дево, плотию родила еси, Бога и Человека.

Смирившаго Себе даже до рабия образа послушанием Богу Отцу и даже до страстей и Креста преклонившагося, Того за ны смотрению, о Дево, и непостижимым тайнам послужила еси.

Дает Тебе преестественная, Богородице, Иже паче естества Сын Твой, рождеством бо Твоим от тли яко воззва человечество, и ныне Тобою призывает люди отриновенныя во язык избранный и именитый по всей земли.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Блаженно чрево, носившее Тя, Спасе, и честнейшая воистину сосца, воздоившая Тя, нас ради младенствовавшаго. Темже молим Тя: слышащим слово Твое и хранящим е блаженство уготови безконечное Рождшия Тя молитвами.

Марие Преблагословенная, благую истинно часть избрала еси и Едина Благодатная явилася еси. В Тебе Отец благоволи, Слово Всевиновное в Тя вселися, и Дух осени Святый, пребываеши нетленная и нам, любовию поющим Тя, спасение подавающая.

Единородный Сын Божий, снизшедый на землю за человеколюбие избавити человечество, единое на земли покоище обрет Тя, Чистую и Пренепорочную, вселитися и жити в Тебе благоволи, освятив, украсив и прославив. И нас ходатайствы Твоими храмы чистыя Тому, Богородице, соделай.

Храме всеосвященный Бога нашего, в храме Твоем ныне торжествующая, Богоневесто, с высоты призри и осени Божественною иконою Твоею, верою кланяющиися ей освящающи: с нею бо Твоя благодать во веки пребывает, спасительная всем подающи.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Праздник празднуем, празднолюбцы, Девы и Богоматере, благодаряще за велие милосердие Ея, и в нас действуемая преславная чудеса прославим.

Благодарственная приносим Тебе, Дево, и молимся: да не оскудеет вера чтущих Тя, и да не похвалятся врази, глаголюще: где есть Бог их? Твоя бо чудесная икона и всесвятая помощь с нами есть.

Устнами воспеваем Тя, умом же и языком моление приносим и сердца с колены преклоняем пред чудотворным образом Твоим, Пречистая, да милость Твою низпослеши на град и люди Твоя.

Ты еси пророков главизна, Ты еси святых похвала, Богоотроковице, и всех христиан упование, к Тебе прибегающе, спасаемся, уповающе же, не посрамимся, Тобою бо хвалится, Богородице, всякое дыхание.

Кондак, глас 2

В Небесныя обители преселившаяся с плотию, сущия на земли никакоже оставила еси, Богородице, образ Божественный и многочудесный Пречистаго Лица Твоего зрети любящим Тя и покланятися даровала еси, яко знамение Твоея благодати; чтим его, лобызающе.

Икос

Являющи человеком Пречистая неизглаголаннаго Своего милосердия сокровище, любящим Ю независтныя дары подавает, благословение, и молитвы, и мир, всяк ум превосходящий. И еже преславное от пречистыя Своея иконы, яко от источника, источает миру оставления воды, в Божественнейшем Ея храме. Тамо бо очи Ея отверсте день и нощь и уши, внемлющии молитве всех. Сего ради покланяемся сей всечестней иконе и чтим ю, лобызающе.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Тварь вся празднует, и стихии Тебе повинуются, Матери всяческих Содетеля, радуются Ангели в Божественнем торжестве Твоем, мы же из Тебе Рождшемуся зовем: препетый отцев Боже, благословен еси.

Дивная чудеса, Благая, слышана сотворила еси по всей земли, мы же, благолепие красоты Твоея от Сиона зряще, доброте дивимся и из Тебе Рождшемуся зовем: препетый Боже, благословен еси.

Монашествующих собори Наставницу Тя ублажают, Дево, множества же немощствующих излиянием милосердия Твоего благодать приемлют и, общницы бывше чудес Твоих, вопиют: Пречистая, благословенна еси.

Источник еси умный, живоприемный и приснотекущий, струи жизни источивший человеком, даждь ми от воды Твоея, Дево, во изсушение моих согрешений и ороси, молюся, мой ум, сердце и помысл, Едина Всепетая и Благословенная.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Ужасу обдержащу иногда Российскую страну нашествием агарян, печали умножившейся людем Твоим, тогда, не на лук уповающе, ниже оружием спасаеми, но на Тя Едину надеющеся, с рыданием моляхуся: виждь бед належание и востани, Богородице, в помощь нашу.

