В терпе́нии многоиску́снем, блаже́нне му́чениче Гео́ргие,/ огнеиску́сную смерть претерпе́л еси́/ и по кончи́не твое́й вене́ц от Христа́ нетле́нный/ с му́ченическими ли́ки прия́л еси́./ И ны́не, на земли́ кро́тких досто́йно водворя́яся,/ Христа́ Бо́га о нас непреста́нно моли́,// и́же ве́рою покланя́ющихся ра́це мо́щей твои́х.

Перевод: В терпении многоопытном, блаженный мученик Георгий, ты претерпел смерть в огне и после кончины твоей принял нетленный венец от Христа вместе с собранием мучеников. И сейчас, достойно поселяясь на земле кротких (Мф.5:5), Христа Бога не переставая моли о нас, с верою поклоняющихся раке с мощами твоими.

Боже́ственным жела́нием от ю́наго во́зраста/ весь сам себе́ Го́сподеви возложи́в,/ в моли́твах и посте́х о́браз быв доброде́тели,/ бога́тство же, и сла́ву, и доброро́дство теле́сное, я́ко не су́щее, презре́в,/ и Христа́ еди́наго от души́ возлюби́л еси́,/ и Того́, и́стиннаго су́ща Бо́га, в Тро́ице покланя́ема,/ пред нечести́выми ту́рки пропове́дал еси́,/ и, срацы́нскую ве́ру, и зако́ны Моаме́фовы под нога́ми попра́в/ и мучи́теля ужаси́в,/ муче́ния венце́м украси́вся, сла́вне,/ к Небе́сным восте́кл еси́ ликостоя́нием,/ прему́дре Гео́ргие./ Моли́ Христа́ Бо́га/ сохрани́ти оте́чество твое́ и спасти́ лю́ди и град,// и́же твоя́ по́двиги при́сно почита́ющия.

Перевод: Устремившись к Богу и с юного возраста предав всего себя Господу, в молитвах и постах ты был примером добродетели, богатством же, и славой, и красотой телесной ты пренебрег, как незначащими, и Христа единого от души возлюбил ты и Его, истинного сущего Бога, в Троице поклоняемого, перед нечестивыми турками ты проповедал, и мусульманскую веру и законы Магомета поправ ногами и тем ужаснув мучителей, ты украсился мученическим венцом, прославляемый, и поднялся на Небеса к ангельскому сонму, премудрый Георгий. Моли Христа Бога сохранить Отечество твое и спасти город и людей, которые всегда почитают твои подвиги.

Боже́ственною уя́звлен любо́вию,/ прему́дре Гео́ргие сла́вне,/ Христа́ Бо́га нечести́вым пропове́дал еси́/ и злоче́стие ту́рское нога́ми попра́л еси́;/ муче́ния же венце́м украси́вся,/ к Небе́сным восте́кл еси́ ликостоя́нием./ Моли́ Христа́ Бо́га/ сохрани́ти оте́чество твое́, град и лю́ди,// по́двиги твоя́ при́сно почита́ющия.

Перевод: Божественной пленен любовью, премудрый Георгий прославляемый, ты проповедал Христа нечестивым и попрал ногами турецкую ересь, мучения же венцом украсившись, ты поднялся на Небеса к ангельскому сонму. Моли Христа Бога сохранить Отечество твое и спасти город и людей, которые всегда почитают твои подвиги.

Вы́шния сла́вы жела́я, многострада́льне Гео́ргие,/ агаря́нскую пре́лесть поплева́в, попра́л еси́/ и побе́ды вене́ц прия́л еси́,/ А́нгелом ны́не свеселя́ся и му́чеником соводворя́яся,// с ни́миже Христу́ Бо́гу моли́ся непреста́нно о всех нас.

Перевод: Желая небесной славы, многострадальный Георгий, мусульманское заблуждение ты, оскорбив, попрал и получил венец победы, радуясь сейчас вместе с Ангелами и поселяясь вместе с мучениками, с ними же Христу Богу молись не переставая обо всех нас.

Я́ко звезда́ пресве́тлая, яви́лся еси́ непреле́стная ми́рови,/ пра́веднаго со́лнца Христа́ возвеща́ющи страда́нии твои́ми, страстоте́рпче,/ вели́кий му́чениче Христо́в Гео́ргие,/ и пре́лесть погаси́л еси́ срацы́нскую,/ и Моаме́фова преда́ния и зако́ны под нога́ми твои́ми попра́л еси́,/ и беззако́ннаго царя́ и мучи́телей ужаси́л еси́ кре́пким твои́м терпе́нием,/ и ве́рным подае́ши свет,/ моля́ся к Бо́гу непреста́нно// о всех нас.

Перевод: Как преяркая и неблуждающая звезда ты явился миру, возвещая своими мучениями праведное солнце Христа, страстотерпец и великий мученик Христов Георгий, и заблуждение угасил ты мусульманское, и Магометовы обычаи и законы ногами своими попрал ты, и беззаконного царя и мучителей привел в ужас великим твоим терпением, и верующим подаешь свет, молясь к Богу непрестанно обо всех нас.