Обыдоша иногда, яко пси мнози, стадо Твое, Чистая, оскверниша жилище имене Твоего и совещаху на ны лукавная; мы же возведохом очи наши на икону Твою, да ущедриши ны; и разумеша языцы, яко Ты, Госпоже, с нами еси во вся веки.

Взбранная Воевода явилася еси царствующаго града Москвы, языки побеждающая, христолюбивое же воинство укрепляющая, военачальники силою Твоею препоясующая; темже Твоя торжествующе победительная, раби Твои, воспеваем Сына Твоего во вся веки.

Богородице, теплая христианом Предстательнице, приими моление недостойных раб Твоих, призри милостивно на немощи наша и всем полезная даруй, немощствующим исцеление, грешным спасение, вся бо можеши, Мати сущи Зиждителя Всемилостивая.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Величит Тя душа моя, и радуется дух мой о Тебе, Мати Господа нашего, яко призрела еси на смирение раб Твоих, сильныя со престолов низложила еси, смиренныя вознесла еси и Россию всю Твоих даров исполнила еси.

Се ныне ублажаем Тя, вси народи великороссийстии, Дево, с нами бо величие сотворила еси и славу Твою показала еси всем языком; свято имя Твое, Богородице, велия и неизреченная милость Твоя на всех, призывающих Тя.

Восприят ны от падения нашего Господь, помянув милость Свою от века, и древняя чудеса отец наших обнови нам, чадом их, иконою Твоею, Богомати; еюже хвалимся, спасшиися, и живота неразрушимаго наследие приемлем.

Богородице Владычице, Приснодево, неложно спребывати с нами обещавшая до скончания века, испроси нам на будущем Суде Сына Твоего деснаго Ему предстояния верою и любовию Тебе поющих, умильно припадающих и со страхом тепле молящихся.

Светилен

Торжествуем днесь, правовернии, во храме Твоем, Владычице, и Ты, Пречистая, приими любовию приносимыя Тебе песни благодарственныя.

 

Текст акафиста утвержден решением
Священного Синода от 26 декабря 2019 года (журнал № 163).

Кондак 1

Взбра́нней Воево́де победи́тельная, я́ко изба́вльшеся от злых, благода́рственная воспису́ем Ти раби́ Твои́, Богоро́дице, но, я́ко иму́щая держа́ву непобеди́мую, от вся́ких нас бед свободи́, да зове́м Ти:

Ра́дуйся, Влады́чице, Засту́пнице ве́рных преблага́я и ско́рая.

Икос 1

Арха́нгела благове́стие слы́шавши Пречи́стая, кро́тостию прия́т во́лю Го́спода Своего́ и во смире́нии се́рдца отвеща́: Се Раба́ Госпо́дня, бу́ди Мне по глаго́лу твоему́. Мы же, дивя́щеся, ка́ко Сын Бо́жий Сын Де́вы быва́ет, с Гаврии́лом Благода́тную пе́сньми си́ми почита́ем:

Ра́дуйся, Отрокови́це, от всех родо́в Бо́гом избра́нная;

ра́дуйся, ски́ние, Ду́хом Святы́м осене́нная.

Ра́дуйся, живоно́сная оби́тель Све́та Боже́ственнаго;

ра́дуйся, Ма́ти Бо́жия, Спа́са ми́ру ро́ждшая.

Ра́дуйся, Всепе́тая, я́ко сотвори́ Ти вели́чие Си́льный;

ра́дуйся, я́ко и в сла́ве икон Твои́х вели́чие сие́ явле́но бысть.

Ра́дуйся, я́ко Тобо́ю, Благода́тная, Неви́димый нам приобщи́ся;

ра́дуйся, я́ко чудотво́рными ико́нами Твои́ми благода́ть и ми́лость нам источи́ся.

Ра́дуйся, Влады́чице, Засту́пнице ве́рных преблага́я и ско́рая.

Кондак 2

Ви́дяще Тя, Богоро́дице, на объя́тиих Свои́х Младе́нца Христа́ держа́щую и главо́ю к пречи́стому ли́ку Его́ кро́тце прини́кшую, разумева́ем боже́ственную любо́вь Твою́ и непреста́нное о ми́ре хода́тайство. Ве́руем, я́ко и́маши ве́лие дерзнове́ние ко благосе́рдию Влады́ки, Ему́же, да́вшему нам Тя благу́ю Засту́пницу, благода́рственно пое́м: Аллилу́иа.

Икос 2

Ра́зум немощны́й не мо́жет пости́гнути глубину́ смире́ннаго служе́ния Твоего́, Госпоже́, Искупи́телю на́шему, не име́вшему на земли́, где главу́ подклони́ти. Егда́ же прии́де вели́кий и тре́петный день страда́ний Сы́на Твоего́, Богома́ти, ору́жие сме́ртное про́йде ду́шу Твою́. Сего́ ра́ди се́рдцем соболе́знующе, глаго́лем Ти такова́я:

Ра́дуйся, незло́бивая А́гнице, верте́п и бе́гство смире́нно прии́мшая;

ра́дуйся, богоприи́мца Симео́на ско́рбное прорече́ние в се́рдце начерта́вшая.

Ра́дуйся, поноше́нию Сы́на Бо́жия сострада́вшая;

ра́дуйся, кре́стный путь Его́ слеза́ми ороси́вшая.

Ра́дуйся, му́ки Его́ кре́стныя се́рдцем раздели́вшая;

ра́дуйся, Кресту́ предстоя́нием соверше́нство любве́ Твоея́ яви́вшая.

Ра́дуйся, гро́бу Сы́на Твоего́ благосе́рдый плач прине́сшая;

ра́дуйся, воскресе́нием Его́ па́че всех обра́дованная.

Ра́дуйся, Влады́чице, Засту́пнице ве́рных преблага́я и ско́рая.

Кондак 3

Си́ла Вы́шняго соде́ла Тя, Благода́тная, исто́чник неоскудева́ющ утеше́ния бе́дствующим: мно́ги бо ско́рби претерпе́вши, мо́жеши и искуша́емым помощи́. Лю́дем ру́сским, лю́те стра́ждущим от наше́ствия ага́рян, благоволи́ла еси́ яви́ти о́браз Твой в зна́мение ми́лости Твоея́ ко Оте́честву на́шему, в защи́ту от враг ви́димых и неви́димых, и́хже по́мощию Бо́жиею побежда́юще, Спаси́телю Бо́гу воспева́ху: Аллилу́иа.

Икос 3

Иму́ще Тя подвигополо́жницу, ше́ствующую по стопа́м Влады́ки Христа́, му́жества исполня́хуся первосвяти́телие Моско́встии и подви́жницы благоче́стия земли́ Ру́сския. Беды́ и напа́сти претерпева́юще, сии́ уча́ху лю́ди ду́хом Го́сподеви рабо́тати, ве́дуще, я́ко си́ла Бо́жия в не́мощи соверша́ется. Мы же, ви́дяще ве́ру оте́ц на́ших и явле́ние благода́ти, претвори́вшия злоумышле́ния во нра́вы до́брыя, досто́йно Тя, наста́вницу ве́рных, ублажа́ем:

Ра́дуйся, насажде́ние ве́ры и благоче́стия;

ра́дуйся, о́бразе несокруши́маго терпе́ния.

Ра́дуйся, ду́ха уны́ния и боя́зни отгна́ние;

ра́дуйся, ду́ха ра́зума и кре́пости стяжа́ние.

Ра́дуйся, близ Донски́х струй чу́дно ико́ну Твою́ яви́вшая;

ра́дуйся, ре́ки слез наро́дных е́ю изсуши́вшая.

Ра́дуйся, до́блести бога́тство нам вручи́вшая;

ра́дуйся, моли́твенников земли́ Ру́сския возрасти́вшая.

Ра́дуйся, Влады́чице, Засту́пнице ве́рных преблага́я и ско́рая.

Кондак 4

Бу́ря превели́каго наше́ствия ага́рянскаго потрясе́ зе́млю Ру́сскую, но не возмо́же пла́мень угаси́ти ве́ры в покро́в Твой, Богома́ти Пречи́стая. Вели́кий печа́льник земли́ на́шея преподо́бный Се́ргий, призва́в на по́мощь Святу́ю Трои́цу и Тя, Влады́чице, со упова́нием благослови́ свята́го кня́зя Дими́трия с дружи́ною в похо́д проти́ву ага́рян и предрече́ ему́ победу, те́мже научи́ всех пе́ти всеси́льному Бо́гу, в Тро́ице сла́вимому: Аллилу́иа.

Икос 4

Ви́дя ико́ну Богома́тере, на по́ли бра́ни от Донски́х преде́л прише́дшую, и, прии́м посла́ние от Се́ргия преподо́бнаго с напу́тием: Да помо́жет ти Бог и Свята́я Богоро́дица, возра́довася князь Дими́трий, я́ко Сама́ Влады́чица гряде́т на супоста́ты, и, воспряну́в ду́хом, с наде́ждею поведе́ во́ины своя́ на тьмочи́сленная по́лчища и побе́ду одержа́. Ико́на же Твоя́, Влады́чице, молниено́сным блиста́нием зра́ка Твоего́ враги́ устраша́ющи, зало́г побе́ды явля́ше. Сего́ ра́ди благода́рственно и ра́достно пое́м Ти похва́льная сия́:

Ра́дуйся, Ма́ти Го́спода Сил, небе́сная Воево́до;

ра́дуйся, земли́ Ру́сския от ве́ка по́моще и покро́ве.

Ра́дуйся, во́ином му́жества неодоли́маго дарова́ние;

ра́дуйся, врага́ иско́ннаго гро́зное низверже́ние.

Ра́дуйся, во́инов-и́ноков на по́двиг ра́тный избра́вшая и укрепи́вшая;

ра́дуйся, Оте́чество на́ше от и́га ага́рянскаго свободи́вшая.

Ра́дуйся, в явле́нии ико́ны Твоея́ луча́ми Со́лнца пра́вды ве́рных осия́вшая;

ра́дуйся, пресла́вную побе́ду правосла́вно Тя чту́щим дарова́вшая.

Ра́дуйся, Влады́чице, Засту́пнице ве́рных преблага́я и ско́рая.

Кондак 5

Богоявле́нною звездо́ю возсия́ ико́на Твоя́ пресве́тлая, озаря́ющи у́тро бра́ни и возвеща́ющи благослове́ние Бо́жие ратобо́рцем, на бра́нь жесто́кую с ага́ряны подви́гшимся. Весь день той предстоя́ху Се́ргий преподо́бный и и́ноцы мно́зи в моли́тве неотсту́пней ко Святе́й Тро́ице. Ве́черу же бы́вшу, побе́ду ста́рец ду́хом позна́в, ра́достно сию́ провозгласи́ и благода́рственное пе́ние соверши́ всеще́дрому Бо́гу, призыва́я и нас велегла́сно воспе́ти Ему́: Аллилу́иа.

Икос 5

Ви́дя очи́ма ве́ры тече́ние би́твы и моли́твою ратобо́рцы укрепля́я, поиме́нно помина́ше преподо́бный Се́ргий вожди́ и во́ины убие́нныя. Мы же, иму́ще заве́т его́ па́мять о таковы́х осо́бо твори́ти и ве́дуще си́лу моли́твы, побе́ду ору́жию принося́щия, из глубины́ се́рдца воззове́м Бо́жией Ма́тери, всемо́щней Покрови́тельнице ду́шу свою́ полага́ющих за дру́ги своя́:

Ра́дуйся, меч гне́ва Бо́жия на проде́рзыя направля́ющая;

ра́дуйся, из пра́вды вене́ц побе́ды соплета́ющая;

Ра́дуйся, с хра́брыми непреобори́мо спобора́ющая;

ра́дуйся, к по́двигом во бра́нех дух возвыша́ющая.

Ра́дуйся, ура́ненных Свои́м попече́нием не оставля́ющая;

ра́дуйся, убие́нных к ве́чному поко́ю управля́ющая.

Ра́дуйся, вдови́ц и обезча́дствованных благода́тно утеша́ющая;

ра́дуйся, Воево́до изря́дная, непобеди́мо держа́вствующая.

Ра́дуйся, Влады́чице, Засту́пнице ве́рных преблага́я и ско́рая.

Кондак 6

Провозве́стник спасе́ния Москвы́ от внеза́пнаго наше́ствия ага́рянскаго яви́ся о́браз Твой, Засту́пнице ско́рая. Неприя́телем во град вни́ти уже́ гото́вым, с ве́рою и сле́зным моле́нием обнесо́ша его́ лю́дие по стена́м и сто́гнам гра́да и поста́виша посреде́ во́инства в похо́дней це́рквице Се́ргия преподо́бнаго и, в моли́тве прилежа́ще, усе́рдно взыва́ху всеми́лостивому Спа́су: Аллилу́иа.

Икос 6

Возсия́вшу со́лнцу, узре́ша стрегу́щии во́ини, я́ко опусте́ стан ага́рянский: но́щию страх внеза́пу нападе́ на ня от не́кия ве́лия си́лы и, смути́вшеся, неудержи́мо бежа́ша да́же до преде́л земли́ Ру́сския и вси изгибо́ша. О, преди́вная Засту́пнице на́ша! Твои́ми моли́твами ско́рое избавле́ние сие́ бысть. Да испо́лнится же дре́вний храм, возвы́сивыйся на ме́сте, иде́же стоя́ше чудотво́рный о́браз Твой Донски́й, гла́са хвалы́ сея́:

Ра́дуйся, свеще́ неугаси́мая, ве́ры огнь воспламеня́ющая;

ра́дуйся, гра́ду Москве́ стра́же неусыпа́ющая.

Ра́дуйся, упова́ющих на по́мощь Твою́ не посрамля́ющая;

ра́дуйся, плач ве́рных вско́ре в ра́дость претворя́ющая.

Ра́дуйся, в бе́гство враги́ обраща́ющая;

ра́дуйся, призыва́ющим Тя по́мощь подаю́щая.

Ра́дуйся, со святи́телями и преподо́бными град наш огражда́ющая;

ра́дуйся, и́ноков под се́нию ико́ны Твоея́ учрежда́ющая.

Ра́дуйся, Влады́чице, Засту́пнице ве́рных преблага́я и ско́рая.

Кондак 7

Восхоте́вши огради́ти зе́млю Ру́сскую, держа́вная Покрови́тельнице на́ша, мно́гажды ко́зни ага́рян и про́чих иноплеме́нник разоря́ше, преде́лы страны́ на́шея храня́щи, и побе́ды ди́вныя да́же без кро́ве подаю́щи. Благоволи́, о Ма́ти Бо́жия, в ми́ре глубо́це и сою́зе любве́ вселе́нную сохрани́ти, Тебе́ бо даде́ся благода́ть всеми́рнаго заступле́ния пред Влады́кою всех, Его́же во́инства небе́сная сла́вят, пою́ще Ему́: Аллилу́иа.

Икос 7

Но́ваго стра́жа неусы́пнаго гра́да Москвы́ досто́йно почти́ти хотя́ще, собо́рный храм лю́дие благочести́вии в Донсте́й оби́тели сооруди́ша и на стене́ хра́ма живописа́ша ико́ну Твою́, Богома́ти, в боже́ственное огражде́ние страны́ на́шея, я́ко да отвне́ находя́щии врази́ отраже́ни бу́дут неотсту́пными моли́твами Твои́ми. Тебе́ же, я́ко су́щей с на́ми, со упова́нием глаго́лем:

Ра́дуйся, Бо́га Жива́го одушевле́нный хра́ме;

ра́дуйся, Ма́ти ми́ра, укроща́ющая смяте́ний во́лны.

Ра́дуйся, нощны́х бде́ний и моле́бных пе́ний ско́рое слы́шание;

ра́дуйся, до́брое приста́нище душа́м, спасе́ния и́щущим.

Ра́дуйся, ико́ну Твою́, я́ко зна́мя побе́д, дарова́вшая;

ра́дуйся, страну́ Ру́сскую достоя́ние Свое́ избра́вшая.

Ра́дуйся, бра́ней прекраще́нием мир и ра́дость принося́щая;

ра́дуйся, ко благоче́стию страну́ на́шу приводя́щая.

Ра́дуйся, Влады́чице, Засту́пнице ве́рных преблага́я и ско́рая.

Кондак 8

Разсе́яшася ту́чи напа́стей моли́твами Твои́ми, Засту́пнице всеблага́я. Те́плая заря́ покая́ния, восходя́щи, предваря́ет то́ки благода́ти, призыва́ющи к по́двигу, е́же ве́ровати пра́во и жи́ти свя́то. Простри́ же покро́в Твой, о Благода́тная Ма́ти, на всех гряду́щих у́зким, но вожделе́нным путе́м Христо́вых за́поведей, да вси позна́ют, я́ко с на́ми Бог, Ему́же пое́м: Аллилу́иа.

Икос 8

Весь мир стра́ждет грех ра́ди челове́ческих, во зло его́ поверга́ющих. В Тебе́, Ма́ти ро́да христиа́нскаго, нача́ло о́бщаго избавле́ния бысть, исполне́ние вся́кия доброде́тели. Да́руй же нам узре́ти, богому́драя Де́во, в Ева́нгелии Сы́на Твоего́ свет боже́ственный, да отве́ргше го́речь греха́, сла́дость благоче́стия обря́щем, взыва́юще Ти сицева́я:

Ра́дуйся, благода́ти живоно́сный исто́чниче;

ра́дуйся, заблу́ждшим путево́дный свети́льниче.

Ра́дуйся, сле́зне ка́ющимся обновле́ние подаю́щая;

ра́дуйся, ходи́ти в зако́не Госпо́дни наставля́ющая.

Ра́дуйся, моли́тве те́плей науча́ющая;

ра́дуйся, по́двигу поста́ вспомоществу́ющая.

Ра́дуйся, грехо́вныя по́мыслы вла́стно от нас отгоня́ющая;

ра́дуйся, братолю́бием те́мную зло́бу побежда́ти наставля́ющая.

Ра́дуйся, Влады́чице, Засту́пнице ве́рных преблага́я и ско́рая.

Кондак 9

Всех немощны́х кре́посте, печа́льных ра́дование, стра́ждущих посеще́ние, ве́рных дерзнове́ние Ты еси́, Пречи́стая Влады́чице Богоро́дице, всех притека́ющих под сень Креста́ Госпо́дня ко спасе́нию приво́диши, да позна́вше Христа́, Бо́жию Си́лу и Бо́жию Прему́дрость, воспою́т Ему́: Аллилу́иа.

Икос 9

Вети́и многовеща́ннии пости́гнути не мо́гут, человеколюби́вая Ма́ти, бе́здну щедро́т Твои́х, на злостра́ждущия и безпо́мощныя излива́емых. И мы, сла́дость утеше́ния в ну́ждах позна́вше, благословля́ем Тя с ве́рою и че́ствуем с любо́вию, моле́ния вознося́ще пред о́бразом Твои́м сицева́я:

Ра́дуйся, в ско́рбех земны́х во́лю Бо́жию смире́нно прии́мшая;

ра́дуйся, обурева́емых в ти́хое приста́нище вводя́щая.

Ра́дуйся, боля́щих милосе́рдая цели́тельнице;

ра́дуйся, вдов и сиро́т незри́мая пита́тельнице.

Ра́дуйся, стра́ждущих любо́вию окружа́ющая;

ра́дуйся, долгонеду́жных сла́дости ра́йстей приобща́ющая.

Ра́дуйся, чад Свои́х от враг необори́мо защища́ющая;

ра́дуйся, я́ко слеза́ми ра́дости ико́на Твоя́ украша́ется.

Ра́дуйся, Влады́чице, Засту́пнице ве́рных преблага́я и ско́рая.

Кондак 10

Спасти́ хотя́ мир, Сын Бо́жий из Тебе́, Де́во, пло́тию облече́ся и естество́ на́ше па́дшее обнови́. Ди́вное Бо́жие смотре́ние о нас Тобо́ю, Де́во, исполня́ется, я́ко Ты еси́ вои́стину поги́бших взыска́ние и гре́шных исправле́ние, и Тобо́ю от отча́яния изба́влени, дерза́ем с весе́лием пе́ти Бо́гу: Аллилу́иа.

Икос 10

Стена́ еси́ несокруши́мая Це́ркви Христо́ве, Всенепоро́чная Де́во, ве́рныя бо во искуше́ниих укрепля́еши, ми́ром и любо́вию огражда́еши. Сего́ ра́ди и гла́си моли́твеннии не умолка́ют зову́щих Ти:

Ра́дуйся, от купе́ли креще́ния блага́я путеводи́тельнице;

ра́дуйся, целому́дрия ю́ных огради́тельнице.

Ра́дуйся, ма́терем многотру́дным изря́дная помо́щнице;

ра́дуйся, чад непокори́вых му́драя наста́внице.

Ра́дуйся, в сиро́тстве ди́вное утеше́ние;

ра́дуйся, вражду́ющих неча́емое примире́ние.

Ра́дуйся, беззако́ннующих све́том пра́вды просвеща́ющая;

ра́дуйся, грехи́ на́ша в мо́ри милосе́рдия потопля́ющая.

Ра́дуйся, Влады́чице, Засту́пнице ве́рных преблага́я и ско́рая.

Кондак 11

Пе́ние всеумиле́нное прино́сим Ти, вмести́вшей ипоста́сное Сло́во Бо́жие. Сын Твой, А́гнец Бо́жий, взе́мляй грехи́ ми́ра, закала́ется и дае́тся в снедь ве́рным. Сподо́би нас, Ма́ти Бо́жия, досто́йно причаща́тися Пречи́стых Те́ла и Кро́ве Его́, да спасе́ние улучи́вше, воспое́м Жизнода́вцу: Аллилу́иа.

Икос 11

Дщи Отца́ Небе́снаго, Ма́ти Сы́на Бо́жия, Неве́сто Ду́ха Свята́го, неисчерпа́емое мо́ре даро́в боже́ственных Ты еси́, Всесвята́я Де́во. Умоли́ человеколю́бца Го́спода откры́ти нам исто́чник всеоживля́ющия благода́ти, да очище́нным се́рдцем потщи́мся возрасти́ти плоды́ Ду́ха, в ра́дости и весе́лии зову́ще Ти:

Ра́дуйся, плодо́в Ду́ха Свята́го стяжа́ние всеце́лое;

ра́дуйся, ра́достию духо́вною упое́ние пречу́дное.

Ра́дуйся, ми́ра непоколеби́маго дарова́ние благонаде́жное;

ра́дуйся, бла́гости и любве́ исполне́ние преми́рное.

Ра́дуйся, милосе́рдия насажде́ние неувяда́емое;

ра́дуйся, ве́ры живы́я утвержде́ние несокруши́мое.

Ра́дуйся, кро́тости наста́внице несравне́нная;

ра́дуйся, вражды́ разруша́ющая средосте́ние.

Ра́дуйся, Влады́чице, Засту́пнице ве́рных преблага́я и ско́рая.

Кондак 12

Благода́тную по́мощь мно́гажды явля́ла еси́, Цари́це Небе́сная, чрез чудотво́рный о́браз Твой, от сме́рти ско́рыя и неизбе́жныя изъима́ющи. Та́ко о́браз всечестна́го Успе́ния Твоего́, на обра́тней стране́ ико́ны Донски́я от лет дре́влих пи́саный, зна́мение есть вся́кому подвиза́ющемуся, да не убои́тся сме́рти, но, взира́я, ка́ко душа́ Твоя́ прие́млется в ру́це Бо́га жива́го, с наде́ждею предае́т себе́ в час сме́ртный Суди́и всех Бо́гу, вопия́ Ему́: Аллилу́иа.

Икос 12

Пою́ще Тя, в моли́твах неусыпа́ющую Богоро́дицу, Святе́й Тро́ице предстоя́щую, вопие́м Ти: пробуди́ нас све́том живоно́снаго Успе́ния Твоего́ от смертоно́снаго сна нераде́ния о спасе́нии души́ и испроси́ нам с Го́сподом примире́ние. Егда́ же приспе́ет жа́тва сме́ртная житию́ на́шему, огради́ нас всеси́льным предста́тельством Твои́м от духо́в зло́бы, да, Тобо́ю води́ми, дости́гнем Ца́рствия Небе́снаго, иде́же незаходи́мое Со́лнце пра́вды невече́рний свет сла́вы Боже́ственныя излива́ет. О Всесвята́я Де́во, от Херуви́м воспева́емая, приими́ от нас, недосто́йных, похвалы́ сия́:

Ра́дуйся, обра́дованная, во успе́нии Твое́м нас не оставля́ющая;

ра́дуйся, Ма́ти всепе́тая, одесну́ю Бо́га предстоя́щая.

Ра́дуйся, го́рняго ми́ра красото́ боголе́пная;

ра́дуйся, кла́дезю богомы́слия неисчерпа́емый.

Ра́дуйся, любве́ боже́ственныя неугаси́мый свети́льниче;

ра́дуйся, грехо́вных уз ско́рая реши́тельнице.

Ра́дуйся, возду́шных мыта́рств безбе́дное прехожде́ние;

ра́дуйся, блага́я врата́рнице, двере́й ра́йских отверзе́ние.

Ра́дуйся, Влады́чице, Засту́пнице ве́рных преблага́я и ско́рая.

Кондак 13

О, всеми́лостивая Влады́чице Богоро́дице, страны́ на́шея ди́вная засту́пнице, оби́димых прибе́жище, гре́шных спасе́ние! Оте́чество на́ше от враг защити́, вселе́нную всю ми́ром благослови́, ве́ру правосла́вную укрепи́, крест коему́ждо со упова́нием понести́ помози́, в любви́ и согла́сии всех нас соблюди́ и в ра́дость Го́спода вни́ти сподо́би пою́щих Ему́: Аллилу́иа.

Этот кондак читается трижды, затем 1-й икос «Архангела благовестие…» и 1-й кондак «Взбранней Воеводе…».

Молитва

О, Пресвята́я Влады́чице, Де́во Богоро́дице, Засту́пнице на́ша блага́я и ско́рая! Воспева́ем Ти вси благода́рственная за чу́дная дела́ Твоя́. Песносло́вим от лет дре́вних неотъе́млемое заступле́ние Твое́ гра́ду Москве́ и стране́ на́шей, чудотво́рным о́бразом Твои́м Донски́м всегда́ явля́емое: в бе́гство обраща́ются полцы́ чужди́х, гра́ди и ве́си невреди́ми сохраня́ются, лю́дие же от лю́тыя сме́рти избавля́ются, осуша́ются о́чи слезя́щеи, умолка́ют стена́ния ве́рных, плач в ра́дость о́бщую претворя́ется. Бу́ди и нам, Пречи́стая Богоро́дице, утеше́ние в бе́дствиих, возрожде́ние наде́жды, о́браз му́жества и исто́чник ми́лости; в ско́рбных обстоя́ниих неистощи́мое терпе́ние нам да́руй. Пода́ждь коему́ждо по проше́нию и нужде́ его́: младе́нцы воспита́й, ю́ныя уцелому́дри и стра́ху Бо́жию научи́, уныва́ющия ободри́ и немощну́ю ста́рость поддержи́. Ми́лостию посети́ в боле́знех и печа́лех су́щия, зла́я сердца́ умягчи́, братолю́бие укрепи́, ми́ра и любве́ всех нас испо́лни. Примири́, Благосе́рдая Ма́ти, вражду́ющия и оправда́й оклевета́нныя. Истреби́ поро́ки, да не восхо́дят греси́ на́ши пред Судие́ю вся́ческих, да не пости́гнет нас пра́ведный гнев Бо́жий. Твои́ми моли́твами, всемощны́м Твои́м покро́вом огради́ нас от наше́ствий вра́жиих, от гла́да, губи́тельства, огня́, меча́ и вся́каго ина́го злострада́ния. Упова́ем моли́твами Твои́ми получи́ти грехо́в изглажде́ние и с Бо́гом примире́ние. Умоли́ стяжа́ти нам Ца́рствие Небе́сное и с ли́ки А́нгелов и святы́х та́мо восхвали́ти Пречестно́е И́мя Святы́я Тро́ицы: Отца́, и Сы́на, и Свята́го Ду́ха во ве́ки веко́в. Аминь.